PINURI ng isang spokesman ng Islamic State group ang pag-atake sa Pilipinas at Iran.

Sa isang audio recording broadcast noong Martes, sa isang jihadist accounts sa social networks, nanawagan ang ISIS extremists sa buong mundong umatake sa panahon ng Ramadan.

Ayon kay ISIS spokesman Aboulhassan al-Mouhajer, binabati niya ang matagumpay na pag-atake ng kanilang mga kapanalig sa Malawi noong isang buwab.

Matatandaang hanggang sa kasalukuyan ay nagaganap pa ang sagupaan sa Malawi, kung saan libo-libong tropa ng militar ang natalaga simula pa noong May 23.

Aabot sa 58 sundalo at 20 sibilyan ang namatay sa laban habang hindi pa matiyak ang bilang ng mga namatay sa loob ng siyudad dahil hindi pa nakukuha ang karamihan sa mga nabubulok na bangkay.

Nasa sa 200 jihadists naman ang napapatay.

Binati rin ng ISIS spokesman ang nagsagawa ng pag-atake sa Iran noong isang linggo, kung saan 17 katao ang namatay sa ilang nasugatan, nang atakihin sila ng mga armadong lalaki at mga suicide bombers sa parliament complex ng Tehran.

Naganap ang pag-atake sa tapat mismo ng shrine ng rebolusyunaryong lider na si Ayatollah Ruhollah Khomeini noong June 7.

Ito ang unang pag-atakeng inangkin ng ISIS sa Iran, kung saan namatay ang limang umatake.

Hiniling pa ni Mouhajer ang tinatawag niyang mga “caliphate soldiers” na ipagpatuloy ang kanilang pag-aksyon sa panahon ng Ramadan isa Iraq at Syria.

Nanawagan din siya ng pag-atake sa Europe, America, Australia, Russia, Egypt, Yemen, Libya, Tunisia at Algeria. NENET VILLAFANIA

ANUMANG araw simula ngayon ay maaaresto na ng National Bureau of Investigation (NBI) ang online hacker na nang-hack sa ilang pribadong websites habang isiniselebra ang ika-119 anibersaryo ng Araw ng Kasarinlan noong Lunes.

Ayon sa NBI nagpakilala ang cyber attacker bilang AnonGhost.ph kung saan nag-iwan ng mensaheng “Operation Independence day” at “Stop the Martial Law now”! sa ilang websites kabilang ang laguna Lake Development Authority at ang Ayala Property Management Corp.

Ang nasabing cyber attacker ay mayroon nang arrest warrant mula sa NBI.

Sinabi naman ni Information and Communications technology Undersecretary Eliseo Rio sa isang panayam sa radyo na ang ginawa ng hacker ay isang krimen dahil ginalaw nito ang mga website kung saan binura nito at inilagay ang kanyang mensahe.

Bagama’t paraan aniya ito ng kanyang malayang pagpapahayag ngunit ito aniya ay paraan pa rin ng pagha-hack ng mga website. JOCELYN TABANGCURA-DOMENDEN

POSIBLENG ibalik sa Davao City mula Metro Manila ang pamilyang Maute kung hindi agad maaprubahan ang inihaing petisyon sa korte sa lunsod para hilingin na ilipat ang pagdinig sa kaso ni Cayamora Maute, ikalawang asawa nitong si Kongan Alfonso Balawag, anak na si Norjanna at asawa nitong si Benzar Ali Tingao mula sa Davao.

Nabatid na ang awtoridad ng Davao ang may hurisdiksyon sa kaso dahil sila ang nakahuli sa itinuturong utak umano ng paghahasik ng terorismo ng mga Maute.

Kung maaalala, naaresto si Cayamora at pamilya nito sa checkpoint sa Sirawan Toril sa siyudad at agad kinustodiya ng Davao City Police Office (DCPO) bago nilipat sa Camp Bagong Diwa sa Taguig City.

Una nang kinumpirma ni Imee Besira-Mabale, Prosecutor III, na nasampahan na nila ng kasong illegal possession of firearms at illegal possession of explosives si Cayamora at parehong kaso rin sa asawa nitong si Kongan Alfonso, Norjanna at Banzar Ali Tingao na sinasabing mga accomplice o tumulong para makatakas ang itinuturong patriach ng mga Maute.

Inilipat sila sa Metro Manila dahil sa pangamba na i-rescue ng kanyang mga kasamahan dahil walang ligtas na detention cell ang siyudad para sa kanila.

Sinabi naman ni P/Insp. Maria Theresita Gaspan, tagapagsalita ng Davao City Police Office (DCPO), nakahanda silang magpatupad ng mas mahigpit na seguridad kung sa Davao isasagawa ang pagdinig sa kaso.

Ngunit kanila munang aasikasuhin ang paghain ng mosyon para sa Manila na lamang isasagawa ang pagdinig sa kaso. BOBBY TICZON

BAYAMBANG, PANGASINAN – Isang barangay kapitan na high-value target sa iligal na droga ang bumagsak sa kamay ng mga awtoridad matapos itong mahuli sa isinagawang raid ng Criminal Investigation and Detection Group (CIDG) sa Brgy. Ambayat sa nasabing bayan.

Base sa tatlong search warrants na ibinaba ni Judge Jaime Dojillo, Branch 57, ng San Carlos regional trial court, nakilala ang suspek na si Larry Verceles, chairman ng Ambayat 2nd, Bayambang.

Sa report, nagsagawa muna ng surveillance ang CIDG tungkol sa illegal activities ng suspek at nang makumpirma nila ito ay agad na kumuha search warrant ang raiding team saka hinaluhog ang bahay ni Verceles.

Nakita sa bahay ng kapitan ang mga sachet ng pinaghihinalaang shabu, drug paraphernalia, .45 pistol at limang bala ng baril.

Kinumpirma ng pulisya na si Verceles ay isang high-value target sa Bayambang Police Station.

Dinala ang suspek sa CIDG-Pangasinan at nakatakdang kasuhan ng Comprehensive Dangerous Drug Act of 2002 at Comprehensive Law on Firearms and Ammunition. ALLAN BERGONIA

BINALASA ang lahat ng immigration officers na itinalaga sa tatlong terminals ng Ninoy Aquino International Airport (NAIA) sa Pasay City bilang bahagi ng patuloy na programa ng Bureau of Immigration (BI) na sugpuin ang korapsyon sa mga kawani nito at mabago ang serbisyo sa kawanihan.

Ayon kay BI Commisioner Jaime Morente, ang 500 immigration officers na nasa immigration arrival at departure counters sa paliparan ay inilipat sa dati nilang puwesto sa nasabing tatlong terminal.

Sinabi pa nitong walang sinomang exempted sa biglaang pagbalasa o paglilipat sa mga ito dahil layon lamang ng ahensya ba maiwasan ang pagkakasabwatan ng mga empleyado.

“Fraternization has long been pinpointed as a major source of corruption among employees in government. It is familiarizatiob that we are trying to prevent by implementing this scheme,” paliwanag pa ng BI chief.

Inatasan na rin ni Morente si Marc Red Marinas , BI port operations division chief, na gawin at ipatupad ang rotation scheme tuwing ika-apat na buwan sa halip na ika-anim na buwan. JOCELYN TABABGCURA-DOMENDEN

PATAY ang isang lalaki na umano’y kolektor sa isang Police Community Precinct (PCP) matapos barilin ng riding-in-tandem habang angkas ang kanyang anak sa Delpan, Zaragosa, Tondo, Maynila.

Dead-on-the-spot ang biktimang si Dennis Antonio, 59, driver, habang sugatan naman ang isa pang bystander na si Rochell Millare, 21, na tinamaan ng bala sa paa at nilalapatan ng lunas ngayon sa Gat Andres Bonifacio Hospital.

Sugatan din ang anak ng biktima na ihahatid sana nito sa eskwelahan na hindi muna pinangalanan ng awtoridad.

Alas-12:10 nang mangyari ang insidente sa Delpan at Zaragosa St. sa Tondo habang naghahatid umano ang biktima sa kanyang anak.

Sinasabing pawang naka-helmet ang mga suspek kaya hindi nakilala at namukhaan na mabilis tumakas matapos ang insidente. JOCELYN TABANGCURA-DOMENDEN

BUKAS si House Speaker Pantaleon Alvarez sa pagpapalawig ng Martial law kung kinakailangan.

Ito aniya’y kung hindi sapat ang 60-araw na deklarasyon ng Martial law sa ikasusugpo ng mga terorista sa Mindanao.

“If necessary,” tugon ni Alvarez, secretary general ng Partido Demokratikong Pilipino-Lakas ng Bayan (PDP-Laban) matapos na ihayag ng Armed Forces of the Philippines (AFP) hindi pa kontrolado ng gobyerno ang Marawi City.

Ani Alvarez, ang 60-araw na deklarasyon ng Martial law ay matatapos sa July 22 matapos itong ipatupad ni Pangulong Rodrigo Duterte noong May 23.

Ipinagtanggol din ni Alvarez ang pangulo nang sabihin nitong handa niyang salungatin ang Supreme Court (SC) kapag tumutol ito sa idineklarang Martial law sa pamamagitan ng pag-uutos na dapat magsagawa ng joint session ang Kongreso.

“Just read the Constitution, what does it say? It says the President has to report to Congress – he will be the one to report and we’ll listen. It doesn’t say he’ll report and listen to us. It doesn’t make sense that the making the reporting will be the one listening,” banggit pa ni Alvarez.

Ang grupo ni Albay Rep. Edcel Lagman na kasapi sa Magnificent 7 o Genuine Opposition ay nagpetisyon sa SC matapos tumanggi ang liderato ng Kamara na magsagawa ng joint session.

Magugunitang magkahiwalay na pinagtibay ng Senadol at Malaking Kapulungan ng KOngreso ang pagsuporta ng mga mambabatas sa Martial law. MELIZA MALUNTAG

TINAMAAN ng sniper bullet ang isang foreign journalist na nagkokober ng giyera sa Marawi City habang nasa loob ng compound ng Lanao del Sur provincial capitol kaninang Huwebes ng umaga.

Ang journalist na nakilalang si Adam Harvey ng Australian Broadcasting Corporation, ay nagtamo ng tama ng bala sa leeg. Si Harvey ang kauna-unahang journalist na nasaktan sa Marawi siege.

Ayon sa kanyang kasamahan, kumukuha ng larawan ng mga batang naglalaro sa compound nang makarinig sila ng ilang putok ng baril.

Nauna nang tinanggal ni Harvey ang kanyang bullet proof vest para makapag-squat at makakuha ng mas magandang litrato.

Ang naturang kapitolyo, na malayo sa conflict areas, ay ikinokonsiderang pinakaligtas na lugar sa lungsod, na pinag-iistambayan ng mga tauhan ng government agencies at journalists.

Inaalam na ngayon ng awtoridad ang pinaggalingan ng shrapnel. BOBBY TICZON

MALUBHANG nasugatan ang isang waiter matapos pagtatagain ng lalaking tinalo niya sa suntukan sa Caloocan City kaninang umaga, June 15.

Ginagamot sa Jose Reyes Memorial Hospital sanhi ng mga taga sa katawan si Christian Rey Legaspi, 26, ng 7th Avenue, Grace Park habang pinaghahanap naman ng mga pulis ang suspek na nakilala lang sa alyas “Jayson”.

Ayon kay Caloocan Police Community Precinct (PCP)-2 SPO2 Michael Rello, dakong 5:30 ng umaga, naglalakad ang biktima kasama ang katrabaho sa Rizal Extn. cor. 5th Ave. patungo sa convenience store nang lumapit mula sa likod ang suspek.

Sa hindi pa malamang dahilan, binugbog ng suspek ang biktima kaya nauwi ang dalawa sa suntukan subalit, nang madehado si Jasyon ay nagtungo ito sa nakaparadang tricycle at kinuha ang bolo saka pinagtataga sa katawan si Legaspi.

Matapos ang insidente, mabilis na tumakas ang suspek habang isinugod naman ng kanyang katrabaho sa naturang pagamutan ang biktima. Inaalam pa ang tunay na motibo sa insidente. RENE MANAHAN

UTAS ang isang traffic enforcer matapos pagbabarilin ng riding-in-tandem sa Caloocan City kaninang madaling-araw, June 15.

Dead-on-the-spot sanhi ng mga tama ng bala sa katawan si Perfecto Martin, 53, traffic enforcer ng Caloocan City Department of Public Safety and Traffic Management (DPSTM).

Ayon sa ulat, dakong 4:00 ng madaling-araw, nakatayo ang biktima sa harap ng kanilang bahay sa Banker’s Village, Brgy. 171, Bagumbong nang dumating ang isang motorsiklo sakay ang mga suspek at walang sabi-sabing pinagbabaril ito.

Matapos ang insidente, mabilis na tumakas ang mga suspek habang patuloy naman ang follow-up investigation ng pulisya upang matukoy ang pagkakilanlan ng mga salarin at inaalam na rin ang tunay na motibo sa insidente. RENE MANAHAN

KAPWA bukas sa negosasyon sina Stephen Curry at Kevin Durant kaugnay sa kanilang sinasahod kung makatutulong ito na mapanatili ang kanilang line-up.

Ayon sa isang reliable source, sinasabing hawak ni Curry sa NBA ang pinakamahal na kontrata na umaabot sa mahigit na $200 million.

Aminado si Curry na kakaibang samahan ang kanilang nabuo sa Warriors na inaasam niya na sana’y hindi na matapos.

“In the context of keeping the team together, if there are decisions that need to be made, we’ll talk about it for sure,” pahayag ni two-time MVP Curry.

Para naman kay Durant, walang dahilan para hindi siya bumalik muli next season sa bagong champion team.

Nagpahiwatig din ito na bukas siya na hindi matanggap ang maximum deal lalo na kung makatutulong na mapapirma muli ang mga top players sa reserves na sina Andre Iguadala at Shaun Livingston.

“It’s the business of basketball obviously so nothing is for sure, but here I feel like we can work that out and we’ll have a chance to do this again next year,” ani Durant na tinanghal na MVP sa katatapos lamang na NBA Finals. BOBBY TICZON

KASABAY ng pagbuo ng task force, naglaan na rin ng P250,000 na pabuya laban sa pumatay sa isang opisyal ng Bureau of Internal Revenue (BIR) sa Quezon City nitong nakaraang Miyerkules ng umaga.

Sinabi ni Quezon City Police District director C/Supt. Guillermo Eleazar kaninang Huwebes ng umaga, nagpasabi sa kanya ang ilang kaibigan ng biktimang si Alberto Enriquez, chief ng assessment division ng BIR Regional District Office 28, na naglaan na sila ng pabuya kapalit ng anomang impormasyon na magbibigay-daan para malutas ang krimen.

Bagama’t tiyak na ang bumaril mismo sa ulo ng biktima ay isang hired killer dahil na rin sa estilo ng kanyang pagpatay, pipilitin na rin malaman kung sino ang mastermind sa pag-ambush sa biktima.

“Nakakuha na tayo ng CCTV. Actually hindi lang ‘yan ang anggulo na nakita natin. Meron pang iba. Until now, ang ating mga imbestigador ay naghahanap ng mga iba’t iba pang CCTV monitors para ma-check natin kung saan galing at saan papunta,” pahayag ni Eleazar na siya rin ang mismong mamumuno at iba pang opisyal na pulisya sa binuong task force.

Nakuha na aniya ng mga imbestigador ang statements ng mga tetestigo at nasa proseso na sila para ito’y pag-aralan.

Umapela na rin si Eleazar sa publiko na sabihan sila agad kung mayroon silang alam para malutas ang kaso.

Idinagdag ni Eleazar na nakipag-koordinasyon na sila sa Philippine National Police Anti-Cybercrime Group para mapalaki ang video footage. Nakita ang gunman sa footage pero hindi masyadong malinaw ang mukha nito. BOBBY TICZON

MULING hiniling sa Sandiganbayan si dating Senador Bong Revilla na payagan siyang bisitahin ang kanyang may sakit na ama na si dating Senador Ramon Revilla, Sr. na sasailalim sa isang operasyon dahil sa sakit sa puso.

Sa apat na pahinang mosyon ay inihirit ni Revilla na payagan siyang bisitahin ang ama sa Hunyo 19 mula alas-6:00 ng umaga hanggang alas-12:00 ng tanghali at sa Hunyo 20 mula alas-2:00 ng hapon hanggang alas-8:00 ng gabi.

Idinahilan ng dating senador sa Sandiganbayan na ang kanyang ama na 90-taong gulang ay muling dinala sa St. Lukes Medical Center sa BGC, Taguig dahil sa “Valvular heart disease, Severe Mitral Regurgitation, congestive Heart failure at NYHA FC II” at sasailalim din ito sa Percutanepus Mitral Clip sa Hunyo 19.

Giit pa ng dating senador sa kanyang mosyon, obligadong puntahan niya ang ama para maalagaan niya ito kahit konting panahon lamang.

Nauna nang pinagayan ng Sandiganbayan si Bong Revilla upang mabisita ang kanyang ama noong Disyembre 16, 28 at 29, 2016 At Pebrero 7 at Marso 8 ng taon kasalukuyan.

Si Bong Revilla ay nahaharap sa kasong plunder at graft kaugnay sa pork barrel scam kung saan kapwa akusado niya si Janet Napoles at kasalukuyang nakapiit sa PNP custodial center sa Camp Crame. MELIZA MALUNTAG

MAKATATANGGAP ng 5,000 tulong-pinansyal ang mga nagsilikas na residente ng Marawi City mula sa Department of Social Welfare and Development (DSWD).

Ayon kay DSWD Sec. Judy Taguiwalo, P1,000 ang kanilang ibibigay sa mga apektadong residente bilang food assistance sa panahon ng Ramadan.

Habang ang nalalabinig P4,000 naman ay para sa transportasyon at iba pang mga gastusin ng mga evacuees sa pagbabalik nila sa kanilang mga tahanan.

Kasunod nito, nagkaloob din ang DSWD ng family food pack na naglalaman ng anim na kilo ng bigas, tatlong de-lata ng corned beef at sardinas gayundin ang anim na pakete ng kape. JOHNNY ARASGA

INILIPAT na sa kustodiya ng Bureau of Jail Management and Penology (BJMP) sa Camp Bagong Diwa sa Taguig City ang ina ng magkapatid na Omar at Abdullah Maute na si Ominta Romato alyas Farhana.

Ayon kay Justice Sec. Vitaliano Aguirre, kasama ni Farhana sa pasilidad ng BJMP si dating Mayor Fahad Salic at siyam na iba pa na kinasuhan ng rebelyon sa Marawi City.

Una nang inilipat sa nasabing pasilidad ang ama ng magkapatid na Maute na si Cayamora na naaresto sa isang checkpoint sa Davao City nuong isang linggo.

Magugunitang muling inapela ng kalihim sa Korte Suprema na ilipat ang pagdinig sa kasong rebelyon laban sa mag-asawang Maute at iba pa sa Metro Manila dahil sa usaping pangseguridad. JOHNNY ARASGA

NARAMDAMAN ang apat na magkakasunod ang naitala mula madaling-araw kanina, Biyernes, sa South Cotabato, Batanes at Occidental Mindoro.

Sa abiso ng Phivolcs, niyanig ng magnitude 4.2 na lindol ang T’boli, South Cotabato alas-2:07 ng madaling-araw.

Naitala ng Phivolcs ang Intensity 4 sa General Santos City bunsod ng nasabing pagyanig.

Alas-2:27 naman ng madaling-araw nang yanigin ng magnitude 3.8 na lindol ang Sabtang, Batanes.

Ayon sa Phivolcs, naganap ang pagyanig sa 18 kilometers South ng baya ng Sabtang.

Naitala naman ang Intensity 3 sa Basco, Batanes bunsod ng lindol.

Alas-3:16 ng umaga naman nang yanigin ng magnitude 4.3 na lindol ang bayan ng Lubang sa Occidental Mindoro na agad nasundan ng magnitude 3.3 alas-3:24 sa nasabi ring bayan.

Ayon sa Phivolcs, pawang tectonic ang origin ng apat na magkakasunod na lindol. JOHNNY ARASGA

IGINIIT ng ilang mambabatas na ilabas ng Malacañang ang tunay na estado ng kalusugan ni Pangulong Rodrigo Duterte.

Kasunod ito ng halos isang linggo nitong pananahimik at hindi pagpapakita sa publiko.

Sinabi ni Magdalo Party-list Rep. Gary Alejano, obligasyon ng Malacañang na magbigay ng mas malinaw na paliwanag sa tunay na kalagayan ng Pangulo.

Aniya, itinuturing na national security issue ang kalusugan ng Pangulo kaya’t hindi makabubuti na magkaroon ng iba’t ibang ispekulasyon sa tunay nitong kalagayan.

Kaugnay nito, inihirit ni Buhay Party-list Rep. Lito Atienza sa Malacañang na magpalabas ng medical bulletin hinggil sa kondisyon ng Pangulo.

Aniya, ang medical bulletin ng Pangulo ay makapagpapalinaw at magpapatigil sa mga espekulasyon sa kalusugan ng Pangulong Duterte.

Una nang ipinalabas ng Malacañang ang mga larawan ni Pangulong Rodrigo Duterte kasunod ng mga espekulasyon na may sakit ang Presidente kaya hindi ito nakikita ng publiko.

Sa larawan ay makikita ang Pangulo nakipagkamay pa sa mga opisyal ng Philipppine Air Force sa Pasay City bago ito tumulak sa Davao City.

Sa account naman ni Special Assistant to the President Bong Go, nag-post ito ng larawan nila ng Pangulo kung saan ay tinukoy pa nito na nagtatrabaho ang Pangulo sa Bahay Pagbabago.

Umugong ang espekulasyon na may malubhang sakit ang Pangulo matapos na bigong dumalo ang Pangulo sa pagdiriwang ng Araw ng Kasarinlan sa Rizal Park. JOHNNY ARASGA

SINAIT, ILOCOS SUR – Dahil nilayasan ng asawa’t anak, isang ama ang nagbigti sa loob ng kanyang kuwarto sa Brgy. Nagongburan, Sinait sa nasabing lalawigan noong Miyerkules, June 14.

Kinilala ng Sinait Police Station (SPS) ang biktimang si Julius Fariñas, 25, sa nasabing barangay.

Sa imbestigasyon, sinabi ng SPS wala nang buhay ang biktima nang matagpuan ito ng kanyang ama na si William na nakabitin sa kanyang kuwarto na gamit ang isang nylon cord.

Napag-alamang bago ang insidente, nag-away ang biktima at asawa nitong si Maricris sa hindi pa malamang dahilan kaya nilayasan ito ng kanyang mag-ina.

Ilang oras pagkatapos ng kanilang pagg-aaway, natagpuan na lamang ang biktima na malamig na bangkay na. ALLAN BERGONIA

HINDI pa rin nakikita ang isang Pinay na nakatira sa nasunog na apartment sa London.

Ayon kay Sen. Joel Villanueva, miyembro ng kanilang religious group na Jesus is Lord (JIL) ang Pinay na si Nanay Ligaya Moore.

Tinukoy umano ng kanilang mga miyembro sa JIL na mag-isang namumuhay si Moore sa London habang ang pamilya naman nito ay nasa Pilipinas.

Sa kabila nito ay hindi pa kinukumpirma ng Department of Foreign Affairs (DFA) kung ilan ang bilang ng mga Pinoy na nadamay sa naturang sunog.

Patuloy aniya sa pag-ikot ang mga opisyal ng Philippine embasssy sa London para magbigay ayuda sa mga Pilipinong biktima. JOHNNY ARASGA

NAGTATAYO na ng ‘tent city’ ang Autonomous Region in Muslim Mindanao (ARMM) na magagamit ng mga evacuees na tumatakas sa kaguluhan sa Marawi City.

Ayon kay ARMM Gov. Mujiv Hataman, ito’y upang mabawasan ang siksikan sa mga evacuation centers at maiwasan rin ang posibilidad ng pagkalat ng iba’t-ibang uri ng sakit dulot ng congestion sa mga naturang lugar.

Paliwanag pa ni Hataman, malaki ang posibilidad na marami sa mga apektadong pamilya ng gulo sa Marawi ang wala nang tahanan na uuwian sakaling matapos na ang gulo sa lungsod dahil sa pinsala ng bakbakan.

Ito aniya ang dahilan kaya’t bahagi ng kanilang plano ay ang magtaguyod ng ‘tent city’ na sa pagitan ng Marawi at bayan ng Saguiaran sa Lanao del Sur na maaaring tirahan ng mga evacuees.

Sa kasalukuyan, nasa 200,234 ang ang bilang ng mga nagsipaglikas na residente ng Marawi na namamalagi sa iba’t-ibang evacuation centers. -30-