KUMALMA na ang ibang mga bansa sa kanilang pagkabahala sa sitwasyon ng human rights sa Pilipinas ayon kay Pangulong Rodrigo Duterte.

Aniya, mas nababahala na ngayon ang mga ito tungkol sa mga isyung may kinalaman sa terorismo.

Sinabi ito ng pangulo matapos ang kanyang pakikipagpulong kay US Secretary of State Rex Tillerson at Australian Foreign Affairs Minister Julie Bishop.

Tinanggap rin ni Duterte kahapon ang credentials ng mga bagong ambassadors ng Chile, Colombia, India at Austria.

Saad pa ni Duterte, karamihan sa mga kinatawan ng ibang bansa na kanyang nakausap ay hindi na nagtanong tungkol sa human rights.

Gayunman, tikom naman ang bibig ng pangulo tungkol sa detalye ng kanilang napag-usapan ni Tillerson.

Hindi aniya niya maaaring sabihin dahil confidential ang mga ito at marami rin silang mga napag-usapan. -30-

PAOAY, ILOCOS NORTE – Dahil sa kalasingan, patay ang isang 28-anyos na magsasaka matapos malunod sa Paoay Lake, Brgy. Nangguyudan sa nasabing lalaliwag kahapon, August 7.

Kinilala ng Paoay police ang biktimang si Christopher Lubong, ng Brgy. 13, Batac City.

Sa imbestigasyon, dakong 7:30 ng umaga kahapon (Lunes), nagtungo sa nasabing lugar ang biktima kasama ang kanyang pinsan upang dalawin ang kanilang tiyuhin at makipag-inuman.

Matapos ang mahigit dalawang oras, nagpaalam ang biktima na maliligo sa Paoay Lake malapit lamang sa bahay ng kanyang tiyuhin.

Pero nagtaka ang pinsan nito dahil magtatanghali na ay hindi pa bumabalik ang biktima.

Agad sinisid ng kanyang pinsan ang bahagi ng lawa kung saan siya maaaring naligo at nakita niya ang wala nang buhay na si Lubong.

Nasa 20 talampakan ang lalim ng bahagi ng lawa kung saan nalunod ang biktima.

Wala namang nakikita ang Paoay police na foul play sa insidente.

Hinihinalang dahil sa sobrang kalasingan ng biktima ay nalunod ito na kanyang ikinasawi. ALLAN BERGONIA

PINASALAMATAN ng Malakanyang ang mga concerned government agency partikular na ang Philippine National Police (PNP), Metropolitan Manila Development Authority (MMDA) at iba pa sa matagumpay na pagdaraos ng ASEAN 50th Foreign Ministers Meeting na isinagawa sa Philippine International Convention Center (PICC) mula August 2 – 8.

Pinasalamatan din nito ang mga miyembro ng media na matiyagang tumutok sa anim na araw na aktibidad ng ASEAN Ministerial meeting gayundin ang mga nagtrabaho para maging matagumpay ang mga kaganapan na tiyak anyang nagbigay na naman ng pagkilala ng international community partikular ng mga dumalo.

Ayon kay Presidential Communications Operations Office (PCOO) Secretary Martin Andanar, nailagay na naman sa kasaysayan ang Pilipinas dahil sa maayos nitong hosting sa ASEAN meeting lalo na sa pag-iistima sa mga bisita at gayundin ng inilatag na seguridad ng mga diplomats, mga bisita at maging ng media na tumutok sa pulong.

Aniya, nakatutuwang malaman na kuntento at mga papuri ang ibinabalik ng mga delegado sa gobyernong Pilipinas dahil sa matagumpay at produktibong meeting ng ASEAN Foreign Ministers sa bansa.

Matatandaang labis ding papuri ang inani ng pamahalaan sa matagumpay na hosting ng ASEAN 2017 Summit noong Abril 26 – 29 kung saan marami sa mga dumalo ang nagsabing babalik sila sa Pilipinas dahil sa magandang karanasan at magagandang pasyalan. KRIS JOSE

HINILING ng isang labor group sa Department of Labor and Employment (DOLE) na pagbawalan ang mga employer nang sapilitang pagpapasuot ng high heels sa kanilang mga empleyado, partikular na ang mga sales lady, bunsod nang panganib na posibleng maidulot nito.

Ayon sa Associated Labor Unions – Trade Union Congress of the Philippines (ALU-TUCP), marami silang natatanggap na reklamo mula sa mga saleslady kaugnay ng hirap nila sa pagsusuot ng matataas na takong habang nakatayo at nagtatrabaho.

Sinabi ni Gerard Seno, National Executive Vice President ng ALU, bukod sa saleslady ay kasama umano sa pinagsusuot ng high heels ang mga promodizer sa mga grocery stores, waitress, hotel and restaurant receptionists at flight attendants.

Sa ngayon aniya ay walang regulasyon ang DOLE kaugnay ng pagsusuot ng high heels.

Pero ang mas nakalulungkot aniya ay karamihan sa mga nasa larangan nang ganoong uri ng trabaho ay pawang mga contractual employee lamang na wala namang boses na katawanin ang kanilang hanay.

Dahil dito, wala silang magawa kundi magtiis na lamang at sundin ang ipinag-uutos ng kumpanya kahit pa labag ito sa kanilang kagustuhan.

Nabatid na batay sa pag-aaral ng American Association of Orthopedic Surgeons, ang pagsusuot ng sapatos na mataas ang takong ay maaring magresulta ng joint pain, lower back pain, gayundin ng sprain. MACS BORJA

AABOT sa P400,000 halaga ng ari-arian ang naabo makaraang lamunin ng apoy ang may 30 bahay sa Brgy. Bagong Pagasa, Quezon City kagabi, Agosto 7, Lunes.

Sa report ni QC Fire Marshall S/Supt. Manuel Manuel, naganap ang sunog alas–11:30 ng gabi makaraang sumiklab ang sunog mula sa ikalawang palapag ng bahay na pag–aari ni Janet Camora ng Santan St., Agham Rd., Sitio San Roque 11, Brgy. Bagong Pag-asa, QC.

Sa imbestigasyon, sumiklab ang apoy sa isa sa naninirahan sa naturang lugar at mabilis na kumalat na tumupok sa bahay ng 70 pamilya sa lugar.

Ayon sa arson investigator, dahil halos gawa sa light materials ang mga bahay ay mabilis kumalat ang apoy na umabot sa 5th alarm at ala–1:10 ng madaling-araw nang ito’y maapula.

Walang nasugatan o nasawi sa naturang sunog na tumagal nang mahigit isang oras. SANTI CELARIO

BINUNYAG ni Pangulong Rodrigo Roa Duterte sa publiko ang itinatagong ‘sikreto” ni Sen. Grace Poe.

Nag-ugat ang pagkainis ng Pangulo sa senadora nang sabihan siya nito na “Watch your mouth…” bilang bahagi ng paalala ni Senador Grace ukol sa kanyang pagmumura na naririnig din at nakikita ng mga batang nanonood sa telebisyon

“Eh, ito naman si Grace Poe, madali kaagad. ‘Yung motherhood statement kaagad. Lahat naman tayo may depekto eh. Ikaw, anong depekto mo? Ikaw ang lakas mong manigarilyo, hindi alam ng Pilipino. Ang lakas mong uminom ng brandy. Totoo lang. ‘Yan ang sikreto mo. Ako walang sikreto. Binubuga ko lahat. Sanay ka kasing mag-ano sa akin. You admonish me as if you are the mother. Motherhood ano ka kaagad…,” anito.

Pinaalala ni Pangulong Duterte kay Senador Poe na alkalde pa lamang ay nagmumura na siya.

Alam aniya ito ng mga tao mula Luzon, Visayas at Mindanao na palamura siya at iyon aniya ang posibleng ikinapanalo niya.

Hindi aniya katulad ni Sen. Poe na ipinakikita ang pagiging ‘prim and proper’ at hindi bastos pero talunan naman.

“Bakit natalo ka kung ganon? Eh, may pera ka pa. You had the money, you had the aura of… Father mo lang naman ‘yung [inaudible] sa’yo. ‘Yun lang ang kapital mo. Ano bang kapital mo? Bakit mo sabihan na, “Watch your mouth?” My mouth is not for your mouth. If you want to watch your mouth everyday, do it. Huwag mo akong pakialaman kasi ako nagmumura talaga noon pa. Tapos when you hear that, ma-motherhood statement ka kaagad. Alam mo na nagmumura ako, bakit mo pa ako ano… Eh, total kung gusto pala nila ‘yang disenteng babae na walang mura, wala lahat, eh ‘di nanalo ka. Ikaw ‘yung popular, ikaw ‘yung may pera. Ikaw ‘yung blessed ng simbahan, ginawaan ka pa ng prayer. Hail Mary, full of Grace. Ako, anong ibinigay nilang dasal sa akin, yung mga pari pati itong mga…?” aniya pa.

Matatandaang, natanong ng media si Senador Poe tungkol sa ginawang pagmumura ni Duterte kay dating pangulong Noynoy Aquino dahil sa naging pahayag nito na parang wala namang nangyayari sa kampanya laban sa iligal na droga. KRIS JOSE

IPINABUBUWAG na ni Kabayan Party-list Rep. Harry Roque ang Bureau of Customs (BOC).

Ayon kay Roque, ito lamang ang nakikita niyang paraan upang malinis sa talamak na katiwalian ang BOC.

Nadiin sa katiwalian ang BOC matapos na makalusot ang mahigit sa P6-bilyong halaga ng shabu sa bansa at mabunyag ang walong opisyal ng BOC na tumatanggap ng suhol.

“Siguro bubuo tayo ng bagong ahensya nang sa ganun ay magkaroon tayo ng pagkakataon na baguhin ang mga tao, importante rin na ma-automate ang operasyon ng Bureau of Customs, matagal na dapat ‘yan kaya lang na-TRO ng Korte Suprema at nakikita natin na kailangan talaga ang pre-inspections sa mga shipment na ‘yan at ilarawan ang mga laman ng containers,” ani Roque.

Samantala, sinabi pa ni Roque na hindi pa lusot sa anumang kaso ang mga atleta na kinuhang consultant ng BOC.

Nasa mahigit 40,000 kada buwan umano ang suweldo ng mga atleta gayung wala namang nagawa ang mga ito para sa BOC.

“Ang tanung namin ay bakit sila naroon, anong ginagawa nila parang sayang lang ang pera dahil malinaw na wala silang kakayahan na makatulong sa Bureau of Customs and yet binibigyan sila ng mga consultancy fee na hindi bababa sa 50,000 kada buwan,” pahayag ni Roque. -30-

SISIRIT ang electric bills ng P0.1338 per kilowatthour (kWh) sa P8.3849 per kWh ngayong Agosto, ayon sa pahayag ng power distributor kaninang Martes ng umaga.

“The slight rate increase this month amounts to a P27 increase in the total bill of a typical residential household consuming 200 kWh,” ayon sa kumpanya.

Ang ibig-sabihin nito, ang makakakonsumo ng 200 kWh ay magbabayad sa Meralco ng P1,676.98 para sa kanilang electricity consumption ngayong buwan.

Ang electric consumers ay nagbayad ng P8.2511 per kWh o P1,50.22 nitong nakaraang Hulyo.

“The electricity rates this August reflect the last installment of the refund of over-recovery on pass-through charges from January 2014 to December 2016 totaling around P6.9 billion, ayon sa Meralco.

“Meralco’s petition for refund with prayer for provisional authority was granted by the Energy Regulatory Commission (ERC) on May 11, 2017 for implementation from June to August 2017,” pahayag pa nito.

“The refund is not shown as a separate line item in the bill but is embedded in different pass-through charges indicated in the bill, which include generation, transmission, and system loss charges and lifeline and senior citizen subsidies,” dagdag nito. BOBBY TICZON

INAPRUBAHAN na sa ikatlo at huling pagbasa ang panukalang batas na ibilang na special non-working holiday ang anibersaryo ng Iglesia ni Cristo (INC).

Batay sa House Bill 5686, tuwing anibersaryo ng Iglesia Ni Cristo na July 27 ay idedeklara itong non-working holiday.

Ang pagpapasa sa panukala ay isinagawa kaalinsabay ng ika-103 taong anibersaryo ng INC na inaprubahan ng may 242 kongresista.

Ang panukalang ito ay pinagsama-samang panukala nina Reps. Winston Castelo (PDP-Laban, Quezon City); Alfred Vargas (PDP-Laban, QC); Eugene de Vera (ABS Partylist); Gil P. Acosta (NP, Palawan); Gus Tambunting (PDP-Laban, Parañaque City) at Romeo Acop (LP, Antipolo City).

Sinabi ni Castelo na inaamyendahan ng HB 5686 ang Republic Act No. 9645 o mas kilala bilang Commemoration of the Founding Anniversary of Iglesia Ni Cristo Act, sa pamamagitan ng pagdedeklara ng July 27 bilang non-working holiday.

Paliwanag ni Castelo, chairman ng House Committee on Metro Manila Development, ito’y upang mabigyan ng pagkakataon ang mga Pilipino na miembro ng INC na maipagdiwang ang anibersaryo tuwing July 27.

Samantala, naipasa na sa Committee on Rules ang House Resolution 1163 na nagpapahatid ng pagbati sa ika-103 anibersaryo ng Iglesia Ni Cristo nitong nagdaang July 27, 2017 at ang House Resolution 1167 na nagpapahatid naman ng pagbati sa walong taong matagumpay na pangunguna ni Iglesia Ni Cristo Executive Minister Eduardo V. Manalo. MELIZA MALUNTAG

KALABOSO ang isang Koreano matapos gulpihin ang kanyang misis makaraang mainis ang una sa hindi pagsagot nito sa tawag sa cellphone sa Quezon City kahapon ng madaling-araw.

Kinilala ni Quezon City Police District (QCPD) Dir., Police C/Supt. Guillermo Lorenzo Eleazar ang suspek na si Hyunsup Cahe, 41, ng no. 8 Yakal St., Tovoli Royal, Vista Real, Brgy. Batasan, QC.

Si Cahe ay inireklamo ng kanyang misis na si Rowena Daño Cahe, 26.

Nabatid sa reklamo ng complainant na naganap ang pananakit sa kanyang ng suspek nitong nakalipas na Lunes, Agosto 7, dakong 2:30 ng madaling-araw.

Sinabi nito sa District Women’s and Children Protection Desk (DWCPD) ng Quezon City Police na ikinagalit ng suspek ang hindi pagsagot ng biktima sa mga tawag nito sa cellphone.

Kamakalawa dumating ng kanilang bahay ang suspek at ginulpi ang biktima na malubhang ikinasugat nito.

Nakapiit ngayon ang suspek sa himpilan ng pulisya at nahaharap sa kaso. SANTI CELARIO

TULOY pa rin ang pagbibigay ng ayuda ng Estados Unidos sa Marawi at Mindanao sa kabila ng patutsada ni Pangulong Rodrigo Roa Duterte sa Estados Unidos.

Sinabi ni US Secretary of State Rex Tillerson na kabilang sa mga tulong na ibinibigay ng Estados Unidos sa Pilipinas ay para sa surveillance capabilities tulad ng Cessna planes at UAV o drones upang labanan ang mga terorista.

Ani Tillerson, wala namang masama kung tumulong ang US sa Mindanao kahit pa may sentimiyento sila sa isyu ng human rights kaugnay sa war on drugs ng gobyerno.

Sa kabilang dako, nakatakda namang magbigay ng tulong-pinansiyal ang pamahalaan ng Australia sa mga residente sa Marawi City na naapektuhan ng bakbakan.

Ayon kay Australian Foreign Ministry Julie Bishop, maglalaan ang kanilang pamahalaan ng $20-milyong halaga para sa recovery at long term peace and stability sa Marawi.

Ito aniya’y tatagal nang mahigit apat na taon dahil hindi naman agad magagawang maka-revocer ng mga naapektuhang sibilyan.

“Today I announce that the Australian Government will provide assistance to ease civilian suffering caused by the siege in the Philippine city of Marawi and contribute to peace-building in the area,” pahayag ni bishop.

Ang 20 milyong dolyar na halaga ng tulong ay bukod pa sa emergency food at iba pang suplay na aabot sa $920,000 ang halaga na una nang inanunsyo ng Australia.

Ikinuwento ni Bishop na sa pulong nila ni Pangulong Duterte kamakalawa, tinalakay nila ang nagpapatuloy na gulo sa Marawi at ang epekto nito sa mga sibilyan.

Base aniya sa impormasyong nakarating sa kanya, aabot na sa 360,000 na katao ang inilikas dahil sa giyera.

Gamit ang halaga na ibibigay ng Australia, popondohan ang small-scale infrastructure projects para sa komunidad sa Marawi kabilang ang pagkukunan ng malinis na inuming tubig at pagsasaayos ng local roads. KRIS JOSE

APAT ang sugatan matapos sumalpok ang kanilang sinasakyang kotse sa isang backhoe na nagdulot ng mabigat na daloy ng trapiko sa mga motorista sa Quezon City kahapon, Agosto 8.

Inaalam pa ng Quezon City Traffic ang pangalan ng mga biktima dahil unconscious pa ang mga ito, na ang dalawa’y nilalapatan ng lunas sa St. Luke’s Medical Hospital, habang ang dalawa’y nasa National Children’s Hospital.

Sa inisyal na ulat, naganap ang insidente dakong 8:00 ng umaga sa tapat ng kalapit na Trinity University of Asia sa E. Rodriguez Ave., QC.

Sakay ang tatlong babae at isang lalaki na kanilang driver sa isang itim na Toyota Vios (PQE-825).

Kwento sa mga awtoridad ng isang saksi, mabilis ang takbo ng naturang Toyota Vios at bigla umano nitong sinakop ang eastbound lane at sinuyod ang mga orange cones o warning devices hanggang sa tuluyang bumangga at pumailalim sa isang nakapardang backhoe.

sa lakas nang pagkakasalpok, nawasak ang harapan ng naturang kotse at nabasag ang windshield at nayupi ang hood.

Mabilis na isinugod ng Quezon City Rescue Team sa naturang mga ospital ang apat na biktima na ngayo’y nilalapatan na ng lunas. SANTI CELARIO

PITO ang patay sa flashfloods at landslides bunsod ng walang tigil na ulan sa Gansu Province, China.

Dalawa naman ang nawawala habang nasa 1,000 residente ang nagsilikas.

Ilang kabahayan din ang nawasak o napinsala habang naputol ang power supply at communication lines.

Libu-libong sundalo naman ang idineploy para sa rescue at relief operations. -30-

NALISTON nang buhay ang isang ginang at kanyang dalawang anak matapos lamunin ng apoy ang kanilang bahay sa General Santos kaninang hatinggabi.

Sinabi ni FO3 Macacuna Tumambiling, ng Bureau of Fire Protection (BFP)-GenSan, kinilala ang mag-iinang sina Jovelyn Gamis, Earl, 5, at Shaun Anthony Cagas, 3.

Sa ulat, naganap ang sunog dakong 12 p.m. sa bahay ng mag-iina sa Purok 1 Blaan community village, Labangal, General Santos City.

Ayon sa mga residente, bigla na lamang lumaki ang apoy sa bahay ng mga biktima na gawa lamang sa light materials at mabilis na kumalat sa tatlong boarding house at internet café na pag-aari ni Gamis.

Sa isinagawang clearing operation, natagpuan ang ina sa banyo habang ang dalawang anak naman ay sa kuwarto. BOBBY TICZON

NAKAPUGA ang limang preso Rosario, Cavite kaninang Miyerkules ng umaga, Agosto 9.

Ayon kay Supt. Chitadel Gaoiran, tagapagsalita ng Calabarzon police, nagpanggap na patay ang isa sa mga preso kaya binuksan ng jail guard na si SPO2 Africa ang pinto ng selda.

Pero imbes tumulong ay kinuyog si Africa ng mga preso kaya sila nakatakas.

Kinilala ang mga pugante na sina Dannymar Carino, Ryan James Villanueva, Frederick Legazpi, Lindon Bartolo at Josefino Abad, na pawang nahaharap sa kasong illegal drugs.

Bumuo na ng mga tracker teams ang Cavite police para sa lalong madaling panahon ay maibalik sa selda ang mga preso. BOBBY TICZON

TODAS ang isang dating barangay tanod na gumagamit umano ng iligal na droga matapos pagbabarilin ng riding-in-tandem sa harap ng kanyang bahay sa Caloocan City kagabi.

Dead-on-the-spot sa mga tama ng bala sa ulo at katawan si Augusto Teleg alyas “Ogie”, 55, ng Brgy. 176, Bagong Silang habang mabilis namang tumakas sa ang mga suspek sakay ng isang motorsiklo matapos ang insidente.

Ayon kay Caloocan police Chief S/Supt. Chito Bersaluna, dakong 8:30 ng Martes ng gabi, nakatayo ang biktima sa harap ng kanyang bahay nang dumating ang mga suspek na kapwa armado ng kalibre .45 baril at walang sabi-sabing pinagbabaril ito sa ulo at katawan.

Sa pahayag ni Purok Leader Salvador Galoso kina homicide investigators PO3 Romel Caburog at PO2 Philip Joseph Reglos, tinanggal niya sa serbisyo bilang barangay tanod ang biktima matapos mapatunayang gumagamit ito ng droga.

Dinala na rin ang biktima ng kanyang asawa sa rehabilitation center upang magamot subalit, nang makalabas ay muli na naman itong gumamit ng droga.

Patuloy naman ang masusing imbestigasyon ng pulisya upang matukoy ang pagkakilanlan ng mga suspek at maaresto. RENE MANAHAN

IPINAAARESTO ni Sen. Juan Miguel “Migz” Zubiri sa awtoridad si Kenneth Dong, kilalang broker at importer sa Bureau of Customs (BOC) kung may sapat na ebidensiyang sangkot siya sa nakumpiskang P6.4-bilyong shabu sa Valenzuela City.

Inihayag ito kahapon ni Zubiri matapos lumutang ang ilang espekulasyon na kilala nya si Dong na hindi naman pinabulaanan ng Senado.

“Nakilala ko si Mr.; Kenneth Dong matapos siyang ipinakilala sa akin ng isang kaibigan ialng taon na ang nakararaan. Sinabi na isa siyang lehitimong negosyante at importer ng Asuki Industrial weighing machines,” ayon kay Zubiri.

Aniya, ikinonsidera nyang kaibigan si Dong pero hindi nya alam ang kanyang transaksiyon at negosyo maliban sa pagmamay-ari ng Asuki.

Bilang public servant, nakasasalamuha niya umano ang maraming tao at hindi niya ito hinuhusgahan kaagad.

“Let it be said, however, that I do not condone any illegal act much more the involvement in the illegal drug trade. I always believe that no one is above the law,” aniya.

Dahil dito, sinabi ni Zubiri na kung may ebidensiya na magpapatunay na sangkot si Dong sa illegal drug trade, dapat siyang arestuhin.

“He should be brought to the bar of justice. If anyone breaks the law then, without fear or favor, friend or not, the law must be implemented and, if found guilty, should be arrested,” giit ni Zubiri.

“Bilang pangunahing awtor ng Comprehensive Dangerous Drugs Act, I have zero tolerance for illegal drugs,” dagdag niya. ERNIE REYES

DALAWA ang patay matapos maka-enkwentro ang mga pulis ng PCP-3 ng Northern Caloocan na tumugon sa sumbong na may bentahan ng shabu sa Brgy. 176, Bagong Silang, Caloocan City.

Pinangunahan ni C/Insp. Ronald Cayago ang grupo ng mga mga pulis na nagpunta sa lugar.

Pagdating ng mga ito sa lugar, nakita sila ng look-out na si Yul Retonal na armado ng baril na agad tumakbo at pinaputukan ang mga pulis.

Hinabol naman ito ng mga pulis hanggang sa mapatay ang suspek.

Habang ang isang suspek ay nasa loob ng bahay na kinilalang si Teofisto Trinidad, at pagpasok sa loob ng mga ay pulis bigla nitong inundayan ng saksak ang operatiba kaya napilitan nilang barilan si Trinidad na agad nitong ikinamatay.

Nakuha sa pangangalaga ng mga napatay na suspek ang isang caliber .38 revolver, isang patalim, at ilang sachet ng shabu. RENE MANAHAN

BAGUIO CITY – Anim na babae na umano’y miyembro ng “Wonder Woman” robbery syndicate ang naaresto na nasa aktong nagnanakaw sa Baguio City kahapon, August 9.

Kinilala ng Baguio City Police Office (BCPO) Station 7 ang mga suspek na sina Theresita Medina Fulgencio, 64; Lorna Miranda Pagod, 51; Susan Ipac Imperio, 57; ng Carmen West, Rosales, Pangasinan; Gloria Ferrer Sinco, 62; Grace Venturia Talania, 41; ng Pugo, Sinait, Ilocos Sur; Imelda Tabay Sinco, 49, ng Bungro, Cabugao, Ilocos Sur; Estrella Galvez at Suzete Tinaza.

Sa imbestigasyon, sinabi ng BCPO na ang mga suspek ang nahuli sa isang central district ng Baguio City.

Napag-alamang ang mga suspek ay pawang umaakyat lamang sa Baguio City para lang makapagnakaw lalo na sa mga turista.

Ayon sa BCPO Station 7, ang mga suspek ay responsable sa mga nakaraang insidente ng bag slashing at snatching.

Nakakulong sa ngayon ang mga suspek sa BCPO Station 7 at nakatakdang sampahan ng kaukulang kaso. ALLAN BERGONIA

NIYANIG ng magnitude 5.4 na lindol ang bayan ng Lila sa lalawigan ng Bohol, Huwebes ng umaga.

Naitala ang pagyanig alas-8:43 ng umaga sa 2 kilometers East ng Lila.

May lalim na 521 kilometers ang lindol at tectonic ang origin.

Ayon sa Phivolcs, hindi naman inaasahang magdudulot ng aftershocks ang pinsala ang nasabing pagyanig.

Unang iniulat ng Phivolcs na magnitude 5.6 ang lakas ng lindol at sa Dimiao, Bohol ito tumama.

Pero kalauna’y nagpalabas ng updated information ang Phivolcs at ibinaba ang magnitude sa 5.4 at binago rin ang epicenter ng lindol. JOHNNY ARASGA