POSIBLENG dalawang hanggang tatlong bagyo ang mabubuo sa Pacific Ocean at papasok sa Philippine area of responsibility (PAR) sa Hulyo.

Ayon sa PAGASA, kung hindi lilihis ay maaaring mag-landfall ang isa sa mga potensyal na bagyo sa Eastern Visayas o sa Central Luzon, o hindi kaya’y tatawid lamang ito sa extreme northern Luzon.

Samantala, umiiral sa ngayon ang inter-tropical convergence zone (ITCZ) sa buong bansa, partikular sa Mindanao.

Sa rainfall forecast ng MetraWeather, hanggang matitinding ulan ang aasahan sa Mindanao, lalo na sa hapon at sa gabi pagsapit ng weekend.

Posible namang umiral ang mga local thunderstorm sa bandang hapon at gabi ng weekend sa iba pang bahagi ng bansa.

Maaaring mararanasan ang matinding ulan sa mga rehiyon ng Cordillera, MIMAROPA, at Negros.

Kahit na maalinsangan, uulanin din ang Metro Manila, partikular na sa hapon at gabi. BOBBY TICZON

SISIMULAN na ng National Capital Region Police Office (NCRPO) ang preparasyon sa seguridad para sa nalalapit na State of the Nation Address (SONA) ni Pangulong Rodrigo Duterte sa Hulyo 24.

Ayon kay NCRPO Chief Dir. Oscar Albayalde, nakatakda silang magsagawa ng anti-CDM o Crowd Disturbance Management competition sa Rizal Park sa Sabado.

Aniya, makikibahagi sa nasabing CDM competition ang regional police safety batallion at public safety batallion ng NCRPO.

Tiniyak ni Albayalde na mas mahigpit ang ipatutupad na seguridad sa SONA dahil na rin sa ilang usapin tulad ng implementasyon ng Martial Law sa Mindanao at krisis sa Marawi City. JOHNNY ARASGA

BAGUIO CITY – Dahil sa suot na maikling short pants, isang dalagita ang naghain ng reklamo sa Baguio City Police Office (BCPO) kahapon (July 3) matapos siyang hipuan sa hita ng isang menor-de-edad sa Brgy. Fairview sa nasabing lungsod.

Kinilala ang nagreklamo na si Princess (hindi tunay na pangalan), ng nasabing barangay.

Samantala, patuloy na pinaghahanap ang suspek na isang menor-de-edad na nakasakay sa isang motorsiklo.

Sa ulat, sinabi ni BCPO Station 1 commander P/C Insp. Eddie Bagto, naglalakad at nagte-text ang biktima na nakasuot ng maikling shorts nang lapitan ito ng suspek saka hinagod ang kamay sa mapuputi nitong hita.

Napasigaw ang biktima at sa puntong iyon, biglang tumakas ang suspek sakay ng isang motorsiklo.

Pinaalalahanan ni Bagto ang mga dalagita sa lungsod na iwasan ang pagsusuot ng maiksing short pants upang maiwasan ang mga ganitong insidente na humahantong minsan sa panggagahasa. ALLAN BERGONIA

ISA na namang barangay chairman ang pinagbabaril hanggang sa mamatay kagabi, July 3, sa Taguin, Ilocos Sur.

Kinilala ang biktimang si Baltazar Lodia, Sr., tserman ng Brgy. Salvacion.

Sa inisyal na imbestigasyon, naglalakad ang biktima pauwi nang bigla siyang lapitan ng suspek na nakilalang si Rufino Gonzaga saka pinutukan sa ulo.

Matapos ito’y tumakas ang suspek na kaswal lang na naglalakad at tila walang nangyari.

Sa ngayon ay nagsasagawa na ang manhunt operation ang pulisya laban kay Gonzaga at inaalam ang motibo nito sa pamamaslang. ALLAN BERGONIA

ARESTADO ang isang fixer sa Land Transportation Office (LTO) sa isinagawang entrapment operation sa Anonas, Quezon City kamakalawa ng gabi.

Kinilala ni Quezon City Police District (QCPD) Director, C/Supt. Guillermo Lorenzo Eleazar ang suspek na si Elizabeth de Vera, 45, ng Brgy. Holy Spirit.

Sa ulat, nadakip ang suspek dakong 8:20 ng gabi sa #1 Acacia St., Brgy. Claro, sa isinagawang entrapment operation sa raket nitong paggawa ng pekeng LTO registration documents.

Nagharap ng reklamo ang mga complainant na sina Jofre Juan, Joel dela Cruz, at Alex Buenaventura, makaraang iparehistro ang kanilang pampasaherong dyip kahit na hindi dinadala ang mga kanilang sasakyan sa Land Transportation Office (LTO) sa tulong na rin ni De Vera.

Makaraang ibigay sa mga complainant ang rehistro ng kanilang sasakyan, nagtungo si Jofre Juan sa isang tanggapan ng LTO para i-check at i-validate ang kanyang hawak na dokumento kung totoo subalit wala sa record ang kanyang hawak na registration.

Dito na humingi ng tulong sa District Special Opertion Unit (DSOU) at sa mga opisyal ng Brgy. Clara para isagawa ang operasyon laban sa suspek.

Agad dinakip ng mga pulis ang suspek matapos ipain ang P3,000 laban sa una.

Nahaharap sa kasong Article 315 of the Revised Penal Code (Estafa) and R.A. 9485 (Anti-Red Tape Act of 2007) laban ang suspek. SANTI CELARIO

AABOT sa P134-milyong halaga ng iligal na droga ang sinira ng Philippine Drug Enforcement Agency (PDEA) sa Maysilo, Malabon City kaninang umaga, Hulyo 4, Martes.

Ayon sa PDEA 44, 669.65 gramo ng shabu at 10.58 gramo ng marijuana ang sinira ng mga awtoridad.

Sinabi ni PDEA Dir. Isidro Lapeña, karamihan sa mga drogang sinira ay nakumpiska sa isinagawang operasyon ng PDEA at PNP sa ipinatupad na search warrant na nagresulta ng pagkakaaresto sa apat na drug personality sa Banawe St., Brgy. Manresa, QC nitong nakalipas na Nobyembre 16, 2016.

Nabatid na isinagawa ang pagsira sa mga nakumpiskang droga sa Clean Leaf International Corp., M.H. del Pilar St., Maysilo, Malabon City.

Sinaksihan ng mga opisyal ng PDEA, ibang law enforcement agencies, Department of Justice (DOJ), Dangerous Drug Board (DDB), Public Attorney’s Office (PAO), Non-Government Organization (NGOs) at media ang naturang aktibidad.

Sinabi ni Lapeña, ang pagsira sa mga nakumpiskang droga ay bilang pagtalima ng ahensya sa iniutos ng batas.

“The destruction of seized illegal drugs is in accordance with provision of the law and will eliminate any misconception that these items are being recycled and peddled back into the street,” ani Lapeña. SANTI CELARIO

UTAS ang magkasintahan makaraang pagbabarilin ng dalawang salarin sa Brgy. Batasan Hills, QC kagabi, Hulyo 2.

Kinilala ni P/Supt. Lito Patay ang mga nasawing sina Analou Soberano alyas Balot, dalaga, 29, ng Fortune St., Freedom Park 3, Brgy. Batasan Hills, at kasintahan nitong si Anthony Mark Cabreros, alyas Agang, 32, ng nasabi ring lugar.

Nabatid agad binawian ng buhay si Soberano dahil sa tama ng bala sa ulo habang ang boyfriend nitong si Cabreros ay naisugod pa sa East Avenue Medical Center (EAMC) subalit hindi na rin umabot nang buhay.

Sa ulatm naganap ang insidente dakong 8:20 ng gabi malapit sa tirahan ng mga biktima.

Bago ito, nag-uusap ang magkasintahan sa lugar kasama ang isang tomboy nang bigla na lamang sumulpot ang dalawang suspek.

Agad nitong binaril sa ulo si Soberano na duguang bumulagta at binaril naman sa katawan ang boyfriend nito na agad namang na naisugod sa naturang ospital.

Sa ngayon ay inaalam pa ng pulisya kung may kinalaman sa iligal drugs ang naturang insidente. SANTI CELARIO

BUMULAGTA sa kasiyasahan ang isang bagong promote pa lamang na Department of Education (DepEd) official sa Pagadian City nitong Lunes ng gabi.

Sa ulat ng Pagadian City police, kinilala ang biktimang si Marcom Borongan, 47, ng Brgy. Dao, Pagadian City, at outgoing officer-in-charge ng Schools Division Superintendent ng lungsod.

Si Borongan ang bagong uupo sa posisyon bilang provincial schools division superintendent ng Zamboanga del Sur.

Nangyari ang pamamaril dakong 6 p.m. habang isinasagawa ang turnover ceremony at despedida party sa loob ng teacher’s center.

Nabatid na habang abala ang biktima sa aktibidad kasama ang marami pang mga guro, pasimpleng pumasok ang salarin at biglang binaril ang opisyal sa ulo at dibdib gamit ang caliber .45 pistol.

Sa salaysay ng mga nakasaksi, naka-pink na T-shirt ang suspek na tumakas sakay ng motorsiklo.

Itinakbo pa ng mga guro si Borongan sa pagamutan pero hindi na ito umabot nang buhay.

Isa sa mga tinitingnang anggulo ng awtoridad ay kung may kaugnayan sa kanyang trabaho ang krimen o sa personal niyang buhay. BOBBY TICZON

TIGBAK ang isang rider matapos makasalpukan ang isang trak na nag U-turn sa Valenzuela City, kaninang umaga.

Dead-on-the-spot sanhi ng mga tinamong pinsala sa ulo at katawan ang biktimang si Rhodes del Rosario, 35, ng 159 Manumbas cmpd., Brgy. POCC Gulod Exit, Novaliches, Quezon City.

Nakapiit naman ngayon habang nahaharap sa kasong reckless imprudence resulting in homicide ang driver ng trak ng LPG (REX-728) na si John Almazon, 39, ng Marco LPG Co., Inc. (X5), Brgy., Ugong.

Ayon kay Valenzuela police chief S/Supt. Ronaldo Mendoza, dakong 7:00 ng umaga, kapwa binabagtas ng suspek at ng biktima ang Mindanao Ave. Extn., Brgy. Ugong north bound habang sakay ito ng kanyang Suzuki Raider (KI-1367).

Nag-U-turn patungong south bound lane si Almazon dahilan upang makasalpukan ang motorsiklo ng biktima.

Sa lakas ng impact, tumilapon nang ilang metro sa kanyang motorsiklo ang biktima at tumama ito sa poste ng ilaw na naging dahilan ng kanyang kamatayan habang kusang-loob namang sumuko sa pulisya si Almazon. RENE MANAHAN

IBINASURA na ng Supreme Court (SC) ang petisyon na kumukwestiyon sa legalidad ng deklarasyon ng Martial law sa Mindanao.

Sa isinagawang press briefing, sinabi kaninang Martes ng umaga ni SC Spokesperson Atty. Teodore Te na pinaboran ng mga mahistrado ang deklarasyon ng batas militar sa botong 11-3-1.

Ang 11 justices ay pumabor na ibasura ang petisyon, partially-granted naman ang boto ng tatlong mahistrado habang isa ang kumontra.

Kabilang sa mga bumoto pabor sa Proclamation 216 ng Pangulong Rodrigo Duterte sina Justices Presbitero Velasco, Teresita de Castro, Diosdado Peralta, Justice Lucas Bersamin, Mariano del Castillo, Jose Mendoza, Bienvenido Reyes, Estela Perlas-Bernabe, Francis Jardeleza, Samuel Martires at Noel Tijam.

Partially-granted naman ang boto nina SC Chief Justice Maria Lourdes Sereno, Justices Antonio Carpio at Benjamin Caguioa sa kadahilanang nais lamang umano nilang sa Marawi City maideklara ang Martial law.

Habang ang kumontra ay si Justice Marvic Leonen.

Maaalalang Hunyo 13 – 15 isinagawa ang oral arguments sa mga petisyon na inihain ng ilang dati at kasalukuyang mambabatas at ilang residente ng Marawi City at lefties groups.

Mayo 23 nang idineklara ni Pangulong Duterte ang martial law sa Mindanao sa loob lamang ng 60 araw dahil sa pag-atakeng inilunsad ng mga teroristang grupo sa pangunguna ng Maute Group sa Marawi City sa hangarin na makapagtayo roon ng teritoryo ng Islamic State. BOBBY TICZON

NILASING muna ng isang ginang bago nito pinatay ang kanyang ka-live-in na isang adik at babaero sa Pangasinan town kaninang Martes ng madaling-araw, Hulyo 4.

Dead-on-arrival sanhi ng tinamong pinsala sa ulo ang biktimang si Ariel Nery Villaflor, 38, habang nakakulong na ngayon at nahaharap sa kasong parricide ang 41-anyos na misis na si Vicky Viernes.

Sa ulat, naganap ang insidente dakong 12:25 a.m. sa mismong bahay ng magasawa sa Pozzorubio, Pangasinan.

Bago ito, nabatid na madalas magtalo ang magka-live-in dahil sa pambababae ng biktima at paggamit ng iligal na droga.

Sa kabwisitan, niyayang uminom ng suspek ang kanyang kinakasama sa kanilang bahay sa Brgy. Palac-palac at nang malasing ay saka nito isakatuparan ang pagpatay sa kanyang mister.

Sa pagsusuri, namatay ang biktima sa hampas ng tubo sa kanyang ulo. BOBBY TICZON

ISANG 59-anyos na beautician at kanyang pinsan ang pinagbabaril at napatay ng apat na maskaradong suspek sa loob mg kanilang bahay Martes ng gabi, July 4, sa Navotas City.

Dead-on-arival sa Navotas City Hospital ang biktimang si Romeo Olarte sanhi ng mga tama ng bala sa ulo habang ang pinsan nitong si Apollo Blasco, 37, ay namatay habang ginagamot sa nasabi ring ospital pasado ala-1:45 kaninang ng madaling-araw.

Mabilis na tumakas ang mga suspek na pawang nakabonet sakay ng dalawang motorsiklo na walang mga plaka.

Ayon kay Navotas deputy police chief for administration Supt. Raymond Mayuga, nagpapahinga nood ang mga biktima sa kanilang bahay sa Fatima St., Brgy. Daanghari nang biglang pasukin ng mga suspek pasado alas-10:25 ng gabi saka pinagbabaril sa ulo.

Agad nagsagawa ng follow-up operation ang mga awtoridad subalit bigo na makilala at maaresto ang mga salarin.

Naniniwala ang mga imbestigador na posibleng may kaugnayan sa iligal na droga ang insidente matapos makarekober ang pulisya ng isang container na may mga sachet ng shabu at mga drug paraphernalia. ROGER PANIZAL

NAGKAGULA-GULANIT ang katawan ng isang live-in partner matapos hagisan ng granada ang kanilang bahay sa Brgy. Vira Roxas, Isabela kaninang ala-1:00 ng madaling-araw.

Namatay noon din sanhi ng mga tinamong pinsala sina Bernard Teel, 24, residente sa nasabing lugar, at Lornalita Guiao, 17, service crew at taga-Angadanan, Isabela.

Wala pang ideya ang pulisya kung sino ang nasa likod ng krimen at kung ano ang motibo rito.

Sinabi ni Police C/Insp. Dennis Pamour, hepe ng Roxas Police Station, natutulog ang mga biktima nang hagisan sila ng mga ‘di pa kilalang suspek ng granada sa bintana.

Lumalabas sa imbestigasyon na nahulog sa kulambo ang granada kaya tinamaan ng shrapnel at nasunog ang katawan ng mga biktima.

Nagkabutas-butas din ang kuwarto ng magka-live-in partner pero mapalad na hindi nadamay sa pagsabog ang mga menor-de-edad na kapatid ng biktimang lalaki na nasa kabilang kwarto. BOBBY TICZON

HINATID na sa huling hantungan ang limang miyembro ng pamilya sa Bulacan kaninang Miyerkules ng umaga.

Ang padre de pamilyang si Dexter Carlos, mga kaanak at kaibigan ay nakasuot ng puting T-shirt na nakasulat ang pangalan ng limang biktima sa harapan habang sa likod ay nakasulat ang panawagan na dapat ibalik ang death penalty.

Ayon kay Carlos, kulang ang pag-amin ng suspek na si Carmelino “Miling” Ibanes para maibalik ang buhay ng kanyang mahal sa buhay.

Hindi rin niya maipaliwanag ang kanyang nararamdaman matapos na mabalitaan na pinatay ang isang person of interest na si Ronaldo Pacino alyas “Inggo”.

Natagpuan ito kahapon ng umaga na tinalian ng pump belt ang leeg, putol ang limang daliri at may karatula pa na “Adik at rapist huwag tularan” sa hindi kalayuan sa kanilang lugar.

Matatandaang nabanggit ang pangalan ni Pacino ng itinuturing na primary suspek na si Carmelino “Miling” Ibañez na pumaslang sa mga biktmang sina Auring Dizon, 53, Estrella, 35, at tatlong mga menor-de-edad na anak nito.

Ilan din sa mga persons of interest ang hindi na nakita sa lugar at isa sa mga dito ay pinangangambahang dinukot ng hindi nakikilalang mga suspek. BOBBY TICZON

PINUGUTAN ng Abu Sayyaf bandits ang dalawa sa kanilang limang Vietnamese hostages sa Basilan.

Ang walang ulo na mga bangkay na nakilalang sina Hoang Thong at Hoang Va Hai, ay narekober kaninang madaling-araw sa may Brgy. Tumahubong sa Sumisip town ng isang residente na ayaw magpakilala, ayon kay Col. Juvymax Uy, commander of Joint Task Force Basilan.

“The bodies were found at 5:40 in the morning by a member of the local populace,” pahayag ni Uy. “The cadavers will be made to undergo forensic exams as coordination with the Vietnamese embassy is also simultaneously done.”

Ang dalawa ay kabilang sa anim na miyembro ng Vietnamese ng MV Royal 16 na inatake noong Nobyembre 11 2016 sa may karagatan ng Sibago Island sa Basilan.

Matatandaang nitong nakaraang buwan, isa sa mga hostages, na si Hoang Vo, 28, ay na-rescue ng military sa Sampinit Complex, sa Sumisip din.

Ang mga nas kamay pa ng Abu Sayyaf ay nakilalang sina Pham Minh Tuan, Do Trung Hieu at Tran Khac Dung.

“[The] three other KVs (kidnap victims) are subject of the intensive ongoing rescue operations conducted by the troops of Basilan,” pahayag ni Capt. Jo-Ann Petinglay ng Armed Forces’ Western Mindanao Command. BOBBY TICZON

NAKALUBLOB sa kanal at wala nang buhay nang matagpuan ng kanyang mga kaanak ang isang mahigit isang-taong gulang lamang na lalaki kagabi sa Caloocan City.

Nakilala ang biktimang si Bryan Jay San Agustin, isang taon at 7-buwang gulang ng 142 Palon St., Brgy. 70 ng nasabing lungsod.

Agad namang naaresto ang suspek na hipag ng ama ng pinaslang na paslit at nakilalang si Maria Ruth Mariano, 23, ng nasabing address.

Sa ulat ng pulisya, natagpuan ang biktima dakong 11:30 ng gabi sa isang kanal sa kahabaan ng Palong St.

Ayon sa suspek, umaga pa lamang ay iniwan na sa kanya ng kanyang biyenan ang bata upang alagaan.

Dahil sa nakagamit ng shabu ay naging mainitin ang ulo nito at labis na nairita sa patuloy na pag-iyak ng bata na sinabayan pa ng pag-iyak ng kanyang dalawang anak na inaalagaan.

Ayon pa sa suspek, parang may nagbulong umano sa kanya na kunin niya ang bata kung saan ay nilagyan niya ng tape sa bibig at binalutan ng mga damit saka ikinulong sa loob ng kanilang cabinet.

Kinagabihan ng matantiya ng suspek na walang makakakita sa kanya ay kanyang inilabas ng bahay ang bata at itinapon sa kanal kung saan ito natagpuan.

Lingid sa kanyang kaalaman ay may nakakitang kapitbahay sa kanya nang lumabas ng bahay dala ang nasabing bata.

Labis ang paghingi ng kapatawaran ng suspek sa kanyang nagawa at umaming nagawa niya ang nasabing krimen dahil na rin sa epekto ng droga.

Kasong murder ang nakatakdang isampa kay Mariano sa piskalya ng lungsod. RENE MANAHAN

INAPRUBAHAN na ni Pangulong Rodrigo Duterte ang proposed P3.767-trillion national budget para sa susunod na taon sa ginanap na cabinet meeting noong Lunes, Hulyo 3.

Mataas ito nang 12.4 percent mula sa kasalukuyang P3.35-trilyong pambansang pondo.

Ayon kay Budget Sec. Benjamin Diokno, pinaplantsa na lamang ang 2018 national budget para maisumite sa pangulo sa mismong araw ng kanyang ikalawang State of the Nation Address (SONA) sa Hulyo 24.

Nabatid mula kay Presidential Spokesman Ernesto Abella na ang Department of Education (DepEd) ang may pinakamataas na alokasyon para sa susunod na taon.

Ang iba pang ahensya na may malaking parte ng proposed national budget ay ang Department of Public Works and Highways (DPWH), Department of Interior and Local Government (DILG), Department of Health (DOH), Department of Social Welfare and Development (DSWD), Department of Agriculture (DA), ARMM at Department of Environment and Natural Resources (DENR).

Inaasahang isusumite sa Kongreso ang 2018 proposed national budget na inaasahang bubusisiin ng mga mambabatas bago tuluyang aprubahan. JOHNNY ARASGA

NAGBABALA ang Department of Health (DOH) sa publiko sa mga sakit na maaaring makuha ngayong nagsimula na ang panahon ng tag-ulan.

Ayon sa DoH, ang waterborne disease tulad ng influenza, dengue at leptospirosis ay mga sakit na nakukuha tuwing tag-ulan.

Pinayuhan din ng DOH ang publiko na iwasang lumusong sa baha upang hindi mabiktima ng leptospirosis na nakukuha mula sa ihi o dumi ng daga.

Sa huling tala, mas mataas ang bilang ng kaso ng dengue ngayong taon kumpara sa nakalipas na taon kaya naman payo ng kagawaran sa publiko na panatilihing malinis ang kapaligiran.

Isa rin umano ang leptospirosis sa may pinakamaraming naitatalang kaso kapag tag-ulan.

Ilan lamang sa simtomas ng leptospirosis ay ang paninilaw, panghihina, lagnat. JOCELYN TABANGCURA-DOMENDEN

ISANG araw matapos katigan ng ang legalidad ng idineklarang Martial law ni Pangulong Rodrigo Duterte sa Mindanao, ipinaliwanag ng Korte Suprema kung bakit ito ang kanilang naging hatol.

Isinapubliko na kahapon ng Korte Suprema ang naging desisyon kaugnay sa mga tumututol at kumukwestyon sa naturang proklamasyon ng pangulo na nag-ugat sa sumiklab na kaguluhan sa Marawi City.

Ayon sa Supreme Court, may kapangyarihan si Duterte na isailalim ang buong bansa sa Martial law kahit pa nasa isang partikular na lugar lamang nagaganap ang rebelyon na dahilan nito.

Paliwanag ng Kataas-taasang Hukuman, nasa kamay ni Duterte ang diskresyon kaugnay ng territorial scope ng Martial law, na sa ngayo’y ipinaiiral sa Mindanao pa lamang.

Base pa sa desisyong nilagdaan ni Associate Justice Mariano del Castillo, bagaman pinahihintulutan ng 1987 Constitution ang Korte Suprema na siyasatin ang kapangyarihan ng pangulo na magdeklara ng Martial law, hindi naman nila ito maaring limitahan.

Para sa Korte Suprema, makatarungan naman ang dahilan ni Duterte sa pagdedeklara ng martial law at pagsuspinde ng privilege of writ of habeas corpus dahil sa pagkubkob ng Maute Group sa Marawi City noong May 23.

Nakasaad din dito na hindi lang practical kundi logical din ang ginawang proklamasyon lalo na’t nakasalalay dito ang territorial sovereignty ng bansa.

Anila pa, hindi na kailangan pang hintayin ni Duterte na umabot na sa bawat sulok ng bansa ang rebelyon bago siya magdeklara ng Martial law, dahil tiyak na hindi naman ito ang nais iparating ng Saligang Batas.

Tungkulin rin ng pangulo na panatilihin ang kapayapaan at kaligtasan ng publiko, at hindi lang ito limitado sa aktwal na pamamayagpag ng rebelyon, kundi pati na rin sa ibang aspeto kung saan posibleng lumawig ang pinangyayarihan ng mga karahasan. JOHNNY ARASGA