ARESTADO ang isang AWOL (absent without official leave) na pulis at dalawang kasama nito sa isinagawang drug buy-bust operation ng mga pulis sa Quezon City kagabi, Hunyo 21, Miyerkules.

Kinilala ni Quezon City Police District (QCPD) Dir. C/Supt. Guillermo Lorenzo Eleazar ang nadakip na suspek na si Arsenio David, Jr., 55, ng Brgy. Concepcion, Marikina City (AWOL na Quezon City pulis), Lucila Palencia, 44, ng Brgy. Barangka, Marikina City, live-in partner ni David, at Arnold Blanco, 42, ng U.P. Bliss, Brgy. San Vicente.

Ayon kay Eleazar, nadakip ang suspek dakong 10:00 ng gabi sa isang buy-bust operation sa bisinidad ng Jollibee Commonwealth-Philcoa sa Brgy. San Vicente, QC.

Nabatid na si David ay under close monitoring ng Anonas Police station 9, District Drug Enforcement Unit (DDEU) matapos makatanggap ng impormasyon ang mga awtoridad sa pagkakasangkot ng suspek illegal drug.

Bunsod nito, ikinasa ng mga awtoridad sa pangunguna ng District Special Operation Unit (DSOU), District Drug Enforcement Unit (DDEU) at Anonas Police Station ng QC Police at PDEA-NCRO ang isang buy-bust operation laban sa suspek at dito na nadakip matapos umanong bentahan ng droga ang isang poseur buyer ng mga awtoridad.

Si David ay nag-AWOL simula noong 2015 hanggang sa matanggal siya sa listahan ng mga aktibong pulis noong Abril 2017.

Ang dating assignment ni David ay ang Anonas Police station 9, Fairview Police station.

Nakuha mula sa suspek ang anim na sachet ng shabu, drug paraphernalia, dalawang cellphone, patalim at buy-bust money.

Nahaharap ang suspek sa kasong paglabag sa R.A. 9165 na mas kilala sa The Comprehensive Dangerous Drugs Act of 2002. SANTI CELARIO

LIMANG mga hinihinalang sangkot sa droga ang nasawi makaraang makipagbarilan sa mga awtoridad sa magkakahiwalay na operasyon ng pulisya sa Caloocan City.

Ayon kay Caloocan police chief S/Supt. Chito Bersaluna, dakong 4:15 kaninang madaling-araw nang makipagbarilan ang umano’y drug pusher na si Frederick Cleopas, 30, ng 459 Rubyville Bukid, Brgy. 160 sa mga operatiba ng Police Community Precinct (PCP) 7 sa pangunguna ni C/Insp. Amor Cerillo malapit sa kanyang bahay.

Ang suspek ay kakalabas lamang sa kulungan noong February dahil sa kasong pagbebenta ng iligal na droga.

Sa Brgy. 176, Bagong Silang, nagsasagawa ng anti-drug operation ang mga tauhan ng PCP-3 Drug Enforcement Unit (DEU) sa pangunguna ni Insp. Alex Hermogeno sa kahabaan ng Grema Phase 1, Package 2, Blk. 27, dakong 10:30 ng kagabi nang maaktuhan sina Michael Malisua, 47, at Rodel Alcaraz, 43, na nagbebenta ng droga.

Gayunpaman, nang mapansin ng mga suspek ang mga pulis ay naglabas ito ng baril at pinaputukan ang mga operatiba, napilitan namang gumanti ng mga putok ang mga awtoridad na nagresulta ng kamatayan ng mga suspek at narekober sa kanila ang dalawang kalibre .38 revolver at drug paraphernalia.

Nauna rito, dakong 9:30 naman ng gabi nang makipagbarilan si Julius Soriano, 24, ng 97 Libis, Talisay Dulo gamit ang kalibre .38 revolver sa mga tauhan ng District Drug Enforcement Unit ng Northern Police District (NPD) sa buy-bust operation sa kahabaan ng Tambakan St., Brgy. 12 na naging dahilan ng kamatayan nito.

Sa Brgy. 175 Camarin, patay din si Rodolfo de Guzman, Jr., 37, ng Sitio Matarik Upper matapos umanong makipagbarilan din sa mga tauhan ng SIB na nagkasa ng buy-bust operation kontra sa suspek dakong 4 ng hapon.

Nakuha sa suspek ang kalibre .45 pistola, 16 plastic sachet ng hindi pa mabatid na halaga ng shabu at isang kitchen knife. RENE MANAHAN

BUMULAGTA sa lansangan ang may 20 katao habang 50 naman ang malubhang nasugatan nang sumambulat ang isang ‘car bomb’ sa labas ng isang bangko sa Helmand, Southern Afghanistan.

Ayon sa mga pulis, na-detonate ang bomba sa gate ng New Kabul Bank branch sa Lashkar Gah.

Napaulat na kasama ang mga sibilyan at ilang miyembro ng awtoridad sa mga nasawi.

Sa kasalukuyan, wala pang umaako sa nasabing pagsabog, ngunit nadadawit naman ang Taliban at Islamic State dahil sa pagsasawa ng mga ito ng mga pagbsabog noong mga nakaraang buwan.

Kasalukuyan nang ginagamot sa ospital ang mga napaulat na sugatan. BOBBY TICZON

SUMUKO sa awtoridad ang 11 aktibong kasapi ng Abu Sayyaf Group (ASG) sa munisipyo ng Sumisip sa Basilan.

Sinabi ni Lt. Gen. Carlito Galvez, Jr., commander ng Western Mindanao Command (WestMinCom), kabilang sa 11 sumukong bandido ang isang nagsisilbing sub-leader na nakilalang si Ibrahim Malat Sulayman, tubong Brgy. Macalang sa munisipyo ng Albarka.

Kinilala naman ang 10 iba pa na sina Salimbawa Ahlil Tanjal alyas Salim Toong Masud, Salasni Ambing Mahawan alyas Ado Emmong, Ahmad Abbi alyas Bolkia, Mar-ie Cabulut Indama, Muhammad Kalung-Hassan, Salman Hawkasa, Husael Fernandez, Roy Mendoza Cabiangan, Ebtor Asano, at si Madja Palinta.

Ang mga sumuko ay nasa ilalim ng grupo nina Nurhassan Jamiri at Furuji Indama na direktang sumuko sa tropa ng 68th at 74th Infantry Battalion ng Philippine Army ng Joint Task Force Basilan.

Kasama rin sa kanilang pagsuko ang pitong high-powered at four low-powered firearms na may mga bala.

Matapos ang isinagawang seremonya at documentation sa Sumisip Municipal Hall Complex sa Brgy. Buli-Buli, Sumisip, kaninang Biyernes ng umaga, ibinigay na sa kustodiya ng municipal government ang 11 mga sumukong Abu Sayyaf.

Ayon kay Galvez, ang patuloy na intensified operations sa mga bulubunduking bahagi ng Basilan at nagbigay ng pressure sa ASG na sumuko sa militar. BOBBY TICZON

ISINUGOD sa pagamutan ang may 33 mag-aaral matapos kumain ng “isaw” burgers na itininda sa labas ng kanilang eskwelahan sa Pangasinan kaninang Biyernes ng umaga.

Sinabi ni Dr. Anna Maria Theresa de Guzman, provincial health officer, 22 mag-aaral na edad 9 – 12 ang naka-confine ngayon sa Pangasinan Provincial Hospital sa San Carlos City habang ang natitira naman ay pinauwi rin kaagad matapos mabigyan ng lunas.

Bago ito, nakaramdam ang mga mag-aaral mula sa Nalsian-Bacayao Elementary School ng pananakit ng tiyan at pagsusuka matapos kumain ng burgers, na ibinenta sa halagang P5.

Ang burger patty ay magkahalong chicken intestines at chicken liver. Tinutugis na ng pulisya ang tindero na nakaalis na bago sumakit ang tiyan ng mga bata. BOBBY TICZON

NASAKOTE ang dalawang lalaki ng mga kagawad ng Quezon City police Drug Enforcement Unit sa isang buy-bust operation sa Mindanao Ave., sa Quezon City kagabi, June 22.

Kinilala ni QCPD police Director, C/Supt. Guillermo Eleazar ang mga suspek na sina Gladwin Balaguer at Joel Taruc.

Sa inisyal na impormasyon, umamin ang isang suspek na si Balaguer na dati siyang kawani ng Department of Transportation and Communication (DOTC).

Nakumpiska mula sa mga suspek ang mahigit na 200 gramo ng shabu na tinatayang nagkakahalaga ng P1-milyon.

Nahaharap ngayon ang dalawa sa kasong paglabag sa Section 11 (Possession of Dangerous Drugs) at Section 5 (Sale of Dangerous Drugs) sa ilalim ng Article 2 ng Republic Act 9165 o Comprehensive Dangerous Drugs Act of 2002. JOHNNY ARASGA

HINDI na tuloy ang hiling ng ilan na isagawa muli sa Pilipinas ang susunod na Miss Universe beauty pageant.

Ito ang kinumpirma ni Tourism Sec. Wanda Teo.

Nang matanong kung bakit, sinabi ni Teo na masyasong magiging maaga kung agad na magsasagawa ng isa pang Miss Universe sa Pilipinas.

Matatandaang noon lamang Enero 30 isinagawa rito sa Pilipinas ang 2016 Miss Universe pageant kung saan nagwagi si Miss France, Iris Mittenaere.

Bago ito, itinanghal si Miss Philippines Pia Wurtzbach bilang 2015 Miss Universe noong 2015. -30-

BAHAGYANG magdadagdag-singil sa kuryente ang Meralco sa buwan ng Hulyo.

Ang kadaragdagang P0.02 kada kilowattHour (kWh) sa singil sa kuryente ay ipatutupad ng Meralco kada-buwan sa loob ng 29 na buwan.

Ito’y dahil sa P1.69-bilyong utang ng Meralco na babayaran sa Philippine Electricity Market Corporation (PEMC).

Sa kabila nito, sinabi ng Meralco na kahit may idadagdag na P0.02 per kwh ay makararamdam pa rin ng pagbaba sa kabuuang bill.

Ayon sa Meralco, sa Hulyo kasi ang ikalawang bugso ng refund na P0.79 per kwh.

Samantala, humirit naman ng dagdag-singil sa tubig ang Maynilad at Manila Water.

Katwiran ng dalawang water concessionaires, naaapektuhan sila ng palitan ng piso kontra dolyar, yen, at euro.

Nasa P0.29 per cubic meter ang inihihirit ng Maynilad, habang P0.07 kada cubic meter naman ang petisyon ng Manila Water. JOHNNY ARASGA

NASA kritikal na kondisyon ang isang konsehal ng barangay at bodyguard nito makaraang tambangan ng dalawang maskaradong suspek kaninang umaga sa Pasay.

Kinilala ni Southern Police District (SPD) Spokeperson P.Supt Jenny Tecson ang biktimang sina Borbie Rivera, Presidente ng Liga ng Barangay sa Pasay, at bodyguard na si Alex Dominguez, kapwa nagkaroon ng mga tama ng bala sa katawan.

Sa salaysay ng iba pang bodyguard ng opisyal, galing pa lamang nila sa pulong kasama ang ilang opisyal ng barangay bandang 4:00 ng madaling-araw.

Nang makasakay na sila sa kanilang kotse ay dito na sila pinputukan ng mga suspek.

Dahil sa tama ng mga bala ay agad isinugod ang dalawa sa San Juan de Dios Hospital habang sa ngayon ay iniimbestigahan na ng awtoridad ang insidente. -30-

NAGKAROON ng malakas na pagsabog sa tapat mismo ng Presinto 3 ng Manila Police District (MPD) sa Arellano Avenue, Malate, Maynila.

Naganap ang nasabing pagsabog pasado alas-3:00 kaninang madaling-araw.

Nakuhanan ng CCTV camera ang insidente kung saan isang lalaki na nakamotorsiklo ang naghagis ng hindi pa mabatid na uri ng bomba at nagpaputok pa ng baril matapos ang pagsabog.

Napinsala sa naturang pagsabog ang isang SUV at isang motorsiklo.

Iniimbestigahan na ng mga awtoridad ang pangyayari. JOHNNY ARASGA

INOBSERBAHAN kaninang Linggo ng umaga ang 8-hour truce sa magulong Marawi City para bigyan ng sapat na oras ang mga Muslim na salubungin ng mataimim ang Eid’l Fitr o Ramadan.

Sinabi ni Lt. Gen. Carlito Galvez ng Western Mindanao Command, dumananas ng sobrang katahimikan ang buong lungsod at walang anomang narinig ng mga pagbomba at putukan simula pa nitong Sabado ng gabi.

“Our troops only consolidated at our strong points. There was no deployment of military assets as security forces maintained an ‘active distance’– no provocative movements,” pahayag ni Galvez.

“Ngayon totally walang putukang maririnig ngayon. This would give way to the 6 to 8 a.m. hours of prayers na hiniling ng mga kapatid nating Muslim.

Pero ang ginawa namin hanggang 2 p.m. at least, to give them also the chance for their festive lunch at 12 noon,” dagdag pa ni Galvez.

Nitong Sabado lang, nagdedisyon ang military na magpatupad ng tigil-putukan laban sa ISIS-inspired Maute group sa loob ng 8 oras ngayong araw para maipagdiwang ng mga Muslim sa Marawi City ang pagobserba ng religious feast na Eid’l Fitr.

Nauna nang sinuwestyon ng militar na ang tigil-putukan ay magsimula ng 6 a.m. at tatakbo sa loob ng 8 oras ng hanggang 2 p.m. ng Linggo.

Pero nilinaw naman agad ni Galvez na anomang pagkilos ng kalaban para malagay sa peligro ang mga sibilyan at ang posisyon ng militar, agad aalisin ang tigil-putukan.

Gayunman, tiniyak ni Galvez na ang kanilang kalaban ay walang katsa-katsansang makapuslit ng lunsod sa mga oras ng tigil-putukan.

Sa ulat ng militar, may 300 sibilyan pa ang naipit sa loob ng lunsod habang ang bakbakan ay pumasok na sa panglawang buwan.

Tinatayang nasa 369 katao na ang napatay sa isang buwang bakbakan na ang sangkapat ay mula sa security forces at civilians, simula nang okupahin ng Islamist militants ang ilang parte ng Marawi noong Mayo 23. BOBBY TICZON

NANALO ang dating Binibining Pilipinas pageant contestant na si Maria Gail Tobes bilang Miss Manila 2017.

Si Tobes ay isang lisensiyadong veterinarian at tubong Northern Samar.

Ang 22-anyos na dalaga ay nanalo sa coronation night na dinaluhan ni Miss Universe 2015 Pia Wurtzbach at Nadine Lustre na nagsilbing mga judges sa pageant.

Naibulsa rin ni Tobes ang P500,000 cash at management contract maliban pa sa pagiging ambassador nito sa lungsod ng Maynila.

Pangalawa naman sa pageant si Francesca Camargo, pangatlo si Diana Mackey, pang-apat si Sofia Sibug at nasa ikalimang puwesto si Naelah Alshorbaji Almazik.

Ang Miss Manila na nataon sa Manila Day ay inorganisa ni dating pangulo at ngayon ay Manila Mayor Joseph “Erap” Estrada.

Ginanap ang coronation night sa Philippine International Convention Center (PICC) nitong Sabado ng gabi. BOBBY TICZON

PABAGSAK na ang liderato ng Maute terrorist group sa Marawi City conflict, ayon sa pahayag kaninang Lunes ng umaga ng Philippine military.

Sinabi ni Task Force Marawi spokesperson Lt. Col. Jo-ar Herrera sa isang press briefing tungkol sa pinakahuling balita sa magulong lungsod, ang tagumpay ng tropa ng pamahalaan ngayon ay hindi na mapipigilan dahil ang local terrorist group Maute at kanilang mga kasabwat ay nauubusan na ng mga magdirigma at iba pang resources.

Isa aniya sa manipestasyon ng tiyak na tagumpay ng military ay pagbagsak ng liderato ng mga terorista sa loob ng conflict zone.

“We have validated reports there are leadership problems inside. They also lack ammunition,” pahayag ni Herrera.

Ilan lamang aniya sa kinakaharap na problema ng mga enemy forces ay ang kahandaang abandonahin ng ilan sa mga Islamist militants ang battlefield dahil aniya sa kanilang lumiliit na defensive zone sanhi ng pag-usad ng government troops.

Kinakaharap din umanong problema ng mga terorista ay kakulangan ng kagamitan at pagkasira ng kanilang komunikasyon.

“There is the issue of money, the issue of decision making. Some of them, especially those other groups, would like already to get away from the battle zone. Gusto na nilang lumayas. However, there are some troops who wanted to stay behind to hold their positions,” pahayag nito.

Sinabi ni Herrera na patuloy na umuusad ang government troops sa mga lugar na haggang ngayon ay pinagkukutaan ng Islamist militants. May 86 na gusali na ang nabawi ng militar na dating pinaglulungaan ng terorista.

Ang tangi aniyang humaharang sa government troops para mapalaya ang Marawi mula sa Islamist militants ay ang presensya ng planted bombs at iba pang bomba sa battle zone, at maging ang naipit na residente at hostages. BOBBY TICZON

KINUMPIRMA ng militar kaninang Lunes ng umaga na malakas ang pruweba na pinupugutan na ng Islamic State-linked militants ang kanilang mga hostage simula pa ng kanilang pag-atake sa Marawi City may isang buwan na ang nakalilipas.

“Naging napakarami po ng ganitong impormasyon dahil lahat po ng kanilang nahuhuli at nakikita nilang pawang mga Kristyano ay ine-execute nila,” pahayag ni Armed Forces spokesperson Brig. Gen. Restituto Padilla.

“Malaki po ang pruweba na hindi lang noong simula [ng bakbakan] nila ginawa ito kundi patuloy pa rin hanggang ngayon,” dagdag nito.

Pino-post aniya ng mga terorista kamakailan ang mga video na nagpapakita ng eksekusyon sa kanilang websites para sa kanilang sympathizers.

Pinatotohanan din ito ng mga nasagip na mga sibilyan sa war zone ang pamumugot ng kanilang hostage, pahayag pa ng opisyal.

Nauna nang inihayag ng isang dating hostage na nakita niya ang isang lalaki na biktima ng pamumugot ng Maute.

Hindi pa umano narerekober ang bangkay ng ng pinugutan na biktima dahil ang pagpatay ay inilatag sa villages na nananatiling nasa kontrol ng mga terorista. BOBBY TICZON

NIYANIG ng magnitude 6.3 na lindol ang Tonga.

Ayon sa US Geological Survey, naitala ang pagyanig sa 200 kilometers northwest ng Pacific Island.

Naganap ang lindol alas-5:42 ng umaga oras doon na may lalim na 40 kilometers.

Wala pa namang napapaulat na pinsala o nasugatan dahil sa nasabing lindol. -30-

SUGATAN ang isang 45-anyos na ginang matapos saksakin ng kanyang live-in partner na kanyang sinundo sa inuman sa Tondo, Maynila.

Ginagamot ngayon sa Mary Johnston Hospital ang biktimang si Maritess Sabado, vendor, ng 335 A. Mata St., Tondo, Maynila.

Pinaghahanap naman ang suspek at live-in partner ng biktima na si Reynald del Carmen, 41.

Sa ulat, nakikipag-inuman ang biktima kasama ang ilang mga kaibigan nang lapitan ng biktima upang patigilin na sa pakikipag-inuman gayundin upang paalalahanan na siya’y may trabaho pa.

Dahil dito, nagalit ang suspek at nagkaroon sila ng mainitang pagtatalo ng biktima na nauwi sa pananaksak.

Nagtamo ng saksak ang biktima sa braso at agad na isinugod sa nasabing ospital.

Posible umanong napahiya ang suspek sa kanyang kainuman nang sunduin ito ng biktima kaya nagalit at sinaksak ang huli. JOCELYN TABANGCURA-DOMENDEN)

INUGA ng magnitude 4.7 na lindol ang Ilocos Sur at kalapit na lugar kahapon ng umaga, Linggo.

Ayon sa Phivolcs, namataan ang epicenter ng lindol 51 kilometers southwest ng Santa Catalina, Ilocos Sur.

May lalim ang lindol na 29 kilometers at tectonic ang origin.

Dahil sa pagyanig, naramdaman ang Intensity II sa Vigan City, habang Intensity III sa Sinait, Ilocos Sur at Intensity I sa Pasuquin, Ilocos Norte.

Pero sinabi ng Phivolcs na wala naman inaasahang pinsala o aftershocks na idudulot ang nasabing lindol. JOHNNY ARASGA

PATAY ang isang negosyante matapos pagbabarilin sa tapat ng kanyang furniture shop sa A. Arnaiz Ave., Pasay City.

Dead-on-arrival sa ospital ang 40-anyos na si Michael Ian Versoza matapos magtamo ng tama ng bala sa ulo.

Sapul pa sa CCTV ang mismong pamamaril ng naglakad lamang na gunman habang isinasara ng biktima ang kanyang furniture shop.

Bumulagta ang biktima matapos malapitang barilin at nang matumba ay muli pa itong pinaputukan saka tumakas.

Hindi pa alam sa ngayon ang pagkakakilanlan ng suspek na naka-na T-shirt, khaki na shorts at nakasumbrero.

Ayon kay Kagawad Ariel Diones ng Brgy. 69, unang narinig na nakikipagtalo sa isang kustomer ang biktima pero hindi nila masabi kung ang nakaaway ng biktima ang bumaril sa kanya.

Nag-alok naman ng pabuya ang pamilya ng biktima para sa makapagtuturo sa gunman.

Nagpapatuloy pa rin ang imbestigasyon ng Pasay City Police sa nasabing insidente. JOHNNY ARASGA

MALAKAS pa rin ang hatak ng laban sa pagitan nina Manny Pacquiao at Jeff Horn sa Australia na tinaguriang “Battle of Brisbane.”

Ayon kasi kay Mike Koncz na adviser ni Pacquiao, sinabi sa kanya ng mga Australian organizer na 45,000 tickets na ang nabili, at nagdagdag pa sila ng 5,000 tickets.

Naniniwala naman si Koncz na kailangang mas galingan ni Pacquiao sa laban na ito upang hindi madismaya ang mga fans.

Aniya, kailangang gumawa ng “statement” si Pacquiao at hindi hayaang tumakbo ang laban sa loob ng 12 rounds at manalo nang dahil lang sa desisyon.

Samantala, sa tingin ni Koncz ay masyado pang hilaw si Horn para lumaban kay Pacquiao dahil kulang pa ito sa karanasan. JOHNNY ARASGA

TUMIMBUWANG sa bangketa ang isang lalaking bagong lipat pa lamang nang barilin ng kilabot na riding in-tandem sa Republic Avenue, Fairview, Quezon City, nitong Linggo ng madaling-araw.

Nagtamo ng tama ng bala sa ulo at sa at namatay noon din ang biktimang si Ricky Casea, 26, tubong Nueva Ecija at residente ng Republic Avenue, Fairview.

Blangko pa ang QCPD-Criminal Investigation and Detection Unit (CIDU) kung sino ang nasa likod ng pag-atake at kung ano ang motibo sa pamamaril.

Sa ulat, naganap ang insidente dakong 12:55 a.m. sa tapat ng isang bakery sa nasabing lugar.

Bago ito, nakatayo lamang sa harapan ng bakery ng kapitbahay ang biktima nang umalingawngaw ang mga putok ng baril.

Nang mahawi ang usok, nakita na lamang na nakahandusay sa tapat ng bakery ang biktima na may dugong umaagos mula sa ulo.

Ayon sa kinakasama ng biktima na si Les Anne Dilaw, walang kaaway at walang bisyo ito pero madalas aniyang inaaya ng kanyang mga kaibigan na magsugal. BOBBY TICZON