PITONG hinihinalang drug personalities, kasama aang isang babae ang naaresto ng mga tauhan ng anti-illegal drug operation kagabi, Lunes, Navotas City.

Kinilala ni Navotas deputy police chief for administration Supt. Bernabe Embile ang mga suspek na sina Marlon Sulon, 20, drug pusher, ng Pandi, Bulacan; Linda Ojinar alyas “Madonna”, 51; Raquel Alfaro alyas “Monay”, 24, pawang taga-Dagat-Dagatan, Brgy, NBBS, Navotas; Josephine Majait alyas “Manok”, 29, ng Tondo, Manila; John Lee Empalina, 29; Joel Morales, 27; at Raymond Mirabel, 29, pawang taga-Navotas Fish Port Cmpd., Brgy. NBBN.

Sa ulat ng Navotas City Police Drug Enforcement Unit, isinailalim nila sa surveillance operation ang Market 3, Brgy. North Bay Boulevard North pasado alas-6:30 kung saan namataan nila si Sulon sa aktong nagbebenta ng droga kay Morales, Empalina at Mirabel.

Agad nilang sinunggaban ang mga suspek kung saan kanila ring naaresto sina Ojinar, Majait at Alfaro na nasa aktong nagpa-pot session sa loob ng sinasabing drug den.

Narekober sa mga suspek ang anim na sachet ng shabu at iba pang nakabukas na sachet at mga drug paraphernalia.

Nakapiit na ngayon ang mga suspek sa Navotas detention center at nahaharap sa kasong paglabag sa Comprehensive Dangerous Drugs Act 2002. ROGER PANIZAL

NAGKITA at nag-usap nang personal sina Pangulong Rodrigo Roa Duterte at ilang lider ng Moro Islamic Liberation Front (MILF) sa Davao City.

Pinag-usapan ng mga ito ang kasalukuyang humanitarian crisis sa Marawi City dulot ng bakbakan sa pagitan ng puwersa ng tropa ng pamahalaan at ng teroristang grupong Maute.

Sinabi ni MILF Chairman Alhaj Murad Ebrahim na wine-welcome nila ang ideya ni Pangulong Duterte na hingin ang tulong o humanitarian assistance ng puwersa ng MILF para sa mga sibilyan na naipit ng nasabing bakbakan sa Marawi City.

Ang mekanismo ng kapayapaan gaya ng Coordinating Committees on the Cessation of Hostilities (CCCHs) kapwa ng GPH at MILF ay ginagamit para sa pagpaplano at implementasyon sa kung paano ang agaran at ligtas na pagbibigay ng humanitarian assistance.

Tiniyak naman ng Pangulo sa mga lider ng MILF na ang deklarasyon ng Batas Militar ay hindi laban o kontra sa MILF, MNLF o NPA kundi para payapain ang rebelyon ng Maute group at ng iba pang ISIS-inspired terrorists.

Tinalakay din nina Pangulong Duterte sa pulong ang mga bagay ukol sa pagda—draft ng Bangsamoro Basic Law (BBL).

Hinikayat naman nito ang Bangsamoro Transition Commission (BTC) na bilisan ang pagda-draft ng BBL.

Ang BTC ay pinamunuan ni MILF First Vice-Chairman Ghazali Jaafar na kumpiyansang nagpahayag na ang draft BBL ay makukumpleto na sa susunod na buwan.

Bukod kay Chairman Alhaj Murad Ebrahim, kasama rin sa pulong sina First Vice-Chairman Ghazali Jaafar, BIAF Chief of Staff Sammy Al-Mansour, Peace implementing Panel Chair Mohagher Iqbal, Supreme Shari’ah Court head Ustadz Khalifa Nando at AHJAG Chair Atty. Abdul Dataya na umabot nang dalawang oras. KRIS JOSE

MAY 89 na Islamic militants ang napatay na ng government security forces sa mahigit isang linggong bakbakan sa Marawi City.

Sa kabila nito, pumapalag pa rin ang mga natitirang Maute Group na may hawak pang mga hostage, pahayag ng military nitong nakaraang Miyerkules.

Paulit-ulit aniya na binobomba ng mga helicopter ng AFP kaninang umaga ang isang bahagi ng Marawi City na pinagtataguan ng mga rebelde kasama ang na-trap na mga residente.

Nagsimula ang bakbakan nitong Martes ng nakaraang linggo nang sumalakay ang Maute group na nagwawagayway ng itim na bandera sa Marawi City bilang ganti sa security forces na dadakip sa isang Filipino na nasa listahan ng US government ng most-wanted terrorists.

Sinabi kaninang Miyerkules ng umaga ni military spokesman Brig. Gen. Restituto Padilla, nakatakas ang militant leader na si Abu Sayyaf Isnilon Hapilon, pero pinaniniwalaang nasa Marawi pa ito.

May mahigit 2,000 residente pa ang na-trap sa ilang lugar sa Marawi na hawak ng mga rebelde, ayon sa pahayag ni Zia Alonto Adiong, spokesman ng provincial crisis management committee. BOBBY TICZON

IDINEKLARA na ang state of calamity sa bayan ng Mother Kabuntalan sa Maguindanao Province dahil sa patuloy na pagtaas ng tubig-baha sa halos 20 barangay na sakop nito.

Sinabi ni Mother Kabuntalan Municipal Administrator Anwar Salik, na ang pagdedeklara ng state of calamity ay sa bisa ng isang resolusyong pinirmahan ng Sanggunian bayan ng Kabuntalan.

Apektado ng baha ang nasa 3,586 na pamilya sa lugar at abot-tuhod na ang tubig sa tapat mismo ng municipal hall, Sanggunian bayan at maging ang Municipal Police Station.

Wala namang naiulat na paglikas sa mga residente dahil nakasanayan na rin nila ang pagbaha sa lugar at sa katunayan ay tila blessing pa sa kanila dahil lumalaki pa ang kita ng mga mangingisda na pangunahing produkto ng bayan.

Sa kabila nito, posible namang maapektuhan ang pag-aaral ng mga estudyante sa darating na June 5 dahil maging ang kanilang mga paaralan ay nalubog na rin sa baha. BOBBY TICZON

HALOS matatapos pa lang ang giyera sa Marawi City, inilagay ng security forces ang Bicol region sa red alert dahil sa banta naman mula sa communist rebels na inatasang palakasin ang kanilang opensiba laban sa government forces.

Sinabi kaninang Miyerkules ng umaga ni Armed Forces of the Philippines Spokesman Brig. Gen. Restituto Padilla, Jr., inilagay na ng Southern Luzon Command (SolCom) ang lahat ng kanilang mga tauhan sa red alert status.

“Sa ilalim ng red alert, nakaalerto ang 100% ng lahat ng units kung may mataas na banta sa seguridad, nasa pagpapasya ng area commanders ang pagpatutupad ng utos,” ani Padilla.

Nang tanungin ang SolCom kung bakit nila ginawa ang naturang hakbang, dalawang dahilan ang sinabi ni Padilla. Ang una’y ang lumalaking pagbabanta mula sa NPA at ang posibleng spillover ng terrorist crisis sa Mindanao, partikular sa Marawi City, na ngayon ay inaatake ng ISIS-inspired Maute Group.

Pero nilinaw ni Padilla, wala namang initial report ng actual threat. “What is being done now is hardening of target,” pahayag nito.

Bukod dito, kailangan aniyang i-secure ng SolCom ang ilang bilang ng government projects sa region told ng power at road projects na karaniwang target salakayin ng NPA.

In the past, “may mga kaso ng panununog ng mga equipment na kagagawan ng mga rebeldeng komunista,” dagdag pa ni Padilla.

Pansamantalang umatras ang gobyerno sa 5th Round of peace negotiations sa National Democratic Front of the Philippines, ang political arm ng CPP, matapos nitong utusan ang NPA na palakasin ang kanilang opensiba laban sa tropa ng pamahalaan habang ang Mindanao ay nasa ilalim ng under Martial law. BOBBY TICZON

IDINEKLARA na ng Philippine Atmospheric, Geophysiocal and Astronomical Services Administration (PAGASA) ang pagsisimula ng tag-ulan.

Nakumpirma ito matapos ang malawakang pag-ulan na naitala at na-monitor sa kanilang mga stations sa nagdaang limang araw, sa ilalim ng Type 1 Climate.

Ipinaalala naman ng PAGASA na patuloy na mararanasan ang mga pag-ulan at pagkulog na may kasamang habagat sa Metro Manila at kanlurang bahagi ng bansa.

Mas magiging madalas naman anila na makararanas ng above normal rainfall conditions ang malaking bahagi ng bansa sa loob ng susunod na dalawang buwan, mula Hunyo – Hulyo.

Gayunman, magkakaroon din ng mga pagkakataong mapuputol ang pag-uulan na tatagal nang ilang araw hanggang Linggo dahil naman sa ridge of high pressure area sa North Pacific.

Inaabisuhan rin nila ang publiko at mga ahensya ng pamahalaan na gawin ang mga kinakailangang paghahanda para sa epekto ng tag-ulan. JOHNNY ARASGA

INATAKE ng mga miyembro ng New People’s Army (NPA) ang isang Army at CAFGU detachment alas-10:30 kagabi sa probinsiya ng Cotabato.

Ayon kay Cotabato police provincial director S/Supt. Emmanuel Peralta, umatake ang mga miyembro NPA sa Brgy. Labuo, President Roxas, North Cotabato.

Agad itong natunugan ng mga sundalo at CAFGU na gumanti naman ng putok sa mga rebelde.

Dahil sa dami ng mga NPA, gumamit pa ng 105mm owitzers cannon ang militar para pasabugan at itaboy ang mga rebelde.

Tumagal nang halos isang oras ang palitan ng bala sa magkabilang panig dahilan ng labis ang takot ng mga sibilyan.

Umatras ang mga NPA patungo sa liblib na lugar sa bayan ng President Roxas nang matunugan nito ang karagdagang pwersa ng 39th Infantry Battalion Philippine Army.

Walang nasugatan o namatay sa mga sundalo at CAFGU habang hindi matiyak sa mga NPA sa pamumuno ng isang Kumander Paroy sa ilalim nang tinaguriang Guerilla Front Committee 53.

Sa ngayon ay nagpapatuloy pa ang pursuit operation ng militar laban sa mga NPA sa probinsya ng Cotabato. -30-

SAN FERNANDO, LA UNION – Isang 73-anyos na lolo ang naaresto dahil sa panghihipo sa isang babae sa bayan ng San Fernando sa nasabing lalawigan noong Lunes, May 29.

Sa bisa ng arrest warrant, naaresto ang suspek na kinilalang si Ernesto Camaya, ng Brgy. Cabaroan sa nasabing bayan.

Sa imbestigasyon, naglalakad ang biktimang si Aillen (hindi tunay na pangalan) nang biglang dakmain ng suspek ang maseselang bahagi ng katawan nito.

Agad namang nagreklamo ang biktima kasama ang kanyang mga magulang sa himpilan ng pulisya para mahuli si Camaya.

Ngunit agad ding nakalaya si Camaya matapos maglagak ng P12,000 bilang piyansa. ALLAN BERGONIA

KINUMPIRMA ng Department of Foreign Affairs (DFA) na hindi na tuloy ang nakatakdang pagbisita ni Pangulong Rodrigo Duterte sa Japan sa June 5 at 6.

Ayon kay Foreign Affairs Sec. Alan Peter Cayetano, ire-reschedule na lamang sa ibang panahon ang pagtungo ni Pangulong Duterte matapos magkasundo ang dalawang gobyerno na ipagpaliban muna ang pagbisita ng pangulo sa naturang bansa.

Ito aniya’y upang matutukan ni Pangulong Duterte ang sitwasyon sa Marawi City at Mindanao.

Kailangan aniya ng buong atensyon ng pangulo upang pangunahan ang pagtiyak ng seguridad at kaligtasan ng mga residente ng Mindanao sa ngayon.

Sa oras aniyang maresolba na ang gulo sa Marawi ay agad na bubuuin ang plano ng pagbabalik ng pangulo sa Japan.

Una rito, nakatakda sanang magtungong Japan si Pangulong Duterte upang magsilbi bilang speaker sa 23rd International Ceonference on the Future of Asia na gaganapin sa Tokyo, Japan sa June 5 at 6. -30-

UMAABOT P1-milyong halaga ng droga ang nasabat ng awtoridad sa isinagawang One-Time Big-Time ng Cebu City Police Office.

Kagabi ay sabay-sabay na nagsagawa ng operasyon ang 11 police stations ng Cebu City at 77 katao ang nahuli.

Sa mga nahuli, 60 ang diumano’y sangkot sa paggamit at pagbebenta ng iligal nga droga habang ang iba naman’y sangkot sa kasong ng iligal na sugal at iligal na pagkustodiya ng mga baril.

Sa nasabing operasyon, nasabat ang kabuuang dami ng pinaniwalaang iligal nga droga na may timbang na 276 grams at nagkakahalaga ng P976,000.

Nakuha rin ang P3,000 kita sa pagbebenta ng iligal na droga at iba’t ibang kalibre ng mga baril.

Sa ngayon ay nakakulong na ang mga nahuli sa mga police stations sa area kung saan sila nahuli. -30-

DEDBOL ang isang 22-anyos na worker matapos pagbabarilin ng riding-in-tandem sa harap ng ina nito kahapon, Martes, sa Malabon City.

Dead-on-the-spot sanhi ng mga tama ng bala ang biktimang si Charles Cruz Devera, ng 155 Hernandez St., Brgy. Catmon, habang mabilis namang tumakas ang mga suspek sakay ng motorsiklo.

Sa ulat, bago ang pamamaril, nanonood si Devera sa kanyang cellphone kasama ang kanyang kaibigang si Edgardo Semana, Jr., 22, pasado alas-4:45 ng hapon sa Valdez St. nang biglang dumating ang apat na mga suspek na sakay ng dalawang motorsiklo.

Isa sa angkas na naka-helmet ang bumaba at walang sabi-sabing pinangbabaril nang malapitan si Devera sa katawan.

Sa kabila ng mga tama sa katawa, nagawa pang tumakbo para humingi ng tulong sa kanyang ina na si Minerva, 54, pero sinundan ito ng salarin at muling pinagbabaril na siya nitong ikinamatay.

Sa ngayon ay patuloy pa rin ang isinasagawang follow-up operation sa pagkakakilanlan ng mga suspek at malaman ang tunay na motibo sa nasabing krimen. ROGER PANIZAL

PATAY na nang matagpuan ang isang 59-anyos na tricycle driver matapos ang pagbugso ng malakas na ulan kagabi sa Ermita, Maynila.

Kinilala ang biktimang si Danilo Dacusin, may-asawa, ng 1324 Mayhaligue St., Sta. Cruz, Maynila.

Sa ulat ni PO3 Aldeen Cruz Legaspi, imbestigador ng MPD-Homicide Section, alas-7:40 ng gabi nang matagpuan ang biktima sa harap gate ng Zen Towers sa 111 Natividad Lopez at San Marcelino St., Ermita.

Nauna rito, huling nakitang buhay ang biktima kasama ang kapwa tricycle driver nito na kaparada sa lugar upang sumilong dahil sa malakas na pagbuhos ng ulan.

Gayunman, nang humina ang ulan ay umalis din ang kasama nitong driver at iniwan mag-isa ang biktima.

Nang lapitan ng security guard na si Jimmy Demegilio, nadiskubre niyang patay na ang biktima kaya agad ipinagbigay-alam sa pulisya. JOCELYN TABANGCURA-DOMENDEN

ISANG nagpakilalang kapatid ng yumaong Senator Miriam Defensor-Santiago ang inaresto ng National Bureau of Investigation – Anti-Organized and Transnational Crime Division (NBI-AOTCD).

Kasalukuyang nakakulong sa detention facility ng ahensya ang suspek na si Atty. Paula Dimpna Beatriz Palma Defensor, na kilala sa totoong buhay na si Mryna Rosales Velez, 65.

Nahaharap sa kasong Estafa at Usurpation of Authority.

Ang pagkakaaresto ng suspek ay bunsod ng reklamo ni Norma Tumambing Mendoza, 44, ng San Isidro Homes, Montalban, Rizal.

Nabatid na nagkakilala ang suspek at complainant sa Department of Justice (DOJ) noong July 2016 habang inaasikaso ang nakabinbing niyang kaso sa RTC Branch 76, San Mateo at RTC Branch 87, Quezon City.

Inialok umano ng suspek ang kanyang serbisyo sa biktima kung saan nagpakilala pa itong kapatid ng dating senator, lawyer at consultant ni Justice Sec. Vitaliano Aquirre at hiningan ang biktima ng P580,000.

Gayunman, nadiskubre ni Mendoza na hindi konektado sa DOJ ang suspek at nalaman ding ang staff ng dating senadora at totoong Atty. Paula Dimpna Beatriz Palma Defensor ay nakatira na sa ibang bansa.

Bunsod nito, nagpasaklolo ang biktima sa NBI upang maaresto ang pekeng kapatid ng yumaong senadora. JOCELYN TABANGCURA-DOMENDEN

PINAGTIBAY ng Committee of the Whole ng Kamara ang resolusyong sumusuporta sa deklarasyon ng Martial law ni Pangulong Rodrigo Duterte sa Mindanao.

Ang House Resolution 1050 ay nagsusulong ng suporta ng Kamara sa Presidential Proclamation 216 o ang dedklarasyon ng Martial law sa Mindanao sa loob ng 60 araw.

Inaprubahan ang resolusyon matapos ang mahigit anim na oras na executive session na pinangunahan ni House Majority Leader Rodolfo Farinas bilang chairman.

Mabilisan namang tumutol ang ilan sa minority group at ang Makabayan Bloc ngunit hindi pa rin nanaig ang mga ito nang magbotohan sa pamamagitan ng viva voce.

Bagama’t nanaig ang mayorya na i-adapt ang resolusyon, naniniwala naman si Akbayan Rep. Tom Villarin na ang mga ibinunyag ng gabinete sa executive session ay hindi na sikreto.

Hindi naman idinitalye ni Villarin ang mga inilahad ng gabinete sa sesyon sa pagsasabing “even if the House approves a resolution affirming the Presidential proclamation 216, the fact that it was not done in joint session renders it an unconstitutional act.”

Buo naman ang suporta ng may 60 kongresista mula sa Mindanao sa Martial law.

Umaasa silang sapat ang 60 araw na deklarasyon ni Pangulong Duterte upang sugpuin ang Maute group at iba pang lawless elements sa Mindnao.

Ayon kay Deputy Speaker Ferdinand Hernandez ng South Cotabato, muling pag-uusapan ng Mindanao bloc kung kailangan ang anomang extension ng Martial law. MELIZA MALUNTAG

LUSOT na sa Malaking Kapulungan ng Kongreso ang Comprehensive Tax Reform Bill o ang House Bill 5636.

Sa botong 246 na pabor, siyam ang tutol at isa ang abstain ay inaprubahan sa huli at ikatlong pagbasa ang nabanggit na panukala na naunang sinertipikahang urgent ni Pangulong Rodrigo Duterte.

Kabilang sa mga tumutol dito ang Makabayan bloc Carlos Zarate – no vote sa House Bill 5636 – hindi makamamamayan sa halip na pagaanangin ang pasanin ng ordinaryhng mamamayan ay lalo pang pinabigat.

Ang panukalang ito ang nagsusulong na huwag bawasan ng income tax ang may sahod na P250,000 kada taon, ngunit palalawigin ang sakop ng expanded value-added tax (VAT), itataas nang P6 kada litro ang excise tax ng produktong petrolyo at P10 naman sa mga inumang ginagamitan ng asukal at itataas din ang presyo ng mga sasakyan.

Sakop din ng panukalang ito ang pagbubuwis ng 20 porsyento sa panalo sa lotto at sweepstakes lottery ng Philippine Charity Sweepstakes Office (PCSO).

Sa kanyang pagtutol, iginiit ni Gabiela Rep. Emmi de Jesus na “malinaw na palamuti lamang ang panukalang pagpapababa ng income tax para ipatupad ang pagpapalawig ng saklaw ng expanded value-added tax at itaas ang excise tax ng langis at sugar sweetened beverages.”

Magandang palamuti lamang ngunit kalauna’y pahirap din ito sa mahihirap na siyang magpapasan sa pagtataas ng buwis. MELIZA MALUNTAG

UMABOT na sa 165 ang bilang ng naitalang krimen ng Cagayan de Oro City Police Office (COCPO) noong Mayo 17, ngunit bumaba ito sa 120 mula nang maipatupad ang Martial law sa buong Mindanao noong Mayo 24.

Ayon kay COCPO spokesperson C/Insp. Mardy Hortillosa, naging matagumpay ang mga pulisya sa pagbabantay ng seguridad sa buong siyudad kung kaya’t nalilimitahan ang mga krimen na nagaganap mula sa mga masasamang elemento.

Bagama’t may mga panaka-nakang hulihan sa droga sa pamamagitan ng kabi-kabilang drug buy bust operation, bumaba pa rin sa mahihit 40 kaso ang naitala dahil Martial law.

Sa ngayon, aabot na sa 100 checkpoints ang inilunsad ng COCPO sa iba’t ibang bahagi ng lungsod ng Cagayan de Oro. JOHNNY ARASGA

KASADO na sa bicameral conference committee ang panukalang limang-taong validity ng driver’s licence at 10-taong validity naman kung walang violations.

Ayon kay Senate committee on public services chairperson, Sen. Grace Poe, mabilis na nailusot ang panukala dahil sa suporta ng dalawang kapulungan ng Kongreso.

Sa usaping ito ay gumamit ang mga mambabatas ng reward at punishment approach.

Ang mga sumusunod kasi sa batas ay maaaring mapalawig ang validity ng lisensya, habang ang mga violators ay hihigpitan at mabilis na matatanggalan ng karapatang magpatakbo ng sasakyan kung makikitaan ng mga paulit-ulit na paglabag sa traffic rules.

“The LTO shall promulgate prerequisites and guidelines before the grant of driver’s licenses to ensure that these are issued only to deserving applicants with sufficient driving skills and knowledge on road safety and proper road courtesy,” bahagi ng bicameral conference committee. JOHNNY ARASGA

NANANATILI pa ring nakakordon ang buong paligid ng Resorts World Manila kasunod ng naganap na pamamaril at panununog ng armadong lalaki sa loob mismo ng hotel and casino.

Pinabulaanan ni Chief PNP Ronald dela Rosa na may kinalaman sa terorismo ang nangyaring pamamaril at panunog ng isang gunman sa Resorts World.

Napasugod agad sa area si Dela Rosa kasunod na hindi kinagat ang umano’y pag-ako ng ISIS sa pamamaril at panununog.

Ani Gen. Dela Rosa, batay sa CCTV footage, isang foreigner ang suspek na nanloob sa stockroom ng casino at inilagay sa bag ang mga chips.

Taliwas sa pahayag ng mga saksi, isa lamang ang suspek at wala itong kinalaman sa ISIS terror group.

Naniniwala ang heneral na posibleng pagnanakaw ang motibo ng suspek na nanunog pa ng casino table gamit ang gasolina.

Una rito, binulabog ng mga putok ng baril ang mga guest ng casino sa Pasay.

Ayon sa ilang mga nakasaksi, ilang hindi pa mabilang na mga armado at nakamaskarang kalalakihan ang nagsunog ng mga mesa sa casino area.

Limang katao ang unang naiulat na nasugatan na itinakbo sa pagamutan.

Agad na isinara ng mga kapulisan ang mga kalsadang katabi ng nasabing lugar.

Nagpakilala umanong ISIS ang suspek pero nilinaw ni Chief PNP Ronald dela Rosa na isang gunman lamang ang suspek at hindi naman tinarget barilin ang mga tao.

Inako ng Islamic State Group of Iraq and Syria (ISIS) ang nangyaring pag-atake ng ilang armadong kalalakihan sa loob ng lugar. Gayunman, hindi pa ito kinukumpirma ng PNP dahil patuloy pa ang isinasagawang imbestigasyon.

Ayon kay PNP Chief Director Gen. Ronald dela Rosa, hindi pa nila makukumpirma kung tauhan nga ng teroristang grupo ang umatake. -30-

KONTROLADO na ang sunog sa itaas ng Maxims Hotel na bahagi ng Resorts World Manila.

Naitala ang first alarm kaninang 12:53 ng hatinggabi, at hanggang ngayon ay nakikita pa rin ang usok na lumalabas mula sa gusali.

Matatandaang sinunog ng suspek ang mga gaming tables sa casino nang nakawin niya ang mga chips gamit ang isang litrong gasolina na dala nito sa loob.

Samantala, hindi bababa sa 19 na katao naman ang nasugatan dahil sa pag-atake ang dinala sa Villamor Air Base.

Pawang mga nasugatan dahil sa stampede, pagtalon sa gusali at mga na-suffocate ang mga dinala roon.

Ayon pa sa awtoridad, dinala ang ibang nasugatan sa San Juan de Dios Hospital, habang ang iba nama’y sa Airport General Hospital. -30-

SUMIRIT na sa kabuuang 1,013 mga pribadong paaralan sa elementarya at high school ang nabigyan ng pahintulot ng Department of Education (DepEd) na makapagtaas ng matrikula para sa taong ito.

Ayon sa DepEd, naaprubahan ang request ng mga paaralan batay sa umiiral na guidelines ng kagawaran.

Ang naturang bilang ay katumbas ng walong porsyento ng kabuuang bilang ng mga pribadong paaralan sa buong bansa.

Sa Metro Manila, nasa 182 paaralan sa high school at elementarya ang inaasahang magtataas ng matrikula, na sinundan ng Davao – 154 school, Central Luzon – 104 schools, at Bicol regional na may 101 na private elementary at high school na magpapatupad ng tuition fee increase.

Paliwanag ni DepEd Sec. Leonor Briones, karamihan sa mga paaralang humiling ng tuition increase ay pawang mga maliliit na eskwelahan at nangangailangan ng dagdag na pera upang ipambayad sa mga suweldo ng kanilang mga guro. JOHNNY ARASGA