UMALMA ang grupo ng mga negosyante at consumer sa panghihimasok ng Philippine Competition Commission (PCC) sa transaksyon sa pagitan ng Globe Telecom, Philippine Long Distance Telephone Company (PLDT) at San Miguel Corp. sa pagbili ng 700 mHz band para mapabilis ang internet connection sa bansa.

Aprubado ng National Telecommunications Commission (NTC) ang nasabing kasunduan na nagresulta ng malaking kapakinabangan hindi lamang sa milyon-milyong internet users kundi maging sa negosyo tulad ng Business Process Outsourcing.

Ang 700 mHz spectrum ay dating idle asset ng SMC kaya walang nakikitang masama ang mga negosyante at consumers group sa pinasok na deal ng dalawang kumpanya.

Naging mabilis ang pag-download ng data ng internet users dahil nakapag-deploy na ng LTE cellsites mula nang mabili ito at magamit ng dalawang telcos.

Lumilitaw rin sa international studies at surveys ang malaking pagbabago sa bilis ng internet na nadoble na matapos ang transaksyon.

Nagtataka ang mga negosyante at consumer’s group kung bakit kinukuwestyon pa ng PCC ang nasabing kasunduan sa kabila nang malinaw na pagbilis ng internet sa bansa at ng pag-apruba rito ng NTC.

Anila, ang ginagawang ito ng PCC ay malinaw na pang-aagaw sa tungkulin ng NTC, Department of Information and Communications (DICT) Technology at iba pang ahensya na nagre-regulate sa telcos.

“Kung mas mabilis ngayon ang internet at nasisiyahan naman ang mga cellphone subscriber sa serbisyo ng telcos, walang dahilan para makialam ang PCC sa aprubado nang transaksyon,” ayon sa mga negosyante.

Kaugnay nito, hiniling nila sa DICT na aksyunan ang panghihimasok na ginagawa ng PCC sa transaksyon sa pagitan ng SMC, Globe at PLDT upang hindi na bumalik ang mabagal na internet sa bansa. REMATE NEWS TEAM

KAPWA pinaglalamayan ngayon ang isang mag-utol matapos pagbabarilin ang isang 43-anyos na lalaki sa mismong burol ng kanyang kapatid habang isa pa ang nasugatan kaninang umaga sa Malate, Maynila.

Namatay habang ginagamot sa Ospital ng Maynila ang biktimang si Victor Isip, may ka-live-in, walang trabaho, ng 1284 Tuazon St. cor. Arellano Ave., Malate, sanhi ng tama ng bala sa iba’t-ibang bahagi ng katawan.

Ginagamot rin sa nasabing ospital si Basilisa Tejedor, 61, ng 1243 Arellano Ave., Malate na tinamaan ng ligaw na bala.

Ititnuturo namang suspek sa pamamaril ang isang alyas “Ron-Ron”, nakasumbrero at jacket na tumakas matapos ang insidente.

Ayon kay PO3 Jorlan Taluban ng Manila Police District (MPD)-homicide section, dakong 10:00 ng umaga nang naganap ang insidente sa kanto ng Tuazon St. at Arellano Ave. sa Malate.

Nabatid na dumating ang suspek sa burol ng kapatid ng biktima subalit saglit lamang at lumabas din ito gayunman, hinanap nito ang kinaroroonan ng biktima at nang nakita na nakaupo ay nilapitan saka pinagbabaril kung saan tinamaan ng ligaw na bala si Tejedor na kanyang katabi noon.

Nang natiyak na patay na ang biktima ay kaswal na lumakad palayo ang suspek dala ang baril na ginamit.

Inaalam pa ng pulisya ang motibo sa pagpatay. JOCELYN TABANGCURA-DOMENDEN

NASAWI ang isang 42-anyos na negosyante nang pagbabarilin ng ‘di nakilalang suspek sa harapan ng kanyang auto shop sa Tondo, Maynila kagabi, Mayo 16.

Hindi na umabot nang buhay sa Ospital ng Tondo ang biktimang si Dennis Cruz, may ka-live-in, ng 2845 Juan Luna St., Tondo, Maynila sanhi ng tama ng bala sa katawan.

Inaalam pa ng pulisya ang pagkakakilanlan sa suspek na tumakas matapos ang pamamaril.

Sa report ni SPO2 Ronald Gallo ng Manila Police District (MPD)-homicide section, dakong 7:10 ng gabi nang naganap ang pamamaril sa harapan ng DC Modifier Auto Shop sa 2819 Juan Luna St., Tondo.

Sa salaysay ni Dennis Lapid, 31, stay-in helper ng auto shop, nakatayo ang biktima sa tapat ng nasabing shop nang nakarinig ng putok ng baril at nang puntahan niya ito ay nakita ang kanyang amo na duguang nakabulagta.

Isinugod pa ang biktima ng live-in partner nitong si Joney Abad subalit hindi na ito umabot nang buhay.

Inaalam pa ng pulisya kung ano ang motibo sa pagpatay. JOCELYN TABANGCURA-DOMENDEN

NIRATIPIKAHAN na ng Malaking Kapulungan ng Kongreso ang panukalang nagpapalawig sa validity ng Philippine passport.

Mula sa validity na limang taon ay gagawin nang 10-taon ang validity para sa matatanda o adult samantalang magiging limang taon naman ang validity para sa mga menor-de-edad o 17-taon pababa.

Inaamyendahan nito ang Section 10 ng Philippine passport Law.

Isa sa mga layunin nito ay mapaginhawa ang sitwasyon ng mga OFW na nasa limang taon lamang ang validity ng kanilang pasaporte at magiging ginhawa ito kung magiging ganap na batas ang hanggang sa 10 taon.

Malaki rin ang maibabawas nito sa mahabang pila sa mga kumukuha ng pasaporte sa Department of Foreign Affairs (DFA). MELIZA MALUNTAG

BAHAGI na ng official family ni Pangulong Rodrigo Roa Duterte si Senador Alan Peter Cayetano matapos na matagumpay na makalusot sa butas ng karayom ng Commission on Appointments (CA).

Opisyal nang kalihim ng Department of Foreign Affairs (DFA) si Cayetano.

“Secretary Cayetano is a welcome addition to the President’s official family,” ayon kay Presidential spokesperson Ernesto Abella.

Bilang chairman ng Senate Committee on Foreign Relations of the 17th Congress, iniakda at nagsilbing co-sponsored si Cayetano ng panukalang batas na nagpapalawig sa validity Philippine passport nang hanggang 10 taon.

Bukod pa sa siya ang nagpalabas ng resolusyon na naglalayong pagsabayin ang ratification/accession sa Articles of Agreement of the Asian Infrastructure Investment Bank (AIIB), Philippine-Japan Agreement on Social Security, at Paris Agreement on Climate Change.

“Secretary Cayetano’s experience and legal acumen shall enrich the leadership of the Department of Foreign Affairs (DFA) and promote and enhance our international relations with the countries of the world,” ani Usec. Abella.

Nauna rito, inabot lamang nang dalawang minuto ang pagsalang ni Senador Cayetano sa CA confirmation hearing at agad itong nakumpirma bilang bagong kalihim ng DFA.

Binigyan lang ng pagkakataon ni CA committee on foreign relations chirman Sen. Panfilo Ping Lacson si Cayetano na maglahad ng kanyang opening statement kung saan niya idinetalye ang kanyang mga accomplishments bilang mambabatas at public servant.

Walang miyembro ng komite ang nagtanong pa kay Cayetano at wala ding tumutol ng isulong ni Congressman Rubito Albano ang pagkumpirma sa appointment nito.

Mamayang ala-una ng hapon ay sasalang si Cayetano sa CA plenary para pagtabayin ang kanyang kumpirmasyon bilang DFA Secretary.
Ayon kay Senate Majority Leader Tito Sotto III maaari ng simulan ni Cayetano na gampanan ang bagong trabaho bilang Kalihim ng DFA. KRIS JOSE

NANAWAGAN ang Volunteers Against Crime and Corruption (VACC) at mga kaanak ng nasawing miyembro ng SAF 44 ang pagbibitiw ni Ombdusman Conchita Carpio-Morales.

Iginiit nina VACC Chairman Dante Jimenez at mga kaanak na sina Leonardo Balicdan, Felicitas Necino at Julie Danao na usad-pagong anila ang ginagawa ng Ombudsman sa kaso ng SAF 44.

Binigyang-diin ni Jimenez na huwag na sanang hintayin pa ni Carpio na siya’y ma-impeach kundi magbitiw na ito sa ngayon.

“Ombudsman Morales, wala na kaming tiwala sa iyo, mag-resign ka na. Let us stop this hypocracy,” ani Jimenez.

Mahigit ng dalawang taon (Enero 25, 2015) nang maganap ang madugong insidente na ikinasawi ng mga miyembro ng Special Action Force sa Mamasapano, Maguindanao.

Naging selective din anila si Morales nang hindi isinama si dating Pangulong Noynoy Aquino sa charge sheet kasama nina dating PNP Chief Alan Purisima at dating SAF commander Getulio Napeñas, Jr. para sa kasong graft at usurpation of public functions.

Tiniyak naman ni Atty. Ferdie Topacio na ihahain din nila ang impeachment complaint laban kay Morales na sa ngayo’y pinagsasama-sama pa nila ang mga reklamo laban sa opisyal.

Duda rin si Topacio sa pagkakaluklok kay Morales matapos i-impeach si dating Ombudsman Mercidita Gutierez na talagang plinano upang maproteksyunan si PNoy kahit nakatapos na ito sa kanyang termino. MELIZA MALUNTAG

SINIMULAN na ngayong araw ang implementasyon ng Anti-Distracted Driving Act.

Sa ilalim ng naturang batas, huhulihin na ng mga awtoridad ang sinomang mapapatunayang gumagamit ng kanilang mga cellphone o anomang uri ng gadget habang nagmamaneho.

Bukod sa mga kotse, damay din sa naturang kautusan ang driver ng mga karetela, motorsiklo, pedicab at iba pa.

Sakaling mahuli, posibleng mapatawan ng penalty ang mga driver na lumabag sa naturang batas o ‘di kaya’y tuluyang matanggalan ng lisensya.

Payo ng LTO sa mga driver na gumagamit ng mga cellphone at iba pang gadgets habang nagmamaneho, kailangang itabi muna ang mga sasakyan bago silipin ang kanilang mga mensahe sa cellphone.

Ito aniya’y upang mapanatiling naka-focus sa pagmamaneho ang mga motorista.

Payo naman ng MMDA sa mga driver ng Uber o Grab na kalimitang gumagamit ng mga cellphone sa kanilang pagkuha ng mga pasahero, dapat ay alamin muna ng mga ito ang ruta na kanilang dadaanan bago tuluyang paandarin ang sasakyan.

Maaari ring gamitin ang hands-free function ng mga gadgets upang hindi mapatawan ng penalty ang mga motorista sa ilalim ng batas. JOHNNY ARASGA

TIMBOG ang isang Chinese national matapos mahulihan ng mahigit P8-milyong halaga ng shabu sa ikinasang buy-bust operation sa Pasay City.

Sa pinagsanib na puwersa ng PDEA-NCR at Manila Police District Station 9, nalambat si Nico Sy alyas ‘Davidson’, na nagpakilalalang isang negosyante na nagbebenta ng kahoy sa Davao.

Ayon kay PDEA-NCR Director Wilkins Villanueva, nagsimula ang kanilang operasyon sa isang mall sa Malate, pero nagduda ang suspek dahilan para dalhin sila sa isang casino sa Pasay City.

Dito na bumili ang operatiba ng isang kilong shabu mula sa suspek sa halagang P1-milyon.

Nang maaresto na, nakuha rin sa kamay ng suspek ang humigit-kumulang dalawang kilo ng shabu na nagkakahalaga ng P8-milyon.

Depensa naman ng suspek, hindi sa kanya ang nakuhang iligal na droga at sinet-up lamang siya.

Ayon kay Villanueva, miyembro ang nahuling suspek ng kilabot na Chinese drug syndicate na nagdi-distribute ng droga sa Metro Manila.

Nahaharap ang suspek sa kasong paglabag sa Republic Act 9165 o Comprehensive Dangerous Drugs Act of 2002. JOHNNY ARASGA

PINAG-IISIPAN na ng China at Pilipinas na magkaroon ng palitan ng mga preso o ‘exchange of prisoners’ sa pagitan ng dalawang bansa.

Ayon kay Philippine Ambassador to China Jose Santiago Sta. Romana, nagkaroon na ng diskusyon sa usapin ng palitan ng mga drug convict upang sa kanilang sariling bansa na makulong ang mga ito.

Sa ngayon aniya, may 190 mga Pinoy ang nakakulong sa iba’t ibang bilangguan sa China.

Dalawa sa mga Pinoy na ito’y nakahanay sa death row, ayon kay Sta. Romana.

Gayundin, mayroon rin naman aniyang mga Chinese na nakakulong ngayon sa Pilipinas.

Gayunman, nilinaw ni Sta. Romana na magiging case-to-case basis at hindi maramihang palitan ng mga preso ang mangyayari kung maaaprubahan ang panukala. JOHNNY ARASGA

SIMULA bukas, Mayo 19, huhulihin na ng Land Transportation Office (LTO) at iba pang law enforcement agencies ang mga motorcycle rider na nag-aangkas ng mga bata nang hindi sumusunod sa regulasyon.

Alinsunod ito sa Republic Act Number 10666 o mas kilala bilang “Children’s Safety on Motorcycles Act of 2015”

Sa ilalim ng R.A. 10666, bawal nang sumakay sa mga motorsiklo ang mga batang 18-taong gulang pababa, lalo’t kung hindi abot ng kanilang mga paa sa foot peg ng motorsiklo.

Hindi na rin sila papayagang umangkas sa anomang uri ng two-wheeled vehicle kundi pa nila kayang humawak sa bewang ng nagmamaneho.

Exempted naman dito ang mga motorcycle rider na may angkas na bata kung may emergency.

Ang R.A. 10666 ay pinirmahan ni dating Pangulong Noynoy Aquino noong July 21, 2015. JOHNNY ARASGA

BINIGYAN ng puwesto sa gobyerno ni Pangulong Rodrigo Duterte ang mga kilalang personalidad at mga dating politiko sa mga nakalipas na administrasyon.

Kabilang sa mga ito ang negosyanteng si Dante Ang na itinalagang Special Envoy of the President for International Public Relations sa ilalim ng Department of Foreign Affairs (DFA), dating Senador Edgardo Angara bilang Special Envoy of the President to the European Union, at Junn Magno bilang member, Board of Directors ng Philippine National Railways (PNR).

Nabigyan din ng puwesto sa gobyerno si Ranjit Shahani, dating Pangasinan Congressman at pamangkin ni dating Pangulong Fidel Ramos, bilang member, Board of Directors ng Manila Economic and Cultural Office.

Si dating House Speaker Jose de Venecia, Jr. naman ay hinirang bilang Special Envoy of the President for APEC, taliwas sa naunang napaulat na Special Envoy for Inter-Cultural Dialogue, habang si Brian Patrick Gordon, anak ni Senador Richard Gordon ay Member, Board of Directors ng Subic Bay Metropolitan Authority (SBMA).

Maging ang kontrobersiyal na pulis-Davao na si P/C Supt. Vicente Danao, Jr. ay itinalagang Commander ng National Anti-Illegal Drugs Task Force, CIDG.

Matatandaang si Danao ay nakunan ng video na nag-viral sa social media habang sinasaktan ang kanyang asawa. JOHNNY ARASGA

LABRADOR, PANGASINAN – Kritikal ang pitong katao kabilang ang isang tatlong-taong gulang na batang lalaki at isang-buwang gulang na sanggol matapos magbanggan ang dalawang motorsiklo sa bayan ng Labrador sa nasabing lalawigan kahapon ng umaga, May 17.

Nagtamo ng mga iba’t ibang sugat sa katawan sina Manuel Marayag, 41, asawa nitong si Ginalyn, 31, at mga anak nitong sina Ethen Dominic, 3, Sofia Jenine, one-month-old, ng Brgy. Paitan East, Sual, Pangasinan.

Samantala, ang mga nakabanggaan nito na pareho ring nasugatan ay nakilalang sina Jayson Olarte, 30, at mga backride na sina Rommel Olarte at Lailanie Betonio, pawang mga taga-Caoayan, Sual sa nasabing lalawigan.

Sa paunang imbestigasyon, papunta ang mga biktima sa Uyong, Labrador nang maganap ang banggaan.

Sa malakas ng pagkakasapok, tumilapon ang mga biktima at sa kabutihang-palad ay wala namang namatay sa insidente.

Ayon sa Labrado police, walang safety gear ang mga biktima kung kaya’t patuloy ang ginagawang imbestigasyon upang malaman kung sino ang dapat managot sa aksidente. ALLAN BERGONIA

KINUMPIRMA ni European Union Ambassador to the Philippines Franz Jessen na nag-abiso na ang Pilipinas na hindi na ito tatanggap ng ayuda mula sa EU.

Tinatayang umaabot sa 300-million euros (€) o P16.6-bilyong halaga ng grant’ ang inilaan ng EU para sa Pilipinas na tatagal sana nang hanggang 2020.

Karamihan sa mga proyektong paglalaanan sana ng naturang mga ayuda ay nakatuon sa pagtulong para sa Mindanao Peace and development projects.

Sa pagitan ng 2007 – 2013, nakatanggap ng €130-milyon ang Pilipinas bilang development assistance mula sa 28-country regional bloc.

Matatandaang makailang ulit na binatikos ni Pangulong Rodrigo Duterte ang EU at Amerika noon dahil sa pakikialam umano sa kanyang kampanya kontra-droga.

Una na ring hinamon ni Duterte ang EU na bawiin ang mga tulong na ibinibigay nito sa Pilipinas.

Matapos ang deklarasyon ng ‘independent foreign policy’ at mga banat nito sa EU at Amerika, dumulog naman si Duterte sa China. -30-

BILANG paghahanda sa darating na Ramadan ay ipinag-utos ni Manila Mayor Joseph Estrada na magpatupad ng “foolproof” o walang palyang security arrangements sa Muslim community sa Quiapo.

Ayon kay Estrada, inatasan na niya ang Manila Police District (MPD) na paigtingin pa lalo ang seguridad sa Quiapo Golden Mosque at iba pang Islamic cultural centers sa lungsod.

Anang alkalde, ang pagpapatupad ng foolproof security arrangement ay upang hindi na maulit pa ang naganap na sunod-sunod na pagsabog sa Quiapo area.

“With the assistance of our Muslim community and religious leaders, the public is assured of security during Ramadan, particularly our Muslim brothers and sisters,” pagtitiyak ni Estrada.

Naniniwala ang pulisya na isang Muslim cleric na kinilalang si Nasser Abinal, na isa ring tax officer sa Bureau of Internal Revenue (BIR), ang target ng pambobomba nitong Mayo 6 kung saan namatay ang nagdeliber ng nasabing bomba at isang tauhan ni Abinal na tumanggap nito.

Ayon kay MPD director C/Supt. Joel Coronel, 425 pulis ang ipapakalat nila sa lungsod, karamihan sa Quiapo at sa Islamic Center.

Maglalagay din aniya ng mga special checkpoint at dadamihan pa ang mga foot at mobile patrols sa buong isang buwan ng pag-oobserba ng Ramadan.

Kahit wala namang malalaking pag-atake ng mga terorista sa Pilipinas, at maging sa Maynila, sa panahon ng Ramadan, nakikipag-ugnayan pa rin anila sila sa iba’t ibang national government intelligence agencies upang mapigilan ang mga bantang ito. JOCELYN TABANGCURA-DOMENDEN

TODAS ang isang 59-anyos na lalaki nang pagbabarilin ng riding-in -tandem sa gitna ng inuman kagabi sa Tondo, Maynila.

Kinilala ang biktimang si Dophy Rito, alyas ‘Nestor,’ walang hanapbuhay, ng 831 Linampas St., Dagupan, Tondo habang inaalam pa ng pulisya ang pagkakakilanlan ng dalawang suspek na mabilis na tumakas matapos ang krimen.

Sa ulat ni SPO1 Charles John Duran, ng Manila Police District (MPD)-homicide section, nabatid na dakong 10:45 ng gabi nang maganap ang krimen sa Linampas St., Tondo.

Nakikipag-inuman ang biktima sa kanyang mga kaibigan nang bigla na lang itong lapitan ng isa sa mga suspek at apat na ulit na pinaputukan sa iba’t ibang bahagi ng katawan.

Isinugod pa sa Metropolitan Medical Center ang biktima ngunit nasawi rin habang nilalapatan ng lunas dakong 11:37 ng gabi.

Bago isinagawa ang pamamaril ay ilang ulit pa umanong napuna ng mga residente na paikot-ikot at tila may hinahanap sa lugar ang mga suspek, na tinutugis na ngayon ng mga awtoridad upang papanagutin sa pagpatay. JOCELYN TABANGCURA-DOMENDEN

TUMIMBUWANG sa drug buy-bust operation ang isang sundalo habang sugatan naman ang isang pulis sa Koronadal City, South Cotabato nitong Miyerkules ng gabi.

Sinabi ni Anti-Drug Abuse Council action officer na si Gloria Sandig, nakilala ang napatay na si Private First Class Richie Librado, 41, ng Brgy. ML Quezon at miyembro ng 33rd Infantry Battalion.

Sugatan naman sa kanang hita at nagpapagaling na lang sa ospital ang biktimang si S/Insp. Ramil Aurello ng Koronadal City PNP.

Tatlo namang suspek na pinaniniwalaang sabog pa sa ipinagbabawal na gamit ang naaresto at kinilalang sina Herbert Deloso, 32 at Ericson Ligaya, 27, kapwa ng Brgy. San Jose; at Ronald Antay, 42, ng Brgy. Esperanza, Koronadal City.

Nakumpiska sa tatlong suspek ang apat na sachet ng shabu at paraphernalia, isang homemade 12 gauge shotgun at isang homemade .45-pistol.

Naganap ang insidente dakong 8 p.m. sa Brgy. San Jose, Koronadal City.

Sa imbestigasyon, nahuli sa aktong humihithit ng shabu ang mga suspek sa naturang lugar.

Pero imbes sumuko, pinaputukan ni Librado ang mga operatiba pero sa pagganti ay tinamaan ang suspek.

Sinabi ni Sandig na ang pagsalakay ay isinagawa matapos magpanggap ang isang operatiba na buyer at makabili ng shabu sa mga suspek. BOBBY TICZON

ISANG Filipino pilot sa dalawang namatay sa bumagsak na maliit na eroplano sa New Jersey.

Kinilala ang namatay na biktima na si Jeffrey Alino, talumpu’t tatlong taong gulang habang inaalam pa ang pagkakakilanlan ng isa pang kasamahan nito na namatay sa aksidente.

Lumalabas sa inisyal na imbestigasyon na sinusubukang lumapag nina Alino sa Teterboro airport ngunit bumagsak ito sa isang parking lot sa di kalayuan ng paliparan.

Aabot sa tatlong gusali at labing tatlong sasakyan ang napinsala sa naturang plane crash ngunit wala namang naitalang nasugatan sa insidente.

Hindi pa batid sa ngayon ang sanhi ng pagbagsak ng eroplano. JOHNNY ARASGA

IPINAHAYAG ni Presidential Spokesperson Ernesto Abella na pinirmahan na ng Pangulong Rodrigo Duterte ang Executive Order (EO) kaugnay ng nationwide smoking ban.

Ang EO 26, “Providing for the Establishment of Smoke-free Environments in Public and Enclosed Places” ay pinirmahan umano ng pangulo noong Mayo 16 na mahigpit na ipagbabawal ang paninigarilyo sa mga pampublikong lugar.

Ito rin ang inihayag ni Health Sec. Paulyn Ubial at Executive Sec. Salvador Medialdea.

“He signed it May 16 but we got (a) copy only today. We are happy! It’s really comprehensive and (the designated smoking areas) are very strict,” wika ni Ubial.

Kasunod nito, asahan naman umano ang pagpapalabas ng kopya ng EO.

Ang EO ay ibinase sa Davao City smoking ban na ipinatupad ni Pangulong Duterte noong alkalde pa ito ng naturang lungsod.

NANGISAY hanggang sa mamatay ang isang lalaki matapos tamaan ng kidlat habang nagpapakain ng mga pato sa Tabaco City, Albay kahapon.

Kinilala ni Supt. Vincent Camero ng Tabaco City police ang biktima na si Antonio Oropesa na isang residente ng Brgy. Napo sa bayan ng Polangui.

Tinamaan siya ng kidlat habang nasa Brgy, Pawa, at natagpuan na lamang ng mga tanod na sina Teofilo Arenal at Domingo Serrana ang sunog nang katawan ni Oropesa.

Isinugod pa ng mga rumespondeng bumbero si Oropesa sa Ziga Memorial District Hospital, ngunit idineklara din itong dead on arrival.

NANANATILI pa rin si Sen. Cynthia Villar na pinakamayaman sa hanay ng mga senador.

Base sa isinumite nilang Statement of Assets, Liabilities and Net Worth o SALN , nasa 3.6 bilyong piso ang net worth ni Villar at wala siyang utang para sa taong 2016.

Noong nakaraang taon, ang idineklarang net worth para sa taong 2015 ni Villar ay mahigit P3.5 billion.

Samantala, si Sen. Antonio Trillanes IV naman ang lumalabas na pinakamahirap sa idineklara niyang net worth na P6.5 million.

Nabatid na P16 million ang idineklarang total assets ni Trillanes ngunit nasa P9.5 million ang utang nito sa housing loan, car loan at personal loans.

Sumunod naman kay Villar sa usapin ng yaman at isa ring bilyonaryo ay ang neophyte senator, ang pambansang kamao na si Manny Pacquiao na may net worth na mahigit P3.072 billion pesos.

Sinundan sila sa ikatlong posisyon ni Sen. Ralph Recto na may net worth na mahigit P522 million.

Pang-apat sa pinakamayamang senador si Sen. Sonny Angara na may net worth na mahigit P123 million at pumasok sa top 5 si Sen. Migs Zubiri na may deklarasyong net worth na mahigit 121 million pesos.

Pang-anim si Sen. Win Gatchalian na may net worth na P92.1 million.

Narito ang iba pang net woth ng mga senador batay sa kanilang SALN:

7. Sen Grace Poe – P88.4 million

8. Senate Minority Leader Frank Drilon – P82.4 million

9. Sen. JV Ejercito – P79.1 million

10. Sen. Richard Gordon – P66.9 million

11. Senate Majority Leader Tito Sotto – P63.8 million

12. Sen. Nancy Binay – P60.4 million

13. Sen. Loren Legarda – P40.9 million

14. Sen Ping Lacson – P38.7 million

15. Sen. Bam Aquino – P33.8 million

16. Sen. Alan Peter Cayetano – P24 .1 million

17. Sen. Joel Villanueva – P21.5 million

18. Sen Gringo Honasan – P21.2 million

19. Senate President Koko Pimentel – P17.7 million

20. Sen. Risa Hontiveros – P16.3 million

21. Sen. Kiko Pangilinan – P9.2 million

22. Sen.Leila de Lima – P6.6 million at;

at ang pang – 23 noong nakaraang taon at ang pinakamahirap noon 2015 ay si Sen. Chiz Escudero na nagdeklara ng net worth na P6.6 million pesos. JOHNNY ARASGA