SINAMPAHAN ng Bureau of Internal Revenue (BIR) kaninang Huwebes ng umaga ng kasong kriminal laban sa aktor na si Richard Gutierrez sa Department of Justice (DOJ) dahil sa pagsusumite umano ng pekeng tax documents at perjured affidavits para i-debunk ang P38.57-million tax evasion case na isinampa laban sa kanya noong Abril.

Si Gutierrez ay inakusahan ng pagsumite ng pinalsipikong annual income tax return para sa taong 2012 at quarterly value-added tax (VAT) returns sa second, third at fourth quarter ng 2012 sa paglabag sa Article 172 ng Revised Penal Code na may relasyon sa Article 171 ng parehong batas.

“The attached returns were deceptively made to appear to have been stamped received by Revenue District Office No. 42- San Juan City,” pahayag ng BIR.

Ayon sa BIR, Revenue District Office (RDO) No. 42 – San Juan City at ang Document Processing Division ng BIR Quezon City ang kapwa nagsertipika na ang R Gutz Productions Corp. ay walang isinampang VAT return sa nabanggit na quarters.

“Also alleged receiving officer Renato Agana denied having received the subject returns saying that the initials appearing on the said returns are not his initials and not even close to his initials,” pahayag ng BIR.

Dagdag pa rito, matapos ang kanyang eksaminasyon sa nasabing dokumento, lumalabas na ito ay dinaya at ang rubber stamp marks ay hindi kabilang sa ginagamit ng RDO No. 42-San Juan City.”

Nilabag din ng aktor ang Article 183 ng Revised Penal Code sanhi ng pagsumite ng perjured affidavits sa naganap na preliminary investigation ng kanyang tax evasion case noong July 18.

Sinabi naman ng abogado ni Gutierrez na si lawyer, Mariglen Abraham Garduque, haharapin ng kanyang kliyente ang akusasyon laban sa kanya.

“However if the alleged falsified documents are the VAT and ITR returns which Richard attached to his counter affidavit as far as Richard is concerned said documents have original stamped received from the concerned RDO of the bureau,” pahayag ni Garduque.

Nauna nang iginiit ni Gutierrez na ang R Gutz ay hindi nag-underdeclare ng tax liabilities sa taong 2012.

“I do not know if this was filed with malice or just a mistake but I just hope that this will not happen again to another taxpayer as the psychological trauma is unbearable,” pahayag ni Gutierrez. BOBBY TICZON

NAKATAKDANG ipatawag ng Senado ang ilang mataas na opisyal ng Caloocan City Police Station hinggil sa pagpatay sa isang 17-anyos na lalaki sa ginanap na anti-illegal drug operation sa lungsod.

Kahapon, naghain ng isang resolusyon si Sen. Bam Aquino upang imbestigahan ang pagkamatay ng biktima na nakitang kinaladkad ng pulis patungo sa lugar na pinagtagpuan sa bangkay.

“I plan to file a resolution kasi nakababahala talaga iyong news reports. Hindi lang iyan, may lumalabas pa na may paglilinlang sa pagpaslang,” ani Sen. Bam patungkol sa Grade 11 student na si Kian Lloyd delos Santos.

Ayon sa pulisya, pinaputukan sila ni Delos Santos kaya napilitan silang gumanti na ikinamatay ng biktima. Ngunit batay sa CCTV footage mula sa barangay, nakita na bitbit ng dalawang pulis ang biktima patungo sa lugar kung saan siya nakitang patay.

“Makikita naman natin na hindi siya bumunot ng baril dahil dala-dala siya sa sulok kaya kailangan itong maimbestigahan at maparusahan ang mga nasa likod nito,” dagdag ni Sen. Bam.

Suportado man niya ang kampanya ng pamahalaan kontra sa iligal na droga, iginiit ni Sen. Bam na dapat muling pag-aralan ng gobyerno ang kanilang istratehiya sa pagsasabing mahirap at walang laban lang ang apektado sa giyerang ito at hindi ang mga sangkot sa malalaking kaso ng iligal na droga.

Sa mga nakalipas na operasyon, 74 katao ang napatay sa Manila, Bulacan at sa Camanava area. ERNIE REYES

KINUMPIRMA ni Agriculture Sec. Manny Piñol kaninang Biyernes ng umaga na may dalawang bagong kaso ng bird flu sa labas ng Pampanga.

Sa San Luis, Pampanga ang itinuturing na ground zero ng nasabing sakit dahil doon natukoy ang unang kso ng bird blu.

Pero lumalabas aniya na bago pa na-secure ang Pampanga ay may avian influenza carrier ang nakarating na sa ibang probinsya.

Sinabi ni Piñol na ang bird flu outbreak sa Nueva Ecija ay nangyari sa isang quail at layer poultry farm sa Jaen at San Isidro.

“Dalawa pong farms ang ground zero dito. Ang isang farm ay quail farm at ayon sa initial report na natanggap ko, ubos na ‘yung pugo sa farm na ‘yon. But na-contain na natin ‘yung area, nag-declare na tayo ng 1-kilometer contained radius. And then the other town is San Isidro, isang layer farm na ang total population is about 20,000 hectares and ang ating mga tao ay nakapag-set up na rin po,” pahayag ni Piñol.

Idinagdag pa nito na ang virus ay katulad ng naunang kaso sa San Luis, Pampanga na Type A subtype H5. Gayunman, hindi pa nila alam ang N strain ng virus, at ang specimen ay ipinadala na sa Australia para sa kaukulang disposisyon.

Kinordon na ang naturang mga lugar at nagpatupad na ng quarantine para ito’y makontamina.

Bagama’t noong isang araw pa nila nabalitaan ang pangyayari, kanina lang lumabas ang isinagawang laboratory test.

Bunsod nito, magsasagawa na rin ng pagpatay sa mga manok at pugo sa lalawigan ng Nueva Ecija.

“Well as usual as in the previous case, ‘yun pong andoon sa Nueva Ecija would still be the same strain as in San Luis, H5. Hindi pa po natin ma-determine ‘yung N, ‘yung N strain pero type H5. Malalaman po natin ‘yung resulta ng test sa Australia within a week,” pahayag nito. BOBBY TICZON

PINAG-IISIPAN na ni Commission on Elections (Comelec) Chairman Andres Bautista ang pagbibitiw sa puwesto matapos maharap sa akusasyon hinggil sa umano’y P1-billion ill-gotten wealth.

Sinabi ni Bautista, maraming options siyang kinokonsidera sa ngayon at ang isa ay ang pag-resign sa puwesto.

Gayunman, nagpapasalamat naman din siya sa suportang natatanggap niya sa kabila ng kontrobersiyang kanyang kinasasangkutan.

Magugunitang kamakailan lang ay inakusahan si Bautista ng kanyang asawa na si Patricia hinggil sa umano’y unexplained wealth nito o tagong yaman.

Pero mariing itinanggi ito ng Comelec chief at inakusahan naman ang kanyang asawa ng pagnanakaw ng mga passbooks at iba pang bank documents sa kanilang bahay.

Dinipensahan naman din ang Comelec chief ng kanyang pamilya matapos sabihin ng kanyang kapatid na nasa $1.7-million ang kanilang joint investments. BOBBY TICZON

BUMULAGTA ang limang na hinihinalang tulak ng iligal na droga nang manlaban sa isinagawang buy-bust operation sa magkahiwalay na lugar sa Maynila.

Sa report ng Manila Police District-Homicide Section, unang napatay sa operasyon sina Norman Anyaya, edad 25-30, at Vicente Bartolome, edad 50-55, kapwa ng 1541 Oroquieta St., Sta. Cruz, Maynila ganap na alas-8:15 Huwebes ng gabi sa kahabaan ng riles ng tren ng PNR sa may Hermosa St., Tondo.

Alas-9:50 naman ng gabi nang makipagbarilan sa awtoridad si Roderick Cailao, 38, miyembro ng Bahala na Gang at residente ng 3479 Int. 14, Paltoc St., Brgy. 426 Zone 43, Sampaloc.

Habang alas-2:45 ng madaling-araw ng Biyernes nang manlaban din sa operasyon sina Edmel Santiago, alyas Hapon, 34, ng 2083 San Roque St., Sta. Ana, Maynila; at Joey Santos, 30-35, nakatira sa nasabi ring lugar.

Narekober sa mga napatay ang ilang kalibre .38 na baril, .45 kalibre, at ilang sachet ng hinihinalang shabu at paraphernalias, gayundin ang ilang pera. JOCELYN TABANGCURA-DOMENDEN

MULING binuhay ng Local Government Unit (LGU) ng Navotas City ang Navotas Chamber of Commerce and Industry para pagtibayin ang sektor ng pagnenegosyo sa lungsod at mahikayat ito na lumahok sa lokal na pamamahala.

Ayon kay Mayor John Rey Tiangco, ang Chamber ay magsisilbing boses ng sektor ng pagnenegosyo. Paiigtingin nito ang kakayahan ng ating mga lokal na negosyo, at makatutulong para mas mapaunlad at maging sustenable sila.

“Mahalaga ang papel na gagampanan ng Chamber para mapalakas ang pagtutulungan ng pamahalaang lokal at ng mga negosyo sa lungsod” ayon pa sa alkalde

“Ang Chamber ay maaaring magsilbing kinatawan ng sektor ng pagnenegosyo sa pakikipag-ugnayan sa amin para sa mga proyekto at programang isusulong na magbibigay-pakinabang sa kanilang industriya at sa lungsod,” aniya.

Inaasahan din na maghahatid ang Chamber ng mga oportunidad sa mga may-ari ng negosyo na mapalawak ang kanilang network at kalaunan ay makapagsilbi sa mas maraming kliyente.

Ang 15 bagong mga opisyal, trustee at director ng Chamber ay nanumpa sa harap ni Tiangco.

Si Jesusa Lukban ng 3D&S Rice Dealer ang nahalal na presidente, at si Nerissa T. Domingo naman ng Pia’s Lechon Manok and Boodle Fight ang napiling bise presidente.

Kabilang sa mga opisyal sina Cesar T. Roque Jr. ng Roque Water Refilling Station bilang corporate secretary, Ruth M. Celorio ng NFC Marine Trading bilang treasurer, at Rosario C. Alcorroque ng Ian’s Foodhaus (Samareños) bilang auditor.

“Iisa lamang ang ating pangarap—ang mapaunlad ang ating lungsod. Kaya tutulungan namin ang isa’t isa para maisakatuparan ang hangaring ito,” dagdag ni Tiangco. ROGER PANIZAL

INAMBUS ng hindi nakikilalang armadong lalaki ang isang barangay traffic enforcer sa Quezon City kaninang Miyerkules ng umaga.

Namatay noon din sanhi ng bala ng hindi pa malamang kalibre ng baril sa iba’t ibang bahagi ng katawan ang biktima na nakilalang si Teogenes Mendez, traffic enforcer ng Brgy. Pasong Putik.

Blangko pa ang mga tauhan ng Quezon City Police District-Criminal Investigation and Detection Unit (QCPD-CIDU), kung sino ang nasa likod ng pamamaril at maging ang motibo sa pagpatay sa biktima.

Sa ulat, naganap ang insidente dakong 8”25 a.m. sa kanto ng Ilang-ilang St., at Oval Road, sa nasabing barangay.

Ayon sa CIDU, bago ang insidente ay lulan ang biktima sa kanyang motorsiklo at pagsapit sa lugar ay pinagbabaril na ito ng suspek.

Nahihiwagahan naman ang CIDU investigators dahil ang sabi ng misis nito at mga kapwa traffic enforcers ay walang kakilalang kaaway ang biktima.

May tatlong buwan pa lamang ang biktima sa pagiging barangay traffic enforcer. BOBBY TICZON

NIYUGYOG ng magnitude 3.7 na lindol ang bayan ng Kalamansig sa Sultan Kudarat.

Ayon sa Phivolcs, naitala ang pagyanig sa 43 kilometers South ng Kalamansig ala-1:43 ng madaling-araw.

Tectonic ang origin ng lindol at may lalim lang na isang kilometro.

Sa kabila ng mababaw na pagyanig, wala namang naitalang intensities bunsod ng nasabing lindol.

Samantala, Miyerkules ng gabi, tumama naman ang magnitude 3.5 na lindol sa Caramoan, Camarines Sur.

Kapwa hindi nagdulot ng pinsala ang dalawang lindol. JOHNNY ARASGA

KINUMPIRMA ng Department of Agriculture (DA) kaninang Huwebes ng umaga na ang bird flu strain sa Pampanga ay H5N6, isang virus na maaring makahawa sa tao.

“The strain tested positive for H5N6 that could be transmitted to humans, but the rate of mortality and transmission is very, very low,” pahayag ni Dr. Arlene Vytiaco, Bureau of Animal Industry chief, sa isang press conference.

“Mas mababa ito kaysa sa H1N1. Since 2014, wala pang 20 ang namamatay, mostly from China,” pahayag nito.

Sinabi ni Vytiaco na wala pang Filipino ang nagpositibo sa nasabing virus.

Ayon kay Agriculture Sec. Emmanuel Piñol, nakikipag-koordinasyon na sila sa Heath Department para matiyak ang mga magsasaka sa San Luis, Pampanga at sa mga bayan ng San Isidro at Jaen sa Nueva Ecija ay hindi maapektuhan ng virus.

“There is no vaccine for the virus because we cannot develop a cure since we did not have a strain before,” paliwanag ni Piñol.

Blangko pa ang DA kung paano nakapasok ang virus sa Pilipinas mula Central Luzon.

May 600,000 fowls na ang kinatay sa Pampanga at mahigit sa 200,000 pang iba sa Nueva Ecija upang masawata ang pagkalat ng nasabing sakit. BOBBY TICZON

INUGA ng 4.6 magnitude na lindol ang ilang bahagi ng Batangas kaninang Huwebes ng umaga.

Ayon sa Phivolcs, naramdaman ang lindol dakong 8:06 ng umaga.

Natukoy ang epicenter sa layong 73 km timog-kanluran ng Calatagan, Batangas at may lalim itong 12 kilometro. Tectonic ang pinagmulan nito.

Sa nasabing pagyanig, wala namang inaasahang pinsala at mga aftershocks.

Samantala, inaasahang magiging bagong bagyo sa susunod na 24 hanggang 36 oras ang low pressure area (LPA) na namataan sa silangang bahagi ng Catanduanes.

Ayon sa PAGASA, bagama’t sa ngayon ay wala pa itong direktang epekto sa alinmang parte ng bansa, tiyak na hahatakin nito ang Habagat kung ito’y magiging ganap na bagyo.

Kung magiging isang tropical depression, tatawagin itong bagyong Jolina, na pang-10 bagyo para sa 2017.

Huling namataan ang LPA sa layong 565 km silangan hilagang-silangan ng Virac, Catanduanes. BOBBY TICZON

PATAY ang isang 35-anyos na ginang matapos tumalon mula sa ika-17 palapag ng isang condominium sa Quezon City kahapon ng tanghali, Agosto 23, Miyerkules.

Kinilala ni Supt. Igmedio Bernaldez, hepe ng Quezon City Police station 2-Masambong, ang biktimang si Lyn Supnet, ng #18 Sultan Kudarat St., Urduja Village, Novaliches, Caloocan City.

Nagtamo ng matinding pinsala sa ulo at katawan ang biktima na naging dahilan ng agaran nitong pagkamatay.

Sa imbestigasyon ni PO3 Roldan Cornejo, ng Criminal Investigation and Detective Unit ng Quezon City Police District (QCPD-CIDU), naganap ang insidente alas-12:30 ng tanghali sa Walk Way ng ika-17 palapag ng Grass Residences Tower 2 sa Brgy. Santo Cristo, QC.

Bago ang insidente, nagtungo ang biktima sa tinitirhan ng kanyang hipag na si Ramona Bejo sa #1743-44 ng nabanggit na condominium.

Napansin ni Bejo na kakaiba ang ikinikilos ng hipag at nasa bandang balkonahe ito at tangkang tatalon.

Agad pinigilan ni Bejo si Supnet, kinalma ito at inilayo sa balkonahe ng kanyang unit.

Sandaling iniwan ni Bejo ang hipag dahil may aayusin ito sa loob ng kanyang condo unit nang makita na niyang nakahawak sa grill ng balkonahe ang hipag.

Tinangka pa niya itong isalba ngunit nahulog pa rin ito at agad binawian ng buhay sa taas ng pinaglaglagan nito.

Ipinagbigay-alam ni Bejo ang insidente sa security personnel ng naturang condominium kung saan sa ngayon ay iniimbestigahan na ng pulisya kung may foul play sa insidente. SANTI CELARIO

DALAWANG minuto lamang ang itinagal ng deliberasyon ng panukalang badyet ng Office of the President na nasa P6-bilyon para sa 2018.

Ang kilalang kritiko ni Pangulong Rodrigo Duterte na si Albay Rep. Edcel Lagman ang nagsulong na agad aprubahan ang badyet ng OP sa House Committee on Appropriations.

Sinigundahan ito ni Majority Leader Rodolfo Fariñas at agad itong inaprubahan ng chairman na si Karlo Nograles.

Samantala, matapos ang OP budget ay agad isinunod ang pagtalakay sa 2018 budget ng Commission on Elections (Comelec) na P16-bilyon na naunang na-deferred matapos na hindi makadalo si Chairman Andres Bautista noong Miyerkules dahil sa appointment nito sa guidance counselor ng kaniyang mga anak.

Mula sa kasalukuyang P3.3-bilyon na badyet ng Comelec ay tumaas ito ng P16-bilyon para sa 2018 bilang paghahanda sa eleksyon sa 2019.

Hindi na nagtanong ng mga personal na isyu ang mga kongresista dahil meron ng nakahaing impeachment complaint laban kay Bautista.

Inaprubahan din ang badyet ng Comelec para sa susunod na taon at nang makapanayam si Bautista matapos ang pagdinig ay sinabi niyang tinitimbang pa niya kung siya ay magli-leave o magbibitiw.

“Iyon ang ating tinitimbang kung ano ang susunod na hakbang at siyempre kailangan protektahan ang mga interes, unang una na ng aking pamilya, interes din ng Comelec, ‘yan ang aking pinag-aaralan,” ani Bautista.

Kumpiyansa rin ang chairman na maipapaliwanag niya sa impeachment court ang diumano’y maling SALN nito.

Tiniyak din ni Bautista na hindi na mauulit ang leak sa mga records ng mga botante na nangyari bago ang 2016 elections na tinaguriang COMELEAK. MELIZA MALUNTAG

HANDA si Commission on Elections (Comelec) chairman Andres Bautista na harapin ang impeachment complaint na isinampa laban sa kanya sa Kamara de Representantes kamakalawa.

Ayon kay Bautista, isang pagkakataon ito para sa kanya upang makapagbigay ng kanyang panig at malinis ang kanyang pangalan.

“Sabi ko nga, ‘yan ay ipapaliwanag sa tamang panahon at sa tamang lugar,” aniya pa.

Gayunman, hindi pa aniya niya nababasa ang buong reklamo na inihain nina dating Negros Oriental Representative Jacinto Paras at Atty. Ferdinand Topacio laban sa kanya.

Tinitimbang pa rin aniya niya ang lahat ng opsyon para protektahan ang interes ng kanyang pamilya at ng Comelec mismo.

Inamin nitong ikinokonsidera niya ang paghahain ng leave of absence o ‘di kaya’y tuluyan nang pagbibitiw sa puwesto.

“‘Yun ang ating tinitimbang kung ano ang susunod na hakbang at syempre kailangan protektahan ang mga interes, unang-una na ng aking pamilya, interes din ng Comelec, ‘yan ang aking pinag-aaralan,” paliwanag pa niya. “Lahat ng options naman kino-consider natin.”

Sa inihaing reklamo, inakusahan si Bautista ng “betrayal of public trust” dahil sa pagkabigo nitong tugunan ang naganap na pag-hack sa website ng Comelec noong Marso 2015 at pagkabigong ihayag ng tama ang kanyang Statement of Assets, Liabilities and Net Worth (SALN).

Binanggit din sa reklamo na isa ring “betrayal of public trust” ang pag-amin ni Bautista na tumanggap siya ng referral fees mula sa technology provider na Smartmatic, sa pamamagitan ng Divina Law Office.

Tinukoy pa nito na obstruction of justice ang pahayag ni Bautista na ang script tweak sa transparency server noong 2016 elections ay “cosmetic” lamang, gayung nakabinbin pa ang imbestigasyon dito. MACS BORJA

SINABON ng mga mambabatas si Justice Sec. Vitaliano Aguirre sa budget hearing ng House Committee on Appropriations na P17.26-bilyon.

Hindi pinalagpas ng mga kongresista si Aguirre para hindi kwestyunin ang muling pamamayagpag ng drug trade sa New Bilibid Prison (NBP) at ang patuloy na paglobo ng mga drug-related killings sa bansa.

Unang tinanong ni Albay Rep. Edcel Lagman kung susuportahan nito ang isang congressional inquiry sa muling pagsulpot ng illegal drug trade sa NBP na mismong si Aguirre ang nagbunyag sa publiko.

Ani Aguirre, hindi siya mangingiming magsama o magdala ulit ng mga testigo sa Kamara para patunayan na nabuhay ang drug trade sa NBP ng limang porciento kumpara aniya sa nadiskubre noong umupo si Pangulong Duterte na nasa 75 porsyento.

“I will do it again. As a matter of fact, it pains me that after a year, there was a resurgence (of the drug trade). When there were many reports given to me (about this), I did not lose time because I want to nip this resurgence of the drug trade in the bud. I immediately issued Department Order No. 547 for the NBI to conduct an in-depth investigation on the resurgence of the drug trade at the NBP in Muntinlupa,” sagot ni Aguirre.

Agad ding kinondena ni Gabriela Rep. Emmi de Jesus ang pagpatay kay Kian Delos Santos at kasabay ang pagbibigay-diin na hindi ito isolated dahil meron na aniyang naitalang 31 menor de edad na napatay sa operasyon ng pulis.

Ang panukalang badyet ng DOJ ay tumaas ng 20 porsyento para sa 2018 na P15.58-bilyon.

Pinagsusumite rin si Aguirre na listahan ng kabuuang kaso ng mga iniimbestigahang kaso ng DOJ sa summary killings na may kaugnayan sa iligal na droga. MELIZA MALUNTAG

Leading telecommunications company Globe Telecom has joined the Department of Environment and Natural Resources (DENR) in showcasing the beauty of Philippine forests and in encouraging the public to be part of responsible tourism and proactive reforestation.

Globe employees took part in DENR’s Bike.Hike.Plant 2017 tree-planting initiative organized by the Forest Management Bureau to celebrate Arbor Day and the 154th anniversary of the Philippine Forestry Service.  The event was conducted to inspire various stakeholders to take care of the forests as well as widen the network of forestry champions to include bikers and hikers.

The volunteers participated in a 30-km bike and trek activity that runs from the DENR Region 3 Office in Government Center, Maimpis, San Fernando City, Pampanga up to Mt. Arayat National Park. Over 1,000 participants biked around the city and hiked up to the chosen area to plant seedlings of various indigenous and agroforestry tree species.

At the same time, Globe provided Libreng Charging stations during the event to serve everyone who joined the celebration.

“Environmental sustainability is one of the immediate responsibilities of Globe especially in the face of global warming.  Thus, aside from reducing and managing the impact of the company’s business operations on the planet, Globe also invests on environmental protection and partners with various organizations, particularly on reforestation programs to reduce our ecological footprint and mitigate the drastic effects of climate change,” said Yoly Crisanto, Globe SVP for Corporate Communications.

Earlier, Globe volunteers also supported DENR’s Earth Month activities such as the coastal clean up in Las Pinas Paranaque Critical Habitat and Ecotourism Area (LPPCHEA), the mangrove tree planting activity in Calatagan, Batangas, and watershed ecosystem awareness in Norzagaray, Bulacan.

In 2016, Globe has invested P2.371 million on total environmental protection such as reforestation programs, solid waste manage, and hazardous waste disposal and treatment.  It has also donated P1.4 million as initial grant for 13,500 seedlings to non-profit organization Hineleban Foundation which advocates environmental conservation and livelihood development.

NIYUGYOG ng magnitude 4.0 na lindol ang Davao del Sur kaninang Huwebes ng madaling-araw.

Ayon sa Phivolcs, naganap ang pagyanig ng ala-1:31 a.m., 27 kilometro sa hilaga ng Santa Cruz, Davao del Sur. May lalim itong limang kilometro.

Naramdaman ang intensity 4 sa Santa Cruz at Hagonoy, Davao del Sur at Davao City.

Habang intensity 3 at 2 naman sa Digos at Sulop sa Davao del Sur din.

Wala namang naitalang napinsala sa nasabing lindol. BOBBY TICZON

NAKATAKDANG ipatawag sa Senado ang lahat ng opisyal, collectors, at mga players kabilang ang kanilang bagman sa multi-milyong tara system sa Bureau of Customs (BOC) upang mabigyan sila ng pagkakataong sagutin ang akusasyon sa ibinulgar kamakailan ni Senador Panfilo Lacson.

‘Dapat bigyan ng pagkakataon ang lahat na sumagot,” ayon kay Senador Sonny Angara, chairman ng Senate committee on ways and means, sa panayam ng Remate.

Aniya, hindi pa naibibigay sa kanyang komite ang resolusyon na inihain ni Senador Antonio Trillanes IV na imbestigahan ang malawakang anomalya sa BOC, ngunit mas gusto niyang ibigay ito Blue Ribbon Committee kaysa komite niya.

“I prefer sa Blue Ribbon kasi masyado tayong abala sa tinatalakay na panukalang buwis ng administrasyon,” ayon kay Angara.

Kamakailan, naghain ng hiwalay na resolusyon si Senador Antonio Trillanes IV upang imbestigahan ang malawakang korapsyon sa BOC na sangkot ang ilang mataas na opisyal kabilang si dating Commissioner Nicanor Faeldon.

Base sa Senate Resolution No. 474, kailangan maipatawag ang lahat ng sangkot sa anomalya ng tara system sa paglalabas ng tone-toneladang kargamento sa lahat ng pantalan na hindi nagbabayad ng buwis.

Karamihan sa miyembro ng Tara System ay pawang mga big players sa Customs na siyang nagbibigay ng lagay sa mga opisyal kada isang container, ayon kay Lacson sa kanyang privilege speech.

Natuklasan na bukod sa mga mataas na opisyal ng BOC, nakatakdang ipatawag din ang isang Joel Teves na sinasabing naghatid ng P100-M “pasalubong” kay Faeldon pagktapos maupong commissioner. Kinuha ni Teves ang P25M bilang finder’s fee sa “pasalubong.”

Sinabi pa ng ilang senador na kailangan ipatawag ang mga sinasabing taga-bigay ng lagay o “players” sa BOC upang maituro kung sino ang binibigyan ng tara kada araw bawat container.

Hiniling din ng ilang senador ang mga “big players na naglalabas ng 390 hanggang 490 containers isang araw o 1,950 – 2450 containers kada linggo, kabilang sina:

1. 100-110 containers – David Tan

2. 80-100 containers – Davao Group

3. 80-100 containers – Manny Santos

4. 80-100 containers – Teves Group

5. 50-80 containers – “Kimberly” Gamboa

“The problem that our country is facing now, such as smuggling, fraud and drug trafficking can effectively be lessened if we only fortify our first line of defense on border management Thus, it is incumbent upon us to address this BOC issue head on and at its core,” ayon kay Lacson sa speech. ERNIE REYES

PAGBUWAG sa Bureau of Customs (BOC) ang isa sa pangunahing rekomendasyon ng Kamara.

Ito’y matapos ilabas ng House Committee on Dangerous Drugs ang rekomendasyon kaugnay sa imbestigasyon ng paglusot sa ahensiya ng P6.4-bilyong halaga ng iligal na droga.

Sinabi ni Surigao del Norte Rep. Robert Ace Barbers, chairman ng komite, nakasaad sa committee report na kailangang gumawa ng panibagong batas upang sa gayon ay mapalitan na ng panibagong revenue collecting agency ang BOC.

Pinagbabakasyon na rin o pinagbibitiw ang matataas na opisyal ng BOC kabilang na ang Deputy Commissioners, heads of office at lahat ng mga port collectors para mabigyang daan ang tamang reporma o sa imbestigasyon hinggil sa issue ng korapsyon.

Samantala, inirekomenda rin ng komite ang kabi-kabilang kaso laban kay dating Customs Commissioner Nicanor Faeldon dahil sa “coddling, protecting and shielding” sa hinihinalang druglord na si Chen Ju Long alyas Richard Tan o Richard Chen, ang general manager ng Hong Fei Logistics.

Dapat din umanong panagutan ni Faeldon ang hindi pagsurender sa 604 kilo ng shabu sa PDEA, pag-eempleyo sa mga basketball at volleyball players gayundin ng pagpapasweldo ng sobra-sobra sa mga ito at kabiguang maghain ng reklamo sa mga lumabag sa RA 10863 o “Customs Modernization and Tariff Act (CMTA) kaugnay ng nasabing iligal na droga gayundin ang pagpapahintulot nito kay Atty. Mandy Therese Anderson na pirmahan ang daily time records ng mga atleta.

Hindi rin ligtas sa kaso sina BoC Intelligence Officer Niel Estrella dahil sa pagkokontamina sa ebidensya at pagkanlong sa hinihinalang drug lord na si Chen Ju Long at maling paghawak sa mga ebidensya.

Pinakakasuhan din sina BoC deputy commissioner Gerardo Gambala sa Department of Justice dahil sa paglabag sa kapabayaan, Director Milo Maestrocampo, Atty. Mandy Therese Anderson dahil sa pamemeke at usurpation of authority.

Maging ang mga ahente ng National Bureau of Investigation-Anti-Organized Transnational Crime Division sa pangunguna ni Atty. Dennis Siyhian at Atty. Catherine Nolaco ay pinakakasuhan ng komite iba pang BoC agents na nasa ilalim ni Estrella, na sina Joel Pinawin at Oliver Valiente.

Kasong kriminal naman ang rekomendasyon ng komite kina Chen Ju Long, Dong Yi Shen alyas Kenneth Dong, Li Guang Feng alyas Manny Li, Eirene Mae A. Tatad ng EMT Trading, Teejay A. Marcellana at Mark Ruben G. Taguba dahil sa umano’y importasyon ng iligal na droga. MELIZA MALUNTAG

NASILO na ng pulisya ang lalaking nagsaboy ng asido sa mag-inang tumatawid ng footbridge sa kanto ng A. Bonifacio Avenue at Sgt. Rivera, sa Quezon City nitong nakaraang Biyernes ng hapon.

Pero dahil may diperensya ang suspect sa pagiisip ay hindi na inilabas ang buong pagkakakilanlan nito.

Matatandaang kahapon ay marami ang naalarma nang sabuyan ng asido ang mag-inang biktima na tumama sa braso, kamay at paa.

Dahil dito, mananatili muna sa kamay ng pulisya ang suspek dahil maituturing itong mapanganib.

Narekober din sa kanya ang ilang bote, kasama na ang sinasabing lalagyan ng asido.

Payo naman ni Quezon City Police District (QCPD) Dir. C/Supt. Guillermo Eleazar, dapat maging alerto ang publiko at agad na isumbong ang mga ganitong insidente upang marespondehan agad ng mga naka-deploy na tauhan ng PNP. BOBBY TICZON

DAHIL desperado na, plano ng Maute group na ipangtapat ang kanilang bagong recruit na mga kabataan laban sa militar sa Marawi City, ayon sa pahayag kaninang Sabado ng umaga ng military spokesman.

“Noong araw ay hindi sila napro-front line pero ngayon dahil sa desperadong kondisyon nila maaring ilabas nila ang mga batang ito,” pahayag ni Armed Forces of the Philippines (AFP) spokesman Brigadier General Restituto Padilla.

Nauna nang sinabi ni AFP chief of staff General Eduardo Año na nakorner ng tropa ng military ang Maute group sa 500-sqaure meter area sa war torn city.

Pinaniniwalaan pa rin na ang mga terrorist leader na sina Maute brother Abdullah at Omar at Isnilon Hapilon at buhay pa at nakalungga pa rin sa hindi malamang lugar.

Ang operasyon laban kay Hapilon sa Marawi City ay nagresulta kaya sumiklab ang kaguluhan noong Mayo 23, na humantong sa pagdeklara ni Pangulong Rodrigo Duterte ng Martial law sa Mindanao.

Sa kabila nito, sinabi ni Padilla na tatangkain pa rin nilang masagip ang mga batang Maute group recruits.

“Pero kami po ay susubukan pa rin namin sila i-rescue at makuha… pero ‘yan po ang ating ginagawa sinisikap nating ma-rescue ang mga hostage at maisalba itong mga batang ito,” pahayag nito.

Pero kung sila ay armado at puputukan ang tropa, sinabi ni Padilla na mapipilitan ang mjga sundalo na gumanto ng putok para ipagtanggol ang kanilang sarili.

“Napakasakit pakinggan, tama po kayo, medyo maramirami ang kanilang hinikayat na mga bata na pumasok at kanilang binrainwash at naging parte ng kanilang grupo… Nakakaawa na isipin na itong mga batang ito sa murang edad ay naging parte sa ganitong napakarumaldumal na krimen,” malungkot na pahayag ng military spokesman. BOBBY TICZON