INILAGAY sa half mast ang watawat ng Pilipinas sa Senado kasunod ng pagpanaw ni dating Senador Eva Estrada-Kalaw sa edad na 96.

Agad din namang bumuhos ang pakikiramay sa mga naiwan ng dating mambabatas.

Nagbigay-pugay din ang ilang mga kababayan at inalala ang naiambag ni Kalaw sa bansa lalo na ang krusada nito para sa demokrasya.

Tinawag ni Sen. JV Ejercito si Kalaw bilang “fierce freedom fighter.”

Noong panahon ng rehimeng Marcos dalawang beses na nakulong si Kalaw.

Habang aktibo pa ito sa lehislatura, kanyang isinulong ang mga adbokasiya sa socio-cultural issues, edukasyon at pagkakapantay-pantay ng babae at lalaki.

Siya ang founder at chairperson ng Jayceerettes Organization, ang female counterpart ng junior Chamber of Commerce, gayundin ang organisasyon na Samahang Filipina.

Kinilala rin si Kalaw sa kanyang walang-pagod na pagganap bilang isang social service leader.

Dahil dito, binigyan siya noon ng parangal bilang “Outstanding Volunteer Social Worker of the Year” ng Women and Gender Institute of Miriam College at ng Senate of the Philippines.

Kung maaalala, nahalal si Estrada-Kalaw bilang senadora noong December 30, 1965.

Noong August 21, 1971, kabilang siya sa mga nasugatan nang pasabugan ng bomba ang Liberal Party rally sa Plaza Miranda.

Naging assemblywoman siya sa Batasang Pambansa na kumatawan sa lungsod ng Maynila.

Matapos ang People Power Revolution, kumandidato siya pero natalo sa senatorial elections sa ilalim ng Grand Alliance for Democracy.

Taong 1992 nang tumakbo siya sa pagka-bise presidente ng Pilipinas bilang running mate ni dating Vice President Salvador Laurel na tumakbo naman sa pagka-presidente pero natalo silang dalawa kay Joseph Estrada at Fidel Ramos. JOHNNY ARASGA

NAGBARIL sa sarili matapos makapatay ang isang 55-anyos na may kapansanan dahil lamang sa away sa dumi ng pusa sa Tondo, Maynila.

Nagbaril sa sentido at namatay noon din si Hilario Cuenca, ng 560 Padre Rada St. sa Tondo.

Nasawi rin si Edmund Flores, vendor ng nasabing lugar, habang isinusugod sa Mary Johnston Hospital.

Sa ulat ni PO3 Jonathan Ruiz, bandang alas-4:00 kahapon nang maganap ang insidente sa loob ng compound kung saan nakatira ang mga namatay.

Bago ito, nagtalo ang dalawa nang magalit si Flores dahil sa pagkakalat ng dumi ng pusa ni Cuenca.

Kahit may polio, nagawa pa ring kumuha ng baril ni Cuenca na kalibre .38 pinaputukan si Flores.

Matapos mapatay si Flores, agad din itong nagpakamatay sa pagbaril sa sentido. JOCELYN TABANGCURA-DOMENDEN

PINIRMAHAN ngayong araw (May 26) ni dating Ilocos Sur Governor at ngayo’y Narvacan councilor Chavit Singsong ang kasunduang pagsuporta sa deklarasyon ng Martial law sa Mindanao na ibinaba ni Pangulong Duterte.

Ayon kay Singson, presidente ng Philippine Councilors’ League (PCL), ang Declaration of Support ng PCL ay nagpapakita lamang na solidong sumusuporta ang grupo kay Pangulong Duterte sa pagpapatupad nito ng Martial law sa Mindanao.

Dagdag pa ni Singson, anomang programa ng Pangulo na ikabubuti ng sambayanan ay sinusuportahan ng PCL.

Ayon pa kay Chavit, siya ay kabilang sa delegates sa Russia bilang kinatawan ng PCL. ALLAN BERGONIA

INANUNSYO ng Department of Public Works and Highways (DPWH) na magsasagawa sila ng road reblocking sa anim na pangunahing kalsada sa Quezon City at Pasig City ngayong weekend.

Simula ala-1:00 ng madaling-araw bukas, May 27), sa Quezon City, isasailalim sa reblocking ang:

2nd lane ng Southbound ng EDSA malapit sa Roosevelt Ave.;

5th lane ng Northbound ng Commonwealth Ave. bago mag-Litex;

2nd lane ng Quirino Highway mula Bernardino St. hanggang Urbano St.;

3rd lane ng Congressional Ave. Extn. mula Luzon Ave. hanggang Tandang Sora Ave.;

At 2nd lane ng Northbound ng Mindanao Avenue bago mag-Sauyo Rd.

Isasailalim naman sa road repair at reblocking ang C-5 Road bago mag-Lanuza Ave. sa Pasig City.

Muling bubuksan ang mga nasabing kalsada sa Lunes (May 29), alas-5:00 ng madaling-araw. JOCELYN TABANGCURA-DOMENDEN

LISTAS pa rin sa banta ng terorista ang Maynila.

Ito ang pagtitiyak ni Manila Mayor Joseph Estrada kaugnay sa mga ulat na nakapasok na sa bansa ang grupo ng ISIS.

Sa isang press briefing sa city hall nitong Huwebes, sinabi ni Estrada na ginagawa nila ang lahat upang protektahan ang lungsod.

“Manila is safe as far as I’m concerned,” paniniguro ni Estrada sa kabila ng gulong nangyayari sa Marawi City kung saan ay may mga ISIS militants na umano ang lumahok sa Maute group.

Isa rin aniya itong rason kong bakit niya ipinag-utos kay Manila Police District (MPD) director C/Supt. Joel Coronel na gamitin ang lahat ng “assets” ng MPD sa pagbabantay sa lungsod.

Noong isang buwan lang ay pinawi din ni Estrada ang takot ng publiko nang sinabi ni Philippine National Police (PNP) chief Dir. Gen. Ronald dela Rosa na may terrorist cell ng Maute group ang nasa Kamaynilaan upang manggulo.

Ito’y bunsod ng police raid sa Quezon City kung saan nakakumpiska ang mga awtoridad ng improvised explosive device (IED) na plano aniyang pasabugin ng teroristang grupo.

Una nang inatasan ni Estrada ang MPD na magsagawa ng mga security checkpoint sa paligid ng Malacañang na aniya’y isa sa malalaking target ng mga terorista.

Sa isang panayam, sinabi ni Coronel na wala silang natatanggap na “actual and direct threat which will constitute clear and present danger to the security of Manila.”

Siniguro naman ni Estrada na handa ang 4,600 miyembro ng MPD na idepensa ang lungsod anomang oras.

Nitong Marso lang ay bumili si Estrada ng P20-milyong halaga ng mga bagong baril upang palakasin pa ang MPD sa paglaban sa mga kriminal at terorista.

Bukod pa ito sa una na rin niyang binili nitong Oktubre na nagkakahalaga din ng P20-milyon. Kabilang dito ay 400 units ng Glock 9mm. semi-automatic pistols, 60 M4 carbines (shorter and lighter variant of the M16A2 Armalite assault rifle), walong Sig Sauer sniper rifles, mga bala, at iba pang gamit. JOCELYN TABANGCURA-DOMENDEN

ITATAAS ng kampo ni Filipina death row inmate Mary Jane Veloso sa Supreme Court (SC) ang kanilang pakiusap para payagan ang deposisyon ng testimonya laban sa kanyang umano’y recruiters mula sa kanyang kulungan sa Indonesia.

Ayon kay National Union of Peoples’ Lawyers (NUPL) president Edre Olalia, magsasampa sila ng petisyon para kwestiyunin ang hakbang ng Court of Appeals (CA) laban sa deposisyon sa unang linggo ng Hunyo.

Ang testimonya ni Veloso ay dapat makalap sa Abril 27 sa Yogyakarta prison subalit nagpalabas ang CA 11th Division nitong nakaraang Marso ng isang temporary restraining order (TRO) na ang validity ay pinalawig hanggang sa preliminary injunction na inisyu nitong Mayo 22.

Ang hakbang ng CA ay nagpaigting sa petisyon na isinampa ng Public Attorney’s Office (PAO), ang counsel para sa recruiter ni Veloso na si Maria Cristina Sergio at ang kanyang live-in partner na si Julius Lacanilao, na nagsabi na ang deposisyon ay laban sa constitutional right ng akusado.

“The recruiters assert that they want to confront her in person yet they themselves oppose and put all roadblocks every step of the way to make this happen,” pahayag ni Olalia.

Si Veloso ay nasentensyahan ng bitay sa pamamagitan ng firing squad noong Abril 2015 matapos mapatunayang guilty sa kasong drug trafficking, pero pumayag ang Indonesian authorities na ipagpaliban ang eksekusyon para makapag-testify sa kaso laban sa kanyang recruiters sa Pilipinas. BOBBY TICZON

NATANGAY sa isang 18-anyos na kasambahay ang mahigit P1-milyong halaga ng pera at mga alahas matapos itong mabiktima ng miyembro ng “Dugo-Dugo” gang sa Malabon City kahapon, May 25.

Sa salaysay ni Ninia Estiaga kina Malabon police investigators PO3 Roger Gonzales at PO2 Diego Ngipol, pasado alas-10:00 ng umaga nang makatanggap siya ng tawag sa bahay ng kanyang amo na si Eliseo Rodriguez, Jr., 58, sa 85 Rd. 13, Pag-asa, Quezon City mula sa hindi kilalang caller at sinabi sa kanyang nasa hospital ang kanyang mga amo matapos madisgrasya.

Ipinakausap sa kanya ang isang babae na kaboses ng kanyang among babae saka inutusan siyang buksan ang pinto ng kanilang kuwarto at sirain ang cabinet sa loob na nilalagyan ng pera at mga alahas bago kinuha ang nakatagong 900 US dollars.

Inutusan siya ng kausap na papalitan ang US dollars na sinunod naman nito at pinabalik siya ng bahay saka ipinakuha ang ibang mga dolyares na nagkakahalaga sa 800 dollars, mga alahas na aabot sa P100,000 ang halaga at iba pang Asian currencies.

Pinapunta ng suspek ang katulong sa SM North bago pinapunta naman sa Muñoz at inatasan na maghanap ng Smart padala at ipadala ang una niyang pinapalitang US dollars na nagkakahaga sa P40,000.

Matapos ito, sinabihan siya ng suspek na pumunta sa Robinson Town Mall sa Malabon City at pagdating ni Estiaga sa naturang lugar dakong 3:00 ng hapon ay pinapunta siya sa Mini Stop kung saan niya inabot sa hindi kilalang babae ang bag na pinaglagyan ng mga alahas at pera.

Hinawakan pa siya sa braso ng suspek bago nagmadaling umalis sakay ng tricycle habang bumalik naman ang katulong sa bahay ng kanyang mga amo at laking gulat nito nang matuklasang hindi naaksidente ang mga amo niya. ROGER PANIZAL

PINABABAWI agad ng isang lider ng Catholic Bishop’s Conference of the Philippines (CBCP) kay Pangulong Rodrigo Duterte ang pagdeklara nito ng Martial law sa Mindanao kapag natapos na ang krisis sa Marawi City.

Sinabi rin ni Fr. Jerome Secillano, executive secretary ng CBCP-Permanent Committee on Public Affairs (CBCP-PCPA), na umaasa siyang masusugpo ng pansamantalang pag-iral ng Martial law ang terorismo sa buong rehiyon.

Iginiit din niyang dapat isaalang-alang ng mga pulis at militar ang mga karapatang-pantao at mahalagang tiyakin ng administrasyong Duterte na masugpo ang terorismo sa rehiyon na siyang ginamit na dahilan upang ipatupad ang batas-militar doon.

Dapat ding tiyakin ni Duterte na walang mangyaring paglabag ng mga karapatang-pantao sa pag-iral ng batas-militar.

Idineklara ni Pangulong Duterte ang Martial law sa buong Mindanao nitong nakaraang Martes ng gabi nang salakayin ng mga miyembro ng mga teroristang grupo ang Marawi City.

Hanggang nitong Biyernes ng umaga, mahigit 40 na ang napatay sa patuloy na bakbakan sa lungsod, 31 sa mga napatay ay mga terorista habang hindi naman aabot sa 10 ang namatay sa panig ng kasundaluhan, ayon sa militar. BOBBY TICZON

SINABI ni Solicitor General Jose Calida na may presensya ng mga foreign terrorists na nakikipagbakbakan sa tropa ng gobyerno sa Marawi City.

Kabilang aniya sa mga nakakasagupaan ng mga tropa ng sundalo sa Marawi City ay ang ilang Malaysians, Indonesians, Singaporean at iba pang foreign jihadists.

Bukod dito, sinabi rin ng militar na anim sa 30 napatay na mga terorista o miyembro ng Maute group ay mga banyaga.

Ani SolGen Calida, labis na nakababahala kung saan mula sa pagiging local terrorist group, sumakay na sila sa ideolohiya ng ISIS at nanumpa na ng pagkilala sa watawat ng international terrorist group.

Binigyang-diin nitong masyado nang mapanganib ang Maute group dahil pursigido silang gawing bahagi ng caliphate o kaharian ng mga Muslim ang Mindanao.

“Correct… Malaysians, Indonesians from Singapore and other foreign jihadists. Yes. And that’s the bothersome—Before it was just a local terrorist group. But now, there is now an ideology, they have subscribed to the ideology of the ISIS and they have pledged allegiance to the flag of ISIS. So they want to create Mindanao as part of the caliphate,” ang pahayag ni SolGen Calida. KRIS JOSE

KULONG ang dalawang Chinese national matapos maaktuhang namimirata ng pelikula sa isang mall sa Pasay City.

Kinilala ang mga suspek na sina Zhu Dan, 28, at Chen Xiu Ying, 20, na wala pang isang linggo mula nang dumating sa Pilipinas.

Ayon sa mga naka-duty na security guard ng sinehan, ipinapalabas ang pelikulang ‘Pirates of the Caribbean’ nang mapansin nila ang tatlong babae na nagre-‘record’ ng naturang pelikula sa kanilang mga cellphone.

Matapos nilang obserbahan, sinita na ng mga guwardiya ang tatlo, at sinabing bawal ang kanilang ginagawang pagvi-video.

Dinala sa admin office ang tatlo upang kausapin pero hindi ito nakipagtulungan nang pakiusapan na buksan ang kanilang mga cellphone.

Nang dadalhin na sa presinto, nakatakbo ang isa sa tatlong mga suspek at hindi na nahuli pa dahil humalo na sa maraming tao.

Nahaharap ang mga suspek sa kasong paglabag sa Republic Act 10088 o ‘Anti-Camcording Act of 2010′’. -30-

TODAS ang isang barangay chairman matapos pagbabarilin sa loob ng kanyang bahay sa Malate, Maynila.

Isinugod pa sa ospital ang biktimang si Angelito Sarmiento, kapitan ng Brgy. 751 Zone 81, pero binawian rin ng buhay.

Ayon kay Arellano PCP Commander C/Insp. Paul Sabulao, naganap ang pamamaril pasado alas-10:00 kagabi sa mismong bahay ng biktima.

Kwento ng ilang saksi, apat na armadong lalaki ang pumasok sa bahay ni Sarmiento.

Naroon rin umano ang misis ng biktima nang maganap ang pamamaril, pero hindi naman ito sinaktan ng mga suspek.

Matapos ang krimen, agad ring tumakas ang mga suspek sakay ng motorsiklo.

Ayon sa Manila Police District (MPD), kasama sa kanilang ‘watchlist’ ang suspek na una na rin umanong sumuko sa Oplan Tokhang noong Hunyo ng nakaraang taon.

Nagpapatuloy naman ang imbestigasyon ng pulisya sa nasabing krimen. -30-

NANINIWALA si dating Pangulong Fidel Ramos na tama lamang ang deklarasyon ng Martial law ni Pangulong Rodrigo Duterte.

Gayunman, ayon sa dating pangulo dapat ay hindi sa buong Mindanao ang Martial law.

Inihalimbawa nito ang mMrtial law declaration ni dating Pangulong Gloria Macapagal-Arroyo sa Maguindanao na sa isang lalawigan lamang.

Umaasa naman ang dating military top official at pangulo na hindi na tatagal ang batas militar at matatapos ito bago ang ika-60 araw.

Iginiit nitong kung ikukumpara sa batas militar ni dating pangulong Ferdinand Marcos, mas maganda ang Martial law ngayon dahil sa 1987 Constitution.

Nanawagan naman ang dating pangulo sa mga opisyales ng pamahalaan na huwag hayaang lumabas ng Mindanao ang kaguluhan.

Dapat din ayon dito na hindi dapat pag-usapan ang paglawak ng sakop ng Martial law sa ibang panig ng bansa bagkus kailangang palakasin ang morale ng mga mamayan.

Nanawagan din ito sa pamahalaan na magkaroon ng strict measure upang hindi maabuso ang karapatang pantao sa Mindanao.

Sa huli, sinabi ni Ramos na hindi niya pinagsisisihan ang pagsuporta kay Pangulong Duterte. JOHNNY ARASGA

WALONG foreign banks ang nagpakita ng interes na pumasok sa Pilipinas.

Ayon kay Bangko Sentral ng Pilipinas (BSP) Gov. Nestor Espenilla, ang naturang mga dayuhang bangko ay mula sa Asya na posibleng magtayo ng kanilang bangko o kaya’y makipag-partner sa mga lokal na bangko dito sa Pilipinas.

Sinabi ni Espenilla na bawat bangko ay inaasahang magdadala ng tinatayang P3-bilyon.

Kapag nagkataon, inaasahang makapagpapalakas pamumuhunan at at madaragdagan din ang trabaho sa bansa. JOHNNY ARASGA

SUMUKO na sa mga awtoridad ang limang pulis na sangkot sa kidnapping at pangingikil sa Malabon City.

Tinukoy ng Philippine National Police (PNP) ang mga pulis na suspek na sina PO3 Michael Angelo Solomon, PO3 Luis Hizon, Jr., PO2 Michael Huerto, PO1 Ricky Lamsen at PO1 Jovito Roque.

Pawang mga nakatalaga ang mga ito sa Malabon City Police Station, na inireklamo ng kidnapping sa isang kasintahan ng inmate sa New Bilibid Prisons (NBP).

Sa ulat ng PNP Counter-Intelligence Task Force (CITF), nanghingi ang mga suspek ng P2-milyon at isang kilo ng shabu kapalit ng kalayaan ng babae.

Ngunit bumaba ito sa P1-milyon nang pumayag ang mga suspek na makipagnegosasyon.

Tinangay pa umano ng mga suspek ang mga personal na gamit ng biktima tulad ng gadgets, alahas, pera at maging ang sasakyan nito.

Mahaharap ngayon sa mga kasong robbery, kidnapping, carnapping at may kinalaman sa pagtatanim ng iligal na droga.

Una nang nasukol ng mga pulis ang apat na iba pang suspek at nakasuhan sa Department of Justice (DOJ), habang patuloy pa namang hinahanap ang dalawang iba pa na sina SPO2 Gerry dela Torre at PO3 Bernardino Pacoma. JOHNNY ARASGA

KULONG ang isang 21-anyos na binatilyo matapos mahuli sa akto ng mga barangay tanod na nagsa-shabu sa loob ng banyo ng palengke sa Caloocan City kaninang madaling-araw, Mayo 27.

Kinilala ni Caloocan police chief S/Supt. Chito Bersaluna ang naarestong si Jhune dela Peña ng Poblacion Market, Brgy. 64.

Sa imbestigasyon ni P02 Benjamin Bedo, dakong 1:30 ng madaling-araw, nagpapatrolya ang mga barangay tanod na sina Rodolfo Cristobal, Jr. at Bernabe Calimlim sa naturang palengke nang may lumapit na concerned citizen at sinabi ang hinggil sa nagaganap na pot session sa loob ng banyo ng naturang palengke.

Nang beripikahin ng mga ito, huli sa akto ang suspek na abala sa pagsa-shabu sa loob na naging dahilan upang agad itong arestuhin at narekober sa kanya ang isang nakabukas na sachet na may bahid pa ng pinaniniwalaang shabu. RENE MANAHAN

BASAG ang bungo ng  isang 37-anyos na  welder nang aksidenteng mahulog sa ginagawang skyway sa San Andres Bukid, Maynila.

Kinilala ni SPO4 Glenzor Vallejo, imbestigador ng Manila Police District – Homicide Section ang biktimang si Jayson Bautista, may-asawa, trabahador ng Skyway DMCI at tubong Salong Calaca, Batangas.

Sa imbestigasyon , nagtratrabaho si Bautista bilang welder sa no.53 post ng Skyway na may taas na 36 feet at matatagpuan sa kahabaan ng Osmeña Highway kanto ng P. Ocampo, San Andres Bukid  nang aksidente itong mahulog dakong alas-2 ng madaling-araw.

Agad namang naisugod sa Ospital ng Maynila ang biktima ng DMCI ambulance crew sa pangunguna ni Allan Delmonte ngunit idineklarang dead on arrival. JOCELYN TABANGCURA-DOMENDEN