MARIING itinanggi ni Communist Party of the Philippines (CPP) founding chair Jose Ma. Sison ang ipinagsigawan ni Pangulong Rodrigo Duterte sa kanyang ikalawang State of the Nation Address (SONA) na mayroon siyang colon cancer.

Sinabi ng 78-anyos na si Sison na maganda ang kanyang kalusugan at wala siyang iniindang cancer.

Imahinasyon lamang aniya ng pangulo ang colon cancer na sinasabi nito.

Paliwanag pa ni Sison, bagama’t totoong naospital siya noong March 20 sa Utrecht University Medical Center, wala itong kinalaman sa ibinibintang ng pangulo na colon cancer.

Sa halip, na-confine siya aniya dahil sa rheumatoid arthritis at kawalan ng ganang kumain dahil sa pagpapalit ng panahon sa The Netherlands.

Dagdag pa nito, dapat ay maging seryoso na lamang ang pangulo sa iba pang isyu tulad ng muling pagbabalik sa negotiating table ng panig ng gobyerno at National Democratic Front (NDF). JOHNNY ARASGA

IPINATUPAD na ngayon ng mga kumpanya ng langis ang panibagong umento sa presyo ng mga produktong petrolyo.

Nasa P0.90 ang itinaas sa presyo ng kada litro ng gasolina, P0.65 naman sa kada litro ng diesel habang P0.80 ang umento sa kada litro ng kerosene.

Alas-12:01 kanina nang ipatupad ng kumpanyang Flying V ang kanilang oil price adjustment habang alas-6:00 naman ngayong umaga susunod ang mga kumpanyang Jetti, Total, Phoenix Petroleum, Petron, Shell.

Ang panibagong oil price adjustment na ito ng mga oil companies ay bunsod pa rin ng paggalaw ng presyo ng langis sa pandaigdigang pamilihan. JOHNNY ARASGA

SA ikalawang pagkakataon ng State of the Nation Address (SONA) ni Pangulong Rodrigo Duterte ay “no show” uli si dating pangulong Benigno Aquino.

Dumalo naman sa ikalawang pagkakataon ang mga dating pangulo na sina Fidel Ramos, ngayo’y Manila Mayor Erap Estrada at Pampanga Rep. Gloria Macapagal-Arroyo.

Nasa VIP gallery naman sina Taguig Mayor Lani Cayetano, dating mga speakers Prospero Nograles at Jose de Venecia, FVR , CGMA, Paola Alvarez na anak ni Speaker Pantaleon Alvarez, Vice President Leni Robredo, Bing Pimentel (asawa ni dating senador Nene Pimentel at nanay ni Koko), Erap at SC Chief Justice Ma. Lourdes Sereno.

Napansin din ang suot ni FVR na T-shirt na may nakalagay na ‘support our troops.’

Si Pangulong Duterte ay dumating Batasan Pambansa sakay ng chopper alas-4:00 ng hapon ngunit hindi agad ito nagtungo sa loob ng session hall at sa halip ay nagpunta muna sa tanggapan ng Presidential Legislative Liaison Office (PLLO).

Dito’y kinausap niya ang liderato ng Kongreso na sina Senate President Koko Pimentel, Senate Majority Leader Tito Sotto, Speaker Alvarez, Majority Leader Rodolfo Farinas at dating speaker Sonny Belmonte bandang alas-4:14 ay lumabas na ito ng PLLO Office patungong session hall kung saan nagawa pa nitong magpalitrato kay Pangasinan Rep. Baby Arenas.

Gaya ng inaasahan, hindi rin naiwasan ang paminsan-minsang pagmumura ng pangulo kasabay ng mga patutsada na may kahalong biro. MELIZA MALUNTAG

LALO pang lumakas ang tropical depression Gorio.

Huli itong namataan ng PAGASA sa 440 kilometers Northeast ng Borongan City, Eastern Samar.

Taglay nito ang lakas ng hanging aabot sa 60 kilometers bawat oras (kph) malapit sa gitna at pagbugsong aabot sa 75 kph.

Kumikilos ang bagyo sa direksyong North Northwest sa bilis na 15 kph.

Ayon sa PAGASA, maliit naman sa ngayon ang tyansa na ito’y tumama sa kalupaan. Maliban sa Bagyong Gorio, umiiral din ang Habagat sa Luzon at Visayas.

Samantala, itinaas na ng PAGASA ang heavy rainfall warning sa Metro Manila at mga kalapit na lalawigan.

Dahil sa Habagat, yellow warning ang umiiral sa Metro Manila, Bulacan, Cavite, Rizal at Bataan.

Maari umanong makaranas ng pagbaha sa nabanggit na mga lugar.

Light hanggang moderate na pag-ulan naman ang nararanasan sa General Nakar at Real sa Quezon; Tarlac, Zambales, Laguna at Batangas.

Muling maglalabas ng rainfall advisory ang PAGASA mamayang alas-8:00 ng umaga. JOHNNY ARASGA

PATULOY pa rin ang palitan ng maaanghang na salita sa pagitan nina Pangulong Rodrigo Duterte at Communist Party of the Philippines (CPP) founder Jose Maria Sison na dati’y magkasundo.

Sa pinakahuling banat ni Pangulong Duterte, pinayuhan niya si Sison na magpakamatay na bilang pabor para sa pamahalaan ng Norway.

Ani Duterte kay Sison, tumanda na sa Norway si Sison pero ayaw pa rin nitong aminin na may sakit na siya.

Ayon pa sa pangulo, dapat ay maawa na lang si Sison sa Norwegian government kaya magpakamatay na lang ito.

“Sison, tumanda ka na lang diyan. Ayaw mo pa aminin na may sakit ka. Maawa ka naman sa Norwegian government. Pakamatay ka na lang,” ani Duterte.

Dagdag pa ng pangulo, kaya pinapaalis na sila Sison sa Norway dahil ang partidong humahawak na ngayon sa gobyerno ng naturang bansa ay natatalo na dahil sa gastos sa pagpapatira at pagpapagamot kay Sison sa ospital.

“Kaya nga pinapaalis na kayo sa Norway,” anang pangulo. “Alam mo, ’yung Norway, ‘yung partido ngayon na humawak ng gobyerno, matatalo. Ang issue dahil sa gastos na pinatira kayo doon at ’yung ospital mo, wala kang bayad-bayad,” dagdag pa niya.

Sa kanyang ikalawang State of the Nation Address (SONA), ibinunyag ng pangulo na may colon cancer si Sison, na agad naman nitong itinanggi.

Nagdesisyon na rin ang pangulo na tuldukan na ang peace talks sa mga komunista lalo na’t hindi pa rin tumitigil ang New People’s Army (NPA) sa mga pananambang at pangingikil sa mga residente. -30-

INUGA ng magnitude 4.4 na lindol ang bayanng Anini-y sa lalawigan ng Antique, Miyerkules (July 26) ng umaga.

Ayon sa Phivolcs, may lalim lamang na walong kilometro ang pagyanig na naitala alas 3:51 ng umaga sa 37 kilometers East ng Anini-y.

Dahil sa nasabing lindol, naramdaman ang intensity 2 sa San Jose de Buenavista, Antique.

Ang nasabing lindol ay nasundan pa ng limang aftershocks kabilang na ang magnitude 3.7 alas 4:24 ng umaga kung saan naitala naman ang intensity 2 sa Anini-y.

Hindi naman inaasahang magdudulot ng pinsala ang lindol. JOHNNY ARASGA

ILALARGA na ng gobyerno ang national identification system na naglalayong mapabilis ang pakikipagtransaksyon at serbisyo sa gobyerno.

Sa isinumiteng proposed 2018 national budget ng Malacañang ay naglaan si Pangulong Rodrigo Duterte ng P2-bilyon sa Philippine Statistics Authority (PSA) para masimulan ang biometrics ID system.

Sa naging budget message ni Pangulong Rodrigo Duterte sa Kongreso, sinabi nitong maaaring magamit ang naturang ID para sa aplikasyon ng passport, driver’s license at pakikipagtransaksyon sa SSS, Pag-IBIG, PhilHealth at NBI.

Umaasa rin ang Pangulo na makatutulong ang pagkakaroon ng national ID ito upang masiguro na ang mga tunay na mga benepisaryo ng conditional cash transfer program ng gobyerno ang makikinabang nito. -30-

TULUYANG ibinasura ng Korte Suprema ang isa pang inihaing petisyon na kumukuwestyon sa idineklarang Martial law ni Pangulong Rodrigo Duterte sa Mindanao.

Labing limang (15) mahistrado ang bumoto sa pagbasura sa inihaing petisyon nila Senadora Leila de Lima, Atty. Alex Padilla, dating Senador Wigberto Tañada at ilang obispo ng Simbahang Katolika.

Partikular na kinukuwestyon ng mga petitioner ang hindi pagdaraos ng joint session ng Kongreso para talakayin ang nasabing deklarasyon batay umano sa isinasaad ng Saligang Batas.

Ngunit nanindigan ang mga mahistrado na walang pang-aabuso sa kapangyarihan sa panig ng Kongreso at wala ring sinasabi ang Saligang Batas na obligado silang magsagawa ng sesyon para pagtibayin iyon.

Sa panig naman nila Associate Justices Marvic Leonen at Benjamin Caguioa, moot and academic na ang mga nasabing petisyon dahil nagpasya na ang Kongreso sa pamamagitan ng joint session noong Sabado para palawigin ang Martial law sa Mindanao hanggang sa katapusan ng taong ito. -30-

UMABOT sa 150 mga bahay ang tinupok ng apoy sa sunog na naganap sa Malabon City.

Ayon kay Camanava Fire Marshall, F/Supt. Crispo Diaz, nagsimula ang apoy sa isang bahay matapos may maiwanang niluluto.

Pasado alas-5:00 ng umaga nang magsimula ang sunog sa bahagi ng Dulong Herrera St.

Mabilis na kumalat ang apoy dahil pawang gawa sa light materials ang mga bahay at dikit-dikit.

Itinaas ito sa ikalimang alarma bago naideklarang under control bago mag-aalas-8:00 ng umaga.

Tinatayang aabot sa 300 pamilya ang nawalan ng tahanan sa sunog.

Ayon kay Diaz, isang residente naman na kinilalang si Daren Mediana ang nasugatan matapos magkaroon ng paso sa katawan. JOHNNY ARASGA

BINARIL habang nagpapahinga sa loob ng kanyang pedicab ang isang 33-anyos na lalaki ng riding-in-tandem kagabi sa Tondo, Maynila.

Namatay noon din sanhi ng tama ng bala sa iba’t ibang bahagi ng katawan ang biktimang si Ronald Martinez, alyas “Tisoy”, sidecar boy, ng 309 Romana St., Tondo.

Sa report ng Manila Police District (MPD)-homicide section, dakong 9:14 ng gabi nang maganap ang krimen sa J.P. Rizal St., malapit sa kanto ng Simoun St., Tondo.

Sa imbestigasyon, mag-isang nakaupo sa kanyang pedicab ang biktima nang bigla na lang sumulpot mula sa kanyang likuran ang dalawang suspek at kaagad siyang pinagbabaril na nagresulta sa kanyang agarang pagkamatay.

Nang matiyak na napuruhan ang biktima ay agad ding sumibat ang mga suspek sakay ng isang motorsiklo patungo sa Jacinto St.

Ayon sa ilang residente, apat na putok ang kanilang narinig at dito nila nakitang nakabulagta ang biktima.

Tinangka pang habulin ng ilang residente ang mga gunman ngunit hindi na rin sila umabot.

Sinabi naman ng ina ng biktima na si Gng. Regina Francisco, walang kaaway ang anak at matagal na ring tumigil sa paggamit ng droga kaya wala umano silang ideya kung sino ang posibleng pumatay sa anak.

Patuloy pang inaalam at iniimbestigahan ng pulisya ang insidente upang matukoy ang pagkakakilanlan ng mga salarin at motibo sa pamamaslang. JOCELYN TABANGCURA-DOMENDEN

INATASAN ng bagong batas ang Land Transportation Office (LTO) na palitan ang lahat ng plaka ng motorsiklo at tricycle nang mas malalaki at kitang-kita para madaling makilala at maiwasan ang riding-in-tandem sa pagtakas matapos gumawa ng krimen.

Inihayag ito kahapon ni Sen. Richard Gordon matapos aprubahan ng Senado sa botong 21 pabor, zero negative vote at walang abstention, ang Senate Bill No. 1397 or Motorcycle Crime Prevention Act of 2017, na inawtor niya at kasama si Senate Majority Leader Vicente Sotto III.

Inaatasan ng panukala ang LTO na mag-isyu ng mas malalaki at reflectorized na plaka sa lahat ng motorsiklo at scooter sa buong bansa upang masugpo ang krimen gamit ang naturang sasakyan tulad ng riding-in-tandem.

Hindi lamang sa likurang bahagi ng sasakyan makikita ang plate number kundi maging sa harapan na ikakabit sa unahang gulong. Bukod dito, may color scheme na ipatutupad ang LTO upang matukoy kung saan nairehistro ang naturang sasakyan.

“Motorcycles have become crime machines. With their small plate numbers, criminals perpetrating crimes while on board motorcycles easily flee from the scene of the crime and usually there are no witnesses who can read or identify plate numbers so that the authorities can go after the criminals,” ayon kay Gordon.

Parurusahan naman ng pagkakulong ng apat na buwan hanggang dalawang taon at multang P50,000 ang sinumang mahuhuling nagmamaneho nang walang plate number.

“Kailangan kumpiskahin ang motorsiklo na walang plaka at isu-surrender sa LTO,” ayon kay Gordon.

Inaatasan din ng batas ang LTO na ibigay sa pulisya ang listahan ng mga rehistradong motorsiklo at scooter kabilang ang pangalan ng may-ari, numero ng driver’s license, address, contact details, vehicle identification number, plate number, body color, brand at manufacturer.

Sinabi ni Gordon na ginagamit ang motosiklo sa paggawa ng krimen kaya’t parurusahan ang may-ari kabilang ang driver, backrider o pasahero na sangkot sa krimen at makukulong nang hihigit sa 12 – 20 taon na itinakda ng Revised Penal Code.

Parurusahan din ang may-ari ng motorsiklo kapag nabigo siyang ireport sa awtoridad sakaling ninakaw ito o ginamit sa paggawa ng krimen.

Sa ulat ng pulisya, umaabot sa 1,069 crime incident ang kinasasangkutan ng riding-in-tandem na nakapatay ng 810 biktima noong 2011, mas mataas sa 824 na naiulat noong 2010 na mayroon 604 napatay na biktima.

Sa Metro Manila pa lamang, ayon kay Gordon, tumalon sa 3,000 insidente noong 2013, at tumaas sa 6,219 crime incidents noong 2014 at bumagsak sa 6,006 sa 2015.

“This is an example of the impunity upon which motorcycles have been utilized in killing,” ayon kay Gordon. ERNIE REYES

IPINATAWAG ng Senado ang mga matataas na opisyal ng Metropolitan Bank and Trust Company, Bangko Sentral ng Pilipinas at Anti-Money Laundering Council (AMLC) upang magbigay-linaw sa nabukong internal loan fraud sa halagang P900M – P2.5-bilyon ng isang mataas na opisyal ng bangko.

sinabi ito kahapon ni Sen. Chiz Escudero, chairman ng Senate committee on banks, financial institutions and currencies, na hindi muna siya magsasagawa ng imbestigasyon bagkus, ipatatawag ang mga opisyal ng naturang institusiyon upang magbigay-linaw sa krimen.

“Ipapatawag muna natin ang mga opisyal ng Metrobank kabilang ang AMLC at BSP saa isang pulong upang malaman natin mismo sa kanila ang pangyayari sa kaso at matukoy kung ano ang butas sa umiiral na safety banking mechanism at proseso,” ayon kay Escudero.

Sinabi pa nitong gustong malaman ng Senado kung bakit nakagawa ng ganoong kalaking panloloko ang isang opisyal mismo ng Bangko sa kabila ng mahigpit na proseso sa pagbabangko.

“Gusto kong malaman kung paano ginawa ng bank executive ang malakihang panloloko sa kabila nang mahigpit na internal control at check and balances ng naturang Bangko,” saad ni Escudero.

Naaresto na ang suspek na si Maria Victoria Lopez sa ikinasang entrapment operation ng National Bureau of Investigation (NBI) noong nakaraang Hulyo 17. Si Lopez ang hepe ng corporate services management division ng Metrobank.

Sinabi ng NBI na gumawa ng pekeng dokumento si Lopez saka inayos ang pag-aapruba ng pautang para sa isang fake accounts sa ilalim ng pangalan ng isang corporate client ng Bangko, ang Gokongwei-led Universal Robina Corporation (URC).

Sa pamamagitan ng P25-billion credit line ng URC, naiproseso ni Lopez ang P900-milyon at P850-milyong utang.

Ayon sa mga ulat, naipalabas ni Lopez ang pautang sa ilang beses na P30-milyon kaya maaaring nalugi ang bangko ng aabot sa P2.5-bilyon.

Natuklasan ang anomalya matapos mapuna ng Metrobank ang ilang iregularidad sa sinasabing letter request mula sa kliyente, na hinihiling sa Bangko na mag-isyu ng P2.25-milyon na manager’s check sa ilang payee bilang pambayad sa interest.

Matapos maberipika sa URC, sinabi ng kumpanya na wala silang nalalaman sa liham kahit ang account na pinagdepositohan ng pautang.

Iniimbestigahan pa ng Metrobank at NBI kung may kasabwat si Lopez sa ibang empleado at opisyal ng Bangko sa panloloko, ayon kay Escudero.

Sinabi pa ni Escudero na susuriin ng Senado ang resulta ng imbestigasyon at mula doon magdedeisyon sila kung kinakailangan pang mag-imbestiga ang Senado o hayaan na lamang ang bangko at NBI sa kanilang tungkulin.

Kasabay nito, nilinaw ng URC na hindi sila nalugi nang anumang halaga sa naturang panloloko at nananatili ang kanilang tiwala sa bangko at patuloy ang kanilang transaksyon sa Metrobank.

Dahil dito, hiniling ni Escudero sa lahat ng bangko na maging istrikto sa internal operations upang maiwasan ang ganitong uri ng panloloko.

“We expect banks to immediately detect red flags in their system and immediately resolve internal matters. Apart from ensuring that the culprit will be brought to justice, Metrobank must secure its clients they have a robust internal control framework and that they will rigorously monitor their system,” ayon sa senador.

Sinabi ng NBI, kinasuhan na si Lopez ng qualified theft, falsification at violation of the General Banking Law sa Makati City Prosecutor’s Office. ERNIE REYES

KRITIKAL ang 66-anyos na empleyado ng Land Transportation Franchising and Regulatory Board (LTFRB) matapos barilin ng hindi kilalang suspek sa Caloocan City kagabi, Hulyo 26.

Patuloy na inoobserbahan sa Tala Hospital sanhi ng tinamong tama ng bala sa katawan ang biktimang si Dennis Sancho, ng 89 Premium St., Project 8, Quezon City.

Sa ulat, dakong 8:10 ng gabi, naglalakad ang biktima sa Congressional Rd., Vicas cor. Camarin Rd., Brgy. 173 nang biglang sumulpot ang suspek na armado ng baril at walang sabi-sabing malapitang pinutukan si Sancho.

Nang bumagsak ang duguang biktima, inakala ng suspek na patay na ito kaya mabilis na tumakas ang gunman.

Mabilis namang isinugod ang biktima sa naturang pagamutan ng kanyang katrabaho na si Melanie Diaz habang patuloy naman ang masusing imbestigasyon ng mga pulis upang matukoy ang pagkakakilanlan ng suspek at motibo nito sa pamamaril. RENE MANAHAN

KINUMPIRMA ni Budget Sec. Benjamin Diokno na ikinukonsidera na ng pamahalaan na buwagin na ang Presidential Commission on Good Government (PCGG).

Ang PCGG ang ahensya ng pamahalaan na itinalaga para bawiin ang mga ill-gotten wealth ni dating Pangulong Ferdinand Marcos.

Ayon kay Diokno, may mga rekomendasyon na sa pag-abolish sa PCGG at ilipat na ang mga nalalabing tungkulin nito sa ilalim ng Department of Justice (DOJ).

Tinutukoy ni Diokno sa nasabing pahayag ang Rightsizing the National Government Act of 2017 na kasalukuyan pang nakabinbin sa Kongreso.

Sa kanyang State of the Nation Address (SONA), sinabi ni Pangulong Rodrigo Duterte na isa ang naturang panukala sa mga priority bills ng kanyang administrasyon.

Sa ilalim ng programang ito, bubuwagin na ang mga ahensya na may “overlapping or redundant operations and functions” na nagreresulta lang ng hindi mabisang pagbibigay-serbisyo sa publiko.

Gayunman, nilinaw naman ni Diokno na isa pa lamang itong panukala at wala pang katiyakan sa magiging aksyon tungkol dito.

Nasa kamay aniya ng isang komite na pangungunahan ng Executive Secretary nakasalalay ang magiging desisyon tungkol dito sa pamamagitan ng isang executive order mula sa pangulo. JOHNNY ARASGA

NAKIPAG-USAP si Presidential Adviser on the Peace Process Jesus Dureza sa mga evacuee mula sa Marawi City.

Ipinabatid ng mga evacuee kay Dureza ang kanilang concerns, depression at frustration sa pag-alis sa kanilang mga tahanan sa Marawi City.

Anila, hindi tuluy-tuloy ang pamamahagi ng relief goods at pagod na anila sa pagkain ng sardinas at noodles sa nakalipas na halos dalawang buwan na.

Humihingi rin ang evacuees ng pinansyal na tulong para makabili sila ng gulay at masustansyang pagkain para sa kanilang mga anak.

Ang mainit ding panahon lalo na sa Iligan ay nakaaapekto rin sa kalusugan ng mga matatanda at bata.

Nangako naman si Dureza na ipiaaabot kay DSWD Sec. Judy Taguiwalo ang sitwasyon at titingnan ang programang nagbibigay ng cash assistance sa mga evacuee.

Pinayuhan pa ni Dureza ang mga bakwit na huwag mainip dahil kasado na ang bangon Marawi Project na tututok sa rehabilitasyon ng Marawi City. JOHNNY ARASGA

NAKATAKDANG mag-convene ang Senado bilang Committee of the Whole para tutukan ang panukalang tax reform program na una nang iniaapela ng Pangulong Rodrigo Duterte na ipasa ng Mataas na Kapulungan.

Sinabi ni Senador Panfilo Lacson na papayagan nila ang mga senador na magkasa ng matalinong boto hinggil sa nasabing panukala.

Ayon kay Lacson, nakikisimpatiya sila kay Sen. Sonny Angara na kawawa naman aniya at baka matulad sa sinapit ni Sen. Ralph Recto.

Tinukoy ni Lacson ang VAT na ipinasa ni Recto na nakatulong naman sa ekonomiya subalit hindi ito na realize ng mga Pilipino at naparusahan pa nang matalo sa eleksyon.

Magugunitang natalo si Recto sa kanyang re-election bid sa 2007 elections bilang ganti sa pagpasa ng e-VAT Law na iniakda nito.

Una nang siningle out ng pangulo si Angara dahil hindi ito pumalakpak nang umapela ang Pangulo sa Senado na agarang ipasa ang tax reform proposal.

Tila nagbanta pa ang pangulo kaugnay sa re-election bid ni Angara noong 2019 sa pagsasabing “bantay ka lang sa eleksyon, tingnan mo.” -30-

KINALAMPAG ni Sen. Nancy Binay ang Department of Health (DOH) na maghanda kaagad laban sa pagsugpo ng dengue mosquito sa panahon ng tag-ulan.

Sa pahayag, sinabi ni Binay na kailangan maghanda kaagad ng pangangailangan ng DOH upang mabawasan kundi man maiwasan ang paglaganap ng dengue cases sa iba’t ibang bahagi ng bansa.

“Taun-taon, humaharap tayo sa problema ng dengue kaya’t praktikal lamang para sa gobyerno na maghanda upang tugunan ang posibleng paglala ng dengue cases ngayong tag-ulan na tumataas ang insidente,” ayon kay Binay.

Sinabi pa nitong kahit tinukoy pa ng DOH na bumagsak ang bilang ng dengue cases sa bansa, ngunit mayroon mang iniuulat na kaso na siyang dapat magbigay hudyat sa pamahalaan na kumilos nang mabilisan upang protektahan ang kalusugan ng mamamayan.

“Sana ngayon pa lang ay nag-iimbentaryo na tayo ng mga gamot, dugo at iba pang mga maaaring kailanganin ng mga kababayan nating maaaring magkaroon ng dengue,” giit ni Binay.

“Importanteng handa ang ating DOH para sa posibleng pagdami ng kaso ng dengue. Wala pa mang dapat ipangamba sa ngayon, dahil sa tag-ulan na, dapat pa ring simulan na ng ating pamahalaan na iiwas sa panganib ang ating mga kababayan,” dagdag niya.

Sa ulat ng InterAksyon.com, sinasabing noong Hulyo 8, umabot nasa 535 dengue cases ang naitala ng Bacolod City Health Office kabilang ang limang bata. Mas mataas ito ng 85% kumpara sa nakaraang taon na umabot lamang sa 290 kaso ang naitala na ikinamatay ng dalawang bata.

Noong nakaraang buwan, tinukoy ng DOH sa kanilang ASEAN Dengue Day statement na umabot na sa 36,000 ang kaso sa bansa sa loob ng limang buwan ng taon. Sinabi ng DOH na mas mababa ito ng 31.8% kaysa 52,780 kasong naitala noong nakaraang taon.

Sa ngayon, umabot naman sa 207 dengue deaths ang naitala mula Enero 1 – Mayo 20, ayon sa ulat ng Epidemiology Bureau ng DOH.

“We must remember that dengue kills. We cannot be complacent just because the recorded cases of the disease so far this year is lower than last year’s,” giit niya. ERNIE REYES

LUMAKAS pa at bahagyang bumilis ang bagyong Gorio habang gumagalaw sa direksyong pahilagang-kanluran.

Sa pinakahuling tala ng Philippine Atmospheric Geophysical and Astronomical Services Administration (PAGASA), namataan ang bagyo sa layong 545 kilometro silangan-hilagang-silangan ng Tuguegarao City, Cagayan o 460 kilometers silangan ng Basco, Batanes.

May taglay itong lakas ng hangin na aabot sa 105 kph malapit sa gitna at pagbugsong aabot sa 130 kph.

Inaasahang gagalaw ang bagyo pahilagang-kanluran sa bilis na 15 kph.

Nakataas ang tropical storm warning signal no. 1 sa Batanes Group of Islands.

Samantala, sinabi ng PAGASA na patuloy na palalakasin ng bagyong Gorio ang habagat na magdadala ng mga pag-ulan sa Luzon, Metro Manila at Western Visayas.

Ibinabala din ng PAGASA ang posibleng pagguho ng lipa at flashfloods sa Metro Manila, Ilocos, Cordillera, central Luzon, CALABARZON at Mimaropa.

Inaasahang sa Linggo pa ng gabi o Lunes ng madaling-araw tuluyang lalabas ng Philippine Area of Responsibility (PAR) ang bagyong Gorio. JOHNNY ARASGA

PATAY ang isang 58-anyos na lola makaraang pagbabarilin ng tatlong armadong suspek sa Brgy. Batasan Hills, Quezon City kagabi, Hulyo 28.

Ayon sa report ni SPO3 Joel Gagasa, desk officer ng Quezon City Police District-Criminal Investigation and Detection Unit (QCPD-CIDU), nakilala ang biktimang si Berlina Bactol, negosyante, ng 104 Cotabato St., Brgy. Batasan Hills, QC.

Si Lola Berlina ay agad nasawi sa pinangyarihan ng insidente dahil sa tama ng bala ng kalibre .45 na baril.

Sa imbestigasyon ng CIDU, alas-10:30 ng gabi nang pagbabarilin ng tatlong armadong lalaki ang biktima sa kanto ng Cotabato St. at Sinangtala St., Brgy. Batasan Hills.

Nabatid na kasasakay pa lamang ng biktima sa tricycle para magpahatid sa TODA terminal sa IBP Rd. nang biglang humarang ang isang sasakyan na Toyota Corrola na walang plaka.

Sa puntong ito, lumabas ang mga suspek sa kotse saka hinatak si lola palabas ng tricycle at walang habas na pinagbabaril hanggang sa duguang humandusay.

Nang masigurong wala nang buhay ay mabilis na nagsitakas ang mga suspek sakay ng kotse patungo sa San Mateo Rd., Brgy. Batasan.

Agad naman ipinag-utos ni QCPD director C/Supt. Guillermo Lorenzo Eleazar sa kanyang mga tauhan ang pagtugis sa mga suspek at pag-alam sa motibo ng mga ito. SANTI CELARIO

NAKAPUWESTO, na sa ika-13 na ang Pilipinas sa listahan ng mga bansang may pinakamalalaking populasyon sa buong mundo.

Ayon sa Commission on Population (PopCom), naungusan ng bansang Ethiopia ang Pilipinas ngayong taon.

Ayon naman kay Popcom executive director Juan Antonio Perez, maaari pang bumaba ang ranggo ng Pilipinas sa mga susunod na taon dahil mas mataas ang population growth rate ng Egypt, ngayo’y na nasa ika-14 na puwesto.

Mayroon kasing 1.5 na population growth rate ang Pilipinas, habang ang Egypt ay may 1.9 na growth rate.

Sa ngayon ay tinatayang nasa 104.3-million na ang kabuuang populasyon ng Pilipinas.

Sa kabila naman ng pagbaba ng ranggo ng Pilipinas sa listahan, tiniyak ni Perez na nakahanda ang gobyerno sa pagbibigay ng mas magandang reproductive health services para mas maibaba pa ang kasalukuyang posisyon ng bansa. JOHNNY ARASGA