NASA 70-80 porsyento na ang kondisyon ni eight-division world champion at Senador Manny Pacquiao para sa kanyang nakatakdang laban kay Jeff Horn sa Hulyo 2 sa Brisbane, Australia.

Ito ang inihayag mismo ng fighting senator sa isang panayam sa GenSan, habang nasa kalagitnaan ng kanyang training sa Wild Card Gym sa lungsod.

Ayon pa sa Pinoy ring icon, maganda ang kanyang kondisyon at maganda rin ang lugar kung saan nagagawa nitong makapag-jogging ng paakyat partikular sa Maasim, Sarangani, na kanyang ginawa kahapon ng umaga.

Inihayag ni Pacquiao na magiging heavy training na ang nalalabing tatlong linggo nito sa GenSan na sakto lamang para marating ang 100 porsiyento na kondisyon bago lumipad patungong Australia.

Samantala, kahit abala sa training ay hindi nakaligtaan ng fighting senator ang mga apektadong pamilya sa kaguluhan sa Marawi City.

Ayon kay Pacman, nakapagpadala na siya ng tulong para sa mga biktima na isa sa pag-aalayan nito ng kanyang nakatakdang laban. BOBBY TICZON

PALPAK na seguridad ng Resorts World Manila ang tinumbok ng liderato ng Malaking Kapulungan ng Kongreso sa imbestigasyon kaugnay sa naganap na pamamaril at pagsunog sa ilang pasilidad sa casino ng nabanggit na hotel.

KAPWA  nakakulong ngayon sa selda ng kapulisan sa Zamboanga City ang isang sundalo ng Philippine Army matapos mahuli sa akto sa loob ng isang motel kasama ang misis ng isa pang sundalo.

Ayon kay Supt. Nonito Asdai ang hepe ng Zamboanga City police station 6 na dakong alas-8:00 ng gabi nang humingi ng tulong sa kanila ang isang miyembro ng Philippine Air Force matapos nitong madiskubre na kasama ng kanyang misis ang sinasabing karelasyon nitong sundalo.

Napag-alaman na ang babaeng suspek na itinago rin ang pagkakakilanlan ay isang empleyado ng local government unit ng Zamboanga City.

Ang dalawa ay nagcheck-in sa isang motel na nasa Barangay Tetuan na sinabi umano ng nahuling misis sa kanyang asawa na gagabihin siya dahil mag-overtime sila sa kanilang opisina.

Pero nabuking pa rin ng mister ang kanyang misis dahil una na rin siyang may suspetsa dito.

Kasunod nito, agad pinuntahan ng mga pulis ang lugar kasama ang nagrereklamong mister at puwersahang binuksan ang kuwarto na naka-check in ang dalawa at huli umano sa akto na halos hubad na.

Dahil dito, hindi na ring nakapalag pa ang dalawa at inaresto ng mga otoridad.

Napag-alaman na nagsimula umano ang sinasabing ‘illicit affair’ ng dalawa mga 6 na buwan ang nakalipas nang madistino sa Task Force Zamboanga ang Army soldier.

Ayon kay Asdai na sasampahan ng reklamong adultery ang babae habang concubinage sa sundalong nahuling kasama nito.

Maliban dito ay maaari din umanong mawalan ng trabaho ang dalawa kung mapapatunayan na may katotohanan ang inaakusa laban sa kanila.

Susubukan pang muli kunin ang panig ng dalawang nahuling suspek pero una na ring tumanggi pang magsalita ang mga ito. JOHNNY ARASGA

PLANO ng pamunuan ng Metropolitan Manila Development Authority (MMDA) na dagdagan ng hazard pay ang kanilang mga traffic enforcers na nakatalaga sa mga kalsada at ipapatupad rin ang “one strike policy” sa mga kawaning tiwali.

Ayon kay MMDA Chairman Danilo Lim, pinag aralan nila na dagdagan ng P6,000 hazard pay ang mga traffic enforcers upang maiwasan umano ang pangongotong ng mga ito sa mga motorista.

“Paano makakapagtrabaho ng mabuti sa labas ang mga enforcer kung gutom naman ang sikmura ng mga ito.” ani Lim sa mga mamamahayag.

Nabatid na ang suweldo ng isang traffic enforcer kada buwan ay nasa P11,000.00.

Ayon pa kay ni Lim, isa sa nakikita niyang dahilan kung bakit may kotongan dahil sa maliit na suweldo ng mga ito na hindi sasapat sa kanilang pamilya.

Subalit, kahit pa aniya maliit ang suweldo ng mga ito, hindi naman aniya tama na gumawa sila ng katiwalian, na dapat ay managot sila kapag napatunayang nagkasala ang mga ito.

Nabatid pa rin kay Lim, ipatutupad din niya sa mga kawani ng MMDA ang “one strike policy” sakaling masangkot ang mga ito sa katiwalian.

Sinuman aniyang kawani o enforcer na nahuling sangkot sa katiwalian tulad nang pangongotong, kaagad itong tatanggalin sa tungkulin. JAY REYES

SUGATAN ang isang tricycle driver nang aksidenteng pumutok ang baril na kanyang pinaglalaruan sa Sta. Cruz, Manila.

Ginagamot na sa Jose Reyes Memorial Medical Center ang biktimang si Cornelio Gayo, 30, binata ng 1345 San Nicolas Street, Tondo, Manila bunsod nang tinamong tama ng bala ng di tinukoy na kalibre ng baril sa kanyang kaliwang hita.

Sa report  ni PO1 Paul Dick Valencia, kay Manila Police District (MPD)-Station 3 commander, P/Supt. Arnold Thomas Ibay, nabatid na dakong 12:00 ng madaling araw nang maganap ang insidente sa Ipil Street sa Sta. Cruz.

Pinaglalaruan umano ng biktima ang kanyang baril ngunit aksidente itong pumutok at tumama sa kanyang hita.

Nakita naman ng kanyang kapitbahay na si Ashley David ang pangyayari kaya’t kaagad siya nitong isinugod sa pagamutan upang malunasan. JOCELYN TABANGCURA-DOMENDEN

MAY posibilidad  na makaranas ng hanggang dalawang bagyo ang Pilipinas ngayong buwan ng Hunyo.

 Ayon sa pagtaya ng PAGASA, patuloy na lumalakas ang southwest monsoon o habagat at lumalawak na rin ang pagkakataon ng mga pag-ulan ang nararanasan sa western section ng bansa ngayong buwan.

Noong May 24, inanunsyo ng weather bureau ang pagdating ng southwest monsoon na naging susi upang ideklara ng Pagasa ang pagpasok ng panahon ng tag-ulan makalipas ang isang linggo.

Bukod sa posibilidad ng pagpasok sa Philippine Area of Responsibility ng dalawang bagyo, makakaaapekto rin ang inter-tropical convergence zone (ITCZ) na magdudulot ng mga pag-ulan sa umaga o sa hapon. JOHNNY ARASGA

SUMIRIT pa sa 202 ang bilang ng kaswalidad sa Marawi City crisis habang umaabante naman ang tropa ng pamahalaan sa kaloob-looban na kontrolado ng Maute terrorist group, pahayag kaninang Miyerkules ng umaga ng military spokesperson.

Sinabi ni Brig. Gen. Restituto Padila, Armed Forces of the Philippines (AFP) spokesperson, mula kahapon (Hunyo 6), kabilang sa mga napatay ay 134 terrorists, 38 government troops at 30 civilians.

Samantala, ang may 1,545 civilians na naipit aniya sa conflict zones ang nasagip pero wala namang balita sa status ng mga hostage.

Sa kabila na nabawi na ng military ang control sa ilang key areas sa Islamic City at ikinokonsidera na ang pagbubukas ng city hospital, sinabi ni Padilla na hindi mapapabigyan ng AFP ang kahilingan ng mga residente na itigil na ang air strikes at offensives.

“Troops need to judiciously use force because of a stiffer kind of resistance from the inner enclaves of the city,” pahayag ni Padilla.

“We feel the pain, we feel the hurt of every member, of every citizen of Marawi, but let us remember we did not start this. It was the armed group that entered the city to wreak havoc on it,” dagdag pa nito. BOBBY TICZON

BINALIKTAD ng Department of Justice (DOJ) ang desisyon ng Manila Prosecutor’s Office na nagbabasura sa pagsasampa ng kaso laban sa mga opisyal ng Smartmatic at Commission on Elections (Comelec).

Inaprubahan na ni Justice Usec. Deo Marco ang pagsasampa ng mga kasong paglabag sa Sections (a)(1), 3 at 4 sa ilalim ng Cybercrime Act of 2012, laban kina Nelson Herrera, Frances Mae Gonzales at Rouie Penalba na pawang mga IT experts sa Comelec.

Kakasuhan rin sina Marlon Garcia at kanyang mga tauhan na sina Mauricio Herrersa at Neill Baniqued ng Smartmatic.

Gayunman, lusot naman na sa kaso ang project director ng Smartmatic na si Elie Moreno.

Inatasan na ng DOJ ang Office of the City Prosecutor ng Maynila na isampa na ang mga kaso sa korte, at magbigay ng ulat kaugnay nito sa loob ng 10 araw matapos nilang matanggap ang resolusyon. -30-

NAAYOS agad ng Bank of the Philippine Island (BPI) ang naranasang aberya sa kanilang internal system at balik-normal na rin ang operasyon ng kanilang mga automated teller machines (ATM).

Ito’y makaraang umalma ang marami sa mga depositor ng nasabing bangko dahil sa mga auto-debit na kanilang naranasan sa mga transaksyon.

Kasabay nito, iginiit ng Bangko Sentral ng Pilipinas (BSP) na hindi na-hack ang sistema ng BPI taliwas sa mga naglalabasang ulat.

Tiniyak ni BSP Governor Nestor Espenilla na walang perang mawawala mula sa mga kliyente ng BPI at humihngi sila ng dispensa sa aberyang idinulot nito. JOHNNY ARASGA

MAGTATAYO ng mall na halos sinlaki ng Pentagon ng US sa China ang anim na tagapagmana ng SM.

Sa report, itatayo ang isang supermall sa China bilang bahagi ng pagbabago ng foreign policy ni President Rodrigo Duterte na nakatutok sa Beijing.

Abot sa 44% ang pag-aari ng anim na anak ni Henry Sy, founder ng SM Conglomerate, na siya ngayong pinakamalaking investment sa Pilipinas.

Si Sy rin ang itinuturing na pinakamayamang Filipino, na kasama sa isa sa pinakamayayamang tao sa buong mundo.

Kasama sa SM group ang mga department stores, supermarket, bangko, property development tulad ng mga condominiums at subdivisions, at logistics.

Ang magkakapatid na sina Teresita, Elizabeth, Henry Jr., Hans, Herbert, at Harley ay may pinagsamang net worth na $10.7-billion, ayon sa tala.

Si Henry Sy, 92, naman ang may hawak ng natitira pang 56% kasama ang kanyang asawa.

Abot sa $17.6-billion ang yaman ng pamilyang Sy, na limang porsyento naman ng taunang GDP ng bansa. Umakyat pa umano ito sa $3-billion mula nang maupo si Duterte.

Inaasahan ng mga investors na simula na ito ng mabilis na pag-akyat ng ekonomiya ng Pilipinas.

Ayon kay Frederic DyBuncio, president ng SM Investments, nagging triple ang kita ng 2GO Group, Inc., na pag-aari rin ng mga Sy at isa sa pinakamalaki nilang negosyo.

Umakyat naman sa 19% ang kita ng SM Prime Holdings, Inc., BDO Unibank, Inc. at holding company SM Investments.

Pinasasalamatan dito ni Teresita Sy-Coson, panganay na anak ni Sy, si Duterte, dahil umano sa tamang pagpapatakbo nito sa ekonomiya kahit pa binabatikos ang pangulo sa ng Human Rights Watch dahil sa libo-libong namatay at nadamay dahil sa kampanyang laban sa droga.

Tumanggi si Coson na magkumento kung magkano ang totoo nilang net worth, ngunit hindi niya ikinailang kasama siya at ang kapatid na si Hans sa mga delegations ni Duterte sa China para makipag-usap kay Chinese President Xi Jinping.

Umakyat din ang bilang ng mga turistang Chinese noong 2016, na nagpalago naman sa kita ng City of Dreams Manila casino resort na pag-aari rin ng mga Sy.

Pito na ang nakatayong SM Mall sa China, at nagpapagawa na rin ang mga Sy ng isang residential project sa Chengdu.

Plano ring magpatayo ng residential projects sa Xiamen at Jinjiang – ang lugar kung saan ipinanganak si Henry Sy.

Ipatatayo naman ang supermall sa Tianjin, na aabot sa mahigit 500,000 square meters sa floor space pa lamang – halos singlaki ng Pentagon.

Pagagandahin umano ito at itatayo ang gusaling mukhang papabukad na bulaklak, tanda ng paglago at bagong oportunidad, ayon sa website ng kumpanya.

Gayunman, 2% lamang ng kikitain ng mall ang mapupunta sa China. Ayon pa sa report, bahagi rin ang supermall ng pagpapasa ni Sy ng desisyon at kayamanan sa kanyang mga tagapagmana.

Nagsimula na umano silang magtalaga ng mga professional managers na hindi kapamilya – na desisyon na ng kanyang mga anak – matapos siyang bumaba bilang chairman SM Investments at nagpasyang hindi na boboto.

Pumalit kay Sy ang matagal na nilang chief financial officer na si Jose Sio, na nagtapos ng MBA sa New York University, at ang 57-anyos naman si DyBuncio, dating JPMorgan banker, ang pumalit kay Harley bilang presidente. NENET VILLAFANIA

SARRAT, ILOCOS NORTE – Arestado ang isang driver ng ambulansya matapos barilin at mapatay ang isang jeepney driver sa Brgy. 17, San Felipe, Sarrat sa nasabing lalawigan kahapon, June 7.

Nakilala ang suspek na si Reggie Rivac, 30, ambulance driver, taga-Brgy. 15 ng nasabing bayan.

Samantala, nakilala namang ang biktimang si Antonio Abay, 36, jeepney driver, ng Brgy. 17.

Ayon kay San Felipe police commander C/Insp. Roldan Suitos, nag-iinuman ang suspek, biktima at iba pang kasamahan nito sa Brgy. 17 nang magtalo ang dalawa sa hindi pa malamang dahilan.

Sa kanilang pagtatalo, agad na binunot ng suspek ang kanyang .45 pistol saka binaril ang biktima.

Dali-dali namang itinakbo si Abay sa ospital ngunit binawian na rin ito ng buhay.

Narekober mula sa crime scene ang pitong basyo ng bala ng .45 pistol at tatlong deformed slug.

Agad namang naaresto si Rivac at dinala sa San Felipe police jail. ALLAN BERGONIA

TODAS ang isang hindi pa kilalang babae na hinihinalang may kaugnayan sa iligal na droga matapos pagbabarilin ng hindi rin kilalang suspek sa Caloocan City kaninang madaling-araw.

Sa pahayag sa pulisya ng saksing si Jhun de Leon, dakong 5:00 ng madaling-araw, nasa loob siya ng kanilang bahay sa 3rd Ave. cor. Josefina St., Brgy. 119 nang makarinig siya ng mga putok ng baril sa labas.

Nang tingnan niya ang pinagmulan ng putok, nakita ng saksi ang duguan at walang buhay na katawan ng biktima na tinatayang nasa 25-35 ang edad, naka-itim na T-shirt na may imprentang “Tribal” at gray short pants na nakahandusay sa kalsada.

Narekober ng mga operatiba ng Scene of the Crime Operatives (SOCO) sa kanang kamay ng biktima ang isang transparent plastic sachet ng hinihinalang shabu.

Hinala naman ng pulisya, posibleng may kaugnayan sa iligal na droga ang motibo sa insidente habang inalaam na ng mga ito ang pagkakakilanlan ng suspek at tunay na motibo sa pagpatay. RENE MANAHAN

KAPWA patay ang tatlong lalaki kabilang ang dalawang dinukot matapos pagbabarilin ng hindi kilalang mga salarin sa magkakahiwalay na lugar kahapon ng hatinggabi, June 7, sa Navotas City.

Sa imbestigasyon ng Navotas police, pasado alas-12:30 kahapon ng madaling-araw nang unang matagpuan ng mga barangay tanod ang bangkay ni Cesar Carillo, 40-45 ang edad, ng Brgy. North Bay Blvd. South (NBBS) sa Baywalk sa Chungkang St., Brgy. Tanza.

May mga tama ng bala sa katawan ang biktima na naging dahilan ng kamatayan nito habang narekober sa pinangyarihan ng insidente ang dalawang basyo ng bala at isang fired bullet ng hindi pa matukoy na kalibre ng baril.

Dakong 12:45 naman ng madaling-araw nang sunod na matagpuan sa Galicia Extn., Brgy. Bangkulasi ang bangkay ni Lepong Baldomero, 40-45 ang edad at nakatira rin sa Brgy. NBBS.

May tama ng bala sa ulo ang biktima na ikinamatay nito habang narekober sa pinangyarihan ng insidente ang isang basyo ng bala ng hindi pa matukoy na kalibre ng baril.

Napag-alamang magkapitbahay at magkaibigan ang mga biktima na dinukot umano ng mga hindi kilalang armadong lalaki na pawang nakabonet Martes ng hapon sa kanilang lugar.

Samantala sa Brgy. San Roque, dakong 9:40 ng gabi, nasa loob bahay sa Aries St. si Carlo Buenaventura, 22, construction worker ng Leongson St. kasama ang ka-live-in na si Roselyn Salvador nang pasukin ng isang grupo ng mga lalaki na pawang naka-maskara at isa sa mga ito ang humatak palabas kay Buenaventura.

Makalipas ang isang sandali, nakarinig ng mga putok ng baril sa labas si Salvador at nang kanyang alamin ay nakita nito ang nakahandusay na duguang katawan ng biktima na mabilis na isigugod ng kanyang mga kaanak sa Navotas City Hospital subalit hindi na rin umabot nang buhay.

Narekober ng pulisya sa pinangyarihan ng insidente ang apat na basyo ng bala ng hindi pa matukoy na kaibre ng baril habang patuloy naman ang masusing imbestigasyon upang matukoy ang pagkakilanlan ng mga suspek at inaalam na rin kung may kinalaman sa iligal na droga ang motibo sa pagpatay. ROGER PANIZAL

NAKWELYUHAN ng awtoridad ang isang pinaniniwalaang miyembro ng Maute Terror Group-ISIS (Islamic State of Iraq and Syria) sa Cotabato City kaninang ala-1:35 ng madaling-araw.

Hindi na nakapalag pa ang suspek na nakilalang si Abdul Rafi Esmael Abdulrahman, 19, binata, estudyante sa isang paaralan sa Cotabato City.

Nadakip ang suspek ng pinagsanib na puwersa ng Cotabato City-Philippine National Police (PNP), 5th Special Forces Battalion, local government unit, at Task Force Kutawato, sa bahagi ng Kabuntalan St., Brgy. Rosary Heights 3, Cotabato City.

Hawak na ngayon ng Cotabato City Police Office sa ilalim ng pamumuno ni S/Supt. Victor Valencia ang suspek na kasalukuyan nang iniimbestigahan.

Sinabi ni Valencia, posibleng sinubukan lamang ng suspek ang lumutang sa lungsod pero hindi nakalusot sa mata ng mga awtoridad.

Iniutos naman ni Cotabato City Mayor Cynthia Guiani Sayadi sa awtoridad ang paghihigpit ng seguridad sa lungsod. BOBBY TICZON

PATAY ang isang rider matapos makasalpukan ang kapwa nito rider kaninang madaling-araw, Huwebes, sa Oroquieta, Maynila.

Dead-on-arrival sa ospital ang biktimang si Antonio Malinao sanhi ng mga pinsala sa ulo kung saan nabasag ang kanyang bungo.

Ayon sa kaanak ng biktima, nakabanggan ng biktima ang isa pang kasalubong na motorsiklo na may angkas na babae.

Agad na tumilapon ang biktima at sa lakas ng impact ay napinsala ang kanyang bungo.

Ayon sa barangay, tinulungan pa ng ilang residente na makatayo ang suspek at pinilit na huwag munang umalis dahil hinihintay ang mga pulis na mag-iimbestiga ngunit nakatakas pa rin ang mga ito nang biglang paharurutin ang motorsiklo.

Bunsod nito, dumulog sa NBI ang kaanak ng biktima upang paimbestigahan ang kaso kung saan bumuo na ng cartographic sketch sa suspek base sa testimonya ng testigo.

Bagama’t may kuha ng CCTV sa lugar ay hindi naman matukoy ang pagkakilanlan ng nakabanggang motorsiklo. JOCELYN TABANGCURA-DOMENDEN