SUMAKABILANG-BUHAY na ang anak ng singer-actor na si Randy Santiago nitong nakaraang Linggo (Agosto 13), sa edad na 24 lamang.

Sa kanyang Facebook post, kinumpirma ng kapatid ni Randy na si Reily Santiago ang malungkot na balita.

Ayon kay Reily, may rare form ng brain disease at multiple sclerosis ang kanyang pamangkin.

Iniwan ni Ryan Leonardo ang kanyang mga magulang na sina Randy at Marilou Santiago at dalawang kapatid na lalaki.

Ang urn viewing ay gaganapin mula Agosto 14 – 16 ng hatinggabi sa La Salle Greenhills Chapel.

Noong 2015, si Ryan Leonardo ay naospital sanhi ng isang fungal virus. BOBBY TICZON

NAKATAKDANG gisahin ng Senado ang may-ari at opisyal ng Luzon Development Bank (LDB), isang rural bank, na sinasabing may 30 savings accounts si Comelec Chairman Andres Bautista, ayon kay Senador Francis “Chiz” Escudero kahapon.

Sa panayam, sinabi ni Escudero, chairman ng Senate committee on banks, financial institutions and currencies, na kailangan malaman ng Senado kung bakit hindi kinuwestiyon ng LDB ang 30 bank accounts ni Bautista na denedeposituhan ng halos P500,000 kada araw.

“Kung totoo ang alegasyon ng kaniyang maybahay, patungkol sa Luzon Development Bank. Maraming katanungan duon, una bakit nga ba may 30 bank account ang isang tao. Bakit ang mga deposito ay mababa sa 500,000, kada deposito at na-report ba iyan sa AMLC,” ayon kay Escudero.

Sinabi pa nitong alinsunod sa regulasyon ng Bangko Sentral ng Pilipinas, itinuturing na Politically Exposed Person (PEP) si Bautista kaya’t nararapat lamang na kuwestiyunin ng LDB ang kanyang deposito.

“At sa ilalim ng rules and regulations ng Banko Sentral, mayroon din tayong itinatawag na KYC o Know Your Client rule. So ibig sabihin noon magandang matanong sa banko,” aniya.

Nais umanong malaman ng komite kung ini-report ng bangko sa Anti-Money Laundering Council (AMLC) ang deposito ni Bautista na halos araw-araw.

“Pangalawa, under sa Know-Your-Client Rule, may rason, dahilan o karapatan ang bangko tumangging tanggapin ang deposito ng ninuman kung hindi sila kumbinsido na ito’y galing sa legal na pamamaraan,” ayon kay Escudero.

“Saan ba galing itong mga perang dineposito, patingin nga ng ebidensiya. Kapag sinabi niyang may binenta akong lupa, may binenta akong condo, pwede ko ho ba makita iyong deed of sale o Xerox copy ng deed of sale,” paliwanag ni Escudero.

“Kapag sinabi naman niyang may negosyo kaming ganito, puwede bang makita ang ITR ninyo? Normal at regular ‘yun na ginagawa ng mga bangko sa kanilang kliyente, lalo na yung itinatawag nating Politically Exposed Person o PEP,” dagdag ng senador.

Nanghihinala din si Escudero sa katwiran ni Bautista na kaya siya nagbukas ng account sa LDB ay kilala niya at may tiwala siya sa may-ari ng bangko.

“Rural bank o maliit na bangko lamang iyan at sabi nga ni Chairman Bautista, napanood ko siya sa isang interview, kilala daw nila iyong mga may-ari at may tiwala sila. Ibig-sabihin wala silang tiwala sa malalaking bangko, BSP, BDO, Metrobank, HSBC, BPI,” aniya.

Dahil dito, sinabi ni Escudero na gusto nilang tingnan ang ganitong sitwasyon sa sistema ng LDB kung totoo naman o hindi ang alegasyon sa kanya.

Sinabi pa ni Escudero na kailangan ay ini-report ng bangko kung nakapaghihinala ang transaksyon ni Bautista dahil ara-araw siyang nagdedeposito ng kalahating milyon.

Itatanong din ng komite sa bangko kung may risk management system sila upang matukoy kung sinusunod ng LDB ang alituntunin ng AMLC.

“Ayon sa Anti-Money Laundering sa nauna pang bersyon kapagka may rason sila para magduda mayroon silang sariling risk management system na dapat in place. Magandang matanong ang Luzon Development Bank, meron ba kayong risk management system?” giit niya.

“Ang kinita noon ng Luzon Development Bank noong 2014 ay anim na milyong piso, tapos iyong deposito na iisang depositor lang ay kung totoo P300 milyon. So may rason naman siguro tayo para mag tanong at magkuwestyon,” ayon pa kay Escudero. ERNIE REYES

BALIK-BIYAHE na ang Uber Systems, Inc. kaninang Martes ng umaga matapos magsampa ng isang motion-for-reconsideration hinggil sa suspension order ng Land Transportation and Franchising Board (LTFRB).

“In response to overwhelming rider and driver demand, we have filed a motion for reconsideration with the LTFRB. This means that Uber’s operations will continue until the motion is resolved. Consequently, we will be resuming serving Metro Manila and Cebu,” pahayag ng Uber.

Sinuspinde ng Uber ang kanilang operasyon kaninang alas-6:00 ng umaga kasunod ng one-month suspension order ng LTFRB.

Pero agad din namang nagsampa ang Uber ng motion-for-reconsideration na natanggap ng LTFRB ng 10:25 ng umaga.

“Over the course of this morning, tens of thousands of riders were left stranded, causing needless inconvenience, while drivers were unable to access the earning opportunities they rely on,” pahayag ng Uber.

“We are looking forward to urgently resolving the matter with LTFRB in the interests of everyone who depends on Uber every day,” dagdag pa ng Uber. BOBBY TICZON

BUMABA ang halaga ng shares ng maraming mga kumpanyang may kinalaman sa negosyo ng manukan o poultry sa trading kahapon, August 14, dahil sa epekto ng bird flu outbreak sa lalawigan ng Pampanga.

Sa pagsasara ng trading sa Philippine Stock Exchange kahapon, Lunes, marami rin sa mga naapektuhan ay mga agrifeeds company na nakasentro sa pag-manufacture ng poultry productsa at poultry processing.

Kabilang sa naapektuhan ay ang Vitarich na bumagsak nang 5.88 percent ang halaga ng stocks.

Ito’y sa kabila ng pahayag ng kumpanya na wala silang farm na matatagpuan sa bayan ng San Luis sa Pampanga na sinasabing pinagmulan ng avian influenza virus.

Bahagya ring bumaba ang halaga ng stocks ng Purefoods at San Miguel na pawang may mga poultry products sa merkado.

Ang Purefoods ay bumaba ng 3.17 percent samantalang ang SMC naman ay 0.2 percent.

Kapwa na rin tiniyak ng dalawang kumpanya na hindi apektado ng bird flu ang kanilang mga chicken products.

Maging ang ilang mga restaurant na nagbebenta ng mga chicken products ay nakaranas rin ng bahagyang pagbaba ng kanilang stocks. JOHNNY ARASGA

SINIBAK sa puwesto ang apat na mga hepe ng Police Regional Office 4-A o CALABARZON sa kampanya laban sa iligal na sugal.

Kinilala ang mga nasibak na sina Supt. Ronan Claraval ng San Pablo, Laguna; Supt. Zaric Soriano ng San Pedro, Laguna; Supt. Carlos Barde ng Lipa, Batangas; at Supt. Giovanni Zibalo ng Sto. Tomas, Batangas.

Ayon sa Regional Director ng PRO-CALABARZON na si C/Supt. Mao Aplasca, nagbigay siya ng sapat na panahon sa apat na mga hepe upang mapatigil nila mga iligal na sugalan kagaya ng jueteng sa kanilang mga nasasakupan, ngunit hindi nila nagampanan ang kanilang trabaho.

Kasunod nito ay binalaan ni Aplasca ang iba pang hepe sa CALABARZON na hindi siya magdadalawang-isip na tanggalin sila sa puwesto kung magpapatuloy ang operasyon ng iligal na sugal sa kanilang mga nasasakupan. JOHNNY ARASGA

PUMAPALO na lang 20 – 40 ang nalalabing puwersa ng Maute group sa Marawi City.

Ayon kay Armed Forces of the Philippines spokesman Brig Gen. Restituto Padilla, patuloy na lumiliit ang puwersa ng teroristang grupo dahil sa patuloy na opensiba ng militar.

Sa kabila nito, itinuturing pa ring seryosong banta ng militar ang naturang grupo kahit maliit na lamang ang kanilang bilang.

Kahit kakaunti na lamang, may kakayahan pa rin aniya ang mga ito na makapaminsala at kumitil ng buhay, dagdag pa ni Padilla.

Bukod dito, may mga hawak pa rin aniyang bihag ang mga ito kaya’t nananatiling komplikado pa rin ang sitwasyon sa lungsod.

Samantala, sinabi naman ni AFP Chief-of-Staff Eduardo Año na buhay at nananatili pa rin sa Marawi City si Abu Sayyaf leader Isnilon Hapilon.

Ito aniya’y batay sa pinakahuli nilang impormasyong nakalap mula sa mga assets.

Nagtatago umano ito kasama ang ilan pang terorista sa isang mosque sa Marawi City. JOHNNY ARASGA

NAGKABUTAS-BUTAS ang katawan ng isang lola matapos saksakin ng isang lalaki na nagtangkang gahasain ang kanyang apo sa Bulacan nitong Lunes ng gabi.

Namatay noon din ang biktimang si Marcosa Malabo, 58, habang sugatan naman ang dalagitang apo nito, na kapwa ng Brgy. Loma de Gato sa Marilao, Bulacan.

Hinahanting na ngayon ng pulisya para pamagutin sa krimen ang suspek na nakilalang si Mark Lester Espajo, kilalang drug addict sa lugar.

Bago ito, natutulog ang apo ng biktima sa kanyang kuwarto nang pasukin ng suspek at tinangkang gahasain.

Pero nakasigaw ang biktima na narinig naman ng biktima kaya sumaklolo ito sa kanyang apo.

Dahil nabitin, pinagsasaksak ng suspek ang matanda na ikinamatay nito agad at maging ang apo nito ay sinaksak din ni Espajo. BOBBY TICZON

MATAPOS dumalo sa Senate Inquiry, kinuwelyuhan ng mga ahente ng National Bureau of Investigation (NBI) kaninang hapon si Kenneth Dong, ang umano’y middleman sa P6.4-billion shabu shipment, dahil sa kasong panggagahasa.

Si Dong ay dinampot matapos ang pagdinig ng Senate blue ribbon committee hearing sa shabu shipment dakong 2 p.m.

“I don’t have exact details but we have a warrant… We have to process him,” pahayag ni NBI Deputy Director Ferdinand Lavin.

Sinabi ni Lavin na nagsagawa sila ng background check kay Dong matapos ang kanyang pangalan ay nabanggit sa Senate at House probes sa shabu controversy, at nalaman ang kanyang kinasasangkutang kasong rape. BOBBY TICZON

MINSAN pang napatunayan ang kasabihan ng matatanda na ang biyenan at manugang ay hindi maaaring magkasundo na parang langis at tubig.

Namatay noon din sanhi ng tinamong tama ng bala sa dibdib ang biktima na nakilalang si Salvador Villablanca, 67, ng Bula, Camarines Sur.

Hinahanting na ngayon para pamagutin sa krimen ang suspek na nakilalang si Benson Camila.

Binaril si Villablanca sa loob mismo ng kanilang bahay dakong 9:00 ng umaga.

Ayon sa anak ng biktima na asawa naman ng suspek, dati nang may alitan ang ang kanyang ama at asawa.

Hindi aniya nagugustuhan ng kanyang tatay ang disiplinang ginagawa ng suspek sa kanyang mga apo. BOBBY TICZON

NASA 21 drug suspects ang nalagas sa pulisya sa magdamag na operasyon sa Bulacan province.

Sinabi ni S/Supt. Romeo Caramat, Jr., provincial police director, may 64 iba pa ang naaresto sa inilatag na 24 buy-bust operations at implementasyon ng dalawang search warrants mula Lunes ng gabi hanggang Martes ng umaga.

Ayon kay Caramat, ang kanilang operasyon ay magpapatuloy ng hangggang Martes ng gabi.

Iniulat din ni Caramat na may kabuuang 21 firearms at mahigit 100 gramo ng shabu ang nakumpiska sa magkakahiwalay na pagsalakay.

Sa Marilao, napatay ang isang alyas Egoy at Tom na kapwa armado ng tig-isang cal. 38 revolver at isang improvised shotgun. Nakumpiska sa kanila ang anim na sachet ng dalawang gramo ng shabu.

Sina alyas Enan at Justin ay napatay naman sa Obando. Ayon sa pulisya, kapwa armado ng cal. 38 revolver at 9mm. pistol nang isagawa ang buy-bust operations. Nakumpiska sa kanila ng 50 gramo ng shabu.

Ang iba pang napatay sa buy-bust operations ay sina Berth sa Pulilan, Alvin sa Balagtas, Chris sa San Miguel, Jerom sa Plaridel, Yayot at isang hindi nakikilalang kasama sa Guiguinto, Arnold at isang hindi nakikilalang kasama sa Norzagaray, Willy at Jeffery sa Malolos, Elias at Eugene sa San Jose del Monte, Macoy sa Sta. Maria, Pugeng Manyak sa Baliwag, at isang hindi pa nakikilalang suspek.

Ang mga napatay naman sa pagsilbi ng arrest warrants ay sina Allan Tattoo at isang hindi nakilalang suspek.

Nauna nang sinabi ni Philippine National Police chief Dir. Gen. Ronald dela Rosa na mula July 1, 2016 hanggang June 30, 2017, may kabuuang 86,030 drug suspects ang naaresto at 3,264 naman ang napatay. BOBBY TICZON

IGINIIT kahapon ni Sen. Cynthia Villar ang agarang pagpapatupad ng financial assistance program sa mga magsasaka, partikular ang maliliit na backyard livestock growers na apektado ng bird flu outbreak sa San Luis, Pampanga.

Ayon pa kay Villar, chair ng Committee on Agriculture and Food, bukod sa financial assistance package na inihahanda ng Department of Agriculture (DA), dapat maging available ang alternatibong livelihood sources para sa mga magsasaka na mawawalan ng kita sa loob ng 4-5 buwan.

“I am praying with the farmers that this outbreak will be contained and will be prevented from spreading to other areas,” aniya.

Sa isang press conference, ipinahayag ni DA Sec. Emmanuel Piñol na magbibigay ang pamahalaan sa mga apektadong magsasaka ng kompensayon na P80 per head culled at P25,000 loan assistance.

Ayon naman kay Dr. Arlene Vytianco, head ng Animal Disease Center, na ang culling operation sa 200,000 infected fowls ay matatapos sa Huwebes.

Aniya, hindi bababa sa 90 araw bago muling makapagsimula ang growers ng mga manok dahil na rin sa quarantine, disinfection at monitoring procedures.

“In support of other Pampanga poultry raisers, we should emphasize that not all Pampanga fowls are infected. In fact, as confirmed by experts, only nine commercial farms, four quail farms and four duck farms in San Luis are infected by the virus,” sabi pa ni Villar.

Umaasa si Villar na ang outbreak ay hindi magdudulot ng malaking puwang sa suplay ng manok at poultry products na hindi maaaring punan ng mga lokal na raisers sa iba’t ibang bahagi ng bansa. ERNIE REYES

TATLONG basyo ng bala na itinuturing na souvenir ng tatlong Japanese nationals ang kinumpiska sa Ninoy Aquino International Airport (NAIA) terminal 2.

Nanghihinayang ang tatlong pasahero na nakilalang sina Akira Nishonono, Ryo Matsuraa at Narise Noda sa tatlong basyo na kanilang inipon sa isang firing activity sa Guam.

Ayon kay Connie Bungag ng MIAA public affairs, ang tatlong dayuhan nagmula sa Guam at may connecting flight patungong Osaka, Japan nang mapansin ng mga tauhan ng Office for Transportation Security sa final security check ang mga imahe ng basyo ng bala sa monitor ng X-ray machine.

Nang magsagawa ng inspeksyon sa kanilang mga bag, tumambad ang mga basyo ng. 45 caliber, 9mm at isang basyo ng hindi matukoy na baril.

Ilang minuto makaraang maisadokumento ang insidente, hinayaang makalulan sa Philippine Airlines flight PR408 ang mga Japanese na nanghihinayang pa rin sa mga basyo ng bala na kanilang nakalap mula sa Guam.

Sa isinagawang patakaran noong 2016 ng OTS at Philippine National Police-Aviation Security Group at ng Manila International Airport Authority, lahat ng bala na makukuha mula sa mga pasahero, o mga basyo na konektado sa baril ay kinukumpiska saka pinapayagang makasakay sa eroplano ang pasahero, maliban lamang kung ang mga balang nakuha mula rito ay higit sa limang piraso. BENNY ANTIPORDA

PATAY ang isang pulis-Maynila nang tambangan ng hindi nakilalang suspek habang naghahatid ng kanyang anak na babae sa Emilio Aguinaldo College (EAC) Martes ng umaga.

Dead-on-the-spot ang pulis na si PO3 Mark Anthony Peniano ,34, nakatalaga sa Manila Police District-Station 3 na nagtamo ng tama ng bala sa ulo at katawan.

Sa kuha ng CCTV malapit sa Technological University of the Philippines (TUP), sakay ng tatlong motorsiklo ang mga suspek nang barilin si Peniano habang angkas ng kanyang anak na babae.

Pasado alas-8:00 ng umaga nang tambangan ang biktima sa kahabaan ng Ayala Ave., San Marcelino St. malapit sa Technological Univesity of the Philipines (TUP).

Sakay umano ng tatlong motorsiklo ang mga suspek na ang isa rito ay bumaba pa at naglakad palapit sa biktima sa muling binaril nang ilang beses.

Bagama’t hindi nasaktan ang anak ng biktima, isang lalaking estudyante ng TUP naman ang tinamaan ng ligaw na bala sa hita.

Narekober sa crime scene ang 10 basyo ng bala ng. 45 kalibre na ginamit sa pamamaril sa biktima.

Patuloy pang iniimbestigahan ng MPD-Homicide Section ang pagkakilanlan ng mga suspek at motibo sa pagpatay.

Samantala, agad namang ipinag-utos ni Manila Mayor Joseph Estrada kay MPD director C/Supt. Joel Coronel ang pag-imbestiga sa insidente kung saan napag-alamang prime suspect pala si Peniano sa pagpatay sa isang babaeng pulis na si PO1 Jorsan Marie Alafriz nitong Marso 19 sa Quiapo. Kilalang anti-drug advocate noon si Alafriz.

Huling naitalaga si Peniano sa MPD Headquarters Support Unit sa UN Avenue habang humaharap sa imbestigasyon kung saan nasa listahan din ito ng High Value Target (HVT), ayon kay Coronel.

Ayon kay Estrada, hindi nito pinapayagan ang extrajudicial killing ng mga pulis na sangkot sa droga at iba pang iligal na gawain kaya inatasan nito si Coronel na bantayan ang mga miyembro ng MPD na kasalukuyang iniimbestigahan sa iba’t ibang kaso. JOCELYN TABANGCURA-DOMENDEN

STA. MARIA, ILOCOS SUR – Patay ang isang 20-taong-gulang na lalaki na nagdiriwang ng kanyang kaarawan matapos malunod ilog sa Brgy. Maynganay Norte, Sta. Maria, sa nasabing lalawigan.

Kinilala ng Sta. Maria police ang biktimang si Mark Joseph Ramboanga, ng nasabing bayan.

Sa report, ayon sa kaibigan ng biktima na si Jayr Cantorna, nagtungo sila sa ilog kasama ang ilan pa nilang kaibigan bilang selebrasyon ng kaarawan ni Ramboanga.

Naligo ang biktima at kanyang mga kasama sa ilog ngunit hindi na namalayan ng mga ito na napunta na pala ang biktima sa malalim na parte ng ilog.

Sinubukan ng kanyang mga kaibigan at mga sumaklolong rescuer na sagipin ito pero hindi na nila kinaya dahil sa lakas ng agos at lalim ng tubig.

“Ginawa namin ang lahat. Sinubukan namin na abutan siya ng kakapitan pero palayo siya ng palayo hanggang sa umahon ito ngumiti at kumaway hanggang sa hindi na namin siya makita,” ani Cantorna.

Dalawang oras ang inabot bago tuluyang narekober ang bangkay ng biktima.

Ikinalungkot naman ng ina ni Mark Joseph na si Mary Ann ang nangyari.

“Napakahirap na tanggapin. Napakasakit lalo na siya ang katulungan ko sa paghahanap buhay,” ani ng ina ng biktima.

Kaya paalala ng mga lokal na awtoridad na mag-ingat sa paliligo sa mga katubigan lalo na kung hindi kabisado ang lalim ng mga ito. ALLAN BERGONIA

AMINADO si Sec. Martin Andanar ng Presidential Communications and Operational Office (PCOO) na nakakahiya ang kapalpakan ng Philippine News Agency (PNA) sa website nito.

Sa deliberasyon ng P1.351-bilyong alokasyon ng PCOO para sa 2018, sinabi ni Carandang na nagpalabas na siya ng showcause para sa dalawang empleyado ng PNA na nag-upload ng Dole Philippines logo sa istorya ng Department of Labor and Employment.

Ayon kay Carandang, bumuo na sila ng editorial board upang siyang mag-double check sa mga inilalabas ng PNA sa website nito kasabay ng pangangatwiran na minana niya lamang sa nagdaang administrasyon ang manpower sa PNA at wala aniya siyang tinanggal dito.

“Matagal na pong pinabayaan ang communications ng gobyerno. Ang P1.3-bilyon na binibuigay po sa PCOO, this is a droplet of bucket in a P1.3 trillion budget of the national government,” binigyang diin ni Andanar sa pagharap nito sa House Appropriations Committee.

Agad namang hiniling ni Bukidnon Rep. Manuel Zubiri sa komite na repasuhin ang maliit na alokasyon sa PCOO dahil ito aniya ang frontliner ng gobyerno at nagpapahatid ng impormasyon sa may 100.3-milyong mga Pilipino.

“We should review the budget of PCOO. The PCOO budget is just a tip of the spear in communication. Very important that we have proper salaries for our communicators. If we want good communicators, if we want good PCOO employees we wholeheartedly support them. Spend more expect more. Spend less, expect less,” ani Zubiri.

Ang kailangan aniya ng PCOO ay tamang mga kagamitan upang makipag-kompetensya ang PNA sa mga pribadong entities. MELIZA MALUNTAG

TUMIMBUWANG ang apat katao na umano’y nagpapot-session matapos pagbabarilin ng mga hindi kilalang salarin sa Brgy. Old Balara, Quezon City kagabi, Agosto 14, Lunes.

Sa report ng Quezon City Police District (QCPD)-Batasan Police Station 6, kinilala ang mga nasawing biktima na sina Jennifer Taba, 43, at Ignacio Yutero, 40, pawang ng Laura St., Brgy. Old Balara; mga dayo na si Alyas Loloy Bad Boy, 32, at alyas Joel, 35.

Sa inisyal na report ni Samuel Mendoza, Ex–O ng Brgy. Old Balara, naganap ang insidente alas–11:00 ng gabi nang marinig ang sunod–sunod na alingawngaw ng putok ng baril sa may Purok 2, Area 5, Laura St., Brgy. Old Balara.

Lumitaw naman sa imbestigasyon ng Batasan Police, isang witness na residente sa lugar ang nakadiskubre sa duguang mga bangkay ng biktima na nakabulagta sa lugar at may mga tama ng bala ng baril sa kanilang katawan.

Ayon kay Supt. Lito Patay, hepe ng Quezon City Police District station 6 Batasan, nagpa-pot session umano ang mga nasawing biktima nang bigla na lamang pagbabarilin ang mga ito ng hindi kilalang mga salarin.

Sinabi pa ni Supt. Patay na ilan umano sa mga biktima ay matagal nang ‘di nakababayad o nakakapag-remit sa supplier ng illegal drugs na siyang hinihinalang dahilan ng pamamaril sa mga ito.

Matapos ang krimen, mabilis na tumakas ang mga suspek at iniwan ang mga duguang biktima. SANTI CELARIO

NATAGPUAN sa ilog sa Valenzuela City kahapon ang wala nang buhay na katawan ng pitong-taong gulang na lalaki na napaulat na nawawala matapos mahulog sa bukas na manhole habang naliligo at naglalaro sa ulan sa Caloocan.

Ang biktimang si Ryan Benedict Morata, ng 149 Atis St., Brgy. 142 Zone 13, Bagong Barrio, Caloocan City ay natagpuan ng concerned citizen na palutang-lutang sa ilog sa Tullahan River, Brgy. Marulas, Valenzuela dakong 4:00 ng hapon at positibong kinilala ng kanyang ama na si Rommel Sr.

Ayon kina Valenzuela Police Women and Children’s Protection Desk (WCPD) investigators SPO1 Richell Siñel at PO1 Mary Ann Ayco, napaulat na nawawala ang biktima simula noong Linggo matapos itong magpaalam sa ama na maglalaro at maliligo sa ulan kasama ang kanyang kuya na si Rommel Jr. dakong 6:00 ng gabi.

Habang naglalaro, aksidenteng nahulog ang biktima sa nakabukas na manhole at tinangay ng malakas na agos ng tubig.

Tinangka pang iligtas ng kanyang kuya ang biktima subalit nabigo ito kaya agad nitong ipinaalam sa kanilang ama ang nangyari na agad namang humingi ng tulong sa mga barangay official.

Agad namang nagsagawa ng search at rescue operation ang mga awtoridad katuwang ang mga tauhan ng Malabon Rescue Unit subalit nabigo ang mga ito na matagpuan ang katawan ng paslit. RENE MANAHAN

NAAAGNAS na nang madiskubre ang bangkay ng isang retiradong Chinese teacher sa loob ng kanyang tinutuluyang condominium unit sa Binondo, Maynila.

Sa ulat ni SPO2 Jonathan Bautista, ng Manila Police District (MPD)-homicide section, kinilala ang biktimang si Mary Chua, 71, retired teacher, na nadiskubre sa loob ng kanyang tinutuluyang Sky Rise Condominium sa 1089 Aguilar St., Binondo dakong 2:24 ng hapon.

Hinihinala umanong nasa anim na araw nang patay ang biktima bago pa ito madiskubre matapos magreklamo ang isang Nora Lee na nakatira sa katabing unit ng biktima, dahil sa masangsang na amoy na nanggagaling aniya sa backdoor ng kanyang unit.

Dahil walang makitang tao, humingi ng tulong si Lee sa building administrator para alamin ang kalagayan ni Chua.

Kaagad namang tinungo ni Noriel Herbosana, security guard ng condo, ang unit ng biktima at kinatok ito ngunit walang sumasagot.

Nang makumpirma ng guwardiya na mula sa unit ng biktima galing ang masangsang na amoy ay agad nitong tinawag ang pamangkin ng biktima na si Benjamin Chua na nakatira lamang sa ikatlong palapag.

Puwersahan nilang binuksan ang pintuan ng unit ng biktima at dito na tumambad sa kanila ang naaagnas at nakadapang bangkay ng retiradong guro na naka-panty lamang.

Huli umanong nakitang buhay si Chua noong Agosto 7, 9:32 ng umaga, matapos bumaba sa lobby para bumili ng almusal at bumalik sa kanyang unit ngunit hindi na ito muling bumaba pa.

Iniimbestigahan pa ng mga awtoridad ang dahilan ng pagkamatay ng biktima. JOCELYN TABANGCURA-DOMENDEN

ISANG hindi pa kilalang lalaki ang natagpuang patay na tadtad ng tama ng saksak ang noo at dibdib, markado ng pagkakabigti ang leeg, nakabalot ng packaging tape ang mukha at nakagapos ang mga kamay sa madamong bahagi ng Brgy. Maysan, Valenzuela City, kaninang madaling-araw, Miyerkules.

Sa ulat na isinumite kay S/Supt. Ronaldo Mendoza, hepe ng Valenzuela Police, walang nakuhang pagkakakilanlan sa bangkay na inilarawang nasa higit-kumulang 5 flat ang taas, 25-30 ang edad, balingkinitan, naka-itim na T-shirt at maong na pantalon.

Sa ulat, ala-1:30 ng madaling-araw kahapon nang madiskubre ng mga nagpapatrulyang barangay tanod ang bangkay at ini-report nila ito sa Valenzuela Police Community Precinct 12-Maysan Patrol Base.

Rumesponde sa lugar ang Northern Police District-Scene of the Crime Operatives (NPD-SOCO) na nakarekober sa bulsa ng biktima ng tatlong sachet ng shabu at isang lighter.

Patuloy naman ang imbestigasyon ni SPO2 Alexander Manalo para malaman ang pagkakilanlan ng biktima at kung sino ang nasa likod ng pamamaslang. RENE MANAHAN

SUMIRIT pa ang bilang ng mga napatay sa serye ng drug raid sa Bulacan sa loob ng 24 oras habang umabot na sa 107 ang naaresto, ayon kaninang Miyerkules ng umaga kay police director S/Supt. Romeo Caramat.

Sa isang press conference sa Camp Crame, sinabi ni Caramat na naglatag sila ng 66 province-wide operations mula alas-12:00 ng umaga, Agosto 15, hanggang alas-12:00 ng hatinggabi sa parehong araw, kung saan 44 dito ay buy-bust operations, 14 naman ang nadale sa pagsilbi ng search warrants, 2 sa anti-criminality checkpoints, at isa ang nahuli sa pagsilbi ng arrest warrant.

Nakasagupa nila ang 20 armadong kalalakihan na nagresulta sa pagkamatay ng 32 drug suspects.

Sa 32 napatay, 16 sa kanila ay nasa drug watchlist, dalawa ay dating sumuko na at 14 ang mga bagong drug suspect.

Nakakumpiska sila ng P1.174-milyong halaga ng shabu at 765 gramo ng dahon ng marijuana at nakarekober ng 34 firearms, dalawang granada, at 114 live ammunition.

Inamin ni Caramat na sa lahat ng kanilang isinagawang one-time, big-time police operations, itong pinakahuli ang nakapagtala ng mas maraming bilang ng kaswalidad. BOBBY TICZON