SINIBAK ngayon ni Manila Mayor Joseph Estrada ang limang miyembro ng Manila Traffic and Parking Bureau (MTPB) na nagpositibo sa paggamit ng droga.

Sina Rommel Santos, 40; Randy Luangco, 28; Marcelo Tinao, 39; John Lennon Dalisay, 27; at Enrico Dalisay, 39, ay bahagi ng 240 MTPB enforcers na sumailalim sa surprise drug test nitong Abril 24.

Base sa drug test report na nilabas ng ACC Drug Testing Center sa Ermita na accredited ng Department of Health (DOH) at nagpositibo sa ipinagbabawal na droga.

Ang ACC ang nagsagawa ng confirmatory tests sa limang enforcers matapos inisyal na magpositibo sa paggamit ng pinagbabawal na droga.

Binalaan naman ni Estrada na patuloy niyang babantayan ang mga kilos nito dahil lahat aniya ng kanilang kilos ang inire-report sa kanya.

Ito aniya ay dahil ayaw na nitong maulit pa ang nakaraan kung saan nasibak noong Nobyembre ang lahat ng 690 traffic enforcers ng MTPB dahil sa tambak na reklamo ng pangongotong sa mga motorista.

Ayon naman kay MTPB director Dennis Alcoreza, ang limang sinibak ay pawang mga job order lamang at wala silang matatanggap na kahit ano mula sa pamahalaang lungsod.

“Wala na silang employment dito sa city hall,” ani Alcoreza. “This constitutes a violation of their work contracts.”

Para sa mga nagnegatibo naman, bawat isa sa kanila ay makakatanggap ng certificate na pirmado ni Estrada na nagpapatunay na sila’y ‘100 percent clean’, dagdag ni Alcoreza.

Sinabi pa ni Estrada na magpapatuloy pa rin ang kanilang random drug test kahit pa nag-negative na ang mga nabanggit na enforcers.

Mandatory na rin aniya ang drug test sa lahat ng aplikante sa MTPB.

Nitong Agosto 8 ay pinangunahan ni Estrada ang 36 miyembro ng Sangguniang Panlungsod, kabilang na si Vice Mayor Honey Lacuna, sa pagpapasailalim sa drug test. JOCELYN TABANGCURA-DOMENDEN

PATAY ang isang padre-de-pamilya matapos tagain ng menor-de-edad na anak sa bayan ng Baggao, Cagayan

 Kinilala ang biktima na si Sorete Romero, 43-anyos at residente ng Brgy. Sta Margarita.

 Ayon kay SPO2 Glenda Geron, imbestigador ng kaso, nadatnan ng 16-anyos na suspek ang amang kasalukuyang sinasaktan ang nakakabatang kapatid.

 Dito, kinuha ng suspek ang itak at saka pinagtataga ang ama.

 Nabatid na lagi umanong sinasaktan ng biktima ang asawa at anak sa tuwing malalasing.

 Sa ngayon, nasa pangangalaga na ng Department of Social Welfare and Development (DSWD) ang nasabing menor-de-edad na suspek.   JOHNNY ARASGA

NAILIPAT na ng kulungan ang tinaguriang ‘pork barrel scam queen’ na si Janet Lim-Napoles.

Mula sa Correctional Institute for Women sa Mandaluyong City, ibiniyahe si Napoles papunta sa Bureau of Jail Management and Penology detention facility sa loob ng Camp Bagong Diwa sa Taguig.

Dakong 4:32 ng madaling-araw nang dumating ang convoy ni Napoles dito sa Camp Bagong Diwa, patungo sa BJMP female dormitory.

Eksakto 4:42 ng umaga nang makapasok si Napoles sa gate ng Taguig City Male Dorm kung saan may daan patungo sa female dorm at reception area.

Nakasuot si Napoles ng bullcap at kulay puting jacket.

Bantay-sarado si Janet Lim-Napoles ng mga miyembro ng SWAT at Bureau of Corrections, at maging mga miyembro ng media ay pinagbawalang makalapit sa sinasakyang ambulansya ni Napoles.

Matatandaang ipinag-utos ng Sandiganbayan First at Third Division ang agarang paglilipat ng kustodiya ni Napoles sa BJMP.

Tinabla ng anti-graft court ang hiling ni Napoles na mailipat ang kanyang kustodiya sa ilalim ng National Bureau of Investigation (NBI) dahil sa umano’y mga banta sa kanyang buhay.

Batay sa ruling, ang isang akusado, tulad ni Napoles ay dapat ilipat kaagad sa pinakamalapit na city jail.

Paliwanag ni Presiding Justice Amparo Cabotaje-Tang, sa ilalim ng Republic Act 6975, mandato ng BJMP ang mangalaga sa kustodiya ng mga akusado na pending pa ang kaso sa korte.

May 8 nang magpalabas ng desisyon ang Court of Appeals na nagbabaliktad sa naunang hatol na ‘guilty’ ng Makati RTC para sa kasong serious illegal detention kay Benhur Luy.

Bagama’t napawalang-sala na si Napoles sa kasong illegal detention, mayroon pa rin siyang kinakaharap na patung-patong na kaso ng plunder sa Sandiganbayan dahil sa pagkakasangkot niya sa diumano’y maanomalyang paggamit ng pork barrel nina Senators Bong Revilla, Jinggoy Estrada at Juan Ponce Enrile. JOHNNY ARASGA

MALINIS na sa pamamayagpag ng rebeldeng Abu Sayyaf ang lalawigan ng Bohol.

Ito ang ipinagmalaki ng Armed Forces of the Philippines (AFP) makaraang mapatay sa magkasunod na pursuit operations ang dalawa pang Abu Sayyaf na tinutugis ng mga awtoridad sa lalawigan simula pa noong nakaraang buwan.

Ayon kay AFP Spokesman Brig. Gen. Restituto Padilla, napatay sa unang engkwentro ang suspek na nakilala sa pangalang Abu Asis.

Si Asis ay napatay sa Bgy. Lawis, Pangangan island sa bayan ng Calape habang nakatakas pa ang kasamahan nito na nakilala sa pangalang Abu Ubayda.

Gayunman, makalipas ang ilang minutong habulan, napatay rin si Ubayda may isandaang metro mula sa unang encounter site.

Nasukol umano ang mga bandido makaraang i-hostage nito ang isang mag-lolo na hinihingian nito ng pagkain sa Brgy. Kahayag.

Matatandaang nasa 11 Abu Sayyaf ang pumasok sa lalawigan ng Bohol noong Abril upang dumukot ng ilang mga turista sa lalawigan. JOHNNY ARASGA

BALAK ngayon ni Magdalo Party-list Rep. Gary Alejano na idulog sa International Criminal Court (ICC) ang naibasurang impeachment case laban kay Pangulong Duterte.

Sinabi ng kongresista, kokunsultahin niya ang kanyang mga kasamahan sa Magdalo Party-list hinggil sa usapin na ito.

Iginiit ni Alejano na dapat daw mapanagot si Pangulong Duterte kaugnay sa mga nilabag nito sa batas.

Magugunitang una na ring naghain ng kaso sa ICC si Atty. Jude Sabio laban sa pangulo.

Samantala, aminado si Alejano na masama ang kanyang loob dahil hindi raw siya binigyan ng pagkakataon na magsalita at patunayan ang kanyang mga alegasyon laban sa presidente.

Maliban dito, iginiit ni Alejano na nainsulto rin siya matapos sabihin ng ilang kapwa niya kongresista na hindi naman siya abogado.

Una rito, bomoto ang 42 mga miyembro ng komite na dumalo para sa pagdeklarang sufficient in form ang impeachment complaint, subalit ang nasabi ring bilang ang bumoto na kulang ito sa sustansiya na siyang tuluyang nagbasura sa reklamo ni Alejano. JOHNNY ARASGA

LUSOT na sa House Committee on Appropriations ang inamiyendahang Tax Reform Bill.

Sinabi ni Davao City Rep. Karlo Alexei Nograles na aprubado sa komite ang mga probisyon para ponduhan ang substitute bill sa Tax Reform for Acceleration and Inclusion (TRAIN) upang tukuyin ang paglalaanan ng dagdag na buwis mula sa panukalang reporma sa buwis.

Ang substitute bill ay pinag-isa mula sa may 55 panukala at tinawag na “Earmarking of Incremental Revenues from the TRAIN Act.”

Dito ay nakasaad na sa loob ng tatlong taon ay hindi dapat lumampas sa 40 porsiyento ang taunang dagdag buwis na makukuha mula sa petroleum excise tax sa ilalim ng Section 21 ng batas.

Ang kikitain dito ay ilalaan para sa Social Benefits Program kung saan ang mga kwalipikadong benepisaryo ay bibigyan ng Social Benefit Card.

Kukunin din sa dagdag-buwis na ito ang fuel vouchers sa kwalipikadong prangkisa ng transportasyon.

Nakapaloob sa panukala na pangangasiwaan ng isang inter-agency committee ang implementasyon sa programa sa pangunguna ng Department of Finance (DOF), at binubuo ng Department of Social Welfare and Development (DSWD), Department of Education (DepEd), Department of Transportation (DOTr), Department of Energy (DOE), Department of Budget and Management (DBM) at ng National Economic and Development Authority (NEDA).

Bibigyan din ng alokasyon ang inprastraktura, pangkalusugan, edukasyon at gastusin sa social protection benefits mula naman sa natitirang taunang dagdag-buwis.

Inaprubahan din ng komite ang probisyon na ang 50 porsiyento ng koleksyon sa buwis mula sa P10 per liter excise tax sa sugar sweetened beverages (SSB) ay mapupunta sa General Fund (GF).

Ang 50 porsiyento ng koleksyon sa buwis mula sa SSB excise tax ay ilalaan sa mga programang prayoridad para sa gobyerno samantalang ang natitirang 15 porsyento ay para sa mga magsasaka ng asukal. MELIZA MALUNTAG

BUREAU of Customs (BOC) authorities on Tuesday foiled an attempt to smuggle two handguns concealed inside electric water heaters.

The guns, Armscor Philippines .45 Caliber and 9mm, were seized at the Thomas Nationwide Transportation Warehouse in Pasay City that according to Customs, the guns were about to be shipped to neighboring Vietnam and Hong Kong, China.

Maj. Jaybee Cometa, head of X-ray Inspection Project, and Customs District III Collector Ed Macabeo said that a 21-year-old employee identified as Alfonso Martin V. Sanchez was arrested when he tried to check the status of the shipment.

Macabeo said Sanchez, a resident of Caloocan City has inquired “about the status of two outbound parcels stored in a Pasay warehouse bound for Vietnam and Hong Kong. When the boxes were opened, agents found a lower receiver 9mm pistol and a lower receiver of .45 pistol with empty magazine.”

But when Customs authorities asked for legal papers prior to exportation of the two guns, Sanchez failed to produce the required documents from the Philippine National Police.

Charges were filed against the suspect before the Pasay city Prosecutors Office for violation of Republic Act 10863, or the customs Modernization and Tariff Act of 2016, and RA 10591, or the Comprehensive Firearms and Ammunition Regulation Act.

According to Customs agent Babe Calixto, the suspect has been coordinating with the authorities to divulge of who was behind the gun smuggling. BENJIE VERGARA

BUMULAGTA sa paniniktik ang isang pulis matapos itong pagbabarilin ng armadong lalaki na kabilang sa drug syndicate sa Batangas town kaninang Martes ng madaling-araw.

Namatay habang ginagamot sa Balayan Bayview Hospital sanhi ng tama ng bala sa iba’t ibang bahagi ng katawan ang biktimang si PO3 Brian de Jesus, miyembro ng Balayan police.

Anim namang mga sibilyan na hindi nakuha ang mga pangalan ang nasugatan matapos tamaan ng ligaw na bala.

Hinahanting na ngayon ng pulisya ang salarin na pinaniniwalaang miyembro ng drug syndicate na tinitiktikan ni De Jesus.

Sa ulat, naganap ang insidente dakong 1:30 a.m. sa isang basketball court sa Brgy. Sampaga, Balayan.

Bago ito, nabatid na may tumutugtog na banda sa lugar at isa ang biktima at kasama nitong police asset ang nakihalubilo sa mga tao para tiktikan ang mga miyebro ng drug syndicate.

Pero maya-maya lamang ay biglang umalingawngaw ang sunod-sunod na putok at nakitang bumulagta ang biktima at anim na sibilyan sa basketball court.

Matagal na aniyang tinatrabaho ni De Jesus ang pagkakasangkot sa bentahan ng iligal na droga ng naturang drug syndicate. BOBBY TICZON

ISANG 33-anyos na helper ang nahahrap sa kasong murder matapos pagasaksakin at mapatay ang kasamahan nito kaninang madaling-araw sa loob ng palengke sa Malabon City.

Si Bryan Layan, helper ng Aida & Jr. fresh chicken shop ay kusang sumuko sa pulisya matapos nitong mapatay ang biktimang si Reynaldo Balsabal, 27, helper ng Vergie’s fresh dress chicken shop sa loob ng Malabon Public Market sa F. Sevilla St., Brgy. Tañong.

Sa ulat, bago ang insidente, nag-inuman pa ang biktima at suspek sa loob ng katayan pasado alas-10:30 Linggo ng gabi nang mauwi sa pagtatalo ang kanilang biruan.

Dito na sila nagsimulang magsuntukan kung saan natalo ang suspek hanggang sa tumigil na sila at itinuloy ang naiwang trabaho.

Pasado alas-2:30 kahapon ng madaling-araw, nagkakatay ng manok si Balsabal ngunit lingid sa kaalaman nito ay galit na galit pa rin si Layan na noo’y armado ng butcher knife at agad siyang sinaksak sa tiyan.

Sa kabila ng tinamong saksak, nagawa pang makatakbo ni Balsabal subalit sinaksak ulit ito ng suspek sa dibdib na ikinamatay na nito. ROGER PANIZAL

PATAY ang isang pulis-Maynila matapos pagbabarilin ng hindi nakilalang suspek kagabi sa Paco, Maynila.

Kinilala ang biktimang si PO2 Abdul Jabbar Alonto, nakatalaga sa District Intelligence Division ng Manila Police District (DID-MPD).

Sa imbestigasyon, binabagtas ni Alonto ang Penafrancia St. sa kanto ng San Gregorio St. sa Paco sakay ng kanyang berdeng kotse nang pagbabarilin ng suspek alas-6:00 ng gabi.

Ayon naman kay Spokesperson Col. Erwin Margarejo, nangangalap pa ang pamunuan ng MPD ng mga impormasyon maging ang mga kuha ng CCTV sa lugar upang makatulong sa imbestigasyon.

Hindi pa batid aniya ang motibo ng pamamaril kung saan dalawang tama ng bala ang tumapos sa buhay ni Alonto. JOCELYN TABANGCURA-DOMENDEN

TINUTUTUKAN ngayon ng Department of Public Works and Highways (DPWH) ang pagpapalawak ng mga kalsada upang masolusyonan ang decongestion na nararanasan ng mga motoristang gumagamit ng Commonwealth Ave. sa Quezon City.

Ayon kay DPWH-NCR Director Melvin Navarro, magkakaroon ng karagdagang tatlong lanes sa kahabaan ng Commonwealth Ave., partikular sa Zuzuarueggi St. hanggang sa Vila Beatriz St.

Tinatayang aabot sa P41-milyon ang halaga ang proyekto, kasama na rin ang pagpapagawa ng sidewalk para sa mga pedestrian.

Sa kasalukuyan, ayon kay Navarro ay nasa 90 porsyento nang kumpleto ang naturang proyekto.

Nakikipag-ugnayan na rin aniya sila sa iba pang ahensya ng pamahalaan upang mailipat sa Bulacan ang mga informal settler na naninirahan sa naturang kalsada. -30-

ISANG 11-anyos na lalaki ang nalunod habang naliligo sa dagat kasama ang mga kaibigan nitong Lunes ng hapon, May 15, sa Navotas City.

Kinilala ni Navotas PO3 Allan Joey Ogatia III ang biktimang si Sean Raven Tanawan, Grade 6 pupil ng Tanza Elementary School, taga-614 Bicol Area, Brgy. Tanza.

Sa ulat, pasado alas-11:45 ng umaga, hinahanap ang biktima ng kanyang ama na si Rodelio Tanawan, 40, nang lumapit sa kanya ang isa pang anak na si Sam at sinabing natagpuang walang malay si Sean sa dalampasigan sa kanilang lugar.

Kaagad pinuntahan ng ama ang biktima at mabilis na isinugod sa Quinto Medical Clinic subalit hindi na rin ito umabot nang buhay dakong 12:15 ng tanghali.

Nabatid na bago ang insidente, kasama ng biktima ang kanyang mga kaibigan na maligo sa dagat subalit bigla na lamang itong nawala kaya agad ipinaalam ng mga kaibigan nito sa ama ni Sean. ROGER PANIZAL

KAPWA patay nang matagpuan sa magkahiwalay na lugar ang isang magka-live-in matapos puwersahang dukutin ng mga nakamasakarang suspek na nagpakilala umanong mga pulis sa Navotas City kagabi, Martes.

Positibong kinilala ni Kristine Jugadora ang kanyang ina na si Jenny Royo, 45, at kanyang stepfather na si Rogelio Gilbuena, 56, kapwa ng Market 3, Navotas Fishport Complex, Brgy. North Bay Boulevard North (NBBN).

Sa imbestigasyon nina PO3 Joemir Juhan at PO1 June Paolo Apelido, unang natagpuan ang bangkay ni Jenny sa Babanse St., Brgy. NBBS dakong 10:40 ng gabi.

May mga tama ng bala sa iba’t-ibang parte ng katawan ang biktima at narekober ng mga tauhan ng NPD-CLO sa pinangyarihan ang apat na basyo ng bala ng hindi pa matukoy na kalibre ng baril, ilang alahas at pera ni Jenny na nakasuksok sa kanyang bra.

Makalipas ang mahigit isang oras, natagpuan naman ang bangkay ni Rogelio sa loob ng Navotas Municipal Cemetery sa Gov. Pascual St., Brgy. San Jose dakong 11:34 ng gabi kung saan may mga tama rin ito ng bala sa ulo habang tatlong basyo ng bala ang narekober sa crime scene.

Ayon sa mga anak ng biktima, dakong 8:00 ng gabi nang puwersahang dukutin sa kanilang bahay ng nasa 10 armadong kalalakihan ang live-in partner at dadalhin daw sa presinto.

Aminado naman ang mga anak na dating gumagamit ng droga si Jenny pero tumigil na ito habang si Rogelio naman ay wala umanong bisyo.
Inaalam pa ng pulisya kung may kaugnayan sa iligal na droga ang motibo sa insidente at ang pagkakilanlan ng mga suspek. ROGER PANIZAL

TODAS ang sinasabing isang notoryus na tulak nang tangkaing makipagbarilan sa mga pulis na nagsasagawa ng Oplan Galugad kaninang umaga, May 17, sa Navotas City.

Ayon kay Navotas police chief S/Supt. Dante Novicio, dakong 5:10 ng umaga, nagsasagawa ng Oplan Galugad ang mga pulis sa kahabaan ng Road 10, Sitio Sto. Niño, Brgy. North Bay Boulevard South (NBBS) nang mapansin ng mga ito si Raymond Bandilla na kilalang notoryus drug pusher sa naturang lugar.

Nang lapitan ng mga operatiba ang suspek ay bigla na lamang itong naglabas ng improvised 12-gauge shotgun at tinangka silang putukan kaya inunahan na itong binaril ng mga pulis.

Dead-on-the-spot ang suspek sanhi ng tama ng bala sa katawan at narekober sa kanya ang improvised shotgun na kargado ng bala ng 12 gauge at 11 sachet ng hindi pa matukoy na halaga ng shabu. ROGER PANIZAL

PATAY ang isang lider ng carnapping group ng mga motorsiklo na sangkot din sa iligal na droga matapos makipagbarilan sa mga pulis habang arestado naman ang tatlong kasama nito sa ikinasang buy-bust operation sa Caloocan City kagabi, Martes.

Ayon kay Caloocan police chief S/Supt. Chito Bersaluna, dakong 8:10 ng gabi nang ikasa ng mga tauhan ng North Extension Office Drug Enforcement Unit (NEO-DEU) sa pangunguna ni Insp. Calixto Manjares ang buy-bust operation kontra kay Armando Navera, 37, sa harap ng kanyang bahay sa 695 NPC Rd., Brgy. 166, Caybiga.

Natunugan ng suspek na pulis ang kanyang katransaksyon kaya agad itong naglabas ng baril at pinaputukan ang poseur buyer subalit hindi ito tinamaan kaya napilitan ang mga kasamahan nitong gumanti na nagresulta ng kamatayan ni Navera.

Nakuha kay Navera ang kalibre .45 baril na kargado ng apat na bala sa magazine, apat na sachet ng shabu na nakuha sa pinangyarihan ng insidente at isa pang sachet na nakita sa kanyang bulsa.

Naaresto naman ang mga kasama ng nasawi na sina Sonny Villanueva, 49, Genesis Navera alyas “Jan-Jan”, 26, at Eugene Buena, 32, habang narekober sa mga ito ang anim na sachet ng shabu.

Narekober din ng pulisya ang anim na “nakaw” at undocumented na mga motorsiklo at iba’t-ibang mga piyesa.

Sa pahayag naman sa pulisya ni Executive Officer Herminigildo Corpen ng Brgy. 166 Caybiga, sangkot sa illegal drug trade at pangangarnap ng mga motorsiklo ang mga naarestong suspek sa pamumuno na pinamumunuan ni Navera. RENE MANAHAN

PINAGTATAGA ng katana ng lalaking nakaalitan ang isang 15-anyos na binatilyo kaninang madaling-araw sa Tondo, Maynila.

Nilalaptan ng lunas ngayon sa Gat Andres Bonifacio Memorial Medical Center ang biktimang si Theogyl Cerdon, alyas ‘TJ,’ binata, out-of-school youth, ng Brgy. 20 Zone 2, Pier 2, North Harbor, Tondo bunsod nang mga sugat sa ulo at batok matapos pagtatagain ng suspek na nakilala lang sa alyas ‘Niño,’ ng Parola Cmpd. sa Tondo.

Sa report ni Manila Police District (MPD)-Station 2 commander, P/Supt. Arnold Thomas Ibay, nabatid na dakong 1:30 ng madaling-araw nang maganap ang insidente sa Apex Cmpd.

Bago ang insidente, naglalakad ang biktima sa lugar at pauwi na nang bigla na lang sumulpot ang suspek.

“Tang—-na mo TJ! Natiyempuhan din kita!” ito ang katagang binitawan umano ng suspek sabay bunot ng katana at kaagad na pinagtataga ang biktima sa ulo at batok.

Nang makitang sugatan na ang biktima ay mabilis nang tumakas ang suspek patungo sa Gate 7 ng Parola Cmpd., habang isinugod naman sa pagamutan ang biktima upang malunasan.

Sinasabing may personal na away ang dalawa na nagtulak sa suspek upang tagain ang biktima.

Tinutugis na ngayon ng mga awtoridad ang suspek. JOCELYN TABANGCURA-DOMENDEN