IBA-BAN ng Department of Agriculture o DA ang 43 garlic importers, epektibo ngayong araw.
Sinabi ni Agriculture Sec. Emmanuel Piñol na mag-iisyu siya ng blacklist order laban sa mga nasabing importer makaraang mabigo ang mga ito na makapag-import ng kinakailangang dami ng bawang.
Paliwanag ng kalihim, inaasahang mag-iimport ang 43 traders ng 70,100 metriko toneladang bawang mula Enero hanggang Hunyo, subalit 19,253 metric tons lamang ng bawang ang dumating na shipment. JOHNNY ARASGA
ISANG bangkay ng lalaki ang natagpuan na nakasilid sa kahon sa labas ng CAA Elementary School sa Las Piñas City.
Hinala ng mga saksi, biktima ng salvage ang lalaki dahil nakatali ang kamay nito at pinagkasya sa kahon.
Ayon kay Felix Papio, barangay investigator, alas-5:05 ng umaga nang makatanggap ng tawag si Rodrigo Canaman, OIC ng barangay CAA na mayroon umanong kahinahinalang bagay sa labas ng paaralan.
Nang kanilang puntahan, nakita ang bangkay sa loob ng karton. Agad pinuntahan at nirespondehan ng nga tanod.
Nakita naman sa tabi ng patay ang tatlong sako ng casing ng cellphone na maaring magamit bilang ebidensya sa krimen.
Patuloy naman ang imbestigasyon ng mga awtoridad sa nangyari sa hindi pa nakikilalang lalaki.
Sa ngayon dinala na ang bankay sa People’s Funeral. JOHNNY ARASGA
IPINADEDEKLARA na sa pamahalaan ang state of calamity ang buong Region 8.
Hinimok nina Eastern Samar Rep. Ben Evardone at Western Samar Rep. Sarmiento si Pangulong Rodrigo Duterte na isailalim na sa state of calamity ang buong rehiyon matapos manalasa ang 6.5 intensity na lindol.
Ayon sa dalawang mambabatas, isang linggo na ang nakararaan mula nang lumindol ngunit hanggang ngayon ay wala pa ring kuryente sa buong Region 8 na kinabibilangan ng Leyte at Samar.
Sa isang press conference, sinabi ni Evardone na umaabot na sa P300-P500 milyon ang nalulugi sa gobyerno ng Region 8 bunga ng kawalan ng suplay ng kuryente.
Sa ngayon ay nangangailangan aniya ng 210 megawatts para sa buong Leyte sa isang araw, 11 megawatts para sa Eastern Samar ngunit dahil sa pagkasira ng mga transformer at kakulangan ng power converter ay nagpapatuloy ang kawalan ng kuryente.
“Kaya po kapag pumasok ang state of calamity ay pwedeng pumasok ang DOE, ang Malakanyang, ang ERC para i-suspend itong matataas na singil ngkuryente,” ani Evardone.
Ngunit ang higit na pinangangambahan ay ang pagsasamantala ng mga negosyante ng kuryente.
“Kahit po ang NGCP ay makapag-deploy ng 3 generators na may tag-iisang megawatt para sa Eastern Samar, magro-rotating na lang. Ipa-prioritize lang ang mga bangko, other vital commercial stablishments, ok na po sa amin iyan,” ani Evardone. MELIZA MALUNTAG
KABIGUAN sa pag-ibig ang tinitingnang motibo sa pagpapakamatay ng isang lalaki sa lungsod ng Naga sa pamamagitan ng pag-inom ng insecticide.
Kinilala ang biktimang si Randy Senson, 27.
Ayon kay PO3 Gil Buban ng Naga-Philippine National Police, dalawang taon nang hindi umuuwi ang asawa ng biktima hanggang sa makita na lamang itong may kasama nang iba.
Natagpuan na lamang si Senson na wala nang buhay at pinaniniwalaang uminom ng isang tasa ng insecticide na narekober sa tabi ng kanyang bangkay.
Nag-iwan pa ito ng suicide note na isinulat sa salamin ng tinitirhan na kubo na nagpapahiwatig ng pagmamahal sa kanyang asawa. JOHNNY ARASGA
APAT na pagyanig na may lakas na 3.2 magnitude ang naramdaman sa Ormoc City, Leyte kaninang umaga Hulyo 12, 2017 (Miyerkules).
Ayon sa Philippine Institute of Volcanology and Seismology (Phivolcs), unang naramdaman ang pagyanig sa silangan ng Ormoc City, Leyte dakong 2:59 ng madaling-araw.
Ang origin ng lindol ay tectonic at ang lalim sa lupa ng pagyanig ay 001 kilometro.
Kasunod nito, naramdaman naman ang 3.0 magnitude na pagyanig sa silangan ng Ormoc, Leyte dakong 3:48 ng madaling-araw.
Tectonic ang sanhi ng lindol at 024 kilometro ang lalim sa lupa ng pagyanig.
Habang dakong 6:02 ng umaga naramdaman naman ang 2.4 magnitude na pagyanig sa silangan ng Ormoc City, Leyte.
Tectonic ang sanhi ng lindol habang 032 kilometro naman ang lalim sa lupa ng pagyanig.
At alas-12:06 ng tanghali naramdaman naman ang 2.0 magnitude na lindol sa silangan ng Ormoc, Leyte.
Ang origin ng lindol ay tectonic at ang lalim sa lupa ng pagyanig ay 004 kilometro.
Wala naman iniulat na napinsala o inaasahang aftershocks sa magkakasunog na lindol. SANTI CELARIO
GIGISAHIN din sa imbestigasyon ng pulisya si Dexter Carlos, Jr., ang padre de pamilya sa Bulacan massacre.
Sinabi ni Bulacan Provincial Police Office Director P/S Supt. Romeo Caramat, Jr., base ito sa kautusan ni Justice Sec. Vitaliano Aguirre II na imbestigahan din si Carlos Sr. na kasalukuyang nasa Witness Protection Program (WPP) ng DOJ.
Ang pagsasailalim aniya sa imbestigasyon kay Carlos Sr. ay upang malinawan lamang ang krimen na hindi naman ito planado at dahil lang sa sistema ng droga sa katawan ng mga pangunahing akusado kaya naganap ang krimen.
Ayon pa sa opisyal, pinagma-match na rin ng Scene of the Crime Operatives (SOCO) team ang mga fingerprints na nakuha sa crime scene mula sa tatlong ‘persons of interest’ na magkakasunod na natagpuang patay.
Una nang iniutos ni PNP Chief Dir. Gen. Ronald ‘Bato’ dela Rosa na isailalim sa imbestigasyon ang magkakasunod na pagpatay sa tatlong ‘persons of interest’ na sina Rosevelt Sorema, Anthony Garcia at Ronald Pacinos na natagpuang patay at may placard na may nakasulat na “Rapist, huwag tularan “ sa magkakahiwalay na lugar sa Bulacan.
Samantala, ang isa pang ‘person of interest’ na si Alvin Mabesa ay nawawala pa rin at patuloy na pinaghahanap.
Noong Hunyo 27 dakong alas-8:45 ng umaga, natagpuang patay ang pamilya ni Carlos Sr. na sina Estrella Dizon Carlos, 35; mga anak na sina Donny, 11; Ella, 7; at si Dexter. Jr., 1, sa kanilang bahay sa North Ridge Royale Subd. sa Brgy. Sto. Cristo.
Si Estrella ay natagpuang hubo’t hubad habang si Auring ay wala ring pang-ibabang saplot matapos halayin ng mga suspek. BOBBY TICZON
KALABOSO ang apat katao kabilang ang dalawang ginang matapos mahuli sa aktong nagsa-shabu sa Caloocan City, kaninang madaling-araw.
Kinilala ni Caloocan policie Chief S/Supt. Chito Bersaluna ang mga suspek na sina Alfredo Soriano, 30, Arlene Galang, 45, kapwa ng 132 Mc Arthur Highway, Rimas Rd., Potrero Malabon City, Salvador Guiling, 31ng 410 3rd Avenue, Josepina St., Brgy. 118, at Edeliza Garcia, 45, ng 109 T. Jacinto St., Grace Park, kapwa ng Caloocan City.
Sa imbestigasyon, dakong 4:40 ng madaling-araw, nagsasagawa ng Oplan Galugad ang mga tauhan ng Police Community Precinct (PCP)-1 sa Josefina St., 3rd Ave., Brgy. 118 nang may lumapit sa kanilang concerned citizen at ini-report ang nagaganap na shabu session sa loob ng hinihinalang drug den na minimintina umano ni Guiling.
Kaagad pinuntahan ng mga pulis ang nasabing lugar kung saan inaresto ng mga ito ang mga suspek matapos mahuli sa aktong nagsa-shabu sa loob ng nasabing bahay.
Narekober sa mga suspek ang isang sachet ng shabu at mga drug paraphernalia. RENE MANAHAN
TINIYAK ni Pangulong Rodrigo Duterte na bumalik na ang operasyon ng iligal na droga sa New Bilibid Prisons (NBP) sa kabila ng mahigpit na pagbabantay ng mga miyembro ng Philippine National Police-Special Action Force (PNP-SAF).
Sinabi ng Pangulo na kahit anong gawin ay nakalulusot pa rin ang illegal drugs operations ng Chinese druglords.
Ayon sa Pangulo, nabuhay ang negosyo sa loob ng NBP dahil posibleng nakapasok na naman ang cellphone sa loob ng kulungan kahit namatay na ang ilang druglord.
Maging sa Davao Penal Colony aniya ay lumabas sa tracking ng mga awtoridad ang tatlong presong nagnenegosyo ng iligal na droga.
Nagbabala pa ang Pangulo sa mga taga-NBP na maghintay lamang ang mga ito na matapos ang kaguluhan sa Marawi dahil pagkatapos nito ay magpapatupad siya ng reporma sa Pambansang Kulungan. -30-
TODAS ang isang barangay chairman matapos pagbabarilin ng riding-in-tandem sa Caloocan City kahapon, Hulyo 12.
Si Francisco Guevarra, 53, ng Room 318-207 8th Ave. at chairman ng Brgy. 106, Grace Park ay isinugod sa Manila Central University (MCU) Hospital subalit hindi na rin umabot nang buhay sanhi ng mga tama ng bala sa ulo at katawan.
Sa ulat ng pulisya, dakong 5:40 ng hapon, naglalakad ang biktima pauwi galing sa trabaho bilang lineman ng PLDT nang pagsapit sa 9th Avenue RAE at M.H. del Pilar St. ay walang sabi-sabing pinaputukan ang ng gunman sa likod ng ulo.
Pagbagsak ng biktima, muli pa itong pinaputukan sa ulo at katawan bago mabilis na tumakas sakay ng motorsiklong walang plaka na minamaneho ng kanyang kasama.
Narekober ng mga operatiba ng Scene of the Crime Operatives (SOCO) sa pinangyarihan ng insidente ang tatlong basyo ng bala ng kalibre .45 pistol.
Ayon sa kapatid ng biktima na si Ronald Guevarra, dating nasa drug watchlist si Francisco subalit nalinis na niya ang kanyang pangalan sa koneksyon umano ng iligal na droga.
Patuloy naman ang imbestigasyon ng pulisya sa kuha ng closed circuit television (CCTV) camera na nakakabit sa lugar ng pinangyarihan na maaaring makatulong para matukoy ang pagkakilanlan ng mga suspek at maaresto. RENE MANAHAN
PATAY ang dalawang sangkot sa iligal na droga matapos pagbabarilin ng riding-in-tandem sa Caloocan City kaninang madaling-araw, Hulyo 13.
Dead-on-the-spot sa mga tama ng bala sa ulo at katawan si Lester Estonina, 27, ng 438 Libra St., Pangarap Village, Brgy. 181 habang si Dexter Quirino, 27, cellphone technician, ng 1013 Malaya St., Sapang Alat ay hindi naman umabot nang buhay sa Tala Hospital sanhi din ng mga tama ng bala.
Ayon kina Caloocan Police North Extension Office (NEO) homicide investigators PO3 Romel Caburog at PO2 Philipp Joseph Reglos, dakong 4:00 ng madaling-araw, nag-iinuman ang mga biktima sa harap ng Divine parlor sa Malaya St., Sapang Alat nang dumating ang mga suspek sakay ng isang motorsiklo.
Bumaba ang mga suspek at naglabas ng mga baril saka walang sabi-sabing pinagbabaril ang mga biktima bago mabilis na tumakas sakay ng motorsiklo.
Sa pahayag naman sa pulisya ng tanod na si Gema Lacambra, sangkot sa kalakaran ng iligal na droga ang mga biktima na kabilang din sa kanilang drug watchlist. RENE MANAHAN
NAGPASAKLOLO na si Ilocos Norte Gov. Imee Marcos sa Supreme Court (SC) kaugnay ng tinaguriang Ilocos 6 na kasalukuyang nakakulong sa mababang kapulungan ng Kongreso matapos i-contempt noong Mayo.
Sinabi ng gobernadora na naghain na sila ng omnibus petition sa SC.
Kabilang sa omnibus petition ang hirit nito na ipatigil ang hearing ng Kamara sa isyu na kinasasangkutan nito, mabigyan siya at ang Ilocos 6 ng proteksyon at ang pag-akyat sa SC ng utos ng Court of Appeals (CA) na palayain ang mga empleyado dahil may jurisdiction dito ang Kataas-taasang Hukuman.
Aniya, naaapektuhan na ang serbisyo ng provincial government, ang agrikultura ng Ilocos Norte, suplay ng gasolina maging ang anim na ospital ay wala na ring gamot dahil sa pagkulong sa Finance Committee ng Ilocos Norte.
Sinabi pa ng gobernadora na kung mayroong krisis sa Marawi ay may hostage crisis naman na nangyayari sa Kamara sa pagkadetine sa Kongreso ng Ilocos 6.
Sinabi pa ni Marcos na pulitika lang ang rason ng lahat ng ito na kaya kinakaladkad siya sa Kongreso subalit ang naiipit ay ang mga empleyado ng provincial government.
Ayon sa kongresista iniipit ang Ilocos 6 para magsabi ng kasinungalingan kapalit ng kanilang kalayaan.
Una rito, ibinulalas ni Marcos ang kanyang sama ng loob matapos umano siyang paatrasin noon ni Rep. Rudy Fariñas sa pagkandidato sa first district ng lalawigan ng Ilocos para bigyang-daan ang kandidatura ng anak nito para sa tuloy-tuloy na succession ng karera nito sa pulitika.
Noong Mayo 29 nang madetine sa Kamara ang tinaguriang Ilocos 6 dahil sa pagtanggi nila na sumagot sa tanong ng House Committee on Good Government and Public Accountability kaugnay ng umano’y maanomalyang paggamit ng P66.45-milyong pondo mula sa tobacco excise tax na ginamit pambili ng mga sasakyan ng provincial government. BOBBY TICZON
UTAS ang isang 38-anyos na lalaki nang mapagkamalan umanong police asset ng mga ‘di kilalang suspek sa Tondo, Maynila kaninang madaling-araw.
Idineklarang patay sa Gat Andres Bonifacio Memorial Medical Center ang biktimang si Liwanag Comia, Jr., 38, may asawa, walang hanapbuhay, ng 1245 Area A, Gate 5, Parola Cmpd., Tondo, sa mga tama ng bata sa katawan.
Sa ulat ni SPO1 Charles John Duran, ng Manila Police District (MPD)- homicide section, nabatid na dakong 1:00 ng madaling-araw nang maganap krimen sa Gate 6 ng Area A sa Parola Cmpd.
Sinabi naman ni Jayross Comia, 22, pinsan ng biktima, bago ang pagpatay ay nagkita pa sila ng pinsan sa labas ng kanilang bahay.
Inilawan pa umano siya ng flashlight at sinabihang “Tulog ka na,” kaya’t umuwi na siya ng kanilang bahay.
Gayunman, pagdating niya sa loob ay nakarinig na lamang siya ng sunud-sunod na putok ng baril at nang kanyang tingnan ay nakitang nakabulagta na ang biktima.
Hinala ni Jayross, posibleng napagkamalang police asset ang pinsan kung kaya ito pinatahimik ng mga suspek.
Inaalam pa ng pulisya ang pagkakilanlan ng mga suspek at tunay na motibo sa pagpatay sa biktima. JOCELYN TABANGCURA-DOMENDEN
KINUMPIRMA ni House Sergeant at Arms Roland Detabali na may banta ng panggugulo sa padating na state of the nation address (SONA) ni Pangulong Rodrigo Duterte sa July 24 subalit hindi aniya ito seryoso.
Sinabi ni Detabali na sa ikalawang SONA ni Pangulong Duterte ay mas maraming puwersa ng Philippine National Police (PNP) at Armed Forces of the Philippines (AFP) ang ipakakalat sa loob at labas ng Batasan Complex maging ng Presidential Security Group.
Meron aniyang mga tao na posibleng gumawa ng gulo matapos masaktan sa kampanya ni Pangulong Duterte laban sa droga at katiwalian.
“Definitely meron (threat) but not really serious. So very tighten ang security measures na gagawin ngayon. Tightened not only because of the current ISIS, local ISIS backed Martial Law in Mindanao but because marami ng nagawa si presidente especially on war on drugs and criminality. Magbayad lang sila siguro baka may mga sira ulong mag-volunteer na gumawa ng gulo, basta makapanggulo lang,” ani Detabali.
Aniya, tatlong araw bago ang SONA ay lockdown na ang Batasan Complex at sisiyasatin na lahat ng papasok na empleado, pagkain at mga gamit.
Hindi rin aniya maiaalis ang mga protestador na may mga hinaing na gusting ilapit kay Pangulong Duterte.
“Base on the intelligence briefing given to us may mga issues sila (protesters) na gustong ilabas na hindi pa nagagawa ng present administration or nagawa na pero sa tingin nila ay kulang pa.”
Binigyang-diin ni Detabali na kahit maliliit na grupo ito ay hindi pwedeng balewalain dahil anumang oras ay maaaring lumkha ang mga ito ng gulo.
“Total effort ay prevention because anything can happen kahit na maliliit na grupo they can create havoc kung gusto nila at matigas ang ulo nila.”
Samantala, ipinaalala din ni House Secretary-General na tutol pa rin si Pangulong Duterte sa magarbong pananamit at preparasyon sa SONA.
Sapat na aniya ang barong tagalog para sa kalalakihan at business attire naman o Filipiniana para sa mga mamabatas na babae. MELIZA MALUNTAG
INUGA ng magnitude 5.8 na lindol ang North Korea.
Ayon sa datos ng US Geological Survey, sa karagatan naitala ang pag-uga na hindi naman inaasahang magdudulot ng pinsala.
Sinabi ni USGS seismologist Julie Dutton, walang indikasyon na man-made ang naganap na pagyanig.
Ang mga nagdaang underground nuclear bomb tests kasi ng North Korea ay nagdudulot ng malalakas na pagyanig ng lupa.
Isang opisyal din ng Pentagon ang nagsabi na wala silang nakitang ebidensya na ang lindol ay mula sa nuclear test.
Unang iniulat ng USGS na magnitude 6.0 ang naitalang lindol pero ibinaba ito sa 5.8. -30-
BACNOTAN, LA UNION – Iniimbestigahan ngayon ng Bacnotan police ang dahilan ang pagpapakamatay ng isang 28-anyos na dalaga matapos siyang magbaril sa ulo sa loob ng kanilang bahay sa Brgy. Agtipal, Bacnotan sa nasabing lalawigan noong Martes, July 11.
Nakilala ang biktimang si Jocelyn Buen, ng nasabing bayan.
Sa imbestigasyon, sinabi ni Bacnotan police commander P/C Insp. Reynaldo Soria na nagtamo ng isang bala ang biktima sa sentido.
Ayon sa ama ng biktima na si Leonardo Buen, nagulat siya nang marinig na lang niya ang tunog ng baril sa kuwarto ng kanyang anak.
Dito, napasugod si Leonardo sa kuwarto at doon nakita niyang nakabulagta na ang kanyang anak at duguan.
Nakarekober sa lugar ang isang cal. 22 baril na siyang ginamit ng biktima sa pagpapakamatay.
Sa ngayon ay hindi pa alam ang motibo ng pagpapakamatay ng biktima. ALLAN BERGONIA
PINASLANG ng grupong Abu Sayyaf ang isa pang Vietnamese hostage sa Sulu.
Kinumpirma ng militar na narekober ang isang bangkay na tadtad ng bala na pinaniniwalaang si Tran Khac Dung alyas Tran Viet Van, mula sa Brgy. Buhanginan sa bayan ng Patikul, noong Hulyo 8.
Narekober ang biktima ilang oras matapos maka-engkwentro ng mga tropa ng gobyerno ang ilang miyembro ng ASG.
Hindi matiyak ng Joint Task Force Sulu kung pinatay ang dayuhan sa kasagsagan ng pakikipagbakbakan ng mga bandido sa mga awtoridad.
Si Tran ang ikatlong Vietnamese hostage na pinatay ng teroristang grupo sa loob lamang ng isang linggo. JOHNNY ARASGA
DEAD-ON-ARRIVAL ang isang 52-anyos na misis matapos malaglag sa sinasakyang owner-type jeep nitong Miyerkules ng hapon, July 12, sa Brgy. Baraoas, San Fernando City, La Union.
Nakilala ang biktimang si Gloria Almojeliana, ng nasabing barangay.
Samantala, ang driver na kamag-anak ng biktima ay nakilalang si Paustino Lazaro, 47, binata, ng parehong barangay.
Ayon sa San Fernando police, binabagtas ni Lazaro ang Brgy. Baraoas sakay ng isang owner-type jeep nang aksidenteng mahulog ang biktima at tumama ang ulo sa semento.
Agad naman itong isinugod ni Lazaro sa ospital ngunit hindi na rin ito umabot nang buhay.
Inimbitahan naman si Lazaro sa presinto upang hingan ng pahayag at matukoy ang tunay na nangyari. ALLAN BERGONIA
DEDO ang isang notoryus na drug pusher nang manlaban sa mga operatiba sa isang buy-bust operation sa San Andres Bukid, Maynila.
Hindi na umabot nang buhay sa Sta. Ana Hospital ang biktimang si Rommel Jhake alyas Ping-Pong, 37, ng 2577 Topacio St., San Andres Bukid, dahil sa tinamong mga bala sa katawan.
Ayon kay SPO1 Milbert Balinggan ng Manila Police District (MPD)- homicide Section, dakong 2:20 ng madaling-araw nang maganap ang operasyon ng mga tauhan ng Station Drug Enforcement Team ng Manila Police District-Station 6 laban sa suspek .
Nauna rito, ang operasyon sa nasabing lugar ay dahil sa talamak na pagbebenta ng shabu ng suspek sa Brgy. 765 sa San Andres Bukid.
Itinuturing din ng pulisya na ‘armed and dangerous’ ang nasawi base na rin sa nakuhang impormasyon kaya naging alerto ang mga awtoridad.
Si PO1 Joey Ganab umano ang nagpanggap na bibili ng shabu ngunit nakahalata ang suspek na pulis ito kaya nagpaputok siya na agad namang ginantihan ng awtoridad na nagresulta sa kanyang pagkamatay.
Narekober sa suspek ang siyam na sachet ng shabu, mga drug paraphernalia, dalawang pirasong P100 bill, at isang kalibre .45 na baril na kargado ng anim na bala. JOCELYN TABANGCURA-DOMENDEN
AABOT sa mahigit 6,000 pulis ang ipapakalat ng Quezon City Police District sa paligid ng Batasan Pambansa sa nakatakdang ikalawang State of the Nation Address (SONA) ng Pangulong Duterte sa Hulyo 24, 2017.
Ayon kay QCPD District Dir. C/Supt. Guillermo Lorenzo Eleazar ipapakalat ang mga naturang pulis sa mga pangunahing lugar sa paligid ng Batasan Pambansa sa araw ng SONA ng Pangulong Duterte.
Sinabi ni Duterte na ipapatupad ng kanyang mga tauhan ang maximum tolerance sa magaganap na rally ng iba’t ibang militanteng grupo at cause oriented groups upang panatilihin ang peace and order sa panahon ng SONA ng chief executive.
Nabatid pa sa district director ng QCPD na manggagagaling ang mga pulis na itatalaga sa araw ng SONA ng pangulo mula sa Northern Police District (NPD), Eastern Police District (EPD), Southern Police District (SPD) at Quezon City Police District (QCPD), na magpapatupad na peace and order sa paligid ng Batasan Pambansa.
Sa isang dialogue sa Quezon City Sports Club kanina Hulyo 14, 2017 (Biyernes) sa pagitan ng mga pulis, lider ng mga raliyista at cause oriented groups, iginiit ni Eleazar na walang magaganap na dispersal sa hanay ng mga raliyista at lider nito kung susundin ng mga ito ang napagkasunduan sa pagitan ng mga pulis at raliyista sa itinakdang lugar ng pagdadausan ng rally ng mga raliyista.
“Wala magaganap na pagbuwag sa nakatakdang rally ng mga magdadaos ng rally sa SONA ng Pangulong Duterte kung makikipagtulungan at susunod ang mga raliyista sa itinakdang lugar ng rally site sa mga ito,” ani Eleazar.
Tiniyak naman ni NCRPO director Oscar Albayalde na ang magiging papel ng mga pulis sa paligid ng Batasan Pambansa sa ikalawang SONA ng Pangulong Duterte ay upang protektahan ang mga raliyista at ipatupad ang peace and order sa lugar habang nagaganap ang SONA ng pangulo. SANTI CELARIO
ISA na namang inmate ang binawian ng buhay matapos manikip ng dibdib sa loob ng selda ng MPD-Station 4 kaninang madaling-araw sa Sampaloc, Maynila.
Namatay habang ginagamot sa Ospital ng Maynila ang suspek na kinilalang si Lauro Lee, 44, binata, ng 40 Santos St., Ugong, Pasig City.
Sa ulat ni PO3 Dennis Turla ng MPD-Homicide Section, dakong 2:05 ng madaling-araw nang ideklarang patay si Dulawan.
Nauna rito, isinugod sa nasabing pagamutan si Dulawan matapos magreklamo ng sobrang pananakit at paninikip ng dibdib.
Nabatid na mula nang makulong sa nasabing presinto si Dulawan noong Hulyo 20, 2017 sa paglabag sa Republic Act 9165 (Dangerous Drugs Act of 2002) ay ininda na umano ang madalas na pananakit ng dibdib.
Nakita rin na may abrasion o gasgas sa noo ang biktima.
Tumanggi naman ang ina ni Dulawan na isalang pa ito sa awtopsiya. JOCELYN TABANGCURA-DOMENDEN