BINIGYANG-LINAW ng Commission on Elections (Comelec) na nasa kamay na ng Senado ang desisyon kung magsasagawa sila ng special election para palitan si Sen. Alan Peter Cayetano.

Ito’y matapos siyang italaga ni Pangulong Rodrigo Duterte bilang bagong kalihim ng Department of Foreign Affairs (DFA).

Ayon kay Comelec spokesperson James Jimenez, si Senate President Koko Pimentel na ang bahala kung babakantehin ba ang posisyon ni Cayetano sa Senado.

Paliwanag ni Jimenez, sakaling may isang mambabatas na lilisanin ang kanyang puwesto, may kapangyarihan ang liderato ng Senado na ideklarang bakante ang posisyon at magtawag ng special election. at hindi na ito tungkulin ng Comelec.

Si Cayetano ay nahalal noong 2013 para sa anim na taong panunungkulan sa Senado, at kailangan niya itong bitiwan para makaupo bilang kalihim sa DFA. JOHNNY ARASGA

IGINIIT ni dating Pangulong Benigno Aquino III na walang “probable cause” para siya’y kasuhan kaugnay ng kontrobersyal na Disbursement Acceleration Program (DAP).

Matatandaang naglabas ng resolusyon noong Marso ang Office of the Ombudsman kung saan nakasaad na lusot sa kaso si Aquino sa kabila ng pagkakaroon ng probable cause na kasuhan si dating Budget Sec. Florencio Abad.

Umapela ang mga nagsampa ng kaso kabilang si Bayan Muna Rep. Carlos Isagani Zarate sa Ombudsman na ipaliwanag kung bakit ganoon ang kinalabasan kaya pinagkomento ng Ombudsman si Aquino.

Dito, ipinabasura ni Aquino ang motion-for-reconsideration na inihain ng mga compalainants dahil wala namang “sufficient ground” para patunayang karapat-dapat siyang kasuhan.

Iginiit ni Aquino na ginampanan lang niya ang “core executive functions” niya bilang pangulo at hindi niya sinapawan ng kapangyarihan ang Kongreso.

Wala rin aniyang sapat na dahilan para kasuhan siya ng technical malversation dahil wala naman siyang direktang kustodiya sa kaban ng bayan.

Hindi rin aniya maituturing na direktang paggasta ng pondo ang paglalabas ng budget circulars at memoranda.

Hindi rin umano dapat siyang kasuhan ng graft dahil ipinatupad niya ang DAP sa paglalayong mapabilis ang mga infrastructure spending na makatutulong sa ekonomiya ng bansa.

Dagdag pa ng dating pangulo, hindi rin naman napatunayan ng complainants na nalugi ang gobyerno dahil sa nasabing programa. JOHNNY ARASGA

TIGOK ang isang hinihinalang drug pusher matapos manlaban sa mga pulis sa ikinasang buy-bust operation sa Baseco Cmpd., Tondo, Maynila.

Dead-on-arrival sa Gat Andres Bonifacio Memorial Medical Center si Nicolas Bornia alyas ‘Alas’ na kabilang sa watchlist ng PNP.

Sa ulat, isang poseur buyer ang bumili ng P300 halaga ng shabu sa suspek.

Nang aarestuhin na, nakatunog ito kaya bumunot ng baril ang at nagpaputok, dahilan para gumanti ang mga pulis at mapatay ito.

Narekober sa crime scene ang isang kalibre .38 na baril, apat na sachet ng shabu at P300 buy-bust money. -30-

PATAY ang isang ‘tulak’ na miyembro ng Bahala na Gang sa isinagawang buy bust operation sa Baseco Compound sa Port Area, Maynila.

Hindi na umabot pang buhay sa Gat Andres Bonifacio Memorial Medical Center si Nicolas Bornia alyas “ALAS”, nasa 40-45-anyos ng Block 9, Old Site, Baseco Compound, Port Area, Maynila.

Sa ulat ni PO3 Roderick Magpaleng Manila Police District-Homicide Section, naganap ang insidente dakong alas-10:45 ng gabi ng Mayo 12 (Biyernes), sa Block 9, Old Site, Baseco.

Nauna rito, nagsagawa ng buy-bust operation laban sa suspek na ng Station Drug Enforcement Team ng MPD-Station 5 .

Sa tulong ng informant, nakabili ng halagang P300 na shabu ang poseur-buyer na si PO1 Sanny Mark Olivar na nakatalaga sa nasabing himpilan at nang makuha na ang iligal na droga ay inaresto na ang suspek.

Sa halip na kusang sumama, itinulak umano ng suspek si PO1 Obligar at saka bumunot ng baril  at ipinutok subalit hindi tumama kaya siya naman ang pinutukan ni PO1 Obligar.

Agad na itinakbo sa hospital ang suspek ngunit hindi na rin naisalba pa,

Narekober sa crime scene ang  isang kalibre 38 na baril na may 2 bala, apat na plastic sachet ng shabu  at ang marked money. JOCELYN TABANGCURA

SA susunod na linggo ay pag-uusapan na ng Pilipinas at China ang isyu ng agawan ng teritoryo sa South China Sea.

Sinabi ni Philippine Ambassador to China Chito Sta. Romana na  hindi lang isang beses pag-uusapan ng dalawang nasabing bansa ang bagay na ito kundi magpapatuloy ito ng dalawang beses sa isang taon.

Magiging bahagi  aniya ng pag-uusap ang mga opisyal mula sa DFA at Chinese Foreign Ministry.

Sa kabilang dako, hiwalay na pag-uusapan naman ang usapin ukol sa agawan ng teritoryo mula sa ekonomiya, trade, kultura at iba pang sektor.

Nauna nang sinabi ng Department of Foreign Affairs (DFA) na pumayag ang China na siyang unang maging host ng unang round ng pag-uusap.

Magugunitang, naghain ng legal case sa arbitral tribunal ang Pilipinas sa ilalim ng Aquino administration kung saan walang basehan ang nine-dash claim ng China ngunit hindi nila ito kinikilala. KRIS JOSE

BENGUET – Patay ang tatlong bata habang 13 pasahero ang malubhang nasugatan matapos mahulog sa bangin ang kanilang sinasakyang Isuzu Ford Fiera sa Sitio Naduguan, Baculongan Sur, Buguias sa nasabing lalawigan kahapon ng hapon, May 12.

Kinilala ang mga nasawi na sina Leo Adel Tullabang, 9; kapatid nitong si Jay-Ar, 10; ng Bolanao, Tabuk City, Kalinga, at si Fred Elmer Quinio Bagni, 14, ng Pozorrubio, Pangasinan.

Samantala, agad na sinigod sa Luis Hora Memorial Hospital ang mga sugatan.

Base sa paunang imbestigasyon, sinabi ni Buguias police commander P/Chief Insp. Peter Daplian ang mga biktima ay lulan ng isang Isuzu Ford Fiera na may plakang ABF-175 na minamaneho ng isang Menargon Wakit Quintos, 50, ng Buguias, Benguet.

Ayon kay Daplian, puno umano ng gulay ang nasabing sasakyan kung kaya’t sumakay ang mga biktima sa tuktok ng sasakyan habang ang iba ay nakisabit .

Nawalan umano ng preso ang sasakyan at nawalan ng control ang driver kung kayat nahulog sa isang garden terrace na may lalim na 15 feet.

Ang mga namatay na bata ay sumama lamang sa kanilang magulang upang magtanim ng gulay sa Buguias, Benguet.  ALLAN BERGONIA

ITINANGHAL na bayani ng Washington Wizard si John Wall sa game 6 kontra sa Boston Celtics matapos itong maka-three point shot sa huling bahagi ng laro.

Nabatid na naipasok ni Wall ang puntos sa nalalabing 3.5 seconds.

Nagtapos ang paghaharap ng dalawang koponan sa score na 91-92, pabor sa Washington.

Dahil dito, aasahan ang mas maaksyon ang game 7 sa Martes na gaganapin sa teritoryo ng Celtics.

Kaya naman, hati ang prediksyon ng fans dahil tiyak na hindi papayag ang Boston na mapahiya sila sa kanilang home court, habang ang Wizard naman ay may momentum na dahil sa huling panalo.  BOBBY TICZON

INATASAN ni Justice Sec. Vitaliano Aguirre II ang National Bureau of Investigation (NBI) para mas lalo pang palakasin ang cyber security measures nito sa gitna ng global ransomware attack sa mga nakalipas na araw.

Maging ang Office of Cybercrime ng Department of Justice (DOJ) ay nakatanggap na rin ng kaparehas na kautusan mula kay Aguirre.

“Let’s do what we can to monitor and step up our cyber security measures to prevent or at least minimize the adverse effects of the ‘Ransomware’ attacks on our system,” bahagi ng statement ng kalihim.

Nauna nang nagbabala ang Department of Information and Communications Technology (DICT) sa mga Filipino kaugnay ng ransomware attack.

Nabatid na ilang bansa na ang apekatado ng ransomware attack, kabilang na ang health system ng Britain, interior ministry ng Russia, Spanish telecommunications giant Telefonica, at US courier firm FedEx. BOBBY TICZON

DALAWANG bangkay ang natagpuan sa loob ng isang inabandonang sasakyan sa Bulacan town kaninang Linggo ng umaga.

Wala pang pagkakakilanlan ang 2 bangkay na isang babae at isang lalaki na kapwa nakaposas at tadtad ng tama ng bala sa katawan.

Tinatayang nasa edad 20 hanggang 25 ang babae na nakasuot ng itim na pantaas at shorts.

Nasa 30-anyos naman ang lalaki na kalbo, naka-orange na pantaas at shorts.

Bukod sa mga bangkay, narekober din ng pulisya sa loob ng sasakyan ang isang sachet ng hinihinalang shabu at isang listahan na may nakalagay na “Mga Pulis na Tulak.”

Ayon kay Supt. Fitz Macariola, hepe ng San Jose del Monte police, iimbestigahan na nila ang mga pangalan sa listahan.

Inaaalam na rin nila kung miyembro ng sindikato ang dalawa o sindikato ang nasa likod ng pamamasalang sa kanila.

Teyorya pa ng pulisya na hindi sa San Juan Del Monte at sa ibang lugar pinaslang ang mga biktima.

Ito ay dahil napuna rin ng pulisya na bagaman may mga tama ng bala ang mga bangkay, wala namang tama ang sasakyan na isang itim na Toyota RAV-4.

Unang napansin ng isang gwardiya na nakatalaga malapit sa lugar ang sasakyan na  magdamag na nakaparada sa bahagi ng Quirino Highway.

Kinaumagahan pa nang madiskubre ang krimen. BOBBY TICZON

NANINIWALA si Buhay Party-list Representative Lito Atienza na ang umano’y pork barrel scam mastermind na si Janet Lim Napoles ang pinaka-guilty sa anomalya kaya hindi ito karapat-dapat na maging state witness.

 Ipinaliwanag ni Atienza, si Napoles umano ang naghati-hati ng salapi at nagbigay ng hanggang bilyon-bilyong piso na mula sa mga pulitiko .

 Giit ng mambabatas, ang dapat na tumestigo ay mga aniya’y dinaanan ng papel na “least guilty” sa pork barrel scam, gaya ng mga naghatid ng pera sa mga pulitiko.

Dagdag ni Atienza, dapat na manatili sa bilangguan si Napoles bilang pangunahing nagpalaganap umano ng katiwalian sa bansa, at dapat na samahan din aniya siya ng mga pulitikong dawit sa pork barrel scam.

SUGATAN ang isang lola matapos bugbugin at saksakin ng kanyang lasing na bayaw sa Las Piñas City.

 Nagpasaklolo sa pulisya ang biktimang si Amelita Gallano, 53-anyos, matapos makalabas sa Las Piñas General Hospital.

 Kasama ni Aling Amelita ang kanyang mister na si Rolando, na mismong umawat sa suspek na kanyang kapatid, si Andres Gallano.

 Ayon sa kwento ni Mang Rolando, kinuwelyuhan, sinakal, sinuntok at pinagsasaksak pa ng kanyang kapatid ang kanyang may-bahay.

 Sinasabing dati nang nakulong dahil sa kasong murder ang suspek, at gumagamit rin ng iligal na droga.

 Nakakulong na ngayon ang suspek at nahaharap sa patong-patong na kaso. JOHNNY ARASGA

DAHIL sa pagdiriwang ng Mother’s day ngayong araw, namigay ang mga staff ng MRT-3 ng mga pulang rosas sa mga nanay na pasahero.

Bukod sa pamimigay ng mga bulaklak ay may pagbati rin ang mga ito ng “Happy Mother’s Day”.

Ikinatuwa naman ito ng mga ina na nakatanggap ng mga bulaklak.

May ilan na nasurpresa sa naging pamimigay ng bulaklak.

Samantala, nanatili namang normal ang operasyon ngayong MRT 3

NAKA-DAY OFF ang halos lahat ng mga Pinoy sa Hong Kong ngayong araw para sa pakikipagkita ni Pangulong Rodrigo Duterte sa Filipino community doon.

Ito ang inihayag ni Teresa Betonio Tenerife, taga-Brgy. Bula sa General Santos City at apat na taon nang nagtatrabaho bilang kasambahay sa Hong Kong.

Ayon kay Tenerife, labis ang kanilang tuwa na mga OFW sa pagbisita at pakikipagharap sa kanila ni Pangulong Duterte upang personal na marinig ang kani-kanilang mga daing.

Nabatid na si Tenerife ay miyembro ng Bisdak (Bisayang Dako) Group, isang rehistradong grupo ng mga OFW na kinabibilangan ng halos mga taga-Mindanao.

Ang naturang grupo ay isa sa mga nagsasagawa ng pagtitipon at kilos-protesta para igiit ang kanilang daing.

Sa naturang pagbisita ng pangulo ay umaasa umano silang matutulungan at mabigyan ng solusyon ang kanilang mga concerns.

Isa na rito ay para sa mga nakararanas ng pang-aabuso sa kanilang employer at hangad din nilang mabigyan ng sapat na benepisyo at sahod.

Ipinaabot din ng naturang OFW ang kanilang pagnanais na matulungan ang ilan nilang kasamahan na umano’y tumalon mula sa bintana na sinasabing nagpakamatay, bagay na malabo umanong mangyari.

Ayon kay Tenerife, pumunta silang mga OFW sa Hong Kong upang kumita ng malaki at makatulong sa kanilang pamilya dito sa Pilipinas kaya’t malabong may magpakamatay sa kanila doon.

Batay sa bagong patakaran ngayon ay hindi na rin umano sila maaring utusang maglinis ng bintana.

Kaya naman hangad umano nilang mabigyan ng sapat na imbestigasyon ay solusyon ang naturang mga insidente upang malaman kung ano talaga ang sanhi nito at upang hindi na maulit pa. JOHNNY ARASGA

NAILIGTAS ang buhay ng isang bilanggo matapos uminom ng muriatic acid sa loob ng Ilocos Norte Provincial Jail (INJP).

Agad na dinala ng jail guards sa  Gov. Roque Ablan Sr. Memorial Hospital si Leonardo Ramos na residente ng bayan ng Vintar na may kasong murder.

Ayon kay Provincial Guard II Robert Reyes, posibleng ang dahilan ng pag-inom ni Ramos ng muriatic acid ay ang hindi pagdalaw sa kanya ng kanyang pamilya sa bilangguan.

Sinabi ni Reyes na halos upat na buwan na walang dumadalaw kay Ramos sa loob ng halos isang taong pamamalagi niya sa INPJ.

 Aniya, nakita ng mga kasamahan ni Ramos na pumuputi at bumubula ang bibig ng inmate habang nasa comfort room ito.

 Inihayag ni Reyes na ililipat nila ang biktima sa Laoag General Hospital para isama sa dalawang bilanggo para hindi sila mahirapang magbantay. JOHNNY ARASGA

IPINAHAYAG ni Pangulong Duterte na ipinag-utos niyang palayain ang convicted’ CPP-NPA members’

Inanunsiyo ni Pangulong Rodrigo Duterte sa pagharap nito sa Filipino community sa Hong Kong na ipinag-utos na nito ang pagpapalaya sa 14 na miyembro ng Communist Party of the Philippines-New People’s Army (CPP-NPA) na nakapiit sa New Bilibid Prison (NBP).

 Aniya, ang 14 na mga bilanggo ay mga convicted na miyembro ng makakaliwang grupo.

 Ang pag-anunsiyo ng pangulo sa pagpapalaya sa mga miyembro ng NPA ay kasunod ng pagpapakilala niya sa mga lefties na miyembro ng kanyang gabinete kabilang sina Agrarian Reform Secretary Rafael Mariano at National Anti-Poverty Commission chair Secretary Liza Maza.

“I just released about 14 prisoners from Bilibid, iyong mga komunista na convicted na,” ani Duterte.

Pero kailangan pa umano ng Malacañang na mag-isyu ng detalye at pangalan ng mga rebeldeng napalaya na.

Sinabi ni CPP founder Jose Maria Sison na wala siyang alam sa pagpapalaya sa 14 na miyembro ng NPA.

Pero naniniwala si Sison na ang pagpapalaya sa mga NPA ay welcome development sa isinasagawang peace talks sa pagitan ng pamahalaan at National Democratic Front of the Philippines (NDFP). JOHNNY ARASGA

NAPRANING na naman ang mga residente ng Quiapo nang isang kahina-hinalang itim na bag na iniwan sa bangketa na malapit sa lugar na pinangyarihan ng dalawang magkasunod na pagsabog kamakailan.

Nakita ang naturang bag nitong Sabado ng umaga na inabandona sa isang bangketa sa Quezon Blvd. at sa kanto ng Globo de Oro St.

Agad ipinarating ng ilang residente sa mga nakaantabay na Special Weapons And Tactics (SWAT) team ang tungkol sa nakitang bag.

Ipinaamoy agad ito sa K9 dog subalit walang response o umupo lamang ang aso, na senyales na wala itong lamang pampasabog.

Hinila patungo sa gitna ng kalsada ang bag malayo sa mga tao at mga gusali saka binuksan at nakita ang laman nito na kubyertos, kumot at mga damit.

Hinihinalang baka naiwan ang bag ng isang pulubi.

Maaalalang lumikha ng malakas na pag-ugong ang naganap na magkasunod na pagsabog na sinundan ng isa pa sa Quiapo District na ikinamatay ng isa at ikinasugat ng halos 10 katao. BOBBY TICZON

SINUWAG ng dalawang sasakyan ang isang lolo na nagbibisikleta sa La union kaninang Sabado ng umaga.

Dead-on-arrival sanhi ng tinamong tama sa ulo at katawan ang biktimang si Romeo Flores, 68, ng Brgy. Pugo sa naturang bayan.

Sa ulat, naganap ang insidente dakong 6:25 a.m. sa national highway ng Quinavite, Bauang, La Union.

Sa imbestigasyon, binabaybay ng ambulansya na mula pa sa Abra at minamaneho ng isang Paolo Castillo, 38, nang bigla nitong mabangga ang nakabisikletang si Flores matapos itong tumawid sa kalsada.

Paghiga ng biktima sa kalsada, nahagip pa ulit ito ng paparating na tricycle na minananeho naman ni Richard Espilo.

Sa lakas ng pagkakatilapon, bumagok ang ulo ng biktima sa kalsada na kanyang ikinamatay.

Nasa kustodiya na ng pulisya ang dalawang drayber. BOBBY TICZON

NABIKTIMA ng basag-kotse gang ang isang Sports Utility Vehicle (SUV) na pagmamay-ari ng isang television reporter sa Quezon City nitong Sabado ng gabi.

Ayon sa biktimang si Steve Dailisan, natangay ang kanyang bag na naglalaman ng laptop at ilan pang mga gadget.

Sa ulat, naganap ang insidente sa bandang alas-9:00 sa Tapat ng Dr. Jesus Delgado Memorial Hospital sa Kamuning Rd., Brgy. Kamuning.

Bago ito, napag-alamang binisita ni Dailisan ang kanyang may sakit na lola na nakaratay sa naturang ospital at ipinarada ang kanyang Mitsubishi Montero sa nasabing kalsada.

Ngunit pagbalik niya, napansin niyang basag na ang salamin sa kanang bahagi ng kanyang van at wala na ang kanyang bag.

Naproseso na ng crime scene investigators ang SUV ni Dailisan habang patuloy naman ang follow-up operation ng pulisya upang maaresto ang mga suspek. BOBBY TICZON

SINOPLA ni House Majority Leader Rodolfo Farinas ang kahilingan ni Magdalo Rep. Gary Alejano sa unang pagdinig ng House Committee on Justice kaugnay sa impeachment complaint nito laban kay Pangulong Rodrigo Duterte.

Giit ni Farinas, “we do not have opening statement of complainants here. There Is a pending complaint here. The committee will dispose the complaint. You will answer questions made by the committee members. A complainant cannot make an opening statement. We are now determining the sufficiency of forms here,” ani Farinas.

Paglilinaw pa ni Farinas, ito’y kakaibang impeachment complaint dahil ang nagrereklamo at nag-endorso ay iisa tao lamang sa katauhan ni Alejano.

Ibinasura rin ni Mindoro Oriental Rep. Reynaldo Umali, chairman ng committee on Justice ang kahilingan ni Alejano na bigyan siya ng pagkakataon na makapagbigay ng opening statement.

Sa unang pagtatanong pa lamang ni Farinas kay Alejano tungkol sa dalawang beses niyang sinumpaan na “issue of verification” kung may personal itong nalalaman sa bintang na sangkot si Pangulong Rodrigo Duterte sa pagpatay sa may 8,000 katao dahil sa kampanya laban sa droga ay hindi ito direktang sinagot ni Alejano.

Hindi tuwirang sinagot ni Alejano ang personal knowledge nito sa pagsasabing, beripikado niya ang statement ng mga saksi.

Nagbanta rin si Farinas na posibleng makasuhan ng perjury si Alejano sa sandaling hindi nito mapatunayang authentic ang kanyang mga reklamo.

Banggit naman ni 1-SAGIP Partylist Rep. Rodante Marcoleta na batay sa nabasa niyang impeachment complaint ni Alejano, ito ay nakabase lamang sa mga ulat sa pahayagan at mula sa internet o website.

“Under the rules, these are inadmissible evidence,” binigyang diin pa ni Marcoleta.

Inamin din ni Aljano na ang kaniyang mga ebidensya sa alegasyon kaugnay sa bank deposits ng mga anak ni Pangulong Duterte ay nagmula kay Sen. Antonio Trillanes. MELIZA MALUNTAG