INABISUHAN na ng liderato ng Kamara ang mga kongresista na huwag munang umuwi sa kani-kanilang distrito pagkatapos ng sesyon ngayong araw.

Ito’y dahil posibleng magpatawag ng sesyon anomang oras kung makapagsusumite si Pangulong Rodrigo Duterte ng report patungkol sa deklarasyon ng Martial Law sa Mindanao.

Sinabi ni House Majority Leader Rodolfo Farinas, sa sandaling matanggap ng Kongreso ang report sa loob ng 48 oras, personal man o written, mula sa pangulo ay saka lamang maisasagawa ng Kongreso ang mandato nito.

Ipinaliwanag ni Farinas na hindi na kailangang magsagawa ng joint session ang Senado at ang Malaking Kapulungan upang pagtibayin ang deklarasyon ng pangulo ng Martial Law.

Pinayuhan din nito ang publiko na maging kalmado kaalinsabay ng deklarasyon ng Martial Law bunsod ng pag-atake ng Maute Group sa isang ospital at paaralan sa Marawi City.

“All members are advised to stay put in Manila. Under the rules, our sessions are until Friday. The President will head back home and we may have session as soon as we receive his official report,” ayon sa advisory na ipinalabas.

Sa panig naman ni Surigao del Sur Rep. Ace Robert Barbers, chairman ng House Committee on Dangerous Drugs, inudyukan pa nito ang PNP at AFP na ibigay sa Maute group ang tila hinihingi nitong giyera.

Hindi na aniya dapat pang madagdagan ang nasasawi at lumaki pa ang pinsala dahil sa pananakot at pag-atake ng mga teroristang grupo sa bansa.

Agad namang sinuportahan ni Davao City Rep. Karlo Alexie Nograles ang deklarasyon ng martial law kasabay ng panawagan sa publiko na maging mapagmatyag dahil karaniwan aniya na ang mga terorista ay nakikihalubilo sa mamamayan.

Malaki aniya ang partisipasyon ng komunidad upang mapalakas ang kampanya ng gobyerno laban sa terorismo. MELIZA MALUNTAG

INILAGAY kahapon sa full alert ang pangunahing paliparan ng bansa kasunod ng pag-atake ng mga terorista sa Marawi City noong Martes.

Siniguro ng Manila International Airport Authority (MIAA) at Civil Aviation Authority of the Philippines (CAAP) na ang Ninoy Aquino International Airport (NAIA) ay ligtas sa publiko.

“We will even reinforce the current (security) process,” ani MIAA General Manager Ed Monreal.

Dalawang sundalo at isang pulis ang napabalitang napatay, at 12 nasugatan sa sagupaan ng government forces at Maute group noong Martes.

Ayon kay Department of Transportation (DOTr) Office of the Undersecretary for Aviation and Airports Manuel Antonio “Skee” Tamayo, nagbigay din ng assurance ang lahat ng CAAP area managers na mahigpit ang security protocol sa lahat ng airport sa bansa sa gitna ng bakbakan sa Marawi City.

Ayon pa kay Tamayo, sa kabila ng gulo, bukas naman ang lahat ng airport para sa normal na operasyon.

Siniguro din ni DOTr Sec. Arthur Tugade sa publiko na lahat ng pasilidad at instalasyon ng CAAP ay ligtas sa publiko.

Hinikayat naman nito ang lahat na maging mapagmasid at mapang-usisa (vigilant) para handa sa safety precautions. BENNY ANTIPORDA

NA-RESCUE ng tropa ng pamahalaan kaninang Miyerkules ng umaga ang may 42 na titser na naipit sa loob ng isang gusali sa kasagsagan ng pagatake ng Maute terrorists.

Ayon sa ulat, dumalo ang mga titser sa isang K-12 program training seminar sa isang gusali na nasa gitna ng lunsod nang sumiklab ang bakbakan sa pagitan ng mga sundalo at terorista.

Sinabi ng isang lalaking titser na ayaw magpakilala na pinaligiran ng mga terorista ang naturang gusali at ilang beses na tinangkang pasukin ito para makakuha ng mga hostages. Parang mga dagang nagtatago anya ang mga titser sa gusali para takasan ang mga umaatake.

Nagtamo siya ng malaking sugat sa kanyang braso nang tangkain siyang i-hostage ng mga miyembro ng Maute group mula sa kanyang mga kasamahan

“Pabalik-balik po kaming nagtatago. Para kaming mga daga na nagtatago sa isang lungga. Akyat-baba, akyat-baba. Hindi na po namin mabilang ilang beses kaming nagtakbuhan. May mga natumbang guro,” kwento nito.

Dinala anya ng mga sundalo ang mga titser sa provincial capitol building, na nagsilbing lugar para sa mga biktima.

Maalala na nagsimula ang bakbakan sa Marawi City nitong nakaraang Martes ng gabi nang paputukan ng mga terorista ang mga sundalo na ang misyon ay dakpin si Isnilon Hapilon, ang suspected leader ng Islamic State sa Southeast Asia.

Idineklara a ni Pangulong Rodrigo Duterte ang martial law sa Mindanao at tinapyasan ang kanyang 4-day official visit sa Russia para bumalik sa bansa kasunod ng tensyon sa Marawi City. BOBBY TICZON

INANUNSYO ng Armed Forces of the Philippines (AFP) na malulutas nila ang sagupaan ng tropa ng gobyerno at ISIS-linked Maute group sa Marawi City sa loob ng 2 buwan.

Sinabi ni AFP Public Affairs Office chief Marine Colonel Edgard Arevalo, na sa kasalukuyan ay under control na nila ang naganap na bakbakan sa pagitan ng dalawang panig.

Nangako rin si Arevalo na tatapusin nila ang pursuit operations para sa ikatatahimik ng lugar.

Una nito, tiniyak ng AFP na hindi nila aabusuhin ang implementasyon ng Martial Law sa buong Mindanao.

Nanawagan din siya sa publiko na aasahan ang maraming mga checkpoints at hindi dapat maalarma sa maraming presensiya ng mga sundalo na makikita sa bawat lugar.

Nilinaw din ng nasabing opisyal na walang katotohanan ang balita na may presensya na ng Islamic State of Iraq (ISIS) sa Pilipinas. BOBBY TICZON

DISMAYADO si coach Freddie Roach sa naging ensayo ni Filipino boxing champion Manny Pacquiao.

Sinabi ni Roach na ito na ang pinakamasamang performance ni Pacquiao na kaniyang nakita nang isinagawa ang pangalawang five-round sparring session nito.

Dagdag pa nito na hindi maganda ang timing ng fighting senator kaya ito ang kaniyang pagtutuunan niya ng pansin.

Nilinaw naman ni Roach na hindi pa nararapat na mag-panic dahil makukuha muli ni Pacquiao ang kaniyang lakas at bilis sa mga darating nilang mga training.

Tiniyak din ni Roach na magiging malakas pa rin ang mga suntok ni Pacquiao at dapat itong ikabahala ng kanyang makakalaban na si Jeff Horn ng Australia. BOBBY TICZON

TINATAYANG nasa mahigit P105 milyon halaga ng mga umano’y pekeng produkto na naipuslit papasok sa ating bansa ang nasabat nang mga ahente ng Bureau of Customs (BoC) sa isinagawang pagsalakay sa tatlong bodega kahapon sa Tondo, Manila.

Ayon kay BoC-Intelligence and Investigation Service (CIIS) Director Neil Anthony Estrella, nakumpiska ang mga nasabing pekeng produkto sa tatlong warehouse na nasa loob ng Dagupan Center na matatagpuan sa 1331 Dagupan St., Tondo.

Isinagawa ang nasabing operasyon matapos ang tatlong buwan na surveillance na isinagawa ng BoC makaraang makatanggap ang mga ito ng impormasyon na may mga kontrabando sa nasabing lugar kung saan pineke ang mga kilalang branded na produkto na gawang China at ipinuslit papasok sa bansa.

Napag alaman kay Estrella na ang kanilang mga nakumpiskang pinekeng produkto ay kahun-kahon na naglalaman ng Rexona sachet deodorants; Safeguard soaps; Bulldog super glue; Insect spray; baby diapers; Spalding basketball; mosquito coils; lighters; Mongol pencil; toothbrush; steel scrubs; spools at mga rain coats.

“It is the policy of the government to protect and secure the exclusive rights of scientists, inventors, artists and other gifted individuals to intellectual property and creations as provided under Republic Act 8293, thus we hit the said contraband,” ani Estrella.

Dahil dito, inabisuhan ng BoC ang pamunuan nang Dagupan Center na ibigay ang kanilang bitbit na Letter of Authority (LOA) at Mission Order (MO) na inisyu ni Commissioner Nicanor Faeldon sa mga may-ari nang nasabat na kontrabando na pawang mga Chinese Businessmen.

Binigyan ng BoC ng 15-araw ang mga nasabing negosyanteng Chinese upang makumpleto ang mga kaukulang dokumento tulad ng import permits batay na rin sa itinakda ng batas.

“But with their failure to comply, the BoC will definitely issue a Warrant of Seizure and Detention on the entire shipment and confiscate it for condemnation,” ayon sa BoC.

Pansamantalang ikinandado ng BoC-CIIS ang tatlong warehouse gayundin ang tatlong container van na naglalaman din ng mga kontrabando at isinailalim sa kanilang kustodiya. JAY REYES

UMABOT sa 281 na rehistradong mangingisdang Navoteño ang nabiyayaan ng bagong mga lambat bilang tulong at pagkilala sa kanilang nagawa para sa lungsod ng Navotas.

Walo naman ang nabigyan ng mga motorized fiberglass na bangka mula sa Bureau of Fisheries And Aquatic Resources (BFAR).

“Lubos ang ating pasasalamat sa ating mga mangingisda dahil sila ang bumubuhay sa ating ekonomiya at kultura. Hindi makikilala ang Navotas kung hindi dahil sa kanila. Nararapat lang na sila’y tulungan dahil ang kanilang lakas at sipag ay yaman ng lungsod,” ayon kay Mayor John Rey Tiangco.

Pinangunahan ng Navotas City Agriculture Office at BFAR ang nasabing programa.

Nasa ikaapat na taon na ang pagbibigay ng livelihood assistance sa mga mangingisda. Tanging ang mga nakapagrehistro lamang sa City Agriculture Office mula 2016 – 2017 ang nakasama sa listahan.

Nagkakahalaga ng P200,000 ang lahat ng pinamahagi na lambat na maaaring gamitin sa panghuhuli ng alimasag, bangus, tilapia, hoya, hipon, asuhos, at alamang.

Bukod rito, binigyang-pagkilala rin ang pinakamatandang mangingisda sa lungsod na si Marcelino Monteroso, 86-anyos. -30-

MAKARARANAS ng mga pag-ulan ang kanlurang bahagi ng Luzon at Visayas dahil sa southwest monsoon o Habagat.

Batay sa forecast ng PAGASA, iiral ang maulap na papawirin na may mahina hanggang sa katamtamang pag-ulan sa mga rehiyon ng Ilocos at Western Visayas at mga probinsya ng Zambales, Bataan, Mindoro, Palawan at Negros Occidental.

Makararanas naman ng bahagyang maulap hanggang sa maulap na kalangitan na may kasamang pagbuhos ng ulan at pagkulog-pagkidlat ang Metro Manila at nalalabing bahagi ng bansa.

Una nang sinabi ng PAGASA na ang mga pag-ulang nararanasan sa iba’t ibang bahagi ng bansa ay senyales lang na pumasok na ang Habagat.

Pero posible aniya na kapag may bagyong pumasok sa bansa ay magdeklara na ang ahensya ng pagsisimula ng rainy season o tag-ulan.

Idinedeklara ng PAGASA ang panahon ng tag-ulan sa pagitan ng buwan ng Mayo at Hunyo. -30-

BAGUIO CITY – Patay ang isang babae habang malubhang nasugatan ang dalawang bata matapos gumuho ang isang malaking pader sa isang contruction site sa Brgy. Kias, Baguio City kahapon, May 24.

Kinilala ng Baguio City Police Office (BCPO) ang namatay na si Gemma Mendoza at habang ang mga sugatang bata ay sina Nathaniel de Jesus, 1, anak ni Mendoza, at pamangking si Lienary de Jesus.

Natagpuan ang katawan ni Mendoza ng rescue team at Baguio City Fire Station at BCPO Station 4 sa bahay nito sa Pinesville Subd., Purok 8 ng nasabing barangay na natatabunan ng malaking pader sa katabing contruction site.

“Kanina kasi may narinig kami parang kidlat, akala naming kidlat [pero] may nagsisisigaw na kanina, kaya iyon na, bomba na iyong baha diyan. Ugaga na lahat ng tao. First na-rescue namin iyong baby,” ani Jason Wana, isa sa mga recuer.

Agad na dinala ang dalawang bata sa Baguio City General Hospital (BCGH) para lunasan habang bumigay na ang katawan ni Mendoza.

Samantala, sinisi naman ni Edwin de Jesus, live-in partner ni Mendoza, ang gumuhong pundasyon ng ginagawang pader sa construction site sa katabi nilang bahay.

“Iyong mga nagpagawa, hindi siguro inayos ‘yung pagpapagawa ng riprap nila. Hiling po sana namin na tulungan kami,” ani Edwin.

Sa ngayon, inaalam ng mga awtoridad kung ano ang dahilan ng pagguho ng pader ng nasabing construction site. ALLAN BERGONIA

ISANG ginang ang agad namatay matapos targetin sa ulo ng isang gunman habang nagpapahinga at nakaupo kagabi, Miyerkules, sa San Andres Bukid, Maynila.

Hindi na umabot nang buhay sa Sta. Ana Hospital ang biktimang si Carmensita Cuison, 43, may-live in partner, walang trabaho, ng 2440 Onyx St., ng nasabi ring lugar.

Sa ulat ng MPD-Homicide Section, alas-7:15 ng gabi nang maganap ang pamamaril sa kahabaan ng Onyx St.

Nakaupo lamang umano ang biktima at namamahinga nang lapitan ito ng hindi nakilalang suspek at walang sabi-sabing binaril sa likurang bahagi na ulo na tumagos sa kanyang bibig.

Matapos ang krimen, kaswal lamang na naglakad ang suspek palayo bitbit ang ‘di nabatid na kalibre ng baril.

Hindi naman mahingan ng pulisya ang mga nakasaksi ng anomang impormasyon kaugnay sa nangyari sa takot nilang baka sila naman ang balikan.

Patuloy pang inaalam ng pulisya ang motibo sa pagpatay sa biktima at ang pagkakilanlan ng suspek. JOCELYN TABANGCURA-DOMENDEN

ISA ang patay habang dalawang babae pa ang naaresto ng mga tauhan ng Manila Police District (MPD) sa isinagawang buy-bust operation kaninang madaling-araw sa Sta. Ana, Maynila.

Dead-on-arrival sa Sta. Ana Hospital si Reynaldo Javier, Jr., 34, miyembro ng Sputnik gang, binata, mg 2564 Pasig Line St., Sta. Ana.

Naaresto naman sina Elaine Sevillana, 18, dalaga, ng 1973 Estrada St., at Zenaida Javier, alyas ‘Nida,’ 57, kaanak ng napatay.

Sa isinumiteng report ni P/Supt. Jerry Corpuz, hepe ng MPD Police Station 6, naganap ang insidente alas-1:20 ng madaling-araw sa bahay ng suspek.

Nagsagawa ng buy-bust operation ang Drug Enforcement Unit ng nasabing istasyon sa pangunguna ni P/S Insp. Consorcio Pangilinan at umakto namang poseur buyer si PO3 Cyrel Lucena.

Bumili umano si PO3 Lucena ng halagang P300 ng shabu sa suspek at nang matapos na ang kanilang transaksyon ay saka nito ibinigay ang hudyat upang arestuhin ang suspek subalit nakahalata at agad bumunot ng baril.

Gayunman, maagap namang bumunot ng baril si PO3 Lucena at pinaputukan ang suspek na tinamaan nito.

Itinakbo pa sa naturang pagamutan si Javier ngunit namatay din ito kalaunan.

Ayon naman kay PO3 Marlon San Pedro, imbestigador ng MPD-Homicide Section, sina Sevillana at matandang Javier ay kasama ng suspek nang maganap ang buy-bust operation sa kanilang bahay.

Nakumpiska sa bahay ng suspek ang isang .38 kalibre ng baril, sumpak, mga bala, ilang drug paraphernalias, at buy-bust money.

Inihahanda na rin ang kasong isasampa laban kina Sevillana at Zenaida. JOCELYN TABANGCURA-DOMENDEN

NAG-ISYU ang United States Embassy sa Maynila ng panibagong travel advisory upang paalalahanan ang kanilang mamamayan na iwasan munang magtungo sa Marawi City at iba pang matataong lugar, bunsod ng nagaganap na kaguluhan doon dahil sa pagsalakay ng teroristang Maute group at deklarasyon ni Pangulong Rodrigo Duterte ng Martial law sa Mindanao.

Sa naturang abiso, hinimok rin ng embahada ang kanilang mamamayan na maging mapagmatyag upang makaiwas sa kapahamakan.

Gayundin, nabatid na pansamantala munang itinigil ng US Embassy ang pagpunta sa Mindanao ng kanilang mga Mission personnel dahil na rin sa kaguluhan.

“The US Embassy has temporarily suspended Mission personnel travel to Mindanao pending a better understanding of the threat environment. While the US Embassy has no information that the events in Marawi City represent a direct threat to US citizens or US interests in the Philippines, we encourage US citizens to review personal security plans, avoid large crowds and gatherings, and remain vigilant at all times,” abiso pa ng embahada.

“The US Embassy wishes to remind US citizens of the most recent Worldwide Caution, dated March 6, 2017, which indicates there is an ongoing threat of terrorist actions and violence against US citizens and interests abroad, including the Philippines. Extremists have targeted sporting events, theaters, markets, mass transportation systems–including airlines, and other public venues where large crowds gather. Crowded nightclubs, shopping malls, buses and popular restaurants have also been targets. US citizens should be mindful of the importance of taking preventative measures to ensure their safety and security while traveling and residing in the Philippines‎,” dagdag pa nito.

Kaugnay nito, nagpaabot rin ng pakikiramay ang embahada sa mga kaibigan at pamilya ng mga pulis at sundalo, na nasawi sa pakikipaglaban sa mga terorista, sa ngalan ng demokrasya. MACS BORJA

INILATAG na ng Malaking Kapulungan ng Kongreso ang pagtalakay sa Martial Law na idineklara ni Pangulong Rodrigo Duterte sa Mindanao.

Sinabi ni House Majority Leader Rodolfo Fariñas na kanyang isusulong na mag-convene bilang Committee of the Whole ang Kamara sa Miyerkules (May 31) upang makapagsagawa ng closed-door executive session sa plenaryo.

Sa Lunes (May 29) aniya ay magmomosyon siya na gawing Miyerkules ang pagtalakay sa Martial law na ayon kay Fariñas, isusulong niya sa Lunes (Mayo 29) ang naturang hakbang para sa pagsasagawa ng executive session na gaganapin sa Miyerkules ng umaga.

“I will move on Monday that we will constitute ourselves into a
committee of the whole and have our meeting at the session hall in an executive session,” ani Fariñas.

Kabilang sa inaasahang dadalo sa closed-door meeting ay ang Executive Secretary, mga kalihim ng DILG, at DND para sagutin ang kanilang mga tanong kaugnay sa ulat ng pangulo.

Iimbitahan din ang iba pang gabinete kabilang ang mga kalihim ng DSWD, DoH, DoJ, DoT. DoTr, DTI at iba pang ahensiya ng gobyerno para tanungin ukol sa kani-kanilang departamento.

“Matters involving national security may be discussed like locations, tactics and strategy of those involved in the rebellion, more so, for our government forces.”

Inihayag ni Fariñas na nagkasundo sila ni Senate Majority Leader Tito Sotto na magsagawa nang briefing ang executive sa Senado sa Lunes ng hapon habang ang Kamara’y sa Miyerkules ng umaga.

Ipinaliwanag din nito na ang pagsasagawa ng joint session ng Kongreso ay hindi na kailangan pa kung walang maghahain ng concurrent resolution mula sa mga mambabatas.

Pahayag pa ni Fariñas, ito rin ang ginawa niyang paliwanag sa Makabayan Bloc at kay Albay Rep. Edcel Lagman ukol sa pagsasagawa ng joint session.

“A Joint Session requires a Concurrent Resolution of both houses to call Congress into such Joint Session. If either does not want to, how can you have a Joint Session?” pahayag ni Fariñas. MELIZA MALUNTAG

NABULAGA ang awtoridad kaninang Huwebes ng umaga nang matagpuan ang dalawang bangkay ng lalaki mula sa isang trak na tumagilid sa Ortigas Ave. Extn. sa Antipolo City.

Sinabi ni Antipolo City PNP traffic investigator PO1 Michael dela Peña, wala pang pagkakakilanlan ang mga biktima at hindi pa rin mabatid kung sila’y mga pahinante ng trak o naglalakad lamang sa kalsada.

Tinutugis na ngayon para panagutin sa krimen ang hindi kilalang truck driver na biglang tumakas matapos ang insidente.

Sa ulat, naganap ang insidente dakong 10 p.m. sa isang bisinidad ng Ortigas Ave. Extn, Antipolo City.

Bago ito, nabatid sa mga saksi na nawalan ng kontrol sa pagmamaneho ang naturang truck driver sa pakurba at pababang bahagi ng Ortigas kaya tumagilid ito sa kalsada. Mga scrap metal ang karga ng naturang trak.

Kaninang umaga, isa-isa nang tinanggal ang mga scrap metal na karga ng trak para mas madali itong maitayo sa pagkatumba.

Pero sa ilalim ng mga scrap, tumambad ang bangkay ng dalawang lalaki na nadaganan pala sa insidente. BOBBY TICZON

SUMALAMPAK sa loob ng taxi ang isang retiradong miyembro ng Armed Forces of the Philippines (AFP) nang barilin ng kasama nitong babae sa Quezon City kahapon ng umaga, Miyerkules.

Kinilala ni PO3 Louie Serbito, ng Quezon City Police District-Criminal Investigation and Detection Unit (QCPD-CIDU), ang biktimang si Nelson Bathan, 51, may-asawa, ng AFP Housing, Trece Martires, Cavite.

Nahuli naman ng mga istambay ang suspek na nakilalang si Lilibeth Bacus, 45, may-asawa, lending collector, ng Brgy. Luciano Trece Martires, Cavite.

Sa imbestigasyon, naganap ang insidente dakong 9 ng umaga sa harap ng Helmark Bldg. sa E. Rodriguez Sr., Brgy. Immaculate Concepcion, QC.

Bago ang krimen, sumakay sa taxi ng isang Walter Sabaria ang biktima at suspek at nagpapahatid sa Taytay, Rizal.

Ayon kay Sabaria, pagsapit nila sa SM City sa Taytay, nakarinig na lang siya ng dalawang putok ng baril sa likurang bahagi ng kanyang taxi.

Nang kanyang tingnan ay nakita niya si Bathan na hindi na gumagalaw at may lumalabas na dugo sa katawan.

Tinutukan siya ni Bacus ng baril at binantaang papatayin kung hindi siya ihahatid sa Cubao, QC.

Pagsapit sa E. Rodriguez Sr. Ave. malapit sa kanto ng New York St., nakakuha ng tiyempo ang si Sabaria at tumalon sa kanyang taxi.

Sumalpok ang naturang taxi sa isang nakaparadang Isuzu pick-up na gray (ZPM-303) at sa isang Toyota Innova (ABT-7424) na nakakuha ng atensyon sa mga istambay sa lugar at iba pang taxi driver kabilang ang barangay tanod ng Immaculate Concepcion saka hinabol ang suspek at naaresto. BOBBY TICZON

INANUNSYO kaninang Huwebes ng umaga ng Philippine Atmospheric Geophysical Astronomical Services Administration (PAGASA) ang pagpasok ng mas maraming bagyo sa Hunyo – Disyembre kumpara sa nakalipas na taon.

Ayon sa PAGASA, posibleng maging madalas ang pagpasok ng mga bagyo simula sa susunod na buwan, lalo na sa huling quarter ng 2017.

Kaugnay nito, nagbabala rin ang PAGASA ukol sa mas madalas at malalakas na buhos ng ulan ngayong nagsimula na ang pag-iral ng southwest monsoon o hanging habagat.

Ayon kay PAGASA Administrator Vicente Malano, ang pagsisimula ng habagat ay indikasyon na rin ng unti-unting pasok ng tag-ulan.

Pero maaaring ideklara nila ang ganap na pagsisimula ng rainy season sa susunod na linggo o sa unang mga araw ng Hunyo. -30-

ISANG sundalo ang napatay, habang 10 sa kanyang mga kasamahan ang sugatan matapos silang tambangan ng bandidong Abu Sayyaf sa Sulu.

Ayon kay Capt. Jo-ann Petinglay ng Armed Forces of the Philippines-Western Mindanao Command (AFP-WestMinCom), hinahabol ng mga sundalo ng 10th Infantry Battalion ang grupo na pinaniniwalaang may hawak na mga bihag.

Aniya, namataan ang grupo ng nasa 10 – 15 kalalakihan na may kasamang mga bihag.

Sinubukan aniyang sundan ng mga sundalo ang mga bandido, nang bigla silang tambangan ng mga ito alas-5:20 ng madaling-araw kahapon, sa Brgy. Tado Bagua sa Patikul, Sulu.

Tumagal nang hanggang 20 minuto ang bakbakan na ikinasugat ng 11 sundalo.

Gayunman, sa kasamaang-palad ay nasawi ang isa sa kanila habang ginagamot. JOHNNY ARASGA

SUMIRIT na sa halos 60 katao ang nanalagas sa nagpapatuloy na engkuwentro sa pagitan ng government forces at teroristang Maute sa ilang barangay sa Marawi City, Lanao del Sur.

Ito ang kinumpirma ni 1st Infantry Division Philippine Army spokesperson Lt. Col. Jo-Ar Herrera matapos nilang ipitupad ang full-scale offensive laban sa local terror group.

Ani Herrera, nasa 31 mga terorista ang panibagong namatay habang naitala ang karagdagang anim na sundalo rin mula sa panig ng gobyerno kahapon lamang Huwebes.

Naitala na rin ng 38 mga sundalo na nasugatan makaraan ang panibagong pito na tinamaan habang tinugis ang mga terorista.

Samantala, narekober din ng mga sundalo ang anim na high-powered firearms at improvised explosive devices (IEDs) ng mga terorista mula sa encounter site.

Iniulat din ni PNP-ARMM spokesperson S/Insp. Marchille Manzano na nadagdagan pa ang bilang ng pulis na nalagas at nasugatan habang nakikipaglaban sa mga suspek.

Sinabi ni Manzano, isang police officer mula sa PNP-ARMM ang kumpirmadong namatay habang mayroon pang pulis na nasugatan kahapon.

Una nang namatay ang dalawang police officials mula Marawi City Police Station at PNP-ARMM nang agad mapasabak sa labanan.

Naitala rin ang nasa 2,737 na pamilya na lumikas mula sa kanilang mga tahanan at tumungo sa mga kaanak sa nila karatig-lugar ng Lanao del Sur, Lanao del Norte maging sa Iligan City at Cagayan de Oro City. -30-