IBINUKO ng dating residente ng isang kilalang Home for the Aged ang mga pagmamaltratong ginagawa sa mga matatandang kasamahan.

Sinabi ng dating residente na may mga staff na malupit sa mga matatandang inaalagaan sa loob ng Home for the Aged.

Kabilang aniya rito ang pananakal ng tuwalya sa mga matatanda kapag may konting reklamo at tinanggalan ng wheelchair.

Gustuhin man aniya nilang magsumbong sa management ay hindi nila magawa dahil walang magamit na wheelchair.

Bukod dito, sinabi ng lolong dating residente na pinagagamit ang mga pasyente ng oxygen subalit wala namang laman at bula lang ang lumalabas.

Kapag gusto aniyang parusahan ang matatanda ay inilalagay ang mga ito sa isolation room. -30-

DEDO ang dalawang lalaki matapos pagsasaksakin ng mga nakaaway sa isang bar sa Brgy. Sta. Cruz, Makati City.

Agad namatay ang mga biktimang sina Locre Jay Mabini, 35, at Jaymar Octavio sa natamong mga saksak sa iba’t ibang bahagi ng katawan.

Sa inisyal na imbestigasyon, nagkakasiyahan ang grupo ng mga biktimang construction worker sa Joke Box Bar sa kanto ng Ponte St. at Chino Roces Avenue.

Bago ito, nagbi-videoke ang mga biktima hanggang sa makainitan ang isa pang grupo na nag-iinuman din sa naturang bar.

Lumabas sa bar ang dalawang grupo at doon na nagpang-abot hanggang sa humantong sa madugong saksakan.

Sugatan rin ang isa pang kasama ng mga biktima na si Teodoro Laguer na dinala sa pinakamalapit na ospital habang mabilis na nakatakas ang mga suspek.

Nagpapatuloy ang follow-up operation ng pulisya upang mahuli ang mga nasa likod ng karumal-dumal na krimen. JOHNNY ARASGA

PATAY sa rumespondeng pulis ang isang negosyante sa La Paz, Cabatuan, Isabela, na unang bumaril sa kanyang misis dahil umano sa selos.

Kinilala ang mga namatay na sina Jaime Natividad, 59, at misis na si Leonila Natividad, 47, kapwa negosyante ng nasabing lugar.

Ayon kay P/S Inspector Victoriano Cabaddu, Jr., deputy chief of police ng Cabatuan Police Station, unang namatay si Mrs. Natividad matapos barilin ng kanyang mister bunsod ng matinding selos.

Nataon namang nagsasagawa ng follow-up operation si PO3 Luis Bayona para sa naka-schedule na drug clearing operation nang marinig ang sunud-sunod na putok ng baril.

Kaagad nagtungo sa lugar si PO3 Bayona at nakitang nakahandusay ang ginang na duguan.

Nakita siya ni Mr. Natividad at pinaputukan pero nakailag siya at dito na gumanti ng putok sa papatakas na suspek na tinamaan sa kanang bahagi ng tiyan.

Naisinugod pa ang mag-asawa sa ospital ngunit idineklarang dead-on-arrival.

Sa ngayon ay nagsasagawa na imbestigasyon an mga awtoridad sa naturang pangyayari. JOHNNY ARASGA

PATAY sa pagsisilbi ng arrest warrant ang isang bomb expert ng bandidong grupo na Bangsamoro Islamic Freedom Fighters (BIFF) matapos manlaban sa awtoridad sa Datu Odin Sinsuat, Maguindanao kaninang Lunes ng madaling-araw.

Sinabi ni S/Supt. Agustin Tello, director ng Maguindanao Police Provincial Office, nakilala ang napatay na si Murad Ali, alyas Kumander Abu Mohammad.

Nahuli naman ang ilan sa mga kasamahan ni Ali na ngayo’y nakakulong na sa Maguindanao PNP detention cell.

Wala namang kaswalidad sa hanay ng pulisya.

Sa ulat, naganap ang insidente dakong 2 a.m. sa tapat ng bahay ng suspect sa Brgy. Capiton.

Ayon kay Tello, bago ang insidente, isisilbi ng kanyang mga tauhan ang arrest warrant laban kay Ali pero imbes sumuko ay pinaputukan ang mga operatiba.

Ang search warrants para kay Ali ay para sa kasong possession of firearms at illegal drugs.

Sinabi ni Tello na si Ali ay miyembro ng BIFF intelligence unit sa ilalim ng Karialan faction at isang bomb expert.

Naging estudyante rin ito ng isang BIFF official at bomb expert na si Abdul Basit Usman na napatay noong 2015.

Nakumpiska sa bahay nito ang isang Ingram machine pistol, 1 grenade, mortar at bomb-making materials. BOBBY TICZON

IGINIIT ni Justice Sec. Vitaliano Aguirre II kaninang Lunes ng umaga na hindi maaaring dumalo si Sen. Leila de Lima sa Senate sessions sanhi ng kanyang pagkakakulong sa kasong illegal drug trading.

Maaalalang hiniling ni De Lima kay Senate President Aquilino Pimentel III na suportahan siya sa paghingi niya ng furlough sa Muntinlupa City Regional Trial Court para makaboto sa “crucial landmark legislations.”

Nang tanungin ang DOJ kung magsasampa ng oposisyon kung susuportahan ng Senado ang kahilingan ni De Lima, sinabi ni Aguirre sa isang text message: “Of course! Our position is contrary to her request.”

Nauna nang sinabi ni Aguirre na ilan sa mga karapatan at pribihileyo ay suspendido kapag ang isang indibidwal ay nakakulong, kabilang ang karapatan na dumalo sa legislative sessions, at ihinalimbawa ang nagging kaso nina dating Senators Juan Ponce Enrile, Jinggoy Estrada at Ramon “Bong” Revilla, Jr.

Ang tatlong dating senador ay nahaharap sa kasong plunder sa Sandiganbayan kaugnay sa pork barrel scam.

Si De Lima ay kasalukuyang nakadetine sa PNP Custodial Center sa Camp Crame sa alegasyon na sangkot sa illegal drug trade sa loob ng New Bilibid Prisons (NBP) noong siya pa ang justice secretary kapalit ng poll campaign funds. BOBBY TICZON

INALMAHAN ni Lingayen Dagupan Archbishop Emeritus Oscar Cruz ang pagpapatanggal sa mga rosary beads at mga religious images na nakasabit sa rear view mirror ng mga pampubliko at pribadong sasakyan dahil sa pagpapatupad ng Anti-Distracted Driving Act (ADDA).

Sinabi ni Archbishop Cruz, masyadong makitid ang utak ng mga gumawa ng nasabing desisyon sapagkat ang mga rosaryo at ang mga maliiit na imahe ng mga santo ang siyang dinadasalan upang malayo ang mga nagmamaneho sa disgrasya sa kalsada.

Hindi aniya ang mga rosaryo at kung ano-ano pang nakasabit sa mga sasakyan ang nakamamatay o sanhi ng disgrasya kundi ang mga wala sa huwisyong driver at hindi malinaw na traffic signs.

Dagdag pa nito, isang malaking kalokohan na mas pagtuunan pa ng pansin ng Land Transportation Office (LTO) at Land Transportation Franchising and Regulatory Board (LTFRB) ang mga nakasabit sa mga sasakyan kumpara sa mga pagbibigay ng solusyon sa mga lumalalang problema sa trapiko sa bansa.

Napag-alamang nakasaad sa Joint Administrative Order 2014-01 na ipinalabas ng LTFRB at LTO na ipinagbabawal ang paglalagay ng mga bagay na makasasagabal sa paningin ng mga driver.

Kabilang rito ang rosaryo at sa pagpapatupad ng ADDA, binigyan na lamang hanggang Mayo 26 ang mga driver na alisin ang mga ipinagbabawal na gamot sa kanilang sasakyan. BOBBY TICZON

ISA na namang miyembro ng Manila Police District (MPD) ang napatay matapos ambusin ng kilabot na riding-in-tandem sa Tondo, Maynila nitong Lunes ng madaling-araw.

Nagtamo ng tama ng bala ng kalibre .45 at 9mm pistol sa iba’t ibang bahagi ng katawan at namatay noon din ang biktimang si PO2 Frederick Tolentino.

Wala pang ideya ang MPD investigators kung sino ang nasa likod ng pagpatay pero isa sa sinisilip na motibo ay may kinalaman sa pagiging alagad ng batas ng biktima.

Sa ulat, naganap ang insidente ganap na 12:25 a.m. sa Quezon St., Brgy. 116 Zone 9.

Ayon sa isang saksing ayaw magpakilala, nakita niya ang dalawang motorsiklo na sakay ang apat na salarin na ang isa’y nakabonet.

Pagsapit sa lugar, inunahan ng mga suspek ang kotseng Toyota sedan na minamaneho ng biktima saka ito pinagbabaril.

Matatandaang nitong Marso lamang, isang babaeng pulis ang inambus din ng riding-in-tandem sa Recto, Maynila. BOBBY TICZON

IMBES na masaya, humantong sa trahedya ang isang family outing nang mahulog sa bangin ang kanilang sinasakyang dyip na ikinamatay ng isa at ikinasugat ng 20 iba pa sa Aklan kaninang Lunes ng umaga.

Sinabi ni PO3 Tony Dee Laus ng Altavas Police station, nakilala ang namatay na si Marjun Martinez, 32, ng Bayebaye, Jamindan, Capiz, na sinasabing naipit sa jeep.

Isinugod naman sa Altavas District Hospital sanhi ng iba’t ibang tinamong pinsala sa ulo at katawan ang may 20 pang biktima tinutugis naman ang drayber ng dyip na si Alex Laconia, 35, taga-Panabuan, Jamindan, Capiz matapos itong tumakas.

Ayon sa ulat, naganap ang insidente dakong 7:15 a.m. sa isang bangin sa Brgy. Tibiao, Altavas.

Nabatid na lulan ang magkakamag-anak at nanggaling sa isang family outing sa isang beach resort sa Brgy. Songcolan, Batan, Aklan, at pauwi na sa Capiz nang mangyari ang aksidente.

Nawalan ng preno ang dyip na minamaneho ni Lasconia, habang paakyat sa bahagi ng daan kaya nahulog sa bangin na may lalim na 50 talampakan. BOBBY TICZON

PATAY ang isang pulis matapos pagbabarilin ng riding-in-tandem sa Tondo, Maynila kahapon ng madaling-araw, Lunes.

Kinilala ang biktimang si PO2 Frederick Tolentino, 43, ng 202A Blg. II Rawis Cmpd., Tondo na nagtamo ng tama ng bala sa iba’t ibang bahagi ng katawan.

Sa imbestiagsyon, dakong 12:20 nang mangyari ang insidente sa kahabaan ng Quezon St., Tondo, Brgy. 116 Zone 9.

Lulan ng kanyang silver Toyota Corolla Altis (XHS 721) ang biktima nang pagbabarilin ng tatlong lalaking sakay ng magkahiwalay na motorsiklo.

Inaalam na ng pulisya ang iba pang detalye kaugnay sa biktima na dating nakatalaga sa NCRPO Regional Personnel Holding Accounting Unit sa Bicutan, Taguig City na napag-alamang dati na ring inaresto ng National Bureau of Investigation (NBI) dahil sa pagkakasangkot sa kindapping sa isang Korean businessman na si Hyun Koo Yeo. JOCELYN TABANGCURA-DOMENDEN

PINASISILIP at ipinarerepaso na ng liderato ng Malaking Kapulungan ng Kongreso ang prangkisa ng Philippine Airlines (PAL) at Cebu Pacific Airlines.

Sa pagdinig ng House Committee on Transportation, tahasang nagbanta si House Majority Leader Rodolfo Fariñas na kapag nagpatuloy ang mga reklamo kaugnay sa pangit na serbisyo ng mga airlines sa publiko ay maaaring ipabawi ang prangkisa ng mga ito.

“Bawat linggo kliyente niyo kami, at ang downtime ko sa PAL siguro bawat linggo ay nasasayang mga dalawa hanggang limang oras. Tell your corporate bosses that I will review your franchise. We can amend your franchise anytime. You make a killing, and we are at your mercy. Pinagsasamantalahan ninyo ang riding public,” pagdiin ni Fariñas.

Giit pa ng kongresista, susuriin ng Kongreso ang prangkisa ng dalawang kumpanya dahil sa mga reklamo sa napakamahal na airline fares at sa mahabang delayed flights.

Nilinaw pa ng komite na pinamumunuan ni Catanduanes Rep. Cesar Sarmiento na ang prangkisa ng mga ito’y hindi karapatan kundi isang pribilehiyo na ibinigay sa kanila ng sambayanan sa pamamagitan ng kanilang kinatawan sa Kamara.

“Kaya kayo naka-operate dahil pinayagan kayo ng mga boss namin, the sovereign Filipino people. Huwag niyo naman pagsamantalahan. Your enterprise is imbued with public interest. Wake up and shape up,” ayon kay Fariñas.

Ipinatawag ng Komite ang pagdinig base sa mga House Resolution 267 na inihain ni Rep. Ferjenel G. Biron, M. D. (4th District, Iloilo) at HR 723 ni Reps. Vicente S. E. Veloso (3rd District, Leyte) at Victoria Isabel G. Noel (Party-list, AN WARAY) sa labis na pananamantala sa pasahe ng PAL at Cebu Pacific.

Ayon naman kay Leyte Rep. Vicente Veloso, isa sa mga naghain ng House Resolution 723 na tila inabandona ng Civil Aeronautics Board (CAB) ang tungkuling i-regulate ang presyo ng pamasahe sa eroplano bilang proteksyon ng taumbayan.

Nagbanta rin si Veloso kay CAB Executive Director Carmelo Arcilla na maaaring nilalabag na ito ang probisyon sa Anti-Graft and Corrupt Practices Act kapag ipinilit ang pananaw at itutuloy na baliwalain ang mandato sa ilalim ng Republic Act 776 na kumikilala sa CAB at sa Civil Aeronautics Administration. MELIZA MALUNTAG

KAHIT hindi sakop ng nationwide smoking ban, target ng Department of Health (DOH) na maisailalim sa regulasyon ang paggamit ng mga electronic cigarettes at vaporizers.

Ayon kay Health Sec. Paulyn Ubial, maaaring maglabas na lang sila ng hiwalay na kautusan kaugnay nito tulad ng isang Food and Drug Administration (FDA) order.

Aniya, sinimulan na ng DOH at FDA ang posibilidad ng paglalabas ng kautusan tungkol sa paggamit ng e-cigarettes at vape.

Sa inilabas na Advisory No. 2013-008 ng FDA, inabisuhan nila ang publiko laban sa paggamit ng e-cigarettes dahil taliwas ito sa layunin na maihinto na ang paggamit sa sigarilyo.

Hindi naman maaring maipagbawal ang mga e-cigarettes at vapes sa Executive Order 26 ng pangulo kaugnay ng nationwide smoking ban, dahil hindi rin naman sakop ng Republic Act No. 9211 o Tobacco Regulation Act of 2003 ang mga ito.

Maaari aniya itong magkaroon ng problema sa legalidad dahil pawang non-tobacco products ang mga e-cigarettes at vapes.

Sa nasabing EO ng pangulo, ipinagbabawal na ang paninigarilyo sa lahat ng outdoor o indoor na pampublikong lugar tulad ng paaralan, playgrounds, simbahan, transport terminals, waiting areas at mga resorts. JOHNNY ARASGA

NADISKUBRE ng mga ahente ng National Bureau of Investigation (NBI) ang mahigit 21 kilo ng shabu sa nakaparadang kotse sa labas ng isang mall sa Bacoor, Cavite.

Pasado alas-11:00 kagabi nang masamsam ng NBI ang droga na nakalagay sa 21 pakete at tinatayang nagkakahalaga ng P100-milyon.

Nabatid na maghapon binantayan ng mga awtoridad ang puting kotse na nakaparada sa Brgy. Habay Dos, Bacoor City.

Isinagawa ng NBI ang pagkilos matapos may makarating sa kanilang impormasyon na may laman itong droga at kukunin ng isang buyer subalit walang dumating.

Nang halughugin ng mga awtoridad ang sasakyan, doon nadiskubre ang dalawang sports bag kung saan na nakasilid ang droga.

Palaisipan din sa mga awtoridad ang iniwang susi ng sasakyan sa gilid ng gulong nito na susi ng naturang kotse.

Inaalam pa ng NBI kung sino ang nag-iwan ng naturang kotse.

Kung matatandaan, nito lamang nakaraang Sabado ay may narekober naman ang Philippine National Police (PNP) na mahigit tatlong kilong shabu sa isang sasakyan sa parking lot ng isang mall sa Taguig City. JOHNNY ARASGA

APAT na climbers na ang kumpirmadong namatay sa Mt. Everest nito lamang nagdaang weekends.

Natagpuan na ang bangkay ng isa sa kanila na si Ravi Kumar, ngunit imposibleng makuha ang katawan nito matapos mapag-alamang nahulog ito 200 metro pababa mula sa kanilang ruta.

Nagkasakit umano si Kumar habang pababa na sila mula sa summit noong Sabado, at sa kasamaang-palad ay hindi na nakayanang umabot sa pinakamalapit na camp, bagaman nagawang umabot ng kanyang guide kahit na may sakit na rin ito.

Kinumpirma rin ni Tourism Department official Kamad Prasad Adhikari na una nang nasawi ang Amerikanong climber na si Roland Yearwood, 50, mula sa Alabama, pero hindi pa malinaw kung kailan ibababa ang kanyang bangkay.

Isa ring Slovak climber na si Vladimir Strba ang nasawi sa Everest, pero nadala na sa South Col camp ang kanyang katawan.

Isa ring Australian climber na si Francesco Enrico Marchetti mula sa Queensland ang nasawi sa Chinese side ng Everest, pero wala nang ibang detalye ang naibahagi pa tungkol sa kanya.

Dahil dito, umakyat na sa anim ang bilang ng mga namatay sa kasalukuyang spring climbing season na nagsimula noong Marso, at magtatapos ngayong buwan. -30-

NAG-IWAN ng 19 na kataong patay habang 50 ang nasugatan ang pagsabog sa concert ng American pop star na si Ariana Grande partikular sa Manchester Arena.

“Emergency services are currently responding to reports of an explosion at Manchester Arena. There are a number of confirmed fatalities and others injured. Please AVOID the area as first responders work tirelessly at the scene,” saad ng Greater Manchester Police.

Ayon sa ilang witness, dalawang malakas na pagsabog ang kanilang narinig na pinaniniwalaang mula sa foyer o sa entrance hall ng concert venue.

Sa ngayon ay inaalam pa ang dahilan ng pagsabog pero itinuturing ng North West Counter Terrorism Unit ang insidente na terroristic attack.

Napag-alamang pinagbawalan muna ang mga residente sa London na lumapit sa sikat na Manchester Arena na noong una’y biniberipika pa ng pulisya kung talagang tunay na pagsabog ang naganap.

Magkakaiba kasi ang pahayag ng fans ng 23-year-old pop star na ang iba’y pinabulaanang may pagsabog, at baka may mga pumutok lamang daw na lobo at ang malakas na speaker ang narinig.

Isinara rin muna ang mga kalapit na kalsada ng nasabing arena kasabay ng pagdating ng mga police car, ambulansiya, at riot vans.

Isa sa mga nanood ng show ay ang aktres na si Julie Hesmondhalgh.

Agad din umanong umalis ang “Bang Bang” hitmaker sa stage nang magkaroon ng stampede.

Si Ariana ay may comeback concert sa Pilipinas sa buwan ng Agosto ngayong taon.

Unang beses pinasaya ni Grande ang Pinoy fans noong 2015. -30-

TODAS ang isang lalaki na umano’y tulak ng iligal na droga nang manlaban sa mga operatiba ng Manila Police District (MPD) kaninang madaling-araw sa Binondo, Maynila.

Dead-on-arrival sa Jose Abad Santos General Hospital ang biktimang nakilala lamang sa alyas na Boy, edad 35-40, katamtaman ang pangangatawan, 5’4- 5’6 ang taas, at may mga tattoo sa dibdib at nakasuot lamang ng violet at orange na boxer shorts.

Bago ang insidente, nagkasa ng buy-bust operation ang mga tauhan ng Drug Enforcement Team ng Meisic MPD-PS 11 sa naturang lugar.

Habang nakikipag-deal ang mga operatiba ay nakahalata ang suspek na pulis ang kanyang katransaksyon kaya agad na bumunot ng baril saka pinaputukan si PO1 Manny Montemayor.

Gayunman, nag-jam ang baril ng suspek dahilan para paputukan naman siya ng isa pang pulis na si PO3 Samson Sison at tamaan sa iba’t ibang bahagi ng katawan.

Bagama’t sugatan at bumagsak na ay nagawa pang magpaputok ng suspek ngunit maswerteng walang tinamaan.

Agad na dinisarmahan ang suspek at dinala sa naturang ospital subalit hindi na umabot nang buhay.

Narekober sa suspek ang ilang bala, baril, pera, patalim at shabu. JOCELYN TABANGCURA-DOMENDEN

DINAMDAM umano ng isang 19-anyos na binata ang nabasang text ng ex-boyfriend ng kanyang girlfriend kaya nagawa nitong magbigti kaninang umaga sa Tondo, Maynila.

Kinilala ng Manila Police District-Homicide Section ang biktimang si Jessie Campo, egg vendor, tubong Sitio Uburan, Brgy. Palid 1, Leyte at stay-in sa 574 Hermosa Ext., malapit sa M. Frilles St., Brgy. 182 Zone 16, Tondo.

Sa ulat ni Panaligan, alas-7:00 ng umaga (Martes) nang madiskubreng nakabigti ang biktima sa room 3 sa ikalawang palapag ng kanyang tinutuluyang bahay sa nasabing lugar.

Sa sinumpaang salaysay ng nobya ng biktima, magkatabi lamang ang kanilang pinapasukang trabaho sa Pampanga St., sa Tondo at habang naka-charge ang cellphone nito pinakialaman ng biktima kung saan may nabasa itong text messages mula naman sa ex-boyfriend ng nobya nito.

“Kamusta ka na, ingat ka palagi, love you,” text message na nabasa ng biktima sabay sabi sa kanyang girlfriend na “break na tayo kasi niloloko mo lang ako.”

Kasunod noon ay lagi nang tahimik ang biktima kahit pa umano pinapaliwanagan na ng kanyang kasintahan.

Gayunman, tinatawagan pa rin ng girlfriend ang biktima mula alas-7:00 – alas-10:00 ng gabi (Lunes) subalit hindi na ito sumasagot pa.

Kaninang umaga ay nadiskubre na lamang itong nakabigti gamit ang nylon cord.

Patuloy pang iniimbestigahan ng pulisya ang pangyayari. JOCELYN TABANGCURA-DOMENDEN

TOP military officials of the Association of Southeast Asian Nations (ASEAN) vowed to work together to fight terrorism which poses threat to peace and security in the region.

Armed Forces of the Philippines (AFP) public affairs office chief Col. Edgard Arevalo said the military chiefs from the regional bloc signed the joint statement aimed at enhancing joint military exercises, humanitarian assistance and disaster relief capacities

The move also seeks to beef up efforts to formalize the ASEAN Chiefs of Defense Forces Informal Meeting (ACDFIM) which was first agreed upon by all defense chiefs during the 12th ACDFIM held in Malaysia in 2015, to become a mechanism to combat the prevalence of violent ideologies and create a coordinated response to non-traditional threats like disasters.

AFP Chief General Eduardo Año, who also sits as the 2017 ACDFIM Chair, spearheaded the call for the enhancement of cooperation and collaboration among the ASEAN Armed Forces for a more secure and stable region.

Arevalo said the threats of terrorism, particularly the spread of ISIS-inspired extremism; maritime security concerns, and onslaught of disasters and calamities became the focus of the meeting and these inspired the mutual agreement to forge stronger partnerships.

During the meeting’s plenary session, Año emphasized the importance of maintaining peace and stability in the regional bloc as a whole in order to strengthen its economic leverage and potential.

The Philippines, Indonesia, and Malaysia have an existing trilateral agreement to fight trans-border crimes, terrorism, piracy, and other terror activities in the Sulu-Sulawesi-Celebes Sea.

Año described such move as a way to “negate the threats and show that strong military cooperation is important in aligning our security requirements and initiatives.”

INAKO ng Islamic State group ang nangyaring pagsabog sa concert ng pop singer na si Ariana Grande sa Manchester sa United Kingdom kahapon.

Matatandaang umabot na sa 22 ang namatay, habang nasa 60 naman ang sugatan dahil sa suicide bombing na naganap matapos ang concert sa Manchester Arena.

Inilabas ng grupo ang pahayag sa kanilang mga social media channels, at sinabing isa sa kanilang mga sundalo ang naglagay ng bomba sa lugar.

Samantala, kinilala na ng Greater Manchester Police ang suspek na si Salman Abedi, 22.

Ayon sa isang European intelligence official, si Abedi ay isang British citizen na may lahing Libyan.

Sa ngayon ay nasa kustodiya na aniya ang kapatid ng nasabing suspek. JOHNNY ARASGA

KINUMPIRMA ni Defense Sec. Delfin Lorenzana na magpapatupad ng adjustment ang militar sa kanilang mga tropa sa Mindanao kasunod sa nagpapatuloy na labanan sa pagitan ng militar at teroristang Maute.

Tumanggi namang idetalye ng kalihim ang gagawing troop adjustment dahil operational matters na ito.

Ngayong umaga inaasahan ang pagdating sa Marawi City ng reinforcement na mga sundalo na magmumula sa area ng 1st Infantry Division.

Pagtiyak ni Lorenzana, kayang tugunan ng Armed Forces of the Philippines (AFP) ang sitwasyon ngayon sa Marawi at hindi kailangan ng tulong ng ibang bansa.

Batay sa ulat na natanggap ni Lorenzana, kinumpirma nitong tatlo ang patay sa panig ng gobyerno na ang isa’y pulis na nakilalang si S/Insp. Freddie Solar, dalawang sundalo, habang 12 ang sugatan.

Aminado rin ang kalihim na nabigla ang mga tropa ng makasagupa ang nasa 100 mga armadong fighters na nagbibigay-seguridad kay ASG leader Isnilon Hapilon na nagpapagamot ng kanyang sugat sa nasabing lugar.

Ibinunyag din ng kalihim na maraming sympathizers ang Maute sa Marawi City kung kaya’t malayang nakakapasok sa lugar ang mga terorista na hindi nalalaman ng militar dahil ang mga ito’y nagpapanggap na mga sibilyan.

Nalaman na lamang ng militar ang presensya ng mga nasabing mga terorista nang matukoy ang lokasyon ni Hapilon na target sana nilang arestuhin.

Bago pa man makalapit ang mga tropa kay Hapilon, pinaulanan na sila ng bala ng mga armadong grupo.

Itinanggi naman ng kalihim na nagkaroon ng lapses sa intelligence ng militar.

Giit nito, “appreciation of intelligence” ang kulang at medyo nagkamali ang militar. -30-