KRITIKAL ang isang 6-anyos na batang babae matapos tamaan ng ligaw na bala sa Tondo, Maynila nang magka-engkwentro ang isang drug suspect at mga awtoridad.

Naka-confine sa intensive care unit ng Manila Memorial Medical Center ang biktimang si Stefie Kate Peñalber.

Nabatid na naglalaro ang biktima sa Brgy. 199 sa Tondo, Maynila nang tamaan ng ligaw na bala sa tiyan.

Ayon sa Manila Police District Station 7, nagkaroon ng enkwentro sa pagitan ng mga awtoridad at ng mga suspek na sina Deris dela Cruz at isang alyas Toteng.

Nanawagan naman ang ama ng biktima na tulungan sila sa pagpapagamot sa kanyang anak lalo na sa pangangailangan sa dugo.

Inaalam din ng pulisya kong sino ang may pananagutan sa insidente. JOCELYN TABANGCURA-DOMENDEN

LUMIHAM muli ang United Nations (UN) kay Senate President Aquilino Pimentel III, bilang babala ng pagtutol sa napipintong pagbabalik ng death penalty sa Pilipinas.

Matatandaang ipinasa ito ng Kamara kamakailan.

Sa report, ipinahayag ni UN Human Rights Committee chair Yuji Iwasawa na nababahala sila sa pagpapasa sa nasabing bill.

Ayon sa Committee na kasalukuyang nagsasagawa ng sesyon sa Geneva, nakarating sa kanila ang impormasyong ipinasa ng House of Representatives ang death penalty para sa mga kasong may kinalaman sa droga sa Pilipinas.

Dahil dito, agad silang nanawagan sa Senado na ikonsidera ito dahil may obligasyon ang Pilipinas sa ilalim ng International Covenant on Civil and Political Rights (ICCPR) at Second Option Protocol na nagbabawal sa pagpapataw ng parusang kamatayan.

Batay sa Article 6 ng ICCPR, na niratipika ng bansa noong 1986, maaari lamang ipatupad ang death penalty sa pinakaseryosong krimen.

Sinabi rin ni Iwasawa na sa nasabi ring artikulo ay nakasaad na kapag inalis na ang death penalty ay hindi na ito maaaring ibalik.

Inalis ng Pilipinas ang death penalty noong 2006 gamit ang Republic Act 9346, at sumang-ayon sa 2nd protocol noong 2007.

Noong December 2016, lumiham si UN human rights chief Zeid Ra’ad Al Hussein kay Pimentel at Speaker Pantaleon Alvarez, bilang paalala sa paglabag nila sa international law kung ipapasa ang nasabing bill.

Ayon kay Zeid, hindi pinapayagan ng international law ang alin mang bansang nagratipika o pumayag sa Second Optional Protocol na bawiin ang kanilang pagpayag. NENET VILLAFANIA

PAIIMBESTIGAHAN sa Malaking Kapulungan ng KOngreso panibagong trahedya sa pampublikong bus sa Nueva Ecija na ikinasawi ng may 31 katao at ikinasugat ng may 49 na iba pa.

Isusulong ni Quezon City Rep. Alfredo Vargas ang isang resolusyon upang imbestigahan ng kaukulang komite sa Kamara ang nabanaggit na trahedya.

Aniya, ang patuloy na mga aksidente ay palatandaan lamang ng mga kapabayaang nagaganap sa pagpapatupad ng mga kaukulang polisiya.

“I am filing a resolution today to investigate this tragedy.”

Si Vargas din ang unang kumalampag sa Land Transportation Franchising and Regulatory Board (LTFRB) na siyasatin ang pagkawala ng break ng isa sa mga bus ng Bestlink sa Novaliches ilang buwan na ang nakararaan kung saan 32 katao din ang nasawi.

“Our authorities in the transportation sector must once and for all act stronger against buses that are not road-worthy. These coffins with wheels must no longer be allowed to take passengers,” ani Vargas.

Panawagan ng kongresista na ang mga ganitong uri ng pampasaherong bus ay dapat nang tanggalin sa kalye at huwag nang itakbo upang hindi na makapaminsala.

“Shout out to LTFRB, what is the penalty for malfunctioned breaks or overloading? Is it worth the lives of people who died violently? Without a strong law to regulate operations of old buses for public transportation, these kinds of horrible accidents will keep happening.” MELIZA MALUNTAG

PINALAYA na ng New People’s Army (NPA) ang dalawang sundalo na kanilang binihag sa Brgy. Bangkal, Matanao, Davao del Sur noong nakaraang Pebrero.

Sinabi ni S/Insp. Bernard Francia, hepe ng Colombio PNP, dakong 10 a.m. nang mabawi nila ang mga bihag na sina Sgt. Solaiman Calocop at Private First Class Samuel Garay ng 39th Infantry Battalion Philippine Army sa may Barangay Telefas Colombio, Sultan Kudarat kaninang alas-10:00 ng Miyerkules ng umaga.

Ayon kay Francia, naging daan ang patuloy na pakikipagnegosasyon sa mga rebelde ng binuong task group na kinabibilangan ng mga sundalo, pulis, religious sector, mga local officials at community upang malapalaya ang mga sundalo.

Malaking bagay din ang pagpapatupad ng Suspension of Military Operations (SOMO) upang mapalaya ang mga itinuturing ng NPA na prisoners of war.

Kasama na sumundo sa mga sundalo ang kanilang pamilya, mga local officials ng Colombio, representante mula sa religious sector.

Agad na isinailalim sa medical attention at debriefing ang dalawang sundalo upang masiguro na sila ay nasa mabuting kondisyon.

Noong Pebrero 2, 2017 nang dinukot ng mga rebelde sina Calocop at Garay sa nasabing barangay habang papunta sa kanilang kampo. BOBBY TICZON

INANUNSYO mismo ni Mixed Martial Arts star Brandon Vera na ‘engaged’ na siya sa kaniyang kasintahan.

Isinagawa ang proposal sa girlfriend na si Jessica Craven sa kanilang bakasyon noong nakaraang Biyernes sa Guam.

Nag-post ito ng larawan sa kanyang Instagram account habang kasama ang kasintahan at ipinakita pa ang engagement ring.

Nakatakda na itong mag-shooting sa pelikula kasama si Anne Curtis at manonood din ito sa ONE Championship sa Biyernes sa MOA Arena. BOBBY TICZON

ITUTULOY pa rin ng Commission on Election (Comelec) ang kanilang preparasyon sa barangay at Sangguniang Kabataan election sa Oktubre.

Ayon sa Comelec, ito’y dahil sa wala pang pinal na kautusan si Pangulong Rodrigo Duterte sa pagpapaliban ng naturang halalan.

Mahigpit ang kanilang ginagawang pagsunod sa nakasaad na mandato sa kanila ng batas.

Sa kasalukuyan, ipatutupad pa rin nila ang deadline na itinakda sa katapusan ng buwang ito para registration ng mga botante sa nabanggit na halalan. BOBBY TICZON

SINISI ng grupong Akbayan Youth si Senador Francis Escudero na siyang nagsulong para bigyan ng parangal si Pangulong Rodrigo Duterte ng Unibersidad ng Pilipinas (UP).

Ayon kay Cassey Deluria, pinuno ng Akbayan Youth at papasok na Pangulo ng UP Student Regents, tila walang prinsipyo si Escudero dahil sa kanyang naging hakbang.

Lumalabas aniyang isang balimbing si Escudero na tila kumikiling na ngayon sa administrasyon dahil sa paniniwalang malakas ito sa kasalukuyan.

Magugunitang tumakbo si Escudero bilang running mate ni Senadora Grace Poe noong halalang pampanguluhan noong isang taon.

Samantala, pinabulaanan ni University of the Philippines Board of Regents Secretary Atty. Roberto Lara, na si Senador Chiz Escudero ang nagsulong upang bigyan ng honorary doctorate degree si Pangulong Rodrigo Duterte.

Taliwas ito sa lumabas na summary ng naging pagpupulong ng BOR o Board of Regents noong April 5.

Paliwanag ni Atty. Lara, kanilang pinakinggan muli ang taped recording ng pagpupulong at natuklasang hindi si Escudero ang naghain ng mosyon para bigyan ng parangal ang Pangulo.

Kaugnay nito, humingi ng paumanhin si Lara para sa pagkakamali sa summary ng meeting at sa posibleng epekto nito kay Escudero.

Una nang itinanggi ng Senador na siya ang nagsulong sa pagbibigay ng parangal sa Pangulo bagama’t hindi niya ito tinututulan. JOHNNY ARASGA

TEPOK ang isang naarestong drug suspect at ama ng Miss World Philippines 2015 matapos magbaril sa sarili sa loob ng presinto sa Solano, Nueva Vizcaya.

Kinilala ang namatay na si Edmundo Parungao, ama ni Miss World Philippines 2015 Hilarie Danielle Parungao.

Ayon kay P/C Insp. Billy Mangali, hepe ng Solano Police Station, inireklamo umano ni Parungao na hindi siya makahinga dahil sa asthma matapos mahuli sa drug buy-bust operation sa nasabing bayan at makuhanan ng tatlong sachet ng shabu.

Aniya, nang tanggalin ang posas ni Parungao upang dalhin sa ospital ay agad nitong inagaw ang baril ng kanyang police escort, ikinasa at ipinutok sa kanyang bibig.

Isinailalim na rin sa paraffin test at autopsy ang biktima para sa malalimang imbestigasyon sa insidente.

Napag-alamang dati nang sumuko si Parungao sa Oplan Tokhang noong 2016. JOHNNY ARASGA

NAG-ALOK si Pangulong Rodrigo Duterte ng isang P1-milyong pabuya para sa bawat Abu Sayyaf na maituturo at mapapatay sa lalawigan ng Bohol.

Inihayag ito ng Pangulo sa kanyang pagbisita sa lalawigan upang personal na inspeksyunin ang mga ginagawang paghahanda sa ASEAN Summit gayundin ang pagsisimula ng Regional Economic Partnership Trade Negotiating Committee Meeting sa Panglao Island.

Nagbabala rin ang Pangulo na may kalalagyan din ang sinomang mapatutunayang nagpapagamit at nakikipagsabwatan sa mga bandido.

Samantala, malugod namang tinanggap ng Armed Forces of the Philippines (AFP) ang nasabing alok ng pangulo.

Ayon kay sa AFP Spokesman Brig. Gen. Restituto Padilla, inaasahan nila na dahil sa pabuya ay mahihikayat ang publiko na tumulong para tuluyang mapulbos ang bandidong grupo.

Sa kasalukuyan ay nagpapatuloy ang operasyon ng militar para matunton ang mga nalalabi pang miyembro ng Abu Sayyaf na naka-engkwentro ng tropa ng pamahalaan sa Inabanga, Bohol noong nakaraang linggo. JOHNNY ARASGA

ITINUMBA ng hindi pa nakikilalang mga salarin ang isa sa mga suspek sa tinaguriang ‘rent-sangla’ scam.

Namatay dahil sa mga tama ng bala sa iba’t ibang bahagi ng katawan at ulo ang biktima na kinilalang si Eleanor ‘Leah’ Constantino Rosales.

Naganap ang pamamaslang sa biktima habang papasok ito sa kanyang bahay sa Bgy. Malusak, Sta. Rosa, Laguna, Miyerkules ng hapon.

Kabababa lamang ng biktima sa isang SUV at kasalukuyang binubuksan ang gate ng kanyang bahay nang dumating ang dalawang suspek na naka-helmet at lulan ng motorsiklo.

Tinangka pang tumakbo ng biktima ngunit hinabol ito ng salarin at makailang ulit na pinaputukan hanggang sa bumulugta.

Si Rosales ang sinasabing sekretarya ng itinuturong mastermind sa ‘rent-sangla’ scam na si Rafaela Anunciacion.

Ang napatay na biktima at ilan pang mga personalidad ay una nang kinasuhan ng large-scale estafa at swindling dahil sa modus na panghihikayat umano ng mga biktima na magpaparenta ng kanilang sasakyan.

Gayunman, kalaunan ay isasangla na ng mga ito ang mga sasakyan sa ibang tao.

Umaabot sa daan-daang may-ari ng iba’t ibang sasakyan ang nabiktima ng modus ng mga suspek. JOHNNY ARASGA

HINIMOK ni Sen. Panfilo Lacson ang Philippine National Police (PNP) na ibahin na ang diskarte sa pagharap sa problema ng iligal na droga sa bansa.

Ito’y matapos mabawasan ang kumpiyansa at suporta ng publiko sa isinasagawang drug war ng pamahalaan.

Gamit na gamit na aniya masyado ang istilong ginagamit ng PNP at ng Philippine Drug Enforcement Agency (PDEA).

Napapagod na aniya ang mga tao na makarinig ng mga ulat tungkol sa summary executions ng mga drug suspect.

Isa aniyang halimbawa na maaring gawin ng PNP bilang kapalit ay ang pagresolba sa vigilante killings at pag-aresto sa mga nasa likod nito.

Ayon kay Lacson, dapat ay may maipakitang solusyon ang PNP sa mga deaths under investigation (DUI).

Gayunman, naniniwala si PNP spokesperson S/Supt. Dionardo Carlos na walang dapat baguhin sa kanilang diskarte laban sa iligal na droga.

Giit ni Carlos, pagsubok para sa kanila ang kinilabasan ng resulta ng survey ng Social Weather Stations (SWS), ngunit nilinaw niyang hindi naman totoo ang state-sponsored na mga pagpatay sa bansa.

Dagdag pa ni Carlos, ang mga pagkamatay ay bumubuo lamang sa 0.2 percent ng mga taong sangkot sa iligal na droga na kanilang nakaharap.

Mapayapa naman kasi aniyang sumuko sa kanila ang 95 percent o 1.18-milyon, kasama na ang mga buhay na naaresto. JOHNNY ARASGA

LA TRINIDAD, BENGUET – Dead-on-the spot ang isang Philippine Army (PA) reservist matapos barilin ng hindi pa nakikilalang suspek kahapon (April 19) sa Brgy. Bugayan, Poblacion, La Trinidad sa nasabing lalawigan.

Kinilala ni La Trinidad police commander C/Insp. Benson Macli-ing ang biktimang si Daniel Lacpap, 53, PA reservist ng 106th Community Defense Center (CDC), ng nasabing bayan.

Hinihinala ng pulisya ang anggulong “love triagle” sa nasabing pagpatay dahil gustong balikan ng suspek ang ka-live-in ng biktima.

Sa ulat, sinundan ng suspek si Lacpap papuntang Buyagan, Poblacion at nang lingunin ng biktima ang suspek ay bigla itong pinutukan sa katawan saka mabilis na tumakas.

Hindi muna pinangalanan ang suspek dahil nagsasagawa na ng La Trinidad police ng follow-up operation upang maaresto ito. ALLAN BERGONIA

INANUNSYO ng Manila Zoological and Botanical Garden na isang baby tiger o cub ang inihahanda na nila sa ngayon upang maging dagdag-atraksyon sa Manila Zoo, Malate, Manila.

Ayon kay Dr. Heinrich Domingo, Officer-in-Charge ng Zoological Division ng Manila Zoo, ang dalawang-buwang gulang na babaeng tigre ay pinangalanan nilang ‘Ashley,’ dahil ipinanganak ito noong nakalipas na Ash Wednesday.

Sinabi ni Domingo na isinilang si Ashley sa Manila Zoo at bagama’t maagang nawalay sa kanyang ina ay maganda ang kondisyon nito.

Iprinisinta na ng pamunuan ng Manila Zoo ang baby tiger sa ilang miyembro ng media, kung saan nagpakita ito ng kakulitan, sa pamamagitan nang pakikipaglaro sa mga staff ng zoo, na siyang nag-aalaga sa kanya.

Nasa aircon room din ang baby tiger upang hindi ito makaramdam ng stress o heat stroke sa nararanasang napaka-alinsangang panahon at isang espesyal na gatas na lactose-free ang ipinaiinom dito.

Ipinagmalaki pa ng pamunuan ng Manila Zoo na makailang ulit nang matagumpay na nakapagsilang ang mga alaga nilang tigre, na patunay na nabibigyan ng magandang pag-aaruga ang mahigit 640 mga hayop dito, tulad ng mga mamalya, mga ibon at reptiles.

Itinuturing din nila ang kanilang lugar bilang isang “accidental bird sanctuary” sa pusod ng Maynila, dahil sa makakapal na puno rito, may tubig at maraming hayop, kaya naeengganyo ang limang migratory bird na dito na manirahan, gaya ng mga knight heron, purple heron, king fisher, swamp hen, at crow o uwak. MACS BORJA

SA ikalimang pagkakataon ay muling nabalam ang pagdinig ng kaso ni dating Sen. Ramon “Bong” Revilla, Jr. sa kaso nitong plunder.

Muli itong naitakda sa June 1, 2017 upang mabigyan pa ng pagkakataon ang prosekusyon at ang depensa na makumpleto ang pre-marking at pagkukumpara ng mga ebidensya.

Ang unang pagdinig ng kaso kaugnay sa kinakaharap nitong plunder ay noong Enero 12 subalit ito ay nakasenla upang ang prosekusyon ay magkaroon ng pagkakataong masuri ang draft pretrial order at magkaroon ng mga pagbabago.

Naitakda muli sa February 9 ngunit muling nakansela dahil sa nakabinbin na resolusyon sa motion to quash na inihain ng kampo ni Revilla.

Ngayong umaga ito muling itinakda at nabalam ulit kung kaya pinagalitan na ni Associate Justice Geraldine Faith Econg ang mga abogado dahil sa halos isang taon na pagkabalam.

Sa May 12 naman ay nagtakda ang korte para sa preliminary conference. MELIZA MALUNTAG

DUMATING sa bansa ang dalawang Russian Navy vessels, kabilang ang isang guided-missile cruiser.

Sa Pier 15, ng South Harbour sa Maynila dumaong ang Russian Pacific fleet na ‘Varyag,’ na siyang Guided Missile Cruiser at large sea tanker na ‘Pechenga’ para sa apat na araw na friendly visit.

Nabatid na bahagi ito ng pagpapalakas ng ugnayan ng Pilipinas at ng bansang Russia at upang isulong ang kapayapaan sa rehiyon.

Ang Varyag, ang ikatlong barko na Slava-class na ginawa para sa Soviet Navy na ngayon ay nagsisilbi sa Russian Navy, at pinamamahalaan ni Capt. Alexsei Ulyanenko.

Armado ito ng anti-ship, anti-aircraft at anti-submarines missiles at gun systems.

Ito na ang ikatlong pagkakataong may isang Russian warship na dumating sa Pilipinas sa ilalim ng Administrasyong Duterte.

Noong Enero, dalawang barkong pandigma rin ng Russia, kabilang ang anti-submarine vessel na Admiral Tributs at sea tanker na Boris Butoma, ang dumating sa bansa para sa limang araw na goodwill visit. JOCELYN TABANGCURA-DOMENDEN

AABOT sa 14 drug suspect ang nalambat ng mga awtoridad sa anti-drug operation na inilunsad ng iba’t ibang police station ng Quezon City police sa naturang lungsod kamakalawa.

Ayon kay Quezon City Police District (QCPD) Director, P/C Supt. Guillermo Lorenzo Eleazar, dakong 7:00 kagabi nang madakip sa harap ng Pepsi Company sa Quirino Highway, Talipapa ang suspek na si Arnel Cruz, 46, ng Talipapa, QC matapos itawag ng ilang concerned citizens dahil sa illegal-drug activities.

Kasunod nito, nadakip naman dakong 8:30 ng gabi ang suspek na si Jonathan Ligon, ng Balon Bato, QC, kasama sina Nicolas Jose Adobas, 27, ng Balong Bato, at Melchor Glen Tremor, 46, ng Bagong Barrio, Caloocan City matapos makatanggap ng tawag sa umano’y nagaganap na pot session sa bahay ng mga Ligon.

Habang dakong 3:30 ng madaling-araw nadakip naman ng Novaliches Police station ang suspek na si Herbert Arzuelo, alyas “Bato”, 28, ng Novaliches, QC.

Dakong 2:30 ng hapon nadakip naman ng mga suspek na sina Fernand Addatu, 22, John Michael Samonte, 18, Alirasul Faisal, 18, Raymond Addatu, 21, Robert Pradanos, 23, at isang 17-anyos na lalaki sa Dirham St. cor. Baht St., Brgy. North Fairview, QC, matapos mahuli sa aktong bumabatak.

Nadakip naman dakong 10:30 ng kagabi sa No. 9 BF Rd., Brgy. Holy Spirit, QC ng Batasan Police Station (PS-6) operatives ang suspek na si Roberto delos Santos, Jr., alyas Diego, 33, ng Brgy Holy Spirit, QC, sa isang buy-bust operation.

Habang nadakip naman ng Project 4 Police Station (PS-8) ang suspek na si Matthew Clyde Lopez, 25, ng Brgy. Bagumbuhay, Proj. 4, QC dakong 6:25 ng gabi dahil sa dalang shabu at mga pinatuyong dahon ng marijuana.

Nadakip naman ng Galas Police Station (PS-11) ang suspek na si Kenji Joaquin, 21, ng Brgy. Tatalon, QC, dakong 11:30 ng umaga sa harap ng of Omni Underwear Bldg., Brgy Tatalon, QC.

Bago ito, sinita muna siya ng mga pulis sa paglabag sa traffic rules at nang inspeksyunin ang kanyang dalang motorsiklo nakuha sa compartment nito ang isang glass pipe na may tira-tirang marijuana at dalawang disposable lighters. SANTI CELARIO

PATAY sa pananambang ng riding-in-tandem ang isang Japanese businessman na kadarating lamang sa bansa habang sugatan naman ang kanyang kasamang Pinoy sa kahabaan ng Roxas Blvd. sa Ermita, Manila kagabi.

Kinilala ang biktimang si Seiki Mizuno, 48, pansamantalang nanunuluyan sa Solaire Hotel sa Pasay, at kararating lamang sa Pilipinas nitong Huwebes para sa isang business transaction sa Pinoy businessman na si John Ong Desbarro na nasugatan rin sa insidente.

Sa ulat ng Manila Police District (MPD)-homicide section, naganap ang pananambang 8:25 ng gabi sa kanto ng Roxas Blvd. at Cuarteles St. sa Ermita.

Magkasamang sakay ng isang Toyota Alphard (UHQ-319) sina Mizuno at Desbarro, kasama ang apat na iba pa, na kinabibilangan ng tatlo pang Hapones at isang Pinoy, nang bigla na lamang silang sabayan ng riding-in-tandem at pagbabarilin.

Una umanong pinaputukan ng mga suspek ang driver na si Rolando Singsing, ngunit maswerteng hindi tinamaan, bago pinagbabaril ang mga nasa loob ng van, kung saan napuruhan si Mizuno, na bibisita lamang sana sa pabrika ng Oakwave sa Tanza, Cavite.

Ayon kay Singsing, company driver ng Oakwave Philippines, kumain lamang sila sa Harbour View Restaurant malapit sa Quirino Grandstand at pabalik na sana sa kanilang hotel sa Pasay City nang maganap ang krimen.

Mabilis namang tumakas ang mga suspek na inilarawang naka-T-shirt, shorts at sumbrero.

Masuwerte namang hindi nasugatan ang iba pang sakay ng van.

Inaalam na ng mga awtoridad ang motibo ng krimen at kung sino ang nasa likod nito. JOCELYN TABANGCURA-DOMENDEN

HIMALANG nakaligtas ang isang batang lalaki sa China matapos tumalon mula sa ika-10 palapag ng isang gusali.

Nagawa niya ito gamit lamang ang isang payong bilang kanyang parachute.

Tumalon ang pitong-taong gulang na bata sa gusali habang hawak ang payong para gayahin ang napanood niyang cartoon character na tumalon mula sa isang bintana.

Bagaman nasa ikalimang palapag lang ang apartment ng bata sa Suzhou, Jiangsu, 10 palapag ang katumbas ng taas nito dahil pawang mga penthouse at duplex ang mga tirahan doon.

Ngunit bukod sa payong, ang pagkasabit niya sa isang kable ng kuryente ang nakapagligtas sa kanya sa kamatayan.

Ilang insidente na rin ang naitala sa China kung saan matinding nasusugatan ang mga bata matapos gayahin ang mga napapanood nila sa mga cartoon shows sa telebisyon. -30-

INAPRUBAHAN na ng House Committee on Muslim Affairs ang panukalang pagdedeklara sa February 1 bilang National Hijab Day.

Ayon kay Committee Chair Rep. Sitti Djalia Turabin-Hataman, may-akda ng nasabing panukala, ang Hijab ay bahagi ay bahagi na ng pamumuhay ng mga babaeng Muslim.

Aniya, nakasaad sa Qur-an na dapat pangalagaan ng bawat babaeng Muslim ang kanilang kalinisang-puri at kababaang-loob.

Nakasaad sa House Bill 968 na ang Hijab ay isang belo na tumatakip sa ulo at dibdib na partikular na sinusuot ng mga babaeng Muslim pagkatapos ng kanilang puberty age sa harap ng mga lalaking hindi nila kapamilya.

Layon ng panukala na hikayatin ang lahat ng mga babae na maranasan ang pasusuot nito at maalis ang misconception na ikinakabit dito.

Umaasa si Hataman na dahil dito, ang mga babaeng hindi Muslim ay magkakaroon ng mas malalim na pag-intindi sa kanilang tradisyon.

Pangungunahan ng National Commission on Muslim Filipinos ang pagtataguyod dito at maging ang mga aktibidad kaugnay ng selebrasyon.

Hango ang National Hijab Day sa World Hijab Day na itinatag ni Nazma Khan na unang ginunita noong February 1, 2013. -30-

NAUWI sa trahedya ang masaya sanang inuman matapos umatake ang dalawang armadong lalaki sa Brgy. Tunasan, Muntinlupa City.

Patay ang biktimang si Danilo Marcellana na nagtamo ng mga tama ng bala sa katawan habang sugatan din ang isang Miriam Forbes na tinamaan naman sa tiyan.

Batay sa kwento ng kaibigan ng mga biktima na si Marlon Arenas, nag-iinuman sila sa tapat ng bahay ng biktima nang dumating ang dalawang hindi pa kilalang lalaki at agad silang pinaputukan.

Nakuha sa crime scene ang limang basyo ng bala mula sa hindi pa matukoy na kalibre ng baril.

Hinala ng mga pulis, posibleng matagal nang away ang motibo sa likod ng pamamaril.

Nagpapatuloy naman ang imbestigasyon ng Muntinlupa City Police sa nasabing krimen. -30-