SINALUBONG ng mga kumpanya ng langis ang Abril ng oil price hike.

Ito’y matapos na mag-anunsyo ang mga oil companies ng P0.35 na dagdag-presyo sa kada litro ng gasolina at diesel, at P0.30 namang dagdag sa kada litro ng kerosene umpisa bukas ng umaga, April 5, 2017.

Unang magtataas ang Flying V 12:01 bukas na susundan ng Pilipinas Shell, Phoenix Petroleum at Seaoil bandang 6:00 ng umaga.

Inaasahan namang mag-aanunsyo rin ng kaparehong pagtataas ang iba pang kumpanya ng langis ngayong araw.

Sa mga nakalipas na taon ay karaniwang tumataas ang presyo ng produktong petrolyo kapag panahon ng tag-init dahil sa mataas na demand ng petroleum products sa merkado.

Noong nakalipas na linggo ay sinabi ng Department of Energy (DOE) na inaasahan na nila ang oil price increase sa mga susunod na araw. -30-

SAMPUNG miyembro ng bandidong Abu Sayyaf (ASG) ang nalagas sa suud-sunod na pambobomba ng puwersa ng militar sa kuta ng mga ito sa lalawigan ng Sulu.

Ayon kay Maj. Gen. Carlito Galvez, commander ng Western Mindanao Command, ang pagkamatay ng mga Abu Sayyaf ay matapos nilang paulanan ng 105 mm. howitzer artillery ang pinagtataguan ng mga bandido.

Ang mga ito aniya ang siyang may hawak sa ilang Vietnamese hostage sa bayan ng Talipao.

Nakadiskubre umano ang kanilang tropa ng mga lasug-lasog na katawan sa mga lugar na direktang tinamaan ng bomba.

Gayunman, wala pa aniya silang impormasyon kaugnay sa mga hawak na bihag ng Abu Sayyaf sa kasalukuyan.

Noong Linggo, 32 sundalo ang nasugatan nang makaengkwentro ang ASG sa Brgy. Lao sa bayan ng Talipao.

Apat sa mga ito ang nadala sa ospital samantalang nagtamo ng minor shrapnel wounds ang 28 iba pa. -30-

ASAHAN na raw ang mabigat na daloy ng trapiko sa North Luzon Expressway (NLEx) mula hapon ng April 12, Miyerkules Santo, hanggang umaga ng April 13, Huwebes Santo.

Ayon sa pamunuan ng NLEX, 15% ang inaasahan nilang paglobo sa bilang ng mga babaybay sa NLEx at katumbas ito ng 250,000 na sasakyan.

Dahil dito, naghahanda na sila sa pagdagsa ng mga biyahero na uuwi sa kani-kanilang mga probinsya at ikinakasa na nila ang kanilang “Safe Trip Mo Sagot ko” program sa Mahal na Araw.

Simula April 7 – 17, magdadagdag ang NLEX ng patrol vehicles at enforcers na ipakakalat sa mga kalsada para asistehan ang mga mororista.

Sa April 7, 8, 12 at 13 naman ang Balinatawak Toll Plaza ay magbubukas ng maximum na 30 toll collection points mula sa normal nilang 16.

Magdadagdag din ang Mindanao Ave. Toll Plaza ng kanilang collection points sa 15 mula sa normal na 5.

Gagawin namang 29 ang toll collection points ng Tarlac Toll Plaza mula sa 5 at mula sa 4 na toll collection points ay magiging 12 na ang bubuksan ng Tipo Toll Plaza.

Ang Bocaue Toll Plaza naman ay itotodo ang kanilang collection points sa 53.

Sinabi rin ng NLEX na pansamantala muna nilang ihihinto ang road works sa Mahal na Araw para matiyak ang mabilis na pagbiyahe ng mga sasakyan. JOHNNY ARASGA

NAGBIGAY ng halos 2-bilyong yen o halos isang P1-bilyon ang Japanese government sa Pilipinas.

Ito’y bilang tulong sa pagpapaganda at pagsasaayos ng mga drug rehabilitation centers gayundin ang pagpapaigting ng treatment protocols sa mga drug dependents.

Kahapon, kapwa lumagda sa isang kasunduan sina Health Sec. Paulyn Jean Ubial at Japan International Cooperation Agency (JICA) Chief Rep. Susumo sa ilalim ng consolidated rehabilitation on illegal drug users program.

Sa kasalukuyan, mayroong 44 na accredited treatment and rehabilitation centers ang DOH para sa mga lulong sa ipinagbabawal na gamot sa bansa. -30-

HINIMOK ng ilang mambabatas si Pangulong Rodrigo Duterte na kasuhan si DILG Sec. Ismael Sueno matapos itong patalsikin sa gabinete dahil sa pagkakasangkot sa korapsyon.

Ipinaliwanag ni 1-EDUKASYON Party-list Rep. Salvador Belaro na bagama’t ang pagpapatalsik ng pangulo kay Sueno sa gabinete ay palatandaan ng pag-ayaw ng pangulo na masangkot sa korapsyon ang kanyang gabinete ay dapat pa ring kasuhan ito.

Naunang pinatalsik ng pangulo sa gabinete si Peter Lavina ng National Irrigation Administration (NIA) ngunit walang nakasampang kaso laban dito.

“While President Rodrigo Duterte’s dismissal of Ismael Sueno and the resignation of Peter Lavina is proof of zero tolerance of corruption, formal charges must be filed if evidence warrant or show probable cause. Due process will allow Sueno and Lavina to defend themselves and for prosecutors to make their case,” ani Belaro.

Sinabi naman ni House Appropriations Chairman at Davao City Rep. Karlo Alexei Nograles, ang lahat ng gabinete ay naglilingkod dahil may tiwala sa kanila ang pangulo.

Aniya pa, ito ay patunay lamang na walang sasantuhin ang pangulo kahit ang pa mga kaibigan at kaalyado niya ang mga ito.

“Simple loss of trust and confidence is enough reason for him to let you go, especially for cabinet members who serve as alter-egos of the President. The President is sending a very strong message – The President is not corrupt, and he will not tolerate any corruption in government,” ayon sa kongresista.

Naniniwala rin ang mambabatas na ang pagtanggal kay Sueno ay hindi magdudulot ng pagkakahati-hati sa gobyerno dahil lalong hindi ito papayagan ng pangulo.

“It doesn’t show a crack in the administration. It shows that the President means business when it comes to his promise to rid the bureaucracy of corruption. His anti-corruption statements are not empty rhetoric. He is not using his position to protect his allies, kapartido man o kaibigan. Walang bias, walang pinoproteksyonan.” MELIZA MALUNTAG

BUNSOD ng nararanasang pangigipit sa sahod ng mga empleyado bukod pa sa hindi pagkakaloob ng kanilang overtime pay ay maituturing na bagsak na  ang kanilang morale.

Ito ang sinabi ni German Robin, pangulo ng Immigration Officers Association of the Philippines (IOAP) kasabay ng apela kay Pangulong Rodrigo Duterte na bawiin ang suspensyon ng tinatanggap na overtime pay ng mga empleyado ng ahensya.

“Kapag ito, maibalik ang express lane fund for the augmentation ng salary namin, lalakas ang moral ng aming kasamahang immigration officers.

Sila ay patuloy na magtatarabaho at actually pinipilit namin na ibalik ang serbisyo namin,” ayon kay Robin.

Aniya pa, anim na BI personnel na ang nagbitiw sa tungkulin simula nang tanggalin ang overtime pay mg mga ito habang  nasa 30 pa ang naghain ng leave of absence (LOA) at mahigit pa sa 100 IOs ang humihingi ng certificates of employment sa BI.

Gayunman, nilinaw ni Robin na bagama’t nahihirapan man ang mga BI employees ay walang plano ang mga itong magsagawa ng protesta o mag-strike sa kadahilanang mahigpit itong ipinagbabawal sa batas.

Samantala, sinabi naman ni Atty. Gregorio Sadiasa, pangulong Employees Union Buklod-CID, na handa ang mga itong tanggapin na alisin ang overtime ng mga ito subalit dapat ay dagdagan ang tinatanggap na sahod.

Isinusulong umano nito ang pagkakaroon ng bagong immigration law para maisaayos ang pagkakaloob sa mg IOs ng dagdag sahod.

Sa kasalukuyan umano ay tumatanggap lamang ang isang abogado ng BI ng P33,000 sahod na malayung-malayo sa tinatanggap na sahod ng Public Attorney’s Office (PAO) na P70,000.

“Hindi pa naa-upgrade ang salary ng BI employees, so as of now, may Salary Grade 1 pa kami around 9,000 and thatis mas mababa pa sa minimum wage,” sabi ni Sadiasa.

Paliwanag pa ni Sadiasa, na base sa Commonwealth Act 613 o ang Immigration Act, pinapayagan ang mga itong mangolekta ng express lane fees na hindi naman idinedeposito sa National Treasury.

Ang nasabing pondo umano ay ginagamit ng pambayad sa mga empleyado na nag-o-overtime sa trabaho dahil sa kakulangan ng personnel.

Sa kasalukuyan umano ay nasa mahigit sa 2,000 regular at contractual employees na malayo sa 7,000 kinakailangan ng ahensya. JOCELYN TABANGCURA

NAKATAKDANG pauwiin sa bansa ng Department of Labor and Employment (DOLE) ang hindi bababa sa 5,000 overseas Filipino workers (OFWs) na kasalukuyang stranded sa iba’t-ibang lungsod ng Saudi Arabia.

Sinabi ni Labor Secretary Silvestre H. Bello III na sinasamantala ng labor department ang 90-araw na amnesty period na ibinigay ng gobyerno ng Saudi para sa lahat ng mga undocumented na banyaga.

Isang grupo na binubuo aniya ng mga senior officials ng DOLE ang lumipad patungong Saudi ngayong Abril na siyang magdadala pauwi sa hindi bababa sa 5,000 undocumented at stranded na mga OFW .

Ito ang aming pangunahing priyoridad. Gagawin namin ang aming makakaya upang iproseso ang kanilang mga dokumento para makauwi sila sa lalong madaling panahon,” ani Bello.

Kasunod ng amnestiya na ibinigay ng Saudi Arabia, inatasan ni Bello si Undersecretary Dominador Say, na siya ring tumatayong OIC ng Philippine Overseas Employment Administration (POEA), na pangunahan ang repatriation mission team sa Saudi at iuwi nang ligtas ang mga stranded na OFW.

Sa isang panayam, sinabi ni Say na kapag dumating na sila sa Saudi, pangangasiwaan nila ang repatriation delegation, at kukuha sila ng mas maraming indibidwal na tutulong sa pagproseso ng mga dokumento at papeles ng mga stranded na OFW upang makauwi na ito ng bansa. Ang grupo ay magtatayo ng tatlong processing centers sa Riyadh, Al Khobar, at sa Jeddah.

“Kami ay mangangailangan ng maraming tao na hangga’t maaari ay may maraming kaalaman sa pagpoproseso ng mga dokumento para sa agarang pagpapauwi ng mga OFW.

Nandito kami upang samantalahin ang amnestiya at maiuwi sila nang ligtas pabalik ng bansa sa panahon na ibinigay ng Kingdom of Saudi Arabia,” paliwanag ni Say.

Ang 90-araw na amnestiya ay sasaklaw sa undocumented, at overstaying na foreign indibidwal ng Umrah, Hajj at ang mga may hawak ng visit visa; mga OFW na may nag-expire na iqamas (residence permit), o sa mga hindi pa ipinalabas ang iqama; mga kaso ng Huroob o mga taong tumakas sa kanilang mga employer; at OFW na inabandona ng kanilang mga amo, kabilang ang kanilang mga dependents.

Ang aplikasyon para sa amnestiya ng mga OFW na may mga kaso ay ipoproseso nang walang parusa, bibigyan ng exit permit, at exemption sa pagkuha certificate of no objection mula sa kanilang mga employer.

Matatanggal din ang mga “deportee fingerprint system” at magagawang makabalik ng legal sa kaharian. Gayunman, ang mga undocumented OFW na may mga kaso sa pulisya, mga paglabag sa trapiko at bank obligations ay hindi sakop ng amnestiya.

Idinagdag ni Say na bukod sa pagpoproseso ng kanilang mga dokumento sa pag-uwi at mga clearance, ang pamahalaan ang magbabayad sa mga tiket ng eroplano ng mga stranded na OFW pabalik ng Pilipinas.

“Naiintindihan namin na ang mga ito ay distressed. Pinapayagan namin ang mga gustong manatili dahil ang ilan sa kanila ay may natagpuan ng trabaho. Gayunpaman, mas maraming OFW ang nais na makauwi ng bansa, iyon ang misyon namin: upang samantalahin ang amnesty, at iuwi ang lahat ng stranded na OFW sa Saudi,” pag-uulit ni Say.

Samantala, ang DOLE senior opisyal din ang nagpasiguro na ang labor department, OWWA, at ang Bureau of Local Employment (BLE) ay handa upang makatulong sa mga nakabalik na OFW kapag sila ay dumating na sa Pilipinas.

Sila ay bibigyan ng tulong pangkabuhayan upang patuloy na magkaroon ng pagkakakitaan habang naghahanap ng isang regular na trabaho sa bansa. JOCELYN TABANGCURA

PINAWI  ng PHIVOLCS o Philippine Institute of Volcanology and Seismology ang pangamba ng publiko kasunod ng magnitude 5.5 na lindol na tumama sa katimugang Luzon partikular sa bayan ng Tingloy sa lalawigan ng Batangas na umabot pa ang pagyanig sa Metro Manila at ilang bahagi ng Bulacan.

Ayon kay PHIVOLCS Director Renato Solidum, walang dapat ikatakot ang publiko sa nangyaring pagyanig at itinangging konektado iyon sa pinangangambahang ‘The Big One.’

 Kaugnay nito, tatlong barangay sa bayan ng San Pascual sa Batangas ang nagdilim makaraang maputulan ng suplay ng kuryente dahil sa naturang pagyanig.

 Agad namang nagsagawa ng paglilikas sa mga pasyente ng Batangas Regional Hospital sa Batangas City dahil sa sunud-sunod na aftershocks na kanilang naramdaman.

 Nagtamo naman ng bahagyang pinsala ang tanyag na Minor Basilika ng St. Martin of Tours sa Taal, Batangas kung saan, nangalaglag ang mga batong adobe na bahagi ng simbahan.

 “Yung sa Batangas City, may mga minor damages lang sa ilang mga building, pero so far wala pang significant damages na naiulat ang Office of the Civil Defense pero sa ngayon mag-uumaga syempre mas marami silang ma-observe magbibigay naman sila ng report, pero at intensity 6 wala kaming nakikitang significant damage.” Pahayag ni Solidum. JOHNNY ARASGA

NAMATAY ang isang sundalo sa Mamasapano, Maguindanao matapos barilin ng mga hinihinalang miyembro ng Bangsamoro Islamic Freedom Fighters (BIFF), Martes ng hapon.

 Kinilala ni Maguindanao police chief Senior Supt. Agustin Tello ang sundalo na si Corporal Tamano Macadatar ng 524th Engineering Battalion ng Philippine Army 52nd Engineering Brigade.

 Kabilang aniya si Macadatar sa mga sundalong nagtatayo ng isang learning facility sa Barangay Tukanalipao sa Mamasapano nang barilin ito ng mga hindi pa nakikilalang suspek dakong alas-3:00 ng hapon.

 Aniya pa, armado ng M1-Garand rifle ang suspek na lumapit pa kay Macadatar bago ito paputukan ng ilang beses.

 Bagaman isa lang ang lumapit sa sundalo, sinabi ni Tello na may 10 iba pang gunmen na naka-posisyon na ilang metro lang ang layo mula sa bunkhouse kung saan namamalagi ang mga sundalo.

 Wala sa lugar ang mga kasamahan ni Macadatar nang mangyari ang pamamaril. JOHNNY ARASGA

ITATALAGA ng pamahalaan ang mga sundalo bilang pansamantalang kapalit ng mga nag-resign na opisyal ng Bureau of Immigration (BI).

 Ito’y, ayon kay DBM o Department of Budget and Management Secretary Benjamin Diokno ay upang maibsan na ang mahabang pila sa mga Immigration booth sa NAIA o Ninoy Aquino International Airport dulot ng kakulangan ng mga tauhan.

 Aniya, kanila nang sinasanay ang nasa 200 sundalo para pansamantalang umupo bilang kapalit na Immigration officers.

 Gayunman, hindi binanggit ni Diokno kung nakahanda na ang mga nasabing sundalo na tumao sa mga booth sa Semana Santa na inaasahang dagsa ang mga parating at papaalis na mga mananakay.  JOHNNY ARASGA

NAMIMILIGRONG makasuhan ng technical malversation ang pamahalaan kung ipamimigay sa Kadamay ang pabahay na nakalaan sa mga sundalo at pulis sa Pandi, Bulacan.

 Ayon kay Cabinet Secretary Leoncio Evasco, nakasulat sa batas ng budget na ang pondong inilaan ay para sa pabahay sa mga sundalo at pulis kaya’t hindi ito puwedeng gamitin sa ibang paraan.

 Dahil dito, kinausap na anya niya si Congressman Alfredo Benitez na siyang Chairman ng Committee on Housing sa Kongreso upang makagawa ng paraan kung paano aamyendahan ang batas.

 Sinabi ni Evasco na handa siyang sundin ang utos ng Pangulo na ibigay sa Kadamay ang mga inokupahan nilang pabahay sa Pandi, Bulacan subalit marami pa anyang isyu ang dapat klaruhin dito.

 Isa na dito kung exempted ba ang Kadamay sa polisiya ng NHA o National Housing Authority na kailangang magbayad ng dalawandaang piso (P200) ang nabigyan ng pabahay pagkaraan ng limang (5) taon.

 Sinabi ni Evasco na aalamin rin niya kung ang inokupahang bahay ng Kadamay ang ibibigay na sa kanila o ihahanap sila ng bakante dahil posibleng may matagal nang nag-aantay na benepisyaryo ang inokupahang bahay.

Maliban dito, sasalang rin aniya sa evaluation ang mga miyembro ng Kadamay na mabibigyan ng bahay upang malaman kung dati na silang naging benepisyaryo ng pabahay at kung ano ang ginawa nila sa naibigay sa kanilang bahay.

 Ayon kay Evasco, marami na kasing report na isinasanla o ibinebenta lamang ng mga benepisyaryo ang bahay na naibigay sa kanila ng pamahalaan. JOHNNY ARASGA

PINAG-AARALAN na ng National Bureau of Investigation (NBI) na isalang sa lie detector test ang lahat ng mga isinasangkot sa anomalya sa National Printing Office (NPO) kaugnay sa P74 milyong pisong pag-iimprenta ng mga document forms ng Social Security System (SSS).

Ayon kay NBI-Anti Fraud Division head, Atty. Irvin Garcia, gagamitin nila ang lahat ng paraan upang mahukay ang katotohanan sa likod ng sinasabing iregularidad.

Una nang tumugon sa subpoena ng NBI ang mga isinasangkot sa isyu na kinabibilangan ng big three printers na Best Forms Security Printer, na pag-aari ni Benjamin Yam; Tri-Print Work ni Ramil Tamayo at Metro Color Company ni Celso Viray.

Maging ang mga opisyal ng NPO sa pangunguna nina  Officer in charge Francisco Vales at dating Bids and Awards Committee Chairman Sherwin Prose Castaneda.

Isinumite ng mga ito ang kani-kanilang mga dokumento na may kinalaman sa kontrata. Sinabi ni Garcia na ipatatawag din nila ang iba pang nasasangkot sa isyu kasama na ang mga dating miyembro ng NPO-BAC at mga opisyal ng SSS.

Tiniyak ng opisyal na agad nilang ihahain ang kaso sa mga lilitaw na may pananagutan sa transaksyon upang mapapanagot ang mga ito.

Ang kontrata ay una nang ini-award sa Western Visayas Printing Corporation na pag-aari ni Raymond Malapayo.

Ang naturang anomalya ay una nang inimbestigahan ng Presidential Communications Operations Office (PCOO) Legal Affairs alinsunod sa kautusan ni Secretary Martin Andanar.

Nagdesisyon naman si Undersecretary for Legal Affairs, Atty. Enrique Tandan III, na isang Mason member na i-refer ang isyu sa NBI para sa posibilidad ng paghahain ng kaso.

Dahil sa anomalya, nag-resign noong November 21, 2016 ang lahat ng miyembro ng Bids and Awards Committee sa pangunguna ni Castañeda. JOCELYN TABANGCURA

TODAS ang isang tubero matapos pagbabarilin sa loob ng kanyang bahay sa Libis Extn., Kalayaan St., Brgy. Batasan Hills, Quezon City.

Kinilala ang biktimang si Jomar Triles, alyas ‘Tamul’, 22.

Ayon sa kapatid ng biktima na si Alexis, nag-iinuman sila ng kanyang nakababatang kapatid at iniwan niya lang ito sandali para ihatid ang kanyang girlfriend.

Nang kanyang katukin ang kanilang bahay, tumambad na sa kanyang harapan ang walang buhay na katawan ng kanyang kapatid.

Aminado naman ang kapatid ng biktima na dati nang gumagamit ng droga ang kanyang kapatid, at sumuko na rin ito dati sa Oplan Tokhang.

Kwento naman ng Edgardo Aguilar, BPSO, nakita nila habang rumoronda ang apat na lalaking nakabonet at ilang minuto lang ay nakarinig na sila ng sunud-sunod na putok ng baril.

Inaalam pa ngayon ng pulisya kung anong motibo sa likod ng pamamaril. JOHNNY ARASGA

NADAKIP ang 20 katao matapos salakayin ang mga cybersex den sa tatlong magkakahiwalay na operasyon sa Quezon City.

Unang sinalakay ng Quezon City Police District-Special Operations Unit at PNP-Anti Cybercrime Group ang isang unit sa One Executive Bldg. sa West Ave. at dito naaresto ang 10 kalalakihan.

Ikinasa ang kasunod na operasyon sa isang residential building sa Ilocos Sur St., Brgy. Bago Bantay at naaresto ang 10 iba pa.

Wala namang dinatnang tao ang mga operatiba sa huling operasyon sa isa pang condominium sa Timog Ave.

Ayon kay QCPD Director S/Supt. Guillermo Eleazar, nagsisilbing online chat operators at nagpapanggap na mga modelo ang mga nahuling suspek para sa mga parokyanong foreigner na nakikipag-cybersex.

Ayon pa kay Eleazar, ginagamit ng mga suspek ang mga impormasyong kanilang nakuha para kikilan ang kanilang mga nabibiktima.

Nahaharap ang mga naaresto sa kasong paglabag sa Republic Act 10175 o Cybercrime Prevention Act of 2012. JOHNNY ARASGA

PALAISIPAN ngayon sa pulisya ang pagpatay sa isang dating beauty titlist matapos pagbabarilin ng mga hindi nakikilalang armadong kalalakihan sa tapat ng kanyang bahay sa Bulacan town kahapon (Miyerkules).

Sinabi ni Supt. Julio Lizardo, Plaridel chief-of-police, nagdala pa ng bouquet of flowers at box of chocolates ang dalawang suspek bago binaril sa ulo ang kanilang target na nakilalang si Mary Christine Balagtas, 23. Si Balagtas ay nanalong Miss Lakambini ng Bulacan noong 2009 at nakatira sa 1st La Miranda Subd., Brgy. Banga, Plaridel.

Blangko pa ang pulisya kung sino ang nasa likod ng pamamaril at kung ano ang motibo sa pagpatay sa biktima.

Isinugod pa ang biktima sa Our Lady of Mercy Hospital sa Pulilan town pero hindi na ito umabot nang buhay.

Sinabi ni Lizardo na tumakas ang mga suspek sakay ng motorsiklo pero gayunpaman, may nakita nang lead ang pulisya para makilala ang mga salarin.

Tiniyak din ni Lizardo na mga hired killer ang pumatay kay Balagtas dahil na rin sa estilo ng kanilang pagpatay.

Isa sa mga anggulong sinisilip ng kanyang mga imbestigador ay hinggil sa binasted nitong manliligaw na isang maimpluwensyang tao sa Bulacan. BOBBY TICZON

BISITA ni dating Pangulo at kasalukuyang Pampanga Rep. Glora Macapagal-Arroyo sa kanyang birthday party sina Pangulong Rodrigo Duterte at dating Sen. Ferdinand “Bongbong” Marcos, Jr. sa bahay nito sa La Vista Subd., Quezon City nitong Miyerkules ng gabi.

Nauna nang dumalo si Marcos sa isa pang birthday party ni Arroyo na idinaos naman sa Pampanga.

Samantala, hindi naman nakadaan si Pangulong Duterte sa nasabing birthday party ni Arroyo dahil sa prior commitment sa iba pang mga events.

Pero bumawi naman ang punong ehikutibo at maging ang kanyang common-law-wife na si Honeylet Avanceña at kanilang 12-taong gulang na anak na si Veronica ay kasama sa okasyon.

Samantala, nasa party din sina dating first gentleman Mike Arroyo at Sen. Richard Gordon na todong binatikos si Duterte sa komento nitong ibigay sa mga miyembro ng Kadamay ang mga pabahay para sa mga sundalo at pulis. BOBBY TICZON

PINAGKOKOMENTO ng Office of the Ombudsman si dating Pangulong Benigno Aquino III sa motion-to-reinstate nito sa mga kasong inihain laban sa kanya kaugnay sa Disbursement Acceleration Program (DAP).

Magugunitang noong Marso 13 nang maghain ng motion-for-reconsideration ang mga complainant na sina Bayan Muna Rep. Carlos Isagani Zarate, Renato Reyes, Benjamin Valbuena, Dante LA Jimenez, Mae Paner, Antonio Flores, Gloria Arellano at Bonifacio Carmona, Jr., pati na rin si dating Budget Sec. Florencio Abad, sa desisyon ng Ombudsman na hindi panagutin si Aquino sa nasabing kaso.

Base sa mga complainant, nabigo ang Ombudsman na makahanap ng probable cause para idiin si Aquino at si dating Budget Sec. Florencio Abad para sa technical malversation at graft.

Sinabi ng Ombudsman na nakapaghain na si Abad ng kanyang sariling motion-for-reconsideration para sa nasabing kaso.

Binigyan naman ng 15-araw si Aquino simula nang matanggap nito ang notice para maghain ng komento sa mga motion-for-reconsiderations. BOBBY TICZON