INAMIN ni Magdalo Rep. Gary Alejano na hindi maituturing na masaker ang naganap na pagpatay kay Mayor Reynaldo Parojinog at sa 14 na iba pa sa Ozamis City.

Aniya, maraming mga sirkumstansya ang dapat ikonsidera bago magkaroon ng konklusyon na ang naganap na pagsalakay ng mga tauhan ng Philippine National Police (PNP) ay masaker o hindi.

“I cannot conclude as of now, pero sa akin definetly ang war on drugs maraming liable diyan. Kaya nga ako nagkaso ng crime against humanity kay Presidente Duterte kasi itong war on drugs ay isang crime against humanity.”

Marami pa aniyang mga impormasyon ang dapat na ikonsidenta at ayaw din niyang maging unfair sa PNP kung hindi makikita ang lahat ng anggulo.

“Pero initially, sabi ko nga it looks like that (massacre). Ang PNP kasi binibigyan ng misyon iyan, eh. Gagawin niya ang misyon niya kaya nga dapat maga-guide siya kung ano ang dapat na susundan,” paliwanag ni Alejano.

Magkagayunman, kumbinsido ang kongresista na posibleng tamaan sa panibagong usapin na ito si Pangulong Rodrigo Duterte dahil nananatiling ito ay nasa ilalim ng kaniyang responsibilidad.

“Lahat ng ginagawa ng gobyerno, ang may responsibilidad ay ang pangulo. So whatever the government does or fails to do it is the responsibility of the president.” MELIZA MALUNTAG

KINUWESTYON kahapon ni Sen. Chiz Escudero ang sistema ng pagsisilbi ng search warrant ng pulisya sa isinagawang paglusob sa tahanan ni Ozamiz City Mayor Reynaldo Parojinog at dalawa pang ibang lugar na ikinamatay ng 14 katao.

Sa panayam, sinabi ni Escudero na nilabag ng pulisya hindi lamang ang Saligang Batas sa pagsisilbi ng search warrant, maging ang police manual ng Philippine National Police (PNP).

“Nangyari ito ng madaling-araw kaya lumitaw ang kuwestyon dahil alinsunod sa itinakda ng Rules of Court at police manual ng PNP, dapat isinisilbi ang search warrant sa araw, at hindi sa madaling araw,” giit ni Escudero.

Sinabi ni Escudero, isang abogado bilang propesyon, maaaring isilbi ang search warrant sa madaling araw kung pinayagan ng hukom ngunit kailangan din dumaan sa pagsusuri.

“Dahil malinaw sa probisyon ng ating Saligang Batas. Katunayan, may hiwalay na probisyon sa searches and seizure lamang, na nagpapatingkad kung gaano kahalaga ang isyung ito o ang bagay na ito,” giit ni Escudero.

Aniya, nakatakda sa Saligang Batas, partikular ang “Article 3 in the Bill of Right, Section 2 provides: the right of the people to be secure in there persons, houses, papers and effects against unreasonable searches and seizure of whatever nature and for any purpose shall be enviable and that no search warrant or warrant of arrest shall issue except upon probable cause to determine personally by the judge after examination under oath or affirmation of the complainant and the witnesses may produce “

“Mahaba ‘yung provision. In particular, describing the place can be searched, persons or things to be seized,” paliwanag pa ng senador.

Nitong Linggo, dakong 2:30 ng madaling-araw, nilusob ng Ozamiz City Police kasama ang ilang miyembro ng Criminal Investigation and Detection Group (CIDG) sa naturang rehiyon ang tahanan ni Parojinog.

Napatay si Mayor Parajinog kabilang ang asawa nitong si Susan, kapatid na si Octavio, isang board member, at ilang pang miyembro ng pamilya at security personnel nito.

Nakakulong naman si Vice Mayor Nova Princess Parojinog at sumasailalim sa imbestigasyon.

Sa paliwanag ng pulisya, sinabi ni S/Supt. Jaysen de Guzman ng Misamis Occidental provincial Police office, humingi sila ng tulong sa Ozamiz City Police upang isilbi ang warrant sa pamilya Parojinog, ngunit sinalubong sila ng bala pagpasok pa lamang sa Brgy. San Roque.

“Pinayagan kaming magsilbi ng search warrant sa araw o gabi,” ayon kay De Guzman.

Ngunit hindi ito tinanggap ni Escudero dahil malinaw sa Saligang Batas at PNP Police Manual na dapat isinisilbi ang warrant sa araw.

“Hindi ko ito (anytime of the day) maintindihan dahil uulitin ko, sinasabi ng sariling manual ng PNP bilang general rule, na dapat isilbi ito sa araw,” giit ni Escudero.

Tinukoy ni Escudero ang December 2000 case, ang People vs Court of Appeals na nagdesisyon ang Korte Supreme bases sa “reasonableness” kasi ipinagbabawal ng Saligang Batas ang “unreasonable search and seizure.”

Aniya, ibang kaso ito, magkaibang-magkaiba dahil 7:30 pm pinayagan ng Korte, ngunit hindi 2:30 ng madaling-araw.

“At 7:30 in the evening. This was is a separate case, it’s a totally different case to served at 2:30 in the morning. Now, what’s the exemption? If the affidavit, if the witnesses, the judge interviewed says so,” aniya.

Hindi rin pinatulan ni Escudero ang katwiran ng pulisya na baka makapuslit ang droga sakaling lusubin nila ito sa araw.

“Ayon sa pulisya, matagal nang under surveillance ang bahay nila. Hindi ko rin maintindihan na ayon sa panayam sa isang pulis, as a rule, were serving search warrants at night daw,” himutok ng senador. ERNIE REYES

HINDI lang ang Islamic State-linked terorrists kundi nakikipaglaban na rin ang tropang sundalo sa mas maliliit pero mas mabagsik na kaaway, ang dengue-carrying mosquitoes, pahayag kaninang Lunes ng umaga ng military.

“Unsanitary na po talaga ang battle zone, hindi na po ganoon ka-safe kaya maaaring nag-breed na po ang mga lamok na ito at nagiging sanhi po ng sakit na iyan,” pahayag ni Armed Forces spokesperson Brig. Gen. Restituto Padilla.

Sa naunang ulat ng isang pahayagan na may 25 na dundalo na sa Marawi ang tinamaan ng dengue, typhoid fever at diarrhea sanhi ng poor environmental condition sa lungsod.

Bilang tugon sa pangangailangan, sinabi ni Padilla na nagbigay na ang gobyerno ng insect repellent sa mga sundalo. Ipinagpaliban naman ang defogging operations para masawata ang potential breeding grounds ng mga lamok habang ang bakbakan sa lakeside ay patuloy na sumisiklab.

Sinabi rin ni Padilla na regular na nakakatanggap ang tropang sundalo ng potable water supply para hindi na maulit ang diarrhea outbreak na tumama sa kanilang hanay sa mga unang araw ng bakbakan.

Nakikipagbakbakan ang tropa ng pamahalaan sa may daan-daang pro-Islamic State militants na sumalakay sa Marawi City noong Mayo 23. May 600 katao na ang namatay habang aabot naman sa 500,000 na residente ang nagsilikas sa Marawi at iba pang parte ng Lanao del Sur. BOBBY TICZON

HULI ang isang lalaki at kanyang live-in partner na umano’y kapwa estapador at sangkot sa iligal na droga sa isinagawang entrapment operation ng mga pulis dahil sa pangloloko sa negosyanteng babae sa Caloocan City kahapon.

Kinilala ni Caloocan police chief S/Supt. Chito Bersaluna ang mga suspek na si Arvin Nepomuceno, 28, ng 123 Dao St., Marikina Heights, Marikina City, at live-in partner nitong si Laila Beldua, 37, ng 95-B Gabronino St., Gen. Mascardo, Bagong Barrio, na naaresto dakong 3:00 ng hapon sa Monserrat St., Morning Breeze, Brgy. 83, Bagong Barrio ng mga tauhan ng Police Community Precinct (PCP) 1 sa entrapment operation.

Ayon kay PCP-1 commander C/Insp. Avelino Protacio II, ang pagkakaaresto sa mga suspek ay dahil sa reklamo ng negosyanteng si Criselda Madrid, 32, ng 77 Gen. Tirona St., Bagong Barrio.

Sinabi ng biktima na nagbigay siya ng pera sa mga suspek para sa housing loan remittances sa Asia World Housing Developer, Inc. ng aabot sa P100,000 at ang P25,000 na una niyang ibinigay sa reservation fee.

Gayunpaman, nadiskubre ng biktima na ang mga suspek na parehong real estate marketing agents ay matagal nang hindi konektado sa naturang kumpanya kaya humingi agad itong humingi ng tulong sa mga pulis.

Narekober ng pulisya sa mga suspek ang tatlong transparent plastic sachet na naglalaman ng hindi pa matukoy na halaga ng pinaniniwalaang shabu habang ang ilang mga drug paraphernalia ay nakuha sa loob ng kanilang gray Toyota Sedan.

Sinabi pa ni C/Insp. Protacio, ang nakuhang cellphone kay Nepomuceno ay may mga mensahe rin na nagpapahiwatig sa transaksyon sa iligal na droga. RENE MANAHAN

SISIMULAN na ang deliberasyon sa P3.767-trilyong national budget na kinapapalooban din ng dagdag-pondo na P10-bilyon para sa rehabilitasyon ng Marawi City.

Sa briefing ng House Committee on Appropriations, inimbitahan ni Davao City Rep. Karlo Alexei Nograles, na siya ring chairman ng komite, ang mga opisyal ng Development Budget Coordination Committee (DBCC).

Unang magpapaliwanag sa pagdinig bukas sina Budget Sec. Benjamin Diokno, Finance Sec. Carlos Dominguez III at iba pa ukol sa macro assumptions para sa badyet ng administrasyong Duterte sa susunod na taon.

“We will start the budget process tomorrow (Tuesday) where DBCC officials will make a macro presentation of the national budget.May funding ring kasama for the rehabilitation of Marawi City,” ani Nograles.

Ang DBCC ay kinabibilangan ng Department of Budget and Management (DBM), Department of Finance (DoF), Bangko Sentral ng Pilipinas (BSP) at National Economic Development Authority (NEDA).

Ang Department of Education (DepEd) ang may pinakamalaking alokasyon na P691.1-bilyon, ang Commission on Higher
Education (CHED) naman ay may P13.5-bilyong pondo at ang State Universities and Colleges (SUCs) ay may P64.6-bilyon.

Sinundan ito ng Department of Public Works and Highways (DPWH) na may P643.3-bilyon.

Ang badyet para sa 2018 na P3.35-trilyon ay mas mataas nang 12.4% kumpara ngayong 2017. MELIZA MALUNTAG

IPINAHAYAG ni Philippine National Police (PNP) chief Ronald dela Rosa na mayroon na namang bagong druglord na nagsisimula nang mamayagpag sa Eastern Visayas.

Ayon kay Dela Rosa, itong nasabing bagong druglord ay hindi pa kasama sa listahan ng narco-politicians ni Pangulong Rodrigo Duterte.

Gayunman, mayroon ding isa pang hinihinalang druglord na nasa listahan na ng pangulo.

Naniniwala naman si Dela Rosa na hindi talaga basta kayang iwan ng mga sindikato ang bilyong pisong kita sa industriya ng iligal na droga.

Inihalintulad pa niya ito sa mga kaso ng mga tiwaling pulis na sa kabila ng pagkakaroon ng Counter-Intelligence Task Force ng PNP, ay hindi pa rin natitinag sa mga maling gawain.

Gagawa at gagawa pa rin kasi aniya ng paraan ang mga ito para maituloy ang kanilang mga iligal na aktibidad. JOHNNY ARASGA

POSIBLE umanong naburyong sa pagkakatalo ng mahigit P20-milyon sa casino kaya naisip na magbigti ang isang Korean national sa inuupahan nitong condo sa Malate, Maynila.

Patay na nang matagpuan ang biktimang si Hyun Jin Do, 38, computer generate, ng 1001 Asmiral Bay Suites at nanunuluyan sa 2138 Aldecoa St., Roxas Blvd., Malate, Maynila gamit ang nylon cord.

Sa ulat ni PO3 Marlon San Pedro ng Manila Police District-Homicide Section, dakong 12:13 kaninang madaling-araw nang madiskubre ng kaibigan na si Sang Sik Yang ang biktima sa loob ng kanyang condo sa Malate.

Nabatid na Hunyo 14 nang dumating sa bansa ang biktima bilang tourist kasama ang kaibigan.

Nagsilbi namang driver ng magkaibigan si Arnulfo Atok, Jr.

Ayon sa imbestigasyon, huling nakitang buhay ang biktima noong Hunyo 31 dakong 4:00 at bumalik sa kanilang bahay ng kanyang driver.

Sinundo naman umano ito ni Sang subalit hindi ito sumasagot sa tawag dahilan upang humingi ng tulong ang kaibigan sa may-ari ng condo kung saan nadiskubreng nakabigti ang biktima.

Sinabi naman ni Atok sa pagtatanong ng pulisya na natalo nga ng naturang halaga ang biktima sa Midas Casino sa Pasay City noong Hunyo 27 – 30 at nagpahinga lang ito noong Hunyo 31.

Nakipag-ugnayan na ang pulisya sa Korean Embassy upang maipagbigay-alam sa kamag-anak ng biktima ang pangyayari.

Ang bangkay ng biktima ay pansamantalang inilagak sa Archangel Funeral home upang isalang sa kanyang awtopsiya at safekeeping. JOCELYN TABANGCURA-DOMENDEN

PATAY ang isang pulis na nasibak dahil sa absence without official leave (AWOL) matapos pagbabarilin ng riding-in-tandem sa bayan ng Villaba sa Leyte.

Ayon kay Villaba Municipal Police Station chief S/Insp. Ruben Recilla, kinilala ang biktimang si Hegino Gaspay na dating pulis at naging traffic enforcer.

Papunta na sa munisipyo si Gaspay para mag-report sa trabaho matapos niyang ihatid sa paaralan ang kanyang anak, nang bigla siyang harangin ng mga suspek sa kahabaan ng national highway sa Brgy. A. Tumamak.

Sa puntong iyon, agad siyang binaril ng isa sa mga suspek na sakay ng motorsiklo, na sinundan ng mabilis nilang pagtakas.

Ayon sa kinakasama ni Gaspay, bago nangyari ang insidente ay may napansin silang mga motorsiklong ilang beses nang lumiligid-ligid sa kanilang bahay sa Brgy. Libagong. -30-

MULING tataasan ng mga kumpanya ng langis ang presyo ng kanilang mga produktong petrolyo ngayong unang araw ng buwan ng Agosto.

Ngayong araw magiging epektibo ang P0.35 na dagdag-presyo ng kada litro ng gasolina ng mga kumpanyang Petron, Total, PTT, SeaOil, Eastern, Phoenix, Shell at Flying V.

Magtataas naman ng P0.50 ang halaga ng kada litro ng diesel ng mga naturang kumpanya.

Bukod dito, magtataas rin ng P0.40 ang halaga ng kada litro ng kerosene ng mga kumpanyang Petron, SeaOil, Shell at Flying V.

Magsisimula alas-6:00 ng umaga ang pagpapatupad ng price increase sa lahat ng mga nabanggit na kumpanya, maliban sa Flying V na nauna nang magpatupad kaninang hatinggabi.

Noong nakaraang linggo ay nagtaas rin ang presyo ng langis hanggang P0.90.

Samantala, magtataas naman ng P5.36 sa kada kilo ng LPG ang Solane, habang P5.35 naman ang itataas sa kada litro ng Petron epektibo rin ngayong araw.

Apektado rin ang AutoLPG na matataas naman ng P3.00 kada litro. JOHNNY ARASGA

ITOGON, BENGUET – Patay ang dalawang minero patapos itong ma-gas poison kahapon (July 31) sa loob ng kuweba sa Gumatdang, Itogon sa nasabing lalawigan.

Nakilala ang dalawang biktimang sina Robert Binay-an Gorteza, 28, at Anthony Gorteza Salas, 20, parehong binate, at mga tubong Bagulin, La Union.

Sa paunang imbestigasyon, sinabi ng Itogon police na ang dalawang minero ay pumasok lamang sa loob ng kuweba upang sumilong mula dahil sa sama ng panahon.

Lingid sa kaalaman ng dalawa (Gorteza at Salas), mayroon palang gas leak na nanggagaling sa Mile Site, Gumatdang at nadiskubre ang dalawang bangkay dakong ala-1:00 ng hapon kahapon.

Nakita pa ang dalawang biktima ng rescue team na magkatabi sa loob ng kuweba. ALLAN BERGONIA

TIGOK ang isang hinihinalang lider ng illegal drug at gun-running group sa Laguna matapos ang isinagawang drug raid sa kanilang hideout.

Kinilala ang mga napatay na sina Flores Aram at Edgar Ramos.

Ayon sa hepe ng Laguna Police Intelligence Unit na si Supt. Vicente Cabatingan, dati nang sumuko si Aram sa kanilang kampanya laban sa iligal na droga.

Si Ramos naman ay naaresto na rin nila, ngunit kalauna’y pinakawalan din.

Ayon kay Cabatingan, sinalakay ng mga awtoridad ang isang farm lot sa Brgy. Dolores sa San Pablo, Laguna ngunit agad silang pinaputukan ng mga suspek.

Agad na namatay sina Aram at Ramos habang nakatakas naman ang lima pang suspek.

Aniya, tila sinadya ng dalawa na maiwan para hayaang makatakas ang kanilang mga kasamahan.

Ayon pa kay Cabatingan, binuo ng mga suspek ang “Posporo Gang” kung saan ay tinatago nila ang iligal na droga sa loob ng mga matchbox.

Mayroon din silang ginawang kubo na siya namang ginagamit bilang shabu tiangge.

Narekober ng pulisya ang dalawang kalibre 45 na baril at shabu na nakasilid sa loob ng ilang matchboxes. JOHNNY ARASGA

UTAS ang isang mister habang kritikal naman ang asawa nito matapos pagbabarilin ng hindi kilalang mga suspek sa loob ng kanilang saksakyan sa Caloocan City kagabi.

Dead-on-arrival sa Manila Central University (MCU) hospital sanhi ng mga tinamong tama ng bala sa katawan si Glenn Bernardo, 35, habang patuloy namang inoobserbahan sa naturang ospital ang asawa nitong si Maricar, 28, kapwa ng 275 3rd St., 9th Ave., Brgy. 91.

Sa ulat ng pulisya, alas-9:30 ng gabi, nasa loob ng kanilang Toyota Corolla kotse na nakaparada sa harap ng PNB Bank sa EDSA, Brgy. 86 ang mag-asawa nang bigla na lamang sumulpot ang anim na armadong hindi kilalang mga suspek at pinaulanan ng bala ang sasakyan ng mga biktima.

Matapos ang insidente, mabilis na tumakas ang mga suspek sa hindi matukoy na direksyon habang isinugod naman ang mga biktima sa MCU hospital.

Narekober ng pulisya sa pinangyarihan ng insidente ang siyam na basyo ng bala ng kalibre .45 pistola at walong basyo ng bala mula naman sa kalibre .9mm pistol na isusumite sa PNP Crime Laboratory para ballistic examination.

Hinala ng pulisya, posibleng may kinalaman sa iligal na droga ang motibo sa insidente dahil nakatanggap sila ng impormasyon na financier diumano ng iligal na droga ang mga biktima habang patuloy naman ang follow-up imbestigasyon upang matukoy ang pagkakilanlan ng mga suspek. RENE MANAHAN

DEDBOL ang 60-anyos na kapatid ng tabloid reporter matapos pagbabarilin sa harap mismo ng kanyang mga kainuman ng hindi kilalang suspek sa Valenzuela City kagabi.

Dead-on-the-spot sanhi ng tinamong tama ng bala sa mukha, leeg at katawan ang biktimang si Antonio Verzola, 60, ng 62 Christmas St., Sta. Lucia Village, Phase 4, Punturin.

Ayon kay Valenzuela deputy police chief-for-operation Supt. Rey Medina, dakong 7:30 ng gabi, nakikipag-inuman ang biktima sa kanyang mga kaibigan sa labas ng bahay ng saksing si Danny Esquida sa Blk. 3, Lot 10, Sampaguita St., Sta. Lucia Village nang bigla na lamang sumulpot ang suspek at walang sabi-sabing pinagbabaril si Verzola.

Matapos ang insidente, mabilis na tumakas ang suspek sa hindi matukoy na direksyon habang dumating naman sa insidente ang mga tauhan ng City Rescue Unit at tinangka pang i-revive ang biktima.

Ang biktima ay kapatid ng tabloid columnist na si Ed Dan Verzola habang patuloy naman ang isinasagawang imbestigasyon ng pulisya upang matukoy ang pagkakilanlan ng mga suspek ay ang tunay na motibo sa insidente. RENE MANAHAN

PLANO ng Quezon City government ang pagpapasara ng Payatas sanitary landfill sa katapusan ng 2017.

Sinabi ni City Administrator Aldrin Cuña kaninang umaga na inaasikaso na nila ang permanenteng pagpapasara dahil malapit na ang sanitary landfill sa kanyang carrying capacity limit, pitong taon matapos itong buksan.

Parte ng Payatas landfill ay pansamantalang isinara nitong nakaraang linggo sanhi ng monsoon rains.

“Umuulan. Hindi kami makapag-dump ng basura. We temporarily slowed down the phase of disposal into the landfill,” pahayag ni Cuña.

“Wala namang danger. Kaya lang, dahil malambot ang lupa… Ang truck ‘pag dumaan sa malambot na lupa, baka mabalahaw,” dagdag nito.

Sa ngayon, tinatapon ang mga basura ng lunsod sa isang sanitary landfill sa Rizal, na inaprubahan ng MMDA. BOBBY TICZON

NAGPOSITIBO ang napatay na si Ozamiz City Mayor Reynaldo Parojinog sa gunpowder nitrate, pahayag kaninang Huwebes ng umaga ni Philippine National Police (PNP) spokesperson C/Supt. Dionardo Carlos.

Ito aniya ang partial report mula sa Crime Laboratory Region 10, at sinabing si Parojinog ay nagtamo ng dalawang gunshot wounds sa mukha at dibdib.

“Positive for paraffin test or gunpowder nitrate si Mayor Reynaldo Parojinog at iba pa nilang kasama. Si Mayor Parojinog, may two gunshot wounds sa chest and face,” pahayag nito sa isang press conference.

Maliban aniya sa mayor, pito sa 15 kaswalidad sa predawn raid ay naging positibo rin sa paraffin test.

Sinabi ni Carlos na kapag ang tao’y naging positibo sa paraffin, ito’y nagpaputok ng kanyang baril.

“Ibig-sabihin sa firearm near their body or limb was fired kaya nagkaroon ng gunpowder burns,” pahayag nito.

May kabuuang 15 katao ang namatay sa lugar ng putukan, na naganap hanang isinisilbi ng puloisya ang search warrants sa bahay na pag-aari ng Parojinog family dakong 2:30 ng madaling-araw nitong nakaraang Linggo.

Ang pang 16 fatality ay namatay sa ospital kahapon.

Kabilang sa mga namatay ang Ozamiz City mayor, ang kanyang misis na si Susan, at kanyang kapaid na si Provincial Board Member Octavio Parojinog. BOBBY TICZON

PITONG hinihinalang drug users ang nahuli sa isinagawang anti- drug operation ng mga pulis sa Dream World hotel sa Cubao, Quezon City kahapon ng madaling-araw, Agosto 3, Huwebes.

Sa report ni Supt. Louise Benjie Tremor, hepe ng Quezon City Police District (QCPD) Station 7-Cubao, kinilala ang mga nadakip na sina Majour Jose delos Reyes, 27, ng Balaos Ipunan, Cagayan; Amir Garcia, 24, ng 220 Cordero St., Arco Bato, Valenzuela City; Frank Fortu, 19, ng Pueto GAlera, Oriental Mindoro; Randy Navarro, 36, ng E. Rodriguez, Cubao; Paolo del Rosario, 23, ng Meycauayan, Bulacan; Ramil Diaz, 36, ng Cagayan de Oro, at Jowarski Pantanosa, 40, ng Bugalion, Pangasinan.

Ayon sa pulisya, nadakip ang mga suspek dakong 3:00 ng madaling-araw sa Dream World Hotel sa Roxas Ave. cor. Araneta Ave., Araneta Center, Brgy. Socorro, Cubao, QC.

Ito’y matapos ikasa ang buy-bust operation ng Cubao Police Station-Drug Enforcement Unit at Philippine Drug Enforcement Agency (PDEA) Unit Regional Unit (PDEA-RO) NCR operatives.

Nakumpiska sa mga suspek ang pitong sachet ng shabu, isang bukas na plastic ng shabu, digital weighing scale , Samsung Duos phone at buy-bust money na nagkakahalaga ng P840.00. SANTI CELARIO

TATLO pang lokal opisyal ang tumetisgo laban kay dating Senador Bong Revilla kaugnay sa umano’y anomalya sa pork barrel nito.

Sa pagpapatuloy ng pagdinig sa plunder case ni Revilla ng Sandiganbayan First Division, tumestigo ang tatlong dating mga lokal na opisyal na wala silang natanggap na anumang farm implements at livelihood kits mula sa opisina nito o maging sa mga non-government organizations na pinili nito para paggamitan ng kanyang Priority Development Assistance Fund (PDAF).

Sinabi nina Pangasinan Vice Governor Jose Ferdinand Calimlim, dating mayor ng bayan ng Mapandan at ngayo’y mayor ng Tumauini, Isabela na si Arnold Bautista, na pineke ang kanilang mga pirma sa mga NGO certificates of acceptance, delivery reports at acknowledgement receipts ay pineke.

Sinabi naman ni Piat, Cagayan Vice Mayor Leonel Guzman na kailanman ay hindi nakatanggap ng anumang assistance ang kanilang bayan mula kina Revilla noong siya pa ang mayor kahit na ang kanilang bayan ay isa sa mga pinangalanang benepisyaryo ng nasa P3.9-milyong halaga ng power sprayers at iba pang farm implements.

Nag-object naman ang abogado ni Revilla na si Estelito Revilla, dating Solicitor General, sa pagpresenta ng mga witness dahil aniya ang mga testimonya ng mga ito ay nakabase sa maling premise dahil wala naman ang pangalan ni Revilla sa mga dokumentong kung saan tumetestigo ang mga ito.

Ayon naman kay lead prosecutor Joefferson Toribio, ang mga naturang testimonya ay sang-ayon sa mga naunang testimonya ng primary state witness na si Benhur Luy at iba pang whistle blower na hindi naipatupad ang mga PDAF projects ni Revilla kung saan ang lahat ng mga liquidation reports at iba pang supporting documents ay umano’y pineke. JOHNNY ARASGA

NAMATAY sa isang ambush ang isang dating newspaper editor at kapatid niyang negosyante sa San Juan City kagabi, Agosto 3.

Ayon kay Eastern Police District (EPD) director C/Supt. Romulo Sapitula, kinilala ang mga biktimang sina Christopher Marasigan na isang negosyante at kapatid niyang si Mike na dating taga-media.

Sa salaysay ng mga nakasaksi sa insidente, nakasakay ang magkapatid sa isang metallic gray na CC5 Mazda (WOU 583) na bumibiyahe sa kanto ng V. Cruz at Barcelona St. sa San Juan pasado alas-6:00 ng gabi nang buntutan ito ng mga suspek at pagbabarilin nang maabutan.

Nang matiyak na napuruhan ang target ay mabilis na sumibat ang mga ito at hanggang sa ngayon ay hindi pa rin natutukoy ang pagkakakilanlan ng mga ito.

Dead-on-the-spot si Mike, habang dinala pa sa San Juan Medical Hospital si Christopher ngunit kalauna’y namatay din.

Ayon naman kay Ssupt. Lawrence Coop, narekober ng mga pulis ang 34 na basyo ng bala, apat ay mula sa cal. .45 na baril habang ang 30 naman ay mula sa 9mm na baril.

Sa ngayon ay wala pang ideya ang pulisya sa motibo sa pagpatay sa magkapatid pero patuloy nang iniimbestigahan ang naturang insidente. JOHNNY ARASGA

INUGA ng magnitude 4 na lindol ang bayan ng Saranggani sa lalawigan ng Davao Occidental.

Naitala ng Phivolcs ang pagyanig alas-4:56 ng umaga sa 232 kilometers timog ng Sarangani.

Tectonic ang origin ng lindol at may lalim na 34 kilometers.

Samantala, alas-7:14 naman ng umaga, tumama ang magnitude 2.9 na lindol sa bayan ng San Marcelino sa Pangasinan.

Ang epicenter ng lindol ay naitala sa 8 kilometers silangan ng San Manuel.

May lalim na 23 kilometers ang lindol at tectonic din ang origin.

Naitala naman ang intensity 3 sa bayan ng San Manuel.

Ayon sa Phivolcs, hindi inaasahang magdudulot ng pinsala ang dalawang lindol. -30-

ISA nang ganap na batas ang “The Universal Access to Quality Tertiary Education Act”.

Ito’y matapos lagdaan ni Pangulong Rodrigo Roa Duterte ang panukalang batas para sa libreng matrikula sa mga state colleges and universities (SUCs).

Inanunsyo ni senior deputy executive secretary Menardo Guevarra sa Mindanao Hour briefing sa Conrad Hotel sa Pasay na nilagdaan na ni Pangulong Duterte ang libreng tuition fee para sa 112 SUCs, local universities and colleges, at state-run technical-vocational schools.

Sinabi ni Guevarra na Hulyo 5 nang ma-transmit sa Office of the President (OP) ang nasabing batas na naipasa sa Kongreso noong Mayo.

Ani Guevarra, 30 araw na ang nakalilipas ay nagkaroon ng matinding diskusyon hinggil sa mabigat na budgetary implications kapag pinondohan ang free tertiary education.

Tinimbang aniyang mabuti ni Pangulong Duterte ang short at long-term benefits ng libreng tuition fee sa SUCs.

Nagdesisyon aniya ang Chief Executive na bigyan na ng long-term benefits ang mga mag-aaral na umaasa sa libreng tuition fee.

Batid aniya ng Pangulo na malaking hamon sa budget ng bansa ang free tuition fee lalo pa’t maraming gastusin ngayon ang pamahalaan gaya ng problema sa Marawi.

“If there’s a will, there’s a way,” ani Guevarra.

Magkakaroon din aniya ng re-alignment ng budget para mapaglaanan ng pondo ang pag-aaral sa mga SUCs.

Umaasa naman ang pamahalaan na magkakaroon ng local at national donations para matulungan ang gobyerno na ipagpatuloy ang libreng tuition fee sa SUCs.

Matatandaang nagpahayag si Budget Sec. Benjamin Diokno na mangangailangan ang pamahalaan ng P100-billion para matustusan ang libreng tuition fee ng state universities and colleges. KRIS JOSE