UMAABOT sa anim na mga bihag na pinatay ng teroristang Maute Group sa Marawi City, matapos tumanggi ang mga itong makipagbakbakan laban sa mga puwersa ng gobyerno.

Ayon kay Lt. Col. Christopher Tampus, commander ng 1st Infantry Battalion, nalaman nila ang impormasyong ito mula sa tatlong bihag na nakatakas noong June 29.

Aniya, pawang mga bihag din ang bumabaril sa mga nagpapatrulyang sundalo sa Lake Lanao, dahil pinupwersa sila ng mga terorista na gawin ito.

Wala na aniyang magawa ang mga ito kundi sumunod na lang dahil anim na kapwa nila bihag ang binaril at pinatay sa harap nila.

Una naman nang sinabi ng mga bihag na nakatakas na sapilitan rin silang pinagnanakaw ng mga terorista sa mga bahay at establisyimento sa Marawi City, habang ang iba nama’y ginagawang sex slaves. JOHNNY ARASGA

NASA ospital ngayon si Jolina Magdangal at asawa niyang si Mark Escueta matapos banggain ng isang van ang sinasakyan nilang SUV sa East Ave. sa Quezon City kaninang madaling-araw, Lunes.

Ayon sa family driver na si Orly Sebulino, kasama ng aktres sa loob ng Mitsubishi Montero ang mister at ang kanilang anak.

Kwento ni Sebulino, ihahatid niya sana ang mag-anak sa airport dahil may flight ito pa-Hong Kong nang mangyari ang aksidente pasado ala-1:00 ng madaling-araw.

Nakahinto sila sa traffic light sa tapat ng Philippine Heart Center nang banggain sila sa likod ng isang van na minamaneho ni Peter Sevilla.

Sa lakas ng impact, nawasak ang harapan ng van at naipit ang driver nito habang nabasag din ang salamin sa likod ng SUV ng aktres at nayupi ang bahagi ng sasakyan.

Aminado naman ang driver ng van na napaidlip siya kaya hindi agad nakapreno nang huminto sa traffic light ang SUV ng aktres. JOHNNY ARASGA

PAGUDPUD, ILOCOS NORTE – Dahil naka-inom at wala pang suot na helmet, dalawang lalaki ang patay nang humampas ang kanilang sinasakyang motorsiklo sa isang puno ng niyog sa bayan ng Pugudpud sa nasabing lalawigan kahapon, July 9.

Kinilala ni Pagudpud police commander S/Insp. Eduardo Santos ang mga biktimang sina Jayson John Lagundino, 22, ng Brgy. Balaoi, ng Pagudpud at Jake Jun Pascua, 17, ng Brgy. Bagbag, bayan ng Solsona, Ilocos Norte.

Sa paunang imbestigasyon, sinabi ni Santos, galing ang dalawang biktima sa isang inuman at kasalukuyang tinatahak ang national highway ng Brgy. Balaoi nang biglang nawalan ng kontrol si Lagundino sa siyang nagmamaneho.

Dito, malakas na humampas ang motosiklo sa isang puno ng niyog at sa lakas ng hampas tumilapon ang mga biktima isang metro mula sa accident site at pumasok pa sila sa isang drainage canal.

Agad na itinakbo sa Bangui District Hospital (BDH) hindi na rin umabot nang buhay.

Lumalabas sa imbestigasyon na ang dalawa’y nakainom ng alak at walang safety helmet nang mangyari ang insidente. ALLAN BERGONIA

NAGKALASOG-LASOG ang katawan ng isang ama ng tahanan matapos itong magpasagasa sa isang pampasaherong bus sa bayan ng Barotac Nuevo, Iloilo kahapon ng umaga, Sabado.

Dead-on-the-spot sanhi ng mga tinamong pinsala ang biktimang kinilalang si Edwin Turao, Sr., 35, pedicab driver, ng Agcuyawan Calsada, Barotac Nuevo, Iloilo.

Sinabi ni SPO4 Glen Azucena, imbestigador ng Barotac Nuevo Municipal Police Station, nanggaling sa northern Iloilo ang Ceres Bus na minamaneho ng isang Harvey Bacinilla, 43, ng Bularan, Banate, Iloilo,

Pagsapit aniya ng bus sa highway ng Brgy. Bunca sa nasabing bayan, biglang tumawid ng kalsada ang biktima para magpasagasa.

Imbes tumalsik, pumailalim ang biktima at nagulungan ng bus na nagresulta sa kanyang agarang kamatayan.

Napag-alamang dati na ring tinangka ni Turao na magpakamatay sa pamamagitan ng pag-inom naman ng pesticide ngunit naagapan ito.

Isa sa mga tinitingnan na anggulo sa pagpapakamatay ng biktima ay ang problema sa kanilang pamilya.

Sa ngayon, ay nakakulong pa ang driver ng bus sa Barotac Nuevo PNP at nahaharap ito sa kasong reckless imprudence resulting to homicide. BOBBY TICZON

HABANG magulo pa ang imbestigasyon sa Bulacan massacre, dalawang drug suspek ang nalagas naman sa isang sting operation sa Malolos, Bulacan kanainang madaling-araw.

Ayon sa Malolos police, tinangkang lumaban ng mga suspek na nakilalang sina Alayas Kenneth at Sherwin kaya sila kapwa napatay.

Sa ulat, naganap ang insidente dakong 12:35 a.m. sa isang buy-bust operation sa Brgy. Bulihan.

Bago ito, nagawang makapagtransaksyon ng isang police agent na nagpangggap na buyer sa mga suspek.

Pero nang iabot ang droga at tanggapin ng mga suspek ang marked money ay pinaputok ni Kenneth ang kanyang improvised shotgun habang inilabas naman ni Sherwin ang kanyang cal. 38 handgun.

Pero sa maikling barilan, napatimbuwang agad ng operatiba ang dalawang suspek.

Narekober sa lugar ang isang improvised shotgun, isang cal. 38 handgun, mga sachet ng shabu, at marked money na ginamit sa operasyon. BOBBY TICZON

INUGA ng magnitude 5.4 na aftershock ang Leyte at iba pang bahagi ng Bisaya at maging ang isla ng Panay, kaninang Lunes ng umaga.

Ayon sa Philippine Institute of Volcanology and Seismology (Phivolcs), naitala ang sentro ng lindol sa siyam na kilometro katimugan ng Ormoc City.

May lalim itong isang kilometro at tectonic in origin.

Sinabi ni Engr. Reynaldo Antioquia ng Phivolcs sa Capiz, isa ito sa mga aftershock ng magnitude 6.5 na lindol na yumanig sa Leyte noong nakaraang linggo.

Naramdaman ang Intensity 5 sa Ormoc City habang intensity 4 naman sa Mayorga, Leyte at Tacloban City at Mandaue City sa Cebu.

Naitala naman ang Intensity 3 sa Cebu City habang Intensity 2 sa Lapu-Lapu City, Cebu; Palo, Leyte at maging sa Iloilo City.

Habang isinusulat ang balitang ito ay wala namang naitala nasugatan o namatay sa lindol na tumama dakong 6:25 a.m. BOBBY TICZON

NAKATAKDANG magpadala ng cash donation ang mga kawani ng Bureau of Customs (BOC) na nakatalaga sa Ninoy Aquino International Airport (NAIA) sa iba’t ibang evacuation centers sa Mindanao.

Ang cash donations ay nakolekta mula sa 458 Customs personnel na boluntaryong nagbigay bilang financial support sa mga residente ng Marawi.

Sa isang miting nila noong nakaraang buwan kung saan napag-usapan ang paghihirap ng mga pamilya ng Muslim at non-Muslim sa evacuation centers, hiniling ni District III Collector Ed Macabeo sa lahat ng BOC-NAIA officials at personnel “to extend your helping hands by way of giving financial contribution to procure food supplies and other needed items for their use while in the evacuation center.”

Itinalaga ni Macabeo si Special Deputy Collector Norsalem Raymond M. Mana-o bilang tagapangasiwa sa crowdfunding campaign sa kanilang distrito.

Ayon kay Mama-o, umabot na sa P480,000 cash ang nalikom nila mula ng inumpisahan ito noong nakaraang buwan, at patuloy na dumadaloy ang cash donation dahil ang iba pang empleyado ng ahensiya ay nangakong magbibigay din ng tulong pinansyal.

Ang cash donations, aniya, ay dadalhin sa iba’t ibang evacuation centers sa Sagularan, Baloi, at Iligan City.

“It’s our way of helping our brothers in Marawi, and at the same time our little own way of showing our support to our commissioner,” anang Mama-o na may mga kamag-anak na nakatira sa Marawi City.

Dagdag pa ni Mama-o, hindi naman pwedeng mag-donate ng ibang bagay ang distrito partikular ang mga gamit na abandonado dahil matatagalan at maraming bagay ang kakailanganing ayusin bago ito mai-release.

Mas mainam, aniya, sa kanila ang magbigay ng cash donation kaysa magbigay ng ibang bagay.

Ang cash donation ay nakatakdang ibigay sa coordinator sa Port of Manila. BENNY ANTIPORDA

SUGATAN ang 19 na katao kabilang ang 18 estudyante, matapos tumigilid ang school service sa Northbound area ng Mckinley-C5.

Papasok sana ng paaralan ang mga estudyante ng Fort Bonifacio Elementary School pero sa halip na sa silid-aralan ay ospital ang diretso nila.

Kininilala ang driver ng school service na may plakang TWJ-647 na si Jason Bernabe, 30.

Ayon kay Arthur Alvin Fauvel, Traffic Management Officer ng Taguig, pasado alas-6:00 ng umaga nang tumagilid ang isang school service sa area ng Northbound ng Mckinley-C5.

May karga itong 18 estudyante na nasa 7-taong gulang pataas.

Nagpapagaling naman na ang mga estudyante na pawang nagkaroon lamang ng minor injuries.

Bago naman mag alas-7:00 ng umaga dumating ang mga enforcer at ambulansya sa lugar ng aksidente para hatakin ang tumagilid na sasakyan.

Ang school service naman na tumagilid ay nasa traffic bureau na ng Taguig. -30-

ISINULONG nina ACT Teachers Rep. Antonio Tinio at France Castro na isama sa 2018 national budget ang dagdag na sweldo ng mga guro.

Ani Tinio, umaasa ang mga guro sa pangako ni Pangulong Rodrigo Duterte na pagkatapos ng increase sa sahod ng mga sundalo at pulis ay isusunod naman nito ang dagdag na sweldo sa mga public school teachers.

Dismayado ang mga mambabatas na hindi isinama sa Philippine-Development Plan para sa taong 2017 – 2022 ang salary increase sa mga government employees kung saan mayorya rito ang mga teacher at non-teaching staff.

Ayon naman kay Castro, tinututulan ng mga budget officer ng Pangulo ang dagdag-sweldo sa mga empleyado ng gobyerno dahil sinasabi ng mga ito na “too ambitious” ang hinihinging umento sa sahod at hindi underpaid ang mga guro.

Patuloy na umaasa sina Tinio at Castro na isa ang salary increase para sa mga pampublikong guro sa buong bansa na babanggitin ni Pangulong Duterte sa kanyang ikalawang SONA sa July 25. MELIZA MALUNTAG

POSIBLENG kumuha ang Malacañang ng interpreter para sa ikalawang State of the Nation Address (SONA) ni Pangulong Rodrigo Duterte sa Hulyo 24.

Ayon kay Presidential Communications Operations Office Sec. Martin Andanar, ito’y para maintindihan ng mga foreign guest ang mga magiging sasabihin ng Pangulo sa salitang Bisaya o Tagalog.

Kilala ang Pangulo na hindi sumusunod sa kanyang nakahandang speech at madalas na kumportableng nagpapahayag sa diyalekto nitong Bisaya.

Samantala, sinabi ni Andanar na mananatili pa ring simple ang SONA ni Pangulong Duterte tulad noong nakaraang taon.

Dahil dito, posibleng hindi pa rin mairampa ng mga mambabatas ang kanilang mga asawa at mga dadalo sa SONA ang mga bongga at mamahaling mga damit. JOHNNY ARASGA

TATANGGAP ng education aid ang Pilipinas mula sa Japan.

Ito’y matapos pirmahan ng Japan International Cooperation Agency (JICA) at National Economic Development Authority (NEDA) ang 264 million yen o P117.5-million education grant.

Ayon sa JICA, sa ilalim ng kasunduan, 20 Filipino government workers ang kukuha ng post-graduate economic courses sa University of Japan, Kobe University, Meiji University, International Christian University at Nagoya University.

Kabilang sa mga course na iaalok ay infrastructure and industry development, public policy, financial reforms, at small and medium enterprises promotion.

Ayon pa sa JICA, sa ngayon ay nasa 259 na Pinoy na ang binigyan ng Japan scholarship grants.

Itinuturing na kaalyado ng Pilipinas ang Japan, at nanindigan din si Pangulong Rodrigo Duterte kay Japanese Prime Minister Shinzo Abe na mas pagtitibayin pa ang relasyon ng dalawang bansa. JOHNNY ARASGA

PATAY ang isang Amerikano matapos pagsasaksakin sa loob ng inuupahang kwarto sa PNR Cmpd., Brgy. 73, Caloocan City.

Kinilala ang biktimang si James Rinaldo Bodreaux o mas kilala sa lugar bilang ‘Jimmy’.

Ayon sa landlady ng biktima na si Marissa Silva, pasado alas-10:00 ng gabi nang dumating si Bodreaux na may kasamang 17-anyos na binatilyo na kinilala lamang sa alyas na ‘John’.

Pero dakong ala-1:00 ng madaling-araw, nagising na lamang umano sila nang makarinig ng mga kalabog at sigaw ng paghingi ng tulong ng biktima.

Sa inisyal na imbestigasyon ng Caloocan City Police, tanging cellphone lamang ni Bordreaux ang nawawala sa kanyang mga gamit, at inaalam pa kung pagnanakaw ang motibo sa krimen.

Ayon pa sa mga residente, mabait na tao umano ang biktima at mayroon pa itong pitong kabataan na pinag-aaral.

Nagpapatuloy naman ang imbestigasyon ng Caloocan City Police upang mahuli ang nasa likod ng pagpatay sa biktima. JOHNNY ARASGA

MANGALDAN, PANGASINAN – Dahil sa pag-awat sa away ng kanyang kapatid, isang 27-anyos na lalaki ang patay matapos pagsasaksakin ng isang 19-anyos na binata sa Mangaldan sa nasabing lalawigan kahapon, July 10.

Nakilala ang biktimang si Jymjem Lomibao, ng Brgy. Guiling, ng nasabing bayan.

Habang nakilala naman ang suspek na si Daryl Solis, 19, ng nasabi ring barangay.

Sa paunang imbestigasyon, ayon sa Mangaldan police, nag-aaway ang kapatid ng biktima na si Richard Lomibao, 29, at ang suspek sa hindi malamang dahilan at umawat ang biktima.

Dahil dito, bigla na lamang bumunot si Solis ng kutsilyo at binalingan ng mga saksak si Jymjem hanggang malugmok ito na agad dinala sa ospital ngunit hindi na rin naisalba pa.

Pinaghahanap ng Mangaldan police ngayon ang suspek na biglang tumakas pagkatapos ng insidente. ALLAN BERGONIA

ANIM na sundalo ang nasugatan nang sumabog ang isang landmine kaninang Martes ng umaga sa Quirino Province.

Sadya namang hindi pinangalanan ang mga sundalong kasapi sa 86th Infantry Batallion ng Philippine Army (PA) dahil ipaaabot muna sa kanilang pamilya ang sinapit ng kanilang mahal sa buhay na isang standard operation procedure (SOP)

Tinutugis na ngayon ng military ang mga rebelde upang panagutin sa insidente.

Sa ulat, naganap ang insidente dakong 7 a.m. sa isang bisinidad sa Sangbay, sa bayan ng Nagtipunan.

Nabatid na nagsasagawa ng combat operation ang mga sundalo sa lugar nang hindi sinasadyang matapakan nila ang inilatag na landmine ng New People’s Army (NPA).

Nitong Hulyo 3 lamang ay sinunog ng rebeldeng grupo ang limang heavy equipment ng isang construction company sa Maddela na karatig-bayan ng Nagtipunan sa parehong lalawigan. BOBBY TICZON

PATAY ang isang live-in partner na sangkot sa iligal na droga matapos pagbabarilin ng dalawang riding-in-tandem sa Valenzuela City.

Ayon kay Valenzuela deputy police chief for operation Supt. Rey Medina, dead-on-the-spot sanhi ng mga tama ng bala sa ulo at katawan si Richard delos Santos at dalawang-buwang buntis na live-in partner nitong si Expe Bonion.

Sa kuha ng closed circuit television (CCTV) camera, sakay ang mga biktima ng bisikleta habang tinatahak ang P. Beato St., Brgy. Balangkas dakongalas-12:56 ng madaling-araw upang bumili ng tinapay nang harangin ang mga ito ng apat na mga suspek na sakay ng dalawang motorsiklo.

Bumaba ang isang nakaangkas at walang sabi-sabing pinagbabaril ang mga biktima sa ulo na nagresulta ng kanilang pagkamatay habang mabilis namang tumakas ang mga suspek matapos ang insidente.

Sa pahayag ng pamilya ng mga biktima, sangkot sa kalakaran ng iligal na droga ang magka-live-in at pareho na ring sumuko sa Oplan Tokhang subalit makalipas ang dalawang buwan ay nagpatuloy na naman sa kanilang illegal drug trade.

Narekober ng pulisya sa pinangyarihan ang sachet na naglalaman ng shabu at mga basyo ng bala ng hindi pa matukoy na kalibre ng baril. RENE MANAHAN

SANHI ng matinding selos, sinunog ng isang lalaki ang kanyang live-in partner at dalawa nitong anak sa Pampanga kagabi, Lunes.

Sinabi ni PO1 Jun Nicdao ng Sta. Rita Police, nasa kritikal na kondisyon ngayon sanhi ng mga paso sa dibdib, tiyan at ari ang biktimang nakilalang si Jennalyn Ramos, 27.

Hindi naman pinalad na masagip ng mnga doktor ang kanyang dalawang anak na sina Jenny Rose at Clinton Dave.

Nakaratay din sa parehong pagamutan sanhi ng pagkasunog ng kanyang braso ang suspek na nakilalang si Ferdinand Igmat. Kinasuhan na ito ng 2 counts ng murder at frustrated murder at ngayo’y binabantayan ng mga pulis sa ospital.

Nanlumo naman ang mga miyembro ng pamilya Ramos sa nangyari sa kanilang mahal sa buhay.

Si Ramos at Igmat ay may isang taon nang nagsasama. BOBBY TICZON

NAGPASYANG magpakamatay ang isang 28-anyos na gym instructor sa pamamagitan ng pagbibigti dahil sa problema sa kanyang live-in partner sa Caloocan City kaninang umaga.

Nakilala ang biktimang si Erick James Hizon, ng Unit G. Cecillia Place, Jupiter St., Brgy. 162, Sta. Quiteria, Caloocan.

Sa imbestigasyon nina SP01 Romel Bautista at P02 Adrian Paguian, dakong 10:45 ng umaga nang matagpuan ng saksing si Joan Turiano, 37, ang biktimang nakabigti sa 3rd floor ng Unit G. Sa naturang lugar.

Agad ipinalaam ng saksi ang insidente sa kapatid na babae ng biktima na si Ysolde Nicole at dalawa pa nilang kapatid na lalaki bago mabilis na ibinaba mula sa pagkakabigti ang biktima subalit, wala na itong buhay kaya hindi na dinala sa ospital.

Ayon sa mga kapatid ng biktima na sina Jerrel at Miguel, huli nilang nakitang buhay ang kanilang kapatid dakong 12:00 ng hatinggabi habang nakikipag-inuman sa mga kaibigan sa loob ng kanilang bahay.

May problema umano ang biktima sa kanyang live-in partner na hindi na nakuha ang pangalan at dati na rin itong nagtangkang magpakamatay ilang taon na ang nakalilipas. RENE MANAHAN

MALUGOD na tinanggap ng Social Security System (SSS) ang inisyung resolusyon ng Korte Suprema na “status quo ante order” (SQAO) na pansamantalang nagbabawal sa National Grid Corporation of the Philippines (NGCP) na kunin ang 6.5-ektaryang lupain ng pension fund sa Pasay City.

“Lubos tayong nagpapasalamat sa resolusyon ng SC na paboran ang ating hiling na pigilan ang NGCP sa pagkuha ng lupa ng ating mga miyembro sa Financial Center sa Pasay City. Bagama’t ito’y panimulang tagumpay lamang, maituturing na itong malaking hakbang sa layunin nating protektahan ang interes ng ating mga miyembro,” ani ni Social Security Commission (SSC) Chairman Amado D. Valdez.

Sa inilabas na resolusyon noong Hunyo 21, nag-isyu ang Third Division ng Kataas-taasang Hukuman ng SQAO laban sa desisyon ng Pasay City Regional Trial Court Branch 108 na nagpapahintulot sa NGCP na kunin at gamitin ang lupain ng SSS sa Diokno Ave. Pasay City.

Gayundin, inutusan ng SC ang NGCP na isumite ang mga komento nito sa petisyon ng SSS sa loob ng 10 araw mula nang tanggapin ang paunawa.

Matatandaang kamakailan ay kinonsulta ni Valdez ang ilang eksperto sa industriya ng enerhiya na nagsabing hindi kailangan ng NGCP ang 6.5-ektarya upang tayuan ng 230kV substation nito. Tinutukoy ni Valdez ang Doña Imelda Substation na mas kilala bilang Araneta Substation sa Quezon City na 900mV subststation ngunit gumamit lamang ng halos 2,000 metro kwadrado ng lupain.

“Batay sa ating konsultasyon sa mga eksperto, nakapagtayo ang NGCP ng mas malaking substation na may kapasidad na 900mV noon at hindi gumamit ng mahigit sa 2 ektaryang lupain. Nagtataka nga sila kung bakit pilit kinukuha ng NGCP ang ganitong kalaking lupa na labis-labis para sa paggagamitan nito,” ani ni Valdez.

Ipinagpasalamat din ni SSS President and Chief Executive Officer Emmanuel F. Dooc ang paunang resolusyon ng SC at umaasa na mananaig ang SSS sa laban na ito para sa mga kasalukuyan at darating pang mga miyembro.

“Malugod naming pinasasalamatan ang preliminaryong desisyon ng SC na mag-isyu ng SQAO at umaasa kami na pagkatapos ng mga tamang proseso, ito’y magiging permanenteng tagumpay para sa pension fund at mga miyembro nito,” sabi ni Dooc.

Nauna rito, binalaan ni Valdez ang NGCP na maaaring mawala ang mga lupain nakuha nila noon kung papaboran ng korte ang SSS.

“Bukod sa pagkawala ng aming ari-arian na nais nilang makuha, kung ang pumabor sa amin ang SC, sa tingin ko, ang ibang nilang nakuhang lupa noon ay dapat ring sumailalim sa pagsisiyasat,” sabi ni Valdez.

Ayon rin kay SSS Commissioner Jose Gabriel La Viña, bilang chairman ng SSC Investment Committee, hindi pa rito natatapos ang laban ng SSS.

“Asahan po nila na ang ng kasalukuyang administrasyon ng SSS ay hindi magpapabaya hanggang sa tuluyang ng mawala ang banta ng pagkuha sa ating lupain,” ani niya.

Ang SSS, sa pamamagitan ng Office of the General Corporate Counsel (OGCC) ay nag-file ng Petition for Certiorari sa SC noong Mayo. Ito ay isang pakiusap na maglabas ang Korte Suprema ng Status Quo Ante Order at / o Writ of Preliminary Mandatory Injunction.

Naghain ng petisyon ang SSS sa pangunguna ng Office of the Government Corporate Counsel (OGCC) para kwestyunin ang batayan ng pagkuha ng lupa ng SSS noong Mayo bunsod ng pag-isyu ng Writ of Possession ng RTC Branch 108 ng Pasay City pabor sa NGCP na sakupin ang 60, 872 metro kwadrado na lupain ng SSS sa Pasay City na pamg-aari ng mahigit 34 milyong miyembro nito.

Kwinestyon ng SSS ang kapangyarihan ng NGCP, isang pribadong kompanya, na kumuha ng lupain nap ag-aari ng pamahalaan at nakatakda ng gamitin para sa publiko.

“Sinusubok ng kasong ito ang kapangyarihan ng ekspropriyasyon na dapat ay sa pamahalaan lamang, ngunit ginagampanan ng isang pribadong korporasyon,” dagdag niya.

AABOT sa P300,000 halaga ng marijuana ang nakumpiska ng mga awtoridad makaraang madakip ang dalawang menor-de-edad sa drug buy-bust operation sa Novaliches, Quezon City kagabi, Hulyo 11, 2017 (Martes).

Ayon kay Quezon City Police District (QCPD) Director, Police C/Supt. Guillermo Lorenzo Eleazar, nagsagawa ng drug operation ang mga tauhan ng District Drug Enforcement Unit (DDEU) at Philippine Drug Enforcement Agency-National Capital Regional Office (PDEA-NCRPO) at nadakip ang dalawang lalaking edad 15 – 16 dakong 10:30 ng gabi sa King Charles St., Kingspoint Subd., Brgy. Bagbag, Novaliches, QC.

Nakumpiska ng mga pulis ang limang bricks ng pinatuyong dahon ng marijuana na nakabalot sa diyaryo at may timbang na limang kilo at may nagkakahalaga ng P300,000.

Isang tauhan ng pulis ang nagpanggap na poseur buyer na bibili ng marijuana sa halagang P75,000 mula sa mga suspek.

Matapos iaabot ang naturang marijuana, agad dinakip ang mga suspek.

Kasalukuyan nang nasa himpilan ng pulis ang mga menor-de-edad habang nakikipag-ugnayan na ang mga pulis sa Department of Social Welfare and Development (DSWD) para sa kaukulang turnover sa mga suspek. SANTI CELARIO

DALAWANG katao ang patay, kabilang ang isang siyam-na-taong gulang matapos makuryente sa magkahiwalay na bayan sa Pangasinan noong Lunes, July 10.

Sa unang ulat, sa Malasique, kinilala ang biktimang si Cjay Pascua, 9, grade 3 pupil, ng Brgy. Lunec.

Ayon sa ina ng biktima na si Leonila Pascua, pumanhik ang kanyang anak sa bubong sa kanilang bahay.

Dito ay bigla na lamang nanginig ang kanyang anak nang maapakan ang isang live wire.

Hindi na umabot nang buhay ang bata sa pinakamalapit na ospital sanhi ng third-degree burn.

Sa Mangatarem, patay ang isang 60-anyos na si Myrna Serquina, ng Brgy. Bantay.

Ayon sa pulisya, hindi napansin ng biktima ang nahawakang open live wire na nakakonekta sa kanilang fuse box.

Dahil dito, biglang bumaliktad ang biktima at agad na namatay. ALLAN BERGONIA