MAGTUTUNGO si Pangulong Rodrigo Duterte sa Marawi City sa darating na Biyernes.

Inanunsyo ito ni Duterte sa kanyang pagdalo sa 120th founding anniversary ng Presidential Security Group (PSG) sa Malacañang Park.

Ayon kay Duterte, hindi niya maatim na nakaupo lamang siya sa kanyang opisina habang nakikipagbakbakan ang mga sundalo sa mga teroristang miyembro ng grupong Maute.

Nais umano niyang puntahan ang conflict area sa Marawi City at personal na damayan ang tropa ng gobyerno roon.

Sa pamamagitan man lamang aniya ng pagdalaw sa mga sundalo ay maitaas niya kahit papaano ang moral ng mga ito sa gitna ng nagpapatuloy na giyera.

Sinabi ng pangulo na mahirap para sa kanya ang pagpapadala ng mga sundalo sa lugar ng gulo, subalit wala raw siyang magagawa dahil ito’y bahagi ng kanyang Constitutional duty at para maprotektahan din ang bansa laban sa mga terorista.

Mula nang sumiklab ang krisis sa Marawi City ay hindi pa nakapunta roon si Duterte.

Ngunit nagawa naman nitong madalaw ang mga bakwit sa Iligan, at binisita rin ang mga sugatang sundalo sa Cagayan de Oro. JOHNNY ARASGA

LIMANG bangkay ng mga sibilyan na walang ulo ang narekober ng awtoridad kahapon sa Brgy. Gadungan sa Marawi City.

Kabilang ang lima sa 17 katawan na narekober ng mga pulis, sundalo at civilian volunteers na pumasok sa barangay matapos itong mabawi ng tropa ng pamahalaan.

Ayon kay 1st Infantry Division spokesman Lt. Col. Jo-Ar Herrera, ito ang unang ebidensyang kanilang nakalap na mayroon nga talagang mga pinugutan ang mga teroristang Maute at Abu Sayyaf Group sa kasagsagan ng mahigit isang buwan na bakbakan sa Marawi.

Ani Herrera, natagpuan ang mga bangkay ng mga sibilyang walang habas na pinatay ng mga terorista sa dalawang magkahiwalay na lugar sa barangay.

Ngunit ayon sa civilian rescuer na si Abdul Azis Lomondot, wala silang nakitang patunay na pinugutan nga ang mga ito dahil nasa “advanced stage of decomposition” o nabubulok na ang mga ito.

Ayon naman kay Armed Forces of the Philippines (AFP) spokesman Brig. Gen. Restituto Padilla, Jr., malamang na marami pang sibilyan ang namatay kapag natapos na ang validation nila ng mga impormasyon.

Batay naman sa tantya ng mga lokal na opisyal, aabot pa sa 500 residente ang nananatiling trapped sa conflict zone sa Marawi. JOHNNY ARASGA

HINDI kumporme si Senador Gregorio Gringgo Honasan, Chairman ng Senate Committee on National Defense and Security, ang ginawang pagtatakda ng deadline o pagtaya ng Department of National Defense (DND) at Armed Forces of the Philippines (AFP) kung kelan matatapos ang krisis sa Marawi City.

Ayon sa senador, hindi praktikal sa ngayon na magsabi kung kailan maaaring matapos ang bakbakan sa Marawi City.

Ginawa ni Honasan ang pahayag matapos sabihin ng DND at AFP na inaasahan nilang matatapos na ang Marawi crisis bago ang State of the Nation Address (SONA) ng Pangulong Rodrigo Duterte sa July 24.

Paliwanag ng senador, mahirap matantiya kung kelan matatapos ang problema sa Maute group lalo pa’t itinuturing ito na teroristang grupo na walang malinaw na physical boundaries o front lines.

Kaugnay nito, sinabi rin ni Honasan na kumplikado kung paano matutugunan at mareresolba ang matitinding karahasang ginagawa ng Maute terror group. JOHNNY ARASGA

UMAMIN na ang isa sa mga suspek sa masaker na naganap sa San Jose del Monte, Bulacan.

Ang suspek na kinilala pa lamang sa alyas “Onyok” ang nagsabing nagawa niya at dalawang iba pa ang krimen dahil may galit umano sila sa pamilya Carlos.

Ayon kay Onyok, nag-ugat ang galit dahil sa tubig na pinagdadamot umano sa kanila ng biktimang si Estrella Carlos.

Inamin ni Onyok na siya at dalawang iba pang suspek ay gumamit ng shabu, uminom ng gin at beer bago ginawa ang krimen.

Hawak na ngayon ng San Jose del Monte Police si alyas Onyok.

Ayon kay Dexter Carlos, asawa ni Estrella, nakakutob na siya na ang mga nakikiigib sa kanila ang posibleng gumawa ng krimen.

Sinabihan na rin umano niya noon si Estrella na bumili na lang ng hose para hindi na kallangang pumasok ng mga nakikiigib sa kanilang compound. JOHNNY ARASGA

INUGA ng magnitude 4.0 na lindol ang bayan ng Hinatuan sa Surigao del Sur alas-4:37 ng umaga ng Huwebes.

Naitala ang pagyanig sa 75 kilometers East ng Hinatuan na may lalim na 19 kilometers.

Inaalam pa ng Phivolcs ang mga lugar kung saan-saan naramdaman ang pagyanig.

Samantala, alas-11:22 kagabi nang yanigin ng magnitude 3.9 na lindol ang Bislig City sa Surigao del Sur.

Naitala ang Intensity 3 sa Bislig City bunsod ng nasabing lindol. -30-

NAGKAROON ng P0.50 – P0.75 na dagdag sa presyo ng ilang brand ng sardinas.

Ayon sa manufacturing group na Canned Sardines Association of the Philippines, napapanahon ang naturang taas-presyo dahil taong 2012 pa huling gumalaw ang presyo ng sardinas.

Siniguro naman ng mga manufacturer na hindi tataas nang sobra ang mga presyo ng sardinas dahil kung mangyayari ito ay posibleng wala nang bumili.

Nagpahayag naman ng pagkabahala ang isang consumer group dahil hindi pa man naipatutupad ang isinusulong ng Department of Trade and Industry (DTI) na pagpapaubaya ng suggested retail price sa mga manufacturer ay tila ngayon palang ay hindi na makontrol ang pagsipa ng presyo ng mga bilihin. JOHNNY ARASGA

UMABOT sa P300-milyong halaga ng shabu ang nakumpiska sa dalawang drug suspect sa isinagawang drug buy-bust operation ng mga pulis sa Quezon City kagabi, Hunyo 28.

Kinilala ni Quezon City Police District (QCPD) Dir. Police C/Supt. Guillermo Lorenzo Eleazar ang nadakip na si Roberto Bernales alyas JR, 38, ng Old Balara, Tandang Sora, at Sarah Jane Malate, 26, ng San Nicolas, Pasig.

Ayon kay Eleazar, nadakip ang mga suspek sa isang drug buy-bust operation dakong 9:45 ng gabi sa M. Place Tower D, Panay Ave., Brgy. South Triangle.

Nakumpiska sa mga susek ang pitong sachet ng shabu na tinatayang 60 gramo at may street value na P300,000, isang Black Widow na baril at bala, cellphone at drug paraphernalia at P1,000 buy bust money.

Sa ulat, isang poseur buyer ang bumili ng droga sa suspek at matapos iabot ang droga ay agad ito dinakip.

Kaugnay nito, nadakip naman ng mga tauhan ng Talipapa police station 3 sa ilalim ni Supt. Danilo Mendoza ang suspek na si Rizaldy Pecana, 30, ng Brgy. Culiat dakong 8:30 ng gabi kamakalawa sa Vasra Toda malapit sa gas station sa Sanville Subd., Culiat.

Bago ito, itinawag sa mga pulis ang iligal na aktibidad ng suspek kung saan nahuli ito sa akto habang hawak ang shabu na kanyang binili. SANTI CELARIO

TIMBOG ang isang aktibong pulis sa ikinasang drug buy-bust operation sa Naga City, Cebu.

Ang suspek na si PO2 Ronjie Magsayo Nadora, 37, ay aktibong pulis at naka-assign sa Regional Personnel Holding Admin Unit ng Police Regional Office sa Central Visayas (PRO-7).

Ikinasa ng Regional Intelligence Division – 7 (RID-7) ang buy-bust operation sa bahay ni Nadora sa Brgy. Tuyan, Naga City, Huwebes ng umaga.

Naaktuhan pa ang suspek na naglalaro ng mahjong sa bahay kasama ang tatlong iba pang lalaki nang ikasa ng mga pulis ang operasyon.

Ayon sa mga awtoridad, nahulihan nila ng droga ang suspek na ngayon ay isinasailalim na sa imbentaryo. JOHNNY ARASGA

TODAS ang dalawang katao matapos pagbabarilin ng hindi kilalang salarin habang nasa tapat ng bahay sa Tandang Sora, Quezon City kagabi, Hunyo 28, Miyerkules.

Kinilala ni Supt. Danilo Mendoza, hepe ng Quezon City Police District station 3-Talipapa, ang mga biktimang sina Bernadette Añasco, ng 21 Florville St., Delta Village, Brgy. Tandang Sora, at Patrick Gregory Mercado, 37, may live-in partner, construction worker, ng nasabi ring lugar.

Kapwa namatay ang dalawa sa tinamong tama ng bala ng baril sa katawan.

Sa ulat ng QC police-Talipapa, naganap ang insidente dakong 8:30 ng gabi sa harap ng bahay sa no. 1010 Taurus St., Brgy. Tandang Sora, QC.

Nasa harap ng bahay sa Tandang Sora ang dalawang biktima nang biglang sumulpot ang hindi kilalang salarin at agad pinagbabaril ang mga biktima.

Agad binawian ng buhay si Anasco sa lugar habang si Mercado naman ay naisugod pa sa Quezon City General Hospital subalit namatay na rin.

Tumakas ang suspek matapos ang pamamaril at kasalukuyan ngayong nagsasagawa ng follow-up operation ang mga pulis para matukoy ang pagkakakilanlan ng mga salarin. SANTI CELARIO

KALABOSO ang isang 43-anyos na ginang at kasabwat nito nang tangkaing mangsikwat ng dalawang gold necklace sa Binondo, Maynila.

Nakapiit ngayon sa detention cell ng Manila Police District (MPD)-Station 11 ang suspek na si Rosie Gamboa, may live-in partner, ng 18-C Zamora St., Pasay City matapos na masabat ng mga elemento ng Gandara Police Community Precinct (PCP) at dahil sa reklamo ni Giovanni Montecino, 41, may-asawa, may-ari ng FM’s Jewelry store.

Nakatakas naman ang kasabwat nitong si alyas Romy.

Sa report ni C/Insp. Brigido Salisi, Deputy Station Commander ng MPD-Station 11, dakong 12:45 ng hapon nang naganap ang insidente sa loob ng FM’s Jewelry Store sa Arrangue Market sa CM Recto Binondo, Manila.

Nagpanggap umanong costumer ang mga suspek sa jewelry shop at kunwaring bibili ng gold necklace na nagkakahalaga ng P40,000.

Ayon sa pulisya, modus operandi na ng mga suspek ang magkunwaring titingin ng mga alahas.

Habang tinitignan ang alahas ay magtuturo pa ito ng iba pang disenyo ng alahas upang lituin ang may-ari ng jewelry shop.

Gayunman, ‘yung unang tiningnan nito ay ipapahawak sa kanyang kasabwat bago muling magsasabi na titingin ulit ng ibang disenyo.

Lingid sa kaalaman ng mga suspek ay natiktikan sila ng ina ng may-ari ng jewelry shop na agad na humingi ng tulong sa pulisya na eksakto namang nagpapatrulya ang mga element ng Gandara PCP na nagresulta sa pagkakaaresto ni Gamboa. JOCELYN TABANGCURA-DOMENDEN

PATAY ang dating bise alkalde sa bayan ng Nabua, Camarines Sur, matapos na maaksidente sa kanyang motorsiklo.

Sinabi ni PO2 Marlon Gallarte mula sa Nabua-PNP, paliko sana ang motorsiklo na minamaneho ng nagngangalang Sebastian Abinal, Jr., sakay ang backrider nito na si dating Nabua Vice Mayor Edgar Pastoral, sa Brgy. Lourdes Young, nang aksidente itong mabangga ng motorsiklo na minamaneho ng isang Ramon Santor.

Nahulog sa motorsiklo si Pastoral at tumama ang ulo nito sa semento.

Walang suot na helmet ang dating bise-alkalde gayundin ang driver ng dalawang motorsiklo kaya nagtamo ng sugat sa kani-kanilang ulo.

Naitakbo pa sa ospital si Pastoral ngunit binawian ito ng buhay habang nagpapagaling naman ang dalawang driver ng mga motorsiklo.

Ayon kay Gallarte, iniimbestigahan pa nila ang pangyayari dahil lumalabas na walang signal light ang motorsiklo na sinasakyan ng dating bise-alkalde habang mabilis naman ang pagmamaneho ni Santor.

Sa ngayon, nananatili na sa kustodiya ng mga awtoridad si Santor habang hinahanda pa ang kasong reckless imprudence resulting to homicide na isasampa laban sa kanya. BOBBY TICZON

ISANG babaeng rider ang tinakbuhan matapos mabangga ng isang pampasaherong jeep sa Sta. Cruz, Maynila.

Nakaratay ngayon sa Jose Reyes Memorial Medical Center (JRMMC) ang biktimang si Aileen Ybanez, 28, ng 60 San Labrador Himalayan, Pasong Tamo, Tandang Sora, Quezon City.

Sa ulat ng Manila District Traffic Enforcement Unit, dakong 9:20 ng umaga nang naganap ang insidente sa southbound lane ng Rizal Ave., sa harap ng Mang Inasal malapit sa Gonzales Puyat St., Sta. Cruz.

Ayon kay SPO2 Rommel del Rosario, binabagtas ng biktima ang naturang lugar lulan ng kanyng motorsiklo (PJX-773) nang masagi ng isang pampasaherong dyip dahilan upang mawalan ng kontrol at mabuwal.

Sa halip namang tumigil ang driver ng dyip ay iniwanan ito at tinakbuhan ang biktima na isinugod ng ilang concerned citizen sa naturang pagamutan.

Sa ngayon ay patuloy na inaalam ng MDTEU sa Land Transportation Office (LTO) kung kanino nakarehistro ang naturang PUJ upang mapanagot ang driver sa nangyaring insidente. JOCELYN TABANGCURA-DOMENDEN

MATAGUMPAY na kampanya laban sa droga, pagkontra sa korapsyon at imprastrastraktura ang nakikitang accomplishment ni dating Pangulo at Pampanga Rep. Gloria Macapagal-Arroyo sa unang taon pa lamang ng panunungkulan ni Pangulong Rodrigo Duterte.

Aniya, kakaiba at aktibong liderato ang ipinakita ng pangulo sa unang taon ng panunungkulan nito sa kabila ng kabi-kabilang pagtuligsa sa kanya ng oposisyon at katunggali sa pulitika.

“President Rodrigo Duterte has shown awesome leadership and resolve in the many programs that he promised to do during his presidency. In his first year, he managed to institute various bold reforms against illegal drugs and corruption. His Build, Build, Build initiative is commendable and is a step in the right direction towards achieving inclusive growth.”

Ngunit higit aniyang kapansin-pansin ay ang inspirasyon na ibinibigay ni Pangulong Duterte sa mga Pilipino at magkaroon ng pagkakaisa upang maipatupad ang mga kailangang pagbabago sa bansa.

“But more than his accomplishments in his work as president, President Duterte has achieved to inspire and unite the Filipino people towards his goal of effecting real change for the country. I wish him success and the best of health for the rest of his term as he fulfills his mandate for the nation and for the people.”

Gradong 8.7 naman kung saan 10 puntos ang pinakamataas ang ibinigay ni AKO BICOL Party-list Rep. Rodel Batocabe kay Pangulong Duterte.

Ito’y dahil aniya sa pagbabago sa peace and order sa bansa buhat nang ito’y manungkulan gayundin sa economic reforms na ipinatutupad nito.

Ngunit ang Magnificent 7 sa pangunguna ni Albay Rep. Edcel Lagman, na kilalang kritiko ng administrasyon ay nagbigay ng 4 na grado o bagsak sa administrasyon sa unang taon nito. MELIZA MALUNTAG

APAT na tama ng bala ang ibinaon sa mukha, leeg at dibdib ng isang tricycle driver na drug surrenderee dahil sa hindi nito pagtigil sa pagdrodroga nang barilin habang nagkakape sa tabi ng kanyang tricycle sa Sampaloc, Maynila.

Sa imbestigasyon ni PO3 Aldeen Legaspi ng MPD-Homicide Section, naganap ang pamamaril sa tapat ng 7-11 convenience store G. Tuazon St., kanto ng Masbate St., Sampaloc dakong 6:15 ng gabi.

Nabatid na nakatayo lamang sa tabi ng tricycle ang biktima at nagkakape nang biglang sumulpot ang mga ‘di nakilalang suspek na magkaangkas sa motorsiklo.

Agad bumaba ang angkas ng motorsiklo saka pinagbabaril ang biktima na hindi na nagawa pang makatakbo sa bilis ng pangyayari.

Wala namang makuhang impormasyon ang pulisya hinggil sa pagkakakilanlan ng mga suspek dahil pawang mga naka-helmet ang mga ito.

Sa pahayag ng mga nakasaksi, walang plaka ang motorsiklong gamit ng mga suspek na mabilis tumakas matapos ang krimen.

Masusi namang iniimbestihanan at inaalam ng pulisya kung posibleng may kinalaman sa iligal na droga ang pagpatay matapos na lumitaw sa pagsisiyasat na si Pigao ay drug personality na kasama sa drug watchlist ng kanilang barangay na dati nang sumuko sa ngunit hindi naman tumigil sa bisyo. JOCELYN TABANGCURA-DOMENDEN

TIMBOG ang dalawang katao matapos mahulihan ng bulto-bultong cocaine sa ikinasang buy-bust operation sa Filinvest Rd., Alabang, Muntinlupa City.

Kinilala ang mga suspek na sina Gecena Nuñez alyas Madam Bebe, at Andrew Nolasco.

Nakuha sa kamay ng mga suspek ang 23 sachet ng cocaine, limang sachet ng hinihinalang shabu, at P5,000 buy-bust money.

Ayon kay S/Supt. Dante Novicio, hepe ng Muntinlupa City Police, aabot sa P1-milyong halaga ng iligal na droga ang nasabat sa nasabing operasyon.

Sinasabing may isa pang kasamahan ang mga suspek na siyang target ng operasyon, pero hindi nila ito naabutan sa lugar.

Aminado naman si Madam Bebe na nagbebenta siya ng droga, pero itinanggi nitong kanya ang lahat ng narekober na ebidensya.

Ayon pa kay Novicio, big-time supplier ng droga sa lungsod ang mga nahuling suspek at matagal na nilang tina-target na mahuli ang mga ito.

Mahaharap ang mga suspek sa kasong paglabag sa Republic Act 9165 o Comprehensive Dangerous Drugs Act of 2002. JOHNNY ARASGA

INUGA ng magnitude 4.0 na lindol ang bayan ng Naguilian sa lalawigan ng La Union.

Naitala ng Phivolcs ang pagyanig sa 4 kilometers hilaga ng Naguilian alas-12:17 ng madaling-araw.

May lalim na 16 kilometers ang lindol at tectonic ang origin.

Wala namang naitalang intensity ang Phivolcs bunsod ng nasabing lindol.

Samantala, 12:07 naman ng madaling-araw nang tumama ang magnitude 3.4 na lindol sa bayan ng Sabtang sa Batanes.

Wala namang inaasahang pinsala na maidudulot ang dalawang pagyanig. JOHNNY ARASGA

NANGAKO ng tuluy-tuloy na tulong ang bansang China upang masawata ang terorismo sa Pilipinas, partikular sa Mindanao.

Ito ang tiniyak ni Foreign Minister Wang Yi kay Foreign Affairs Sec. Alan Peter Cayetano na bumibisita sa Beijing sa kasalukuyan.

Paliwanag ni Wang, unang bahagi pa lamang ng tulong ng China ang ipinadalang mga armas kamakalawa at magpapatuloy ang pagpapadala nila ng kinakailangang ayuda sa mga susunod na panahon.

Ayon naman kay Chinese Ambassador Zhao Jianhua, magkakaroon pa ng second batch ang mga armas na kanilang ibibigay sa Pilipinas.

Bagama’t hindi aniya kalakihan ang bilang ng mga armas na kanilang ibinigay, simbolo aniya ito ng panibagong yugto sa ugnayan ng Pilipinas at China.

Bukod sa usapin ng terorismo, patuloy rin aniyang tutulong ang China upang masugpo ang droga sa bansa. JOHNNY ARASGA

BUMAGSAK ang halaga ng piso sa halagang P50.53 kada isang dolyar sa pagsasara ng trading kahapon.

Ito na ang pinakamababang antas ng palitan ng piso kontra dolyar sa loob ng halos 11 taon.

Huling bumaba sa P50.54 bawat dolyar ang palitan noong September 11, 2006.

Sa kabuuan, umabot sa P7.77-bilyon ang total value turnover kahapon, Huwebes.

Ayon sa ilang eksperto, ang domestic investors ang nakahila sa merkado samantalang nagsilbi namang net buyers ang mga foreign investors na nakapagtala ng P118.61-million.

Bumaba naman ang local stock barometer sa 7,800 points samantalang nabawasan aman ng 69.12 points ang Philippine Stock Exchange (PSE) Index. -30-

INANUNSYO ng Professional Regulation Commission (PRC) na nasa 5,202 mula sa kabuuang 20,819 examinees ang nakapasa sa katatapos na Criminologist Licensure Examination sa bansa.

Ayon sa PRC, nanguna sa listahan ng mga pumasa sa pagsusulit si Gander Suello Quillip ng University of Mindanao-Digos College na may gradong 88.40, kasunod si Matthew Tobias Solomon ng ICCT Colleges Foundation, Inc. na may gradong 88.35 at pumangatlo si John Carlo Fetalcorin Fetalvero ng Bestlink College of the Philippines na nakakuha naman ng 87.95.

Nabatid na ang pagsusulit ay isinagawa nitong unang bahagi ng Hunyo sa mga lungsod ng Manila, Baguio, Cagayan de Oro, Cebu, Davao, Iloilo, Legazpi, Lucena, Pagadian, Tacloban, Tuguegarao at Zamboanga.

Inanunsyo naman ng PRC na simula sa Hulyo 13, 2017 ay uumpisahan na ang online registration para sa issuance ng Professional Identification Card (ID) at Certificate of Registration. MACS BORJA

PATAY ang isang tulak ng ipinagbabawal na droga makaraang sumabog ang hawak na granada na tinangkang ihagis sa mga aarestong pulis sa Caloocan City kagabi.

Kinilala ni Caloocan police chief, S/Supt. Chito Bersaluna ang nasawing si Freddie Aguirre alyas “Daddy Pido”, ng Brgy. 176, Bagong Silang, Caloocan.

Nauna rito, nakatanggap ng tawag mula sa ilang residente ang DEU Precinct 3 kaugnay ng lantarang bentahan ng iligal na droga sa Phase 8B sa pangunguna ni Daddy Pido na kabilang sa kanilang drug watchlist.

Dahil dito, nagkasa ang operatiba ng PCP-3 sa naturang lugar bandang alas-10:57 ng gabi at nang makita ni Daddy Pido ang mga awtoridad ay tumakbo ito na may dala-dalang granada sa loob ng bahay niya.

Tinangkang ihagis ng suspek ang granada sa mga pulis subalit naunahan siyang barilin kaya hindi nagawang ihagis at sumabog ito sa kanyang kamay dahilan ng kanyang pagkamatay.

Narekober ng mga pulis sa pinangyarihan ang grenade pin, tatlong pakete ng shabu na nagkakahalaga ng P50,0000, drug paraphernalia at dalawang piraso ng 12 gauge ammunition. RENE MANAHAN/JOJO RABULAN