DAHIL umano sa napabayaang kandila ang sanhi ng sunog sa mga kabahayan sa Leroy St., sa Paco, Maynila kaninang madaling-araw.

Ayon kay Sr. Insp. Erik Sabiano, ng Manila Fire Bureau pasado alas-12 ng madaling-araw nang magsimula ang sunog sa bahay in Carla Tejedor.

Nagsimula umano sa ikalawang palapag ang apoy at mabilis itong kumalat sa mga kapitbahay .

Aminado naman si Tejedor na naiwan niyang nakasindi ang kandila sa kanilang bahay bago umalis para magtinda.

Nasa 20 pamilya ang apektado sa sunog matapos madamay na masunog ang kanilang bahay.

Tinatayang aabot sa P50,000 halaga ng ari-arian ang natupok ng apoy na idineklarang fire out ganap na ala 1-ng madaling-araw, Linggo.

Tinitignan ding sanhi ng sunog ang mga jumper sa lugar na isa sa posibleng sanhi rin ng sunog. JOCELYN TABANGCURA

NAITAAS pa ng Los Angeles Clippers sa tatlo ang kanilang panalo matapos na pataubin ang Los Angeles Lakers, 115-104, na may apat nang sunod na talo.

Naging makasaysayan din ito para kay Coach Doc Rivers sapagkat kasabay ng kanilang panalo ngayong araw ay nakamit din niya ang kanyang ika-800 na career victory sa tulong ni Blake Griffin.

Si Griffin ay bumuslo ng 36 points sa 12 of 15 shooting, habang si Chris Paul ay mayroong 29 points, nagdagdag naman ng 19 si JJ Redick.

Sa ngayon ay mayroon nang 47 panalo ang Clippers sa loob ng 78 outings.

Samantala, ang Lakers naman ay mayroon nang 55 talo sa loob ng 76 na laro.

Umiskor si David Nwaba ng off the bench 19 points para pangunahan ang Lakers.

Nagtapos naman na may 18 points si Brandon Ingram at nagdagdag ng 16 points si Thomas Robinson. BOBBY TICZON

TATLONG pampublikong ospital sa Maynila ang  makikinabang sakaling maisakatuparan ang posisyon ni Pangulong Rodrigo Duterte na magkaroon ng rasonableng out-of court settlements sa mga kompanyang dapat magbayad ng sapat na buwis.

Pabor sa posisyong ito si Manila Rep. Manny Lopez na nauna na ring sinang-ayunan ni Manila City Mayor Joseph Estrada.

Mismong si Estrada nag-endorso sa Department of Finance (DoF) sa mabilisang benipisyo lalo na sa mga mahihirap nangangailangan ng gamot.

Mainam na anila ang ganitong sistema kaysa naman maghintay pa na matapos ang kaso sa korte na kung minsan ay inaabot ng taon.

Ang tatlong ospital  ay ang Ospital ng Tondo, Tondo Medical Center at Gat Andres Bonifacio Medical Center.

Sinabi ni Lopez na batay sa posisyon ng pangulo may P1-bilyon pondo mula sa P3-bilyon na iniaalok na out-of-court settlement ng Mighty Corporation ang maibibigay upang maipaayos ng naturang tatlong ospital.

“This is a very good news for my poor constituents and we support this proposal to provide immediate relief to indigent patients who are in need of vital health services. To instantly raise funds for the basic social services of the poor people is a guaranteed victory,” ani Lopez.

Naunang sumang-ayon sina Estrada at House Speaker Pantaleon “Bebot” Alvarez sa mungkahi ni Pangulong Duterte na ang mababawing buwis sa mga negosyo na dapat nilang bayaran ay maibigay para sa social service projects sa halip na maghintay pa ng maraming taon bago maresolba at magamit.

“It is the decision of the President [to enter in an out-of-court settlement], he’s the commander-in-chief,” sinabi pa ni Alvarez.

Aniya ginagawa lamang ng pangulo ang mabuti para sa bansa. MELIZA MALUNTAG

HINDI dapat na ituring  na ‘normal’ lamang ang pangangalunya o pagkakaroon ng karelasyon maliban sa iyong asawa.

Ito ang reaksyon ni Lingayen-Dagupan Archbishop Socrates Villegas, pangulo ng maimpluwensiyang Catholic Bishops’ Conference of the Philippines (CBCP), sa tahasang pag-amin ni House Speaker Pantaleon Alvarez na mayroon siyang nobya maliban sa kanyang asawa.

Ayon kay Villegas, walang sinuman ang ‘exempted’ sa ikaanim na kautusan ng Panginoon na may kinalaman sa adultery, kaya’t hindi ito dapat na ituring na normal lamang.

“No one is exempted from the 6th Commandment, which is adultery. So whether you are a teenager or an 80-year-old lola, no one is exempt,” ani Villegas. “We should not consider this as normal.”

Pinaalalahanan rin ni Villegas ang publiko na hindi na dapat pang makipag-relasyon ang mga taong may asawa na.

Nauna rito, nagkaroon ng alitan sa pagitan ng mga mambabatas na sina Alvarez at Davao del Norte Rep. Antonio Floirendo Jr., na sinasabing nag-ugat sa awayan ng kani-kanilang nobya. MACS BORJA

NANANATILING sapat ang suplay ng kuryente sa buong bansa ngayong papasok na ang panahon ng tag-init o summer season.

Ito ang muling pagtitiyak ng National Grid Corporation of the Philippines (NGCP) sa kabila ng inaasahang mataas na pagkonsumo ng kuryente sa mga kabahayan dahil sa mainit na panahon.

Ayon sa NGCP, walang inaasahang brownout sa buong bansa maliban na lamang kung magkakaroon ng mga unscheduled maintenance shutdown at kung tataas ang demand sa kuryente nang lagpas sa inaasahan.

Batay sa pagtaya ng NGCP, inaasahang aabot sa mahigit 9,800 megawatts ng kuryente ang magiging demand sa susunod na buwan.

Ngunit, nananatili pa rin naman ang peak suplay ng kuryente sa mahigit 11,000 megawatts o katumbas ng 1,000 megawatts ng reserve power. JOHNNY ARASGA

IPINAAARESTO at papanagutin ng National Democratic Front (NDF) sa Southern Mindanao si dating Pangulong Benigno ‘Noynoy’ Aquino III at iba pang opisyal ng nakalipas na administrasyon.

Kaugnay ito sa marahas na dispersal sa mga magsasaka na nagkilos-protesta sa Kidapawan City noong Abril 2 ng nakalipas na taon.

Ayon sa rebolusyonaryong grupo, dapat makasuhan sina Aquino at mga alipores nito ng kasong crimes against humanity at iba pang kaso ng paglabag sa karapatang pantao.

Maliban kay Aquino, ipinaaaresto rin ng rebolusyonaryong grupo sina North Cotabato Gov. Emmilou Taliño-Mendoza, Kidapawan City Mayor Joseph Evangelista, at North Cotabato Rep. Nancy Catamco.

Gayundin ang iba pang opisyal ng Government Peace Panel noong administrasyong Aquino, mga opisyal ng militar at mga pulisya.

Ipinauubaya na ni Pangulong Rodrigo Duterte sa hukuman ang posibleng maging kapalaran ni dating Pangulong Noynoy Aquino.

Ito’y makaraang ipanawagan ng NDF sa Southern Mindanao ang pagpapanagot kay Aquino gayundin sa iba pang mga opisyal nito hinggil sa madugong dispersal sa Kidapawan noong isang taon.

Pagbibiro pa ng pangulo, handa rin siya magpakulong kasama si Ginoong Aquino ngunit hiling niya na magbukod sila ng selda. JOHNNY ARASGA

BINUKSAN na ng Metropolitan Manila Development Authority (MMDA) at ng Bureau of Fire Protection (BFP) ngayong araw ang ikaapat na lane ng EDSA para sa mga fire truck.

Sa opening ceremony, ipinakita ng MMDA kung papaano gagamitin ang naturang fire lane.

Sa tulong ng BFP, nagsagawa ng fire drill sa kahabaan ng EDSA-Boni Ave. sa Mandaluyong City.

Ayon kay BFP-National Capital Region Dir. Wilbero Kwan Tiu, gamit ang fire lane, ang pang-apat na lane mula sidewalk sa EDSA, mas mabilis na makakaresponde ang mga bumbero sa sunog lalo na kapag rush hour.

Lahat aniya ng fire truck sa Metro Manila ay iisa na lamang ang gagamiting lane.

Sa halip aniya na ang firetruck ang iiwas, ang mga motorista na ang dapat umiwas kapag may pagkakataon.

Kasabay nito, hinimok ni Kwan Tiu ang lahat ng alkalde sa Metro Manila na maglagay din ng fire lanes sa kani-kanilang area of jurisdiction bukod sa EDSA.

Dagdag ni Kwan Tiu, mamarkahan ng BFP ang mga fire lane bilang no parking zone at ang mga lalabag na motorista ay may parusa na haharapin sa paglabag sa Fire Code of the Philippines.

Maaari rin aniyang basagin ng mga bumbero ang bintana ng mga sasakyan para mapaalis sa fire lanes lalo na kapag may emergency. -30-

SISIMULAN na ang ang second phase ng testing sa bakuna laban sa Zika virus sa Estados Unidos.

Ayon kay Dr. Anthony Fauci, director ng National Institutes of Allergy and Infectious Diseases, naibigay na ang $100-milyong pondo para sa pagpapatuloy ng pagsusuri sa nasabing bakuna.

Aniya, sa ikalawang phase ng test ay kanilang susuriin ang bisa nito.

Kanilang pag-aaralan kung may kakayanan ang nasabing vaccine na mapasigla ang immune system para makabuo ng antibodies laban sa zika at aalamin kung mapipigilan nito ang pagkalat ng infection.

Inaasahang maipapalabas ang preliminary result ng nasabing trial bago matapos ang taon.

Ang Zika ay virus na dala ng babaeng lamok na aedes aegypti, ang parehong lamok na nagdudulot ng dengue at maaari ring makahawa sa pamamagitan ng pakikipagtalik.

Ito’y maaaring magresulta ng microcephaly at guillain barre syndrome sa mga sanggol na ipinagbubuntis. -30-

DUMAGSA na sa mga bus terminal sa Cubao, Quezon City ang mga pasaherong luluwas sa mga probinsya ngayong Lunes.

Karamihan sa mga pasahero sa Araneta bus terminal ay pauwi ng Samar at Leyte para magbakasyon at gunitain ang Semana Santa.

Gayunman, ayon sa isang pasaherong si Aling Editha Suarez, tumaas na ang pasahe sa aircon bus patungo sa bayan ng Bato sa Leyte.

Ang dating P1,500 one-way na pamasahe ay P1,600 – P1,700 na ngayon.

Inaagahan umano nilang umuwi para hindi na maabala sa pagdami ng pasahero habang nalalapit ang Holy week.

Samantala, punuan na rin ang mga bus sa mga terminal sa Pasay City dahil dagsa na rin ang mga pasahero.

Wala pa namang namamataang pulis na nagbabantay sa mga nabanggit na terminal. -30-

APRUBADO na ng Sangguniang Panglungsod ang bagong anti-smoking ordinance sa lungsod na papatawan ng mas mabigat na parusa.

Ayon kay Manila Mayor Joseph Estrada, pinasa ng konseho ang bagong anti-smoking ordinance sa Maynila na may multang P5,000 sa mga lalabag nito.

Ani Estrada, inaasahan niyang makatutulong ang Ordinance No. 7812 na kontrolin ang paninigarilyo at pangalagaan ang kalusugan ng mga Manilenyo, at magsimula na ng healthy lifestyle tulad ng pagtigil niya sa paninigarilyo nitong Disyembre.

“We don’t have to remind everyone, again and again, that smoking is bad for your health. Kailangan pa bang i-memorize ‘yan?” ani Estrada. “But with this new ordinance that carries heftier fines and penalties, I’m expecting that smokers, at least, will have to think twice before lighting a cigarette.”

“Warning na ito sa inyo,” babala pa niya.

Matapos sandaling maospital nitong Disyembre dahil sa asthma attacks, tinigil na ni Estrada ang paninigarilyo.

Matapos nito, iniutos niya nitong Pebrero ang mahigpit na pagpapatupad ng Ordinance No. 7748 na nagbabawal sa paninigarilyo sa mga pampublikong gusali tulad ng ospital, paaralan at mga pampublikong lugar tulad ng shopping malls, restaurants, bars, at iba pa.

Sa isinagawang en banc session nitong Huwebes, Marso 30, pinasa na ng Sangguniang Panglunsod sa third and final reading ang Ordinance No. 7812 o ang “Smoke-Free Ordinance of the City Government of Manila” na akda ni Coun. Casimiro Sison.

Ang sinumang lalabag sa bagong ordinansang ito ay papatawan ng multang P2,000 o isang araw na pagkakakulong sa first offense; P3,000 at dalawang araw na kulong sa second offense; at P5,000 at tatlong araw na kulong sa third offense.

Malayo ito sa Ordinance No. 7748 na nagpapataw lang ng multang P300 at hanggang dalawang araw na kulong sa mga mahuhuling violator.

Istriktong pinagbabawal dito ang paninigarilyo hindi lang sa loob ng mga city government-buildings kundi pati na rin sa loob ng compound ng mga ito, at hanggang sa 100 metro nito.

Bawal rin ang “possession” ng kahit anong tobacco products, maging ang uso ngayong vape, “whether the smoke is being actively inhaled or exhaled.”

Maglalagay din naman ng mga smoking area sa labas ng mga gusali na pag-aari ng pamahalaang lungsod basta’t hindi ito bababa sa 10 metro ang layo sa mga dinadaanan ng tao, at kinakailangang may mga sign na “Smoking Area” at “Minors Not Allowed” na may kasama pang graphic health warnings. JOCELYN TABANGCURA-DOMENDEN

MAY sapat na pondo ang Commission on Elections (Comelec) sakaling matuloy ang pagdaraos ng Barangay at Sangguniang Kabataan Elections (BSKE) sa Oktubre 23.

Ito ang tiniyak kahapon ni Comelec spokesman James Jimenez nang maging panauhin sa lingguhang Kapihan sa Manila Hotel sa Intramuros, Manila.

Ayon kay Jimenez, posibleng umabot ng P5-bilyon ang gastusin nila sa pagdaraos ng nalalapit na eleksyon.

Kahit aniya may mga nagastos na sila noong nakaraang taon para sa paghahanda sa naipaglibang halalan, ay sapat aniya ang hawak nilang pera para mairaos ang barangay polls kaya’t wala pa silang planong humingi pa ng karagdagang pondo para rito.

Aminado rin naman si Jimenez na posibleng mas malaki ang gastusin nila sa eleksyon ngayon dahil na rin sa mas maraming botante na maaaring umabot ng 56-milyon.

Kaugnay nito, muli namang umapela si Jimenez sa Kongreso na kaagad na desisyunan kung itutuloy ba o hindi ang barangay polls, kasunod na rin ng pahayag ni Pangulong Rodrigo Duterte na plano niyang magtalaga na lamang ng barangay officials at huwag nang magkaroon ng eleksyon.

Mas maganda aniya kung pagsapit ng Hulyo ay may malinaw ng desisyon hinggil dito upang mapabagal nila ang isinasagawang paghahanda para sa halalan at maiwasan ang mga gastusin.

Tiniyak rin ni Jimenez na hangga’t wala pang batas na pinipirmahan ang pangulo para sa pagpapaliban ng eleksyon ay tuluy-tuloy lang ang gagawin nilang preparasyon sa eleksyon. MACS BORJA

PATAY ang isang lalaking kalalaya lamang sa bilangguan matapos makulong sa kasong pagnanakaw nang pagbabarilin ng nag-iisang suspek sa Tondo, Manila kaninang umaga.

Sa ulat ni PO3 Ryan Jay Balagtas ng Manila Police District (MPD)- homicide section, nakatayo lamang ang biktimang si Ryan Tom Cay, 25, binata, walang hanapbuhay, ng 1120 A2 Batangas St., Tondo, nang bigla na lang itong pagbabarilin sa Molave St., malapit sa kanto ng Batangas St. dakong 10:45 ng umaga.

Ayon sa mga saksi, nakarinig sila ng mga putok ng baril at nang tingnan ay duguan nang nakabulagta si Cay.

Mabilis namang tumakas ang suspek na inilarawang naka-orange na jacket at maong pants.

Bigo ang mga testigo na makilala ang suspek dahil sa suot nitong bike helmet at maskara nang isagawa ang krimen.

Teorya ng pulisya, may kinalaman sa iligal na droga ang krimen matapos aminin ng ama ng biktima na si Tomas Cay na isang drug dependent ang anak.

Iniimbestigahan pa ng mga awtoridad ang krimen upang matukoy ang pagkakakilanlan ng suspek, gayundin ang motibo sa pagpatay. JOCELYN TABANGCURA-DOMENDEN

SWAK sa kulungan ang 22 sabungero matapos mahuli sa isang tupada sa Brgy. Payatas, Quezon City kahapon ng tanghali, Abril 3, 2017.

Kinilala ni Quezon City Police District (QCPD) Director, P/C Supt. Guillermo Lorenzo Eleazar ang mga nadakip na sina Christopher Perez, 42, Antonio Habitchuela, 48, Ryan Longgasa, 24, Rey Temporas, 30, Julian Daniel, 36, Ramon Martillan, 35, Bienvinido Enverzo, 65, Arnulfo Balictar, 61, Jeramie Daniel, 33, Rene Nivera, 30, Emeliano Nedura, 39, Danilo Acebog, 61, Rosendo Salvador, Jr., 50, Mark Santiago, 37, Ruby Gauran, 59, Christopher Odias, 35, Jonathan Samones, 45, Antonio Gueco, 54, Noe Abaigar, 61, at Remiel Salvador, 24.

Nakumpiska ng mga pulis ang dalawang patay na piraso ng panabong na manok at P2,200 halaga ng taya.

Kaugnay nito, nadakip naman ng mga operatiba ng La loma Police Station (PS-1) dakong 1:15 ng tanghali sa Kaingin Bukid, Tabing Ilog, Brgy. Apolonio Samson, sina Alejandro Lucero, 44, ng Brgy. Muzon, San Jose del Monte, Bulacan, Ernesto Cuerdo, 37, at isang 17-anyos na batang lalaki mula sa 10-H Catherine St., Parkway Village, Brgy. Apolonio Samson, dahil sa iligal na tupada na nakuhanan ng panabong na manok at P500 halaga ng taya.

Samantala, nadakip naman ang mga suspek na sina Efren Flores, 44, ng156 Tieremas St., Brgy. Bagong Barrio, Caloocan City; at Jeffrey Bautista, 26, ng 63 Filipino Ave., Brgy. Balon Bato, QC matapos mahuling nagkakara-cruz dakong 3:00 ng hapon.

Nakumpiska rin ng mga tauhan ng Talipapa police ang isang video-karera (VK) machine sa 800 Bougainvilla St., Brgy. Baesa dakong 9:40 ng umaga matapos makatanggap ng reklamo mula sa 911 hinggil sa naturang sugal. SANTI CELARIO

BISTADO ng nakararaming mambabatas at maging mga staff ng Kamara ang pagkakaroon ng ‘girlfriend’ ni House Speaker Pantaleon Alvarez.

Matatandaang si Alvarez ang isa sa mga maingay noong kumastigo kay Sen. Leila de Lima dahil sa pagkikipagrelasyon nito sa kanyang driver na si Ronnie Dayan.

Paliwanag ni Kabayan Rep. Harry Roque, naging tapat si Alvarez sa publiko dahil hindi naman nito tinangkang itago ang kanyang relasyon.

Kahit sa simula pa lamang aniya ay alam na nilang hiwalay na si Alvarez sa kanyang maybahay na si ginang Emelita, pinuno ng Congressional Spouses Foundation, Inc., na may tanggapan sa Kongreso.

Ang karelasyon na rin aniya nitong si Jennifer Maliwanag Vicencio ang minsan na ring nakakasama ng Speaker sa ilang okasyon sa Kamara.

Iba rin aniya ang kaso nina Alvarez at De Lima.

Sa kaso aniya ni De Lima at Dayan, may alegasyon ng ‘possible criminal act’ dahil ginawa umanong bagman ng senadora ang kanyang driver/lover na wala sa kaso nina Alvarez at Vicencio.

Para naman kay Surigao del Norte rep. Robert Ace Barbers, suportado pa rin ng malaking bilang ng mga mambabatas at maging ng pangulo si Alvarez sa kabila ng kontrobersiyang kinakaharap nito. JOHNNY ARASGA

KULUNGAN ang bagsak ng isang janitor sa Ninoy Aquino International Airport (NAIA) makaraang mahuling nagbebenta ng shabu sa oras ng trabaho.

Kinilala ng Philippine Drug Enforcement Agency (PDEA) ang suspek na si Jesus Dotollo, building attendant, at nakatalaga sa admin building ng Manila International Airport Authority (MIAA).

Nabatid sa Office of the Assistant General Manager-Security and Emergency Services ng NAIA, tatlong sachet ng shabu ang nakuha ng PDEA mula kay Dotollo na nagkakahalaga ng P1,200 na nabili ng isang poseur buyer ng PDEA.

Kasalukuyan nang hawak ng PDEA sa Terminal 3 si Dotollo na nahaharap sa kasong paglabag sa Republic Act 9165 o ang Comprehensive Dangerous Drugs Act of 2002. JOHNNY ARASGA

SINIBAK na sa puwesto ni Pangulong Rodrigo Duterte si Department of Interior and Local Government (DILG) Sec. Mike Sueno.

Ito ang kinumpirma ni Presidential Spokesperson Ernesto Abella sa isang pahayag.

Ayon kay Abella, kawalan ng tiwala ang naging dahilan ng pagkakasibak kay Sueno.

“President Rodrigo Roa Duterte has dismissed Department of Interior and Local Government Sec., Mr. Ismail Sueno, citing loss of trust and confidence,” ani Abella.

Ginawa ang pagsibak kay Sueno gabi ng Lunes, sa pagtatapos ng 14th cabinet meeting.

Bago ang pagsibak, tinanong muna ng pangulo si Sueno at sinabi na ang naturang summary dismissal ay nagsisilbing babala sa lahat ng cabinet officials.

Sinabi ni Abella na hindi kailanman sasang-ayon si Pangulong Duterte sa mga kwestyonableng desisyon na gagawin ng sinuman sa mga miyembro ng gabinete.

“The President had earlier asked a few questions of Mr. Sueno but the summary dismissal served as a warning that Mr. Duterte would not countenance any questionable or legally untenable decisions by any member of the Cabinet,” dagdag pa ni Abella.

Sa katunayan aniya, isa sa mga kumumbinsi kay pangulong Digong si Sueno para tumakbo noong nakaraang May 2016 elections.

Pero hindi umano ito sapat na dahilan para hindi sibakin si Sueno lalo pa’t pursigido si Duterte na magpatakbo ng isang mapagkakatiwalaang gobyerno sa pamamagitan ng pagtugon sa mga isyu ng korapsyon. JOHNNY ARASGA

BINALAAN ni Pangulong Rodrigo Roa Duterte ang mga drug addict na huwag pakalat-kalat sa lansangan dahil handa niyang ipatapon sa Manila Bay ang mga ito gawing fertilizer sa mga isda.

Sa naging talumpati ni Pangulong Rodrigo ay sinabi nito na makabubuti aniyang magkulong na lamang ang mga durugistang ito sa kanilang bahay sa halip na maging pakalat-kalat sa daan.

“Avoid the streets because people are afraid if you congregate in corners, especially ‘yung mga istasyon-istasyon diyan sa Ermita, pati… Get out. Kung gusto ninyong mabuhay pa nang mahaba-haba, huwag kayong mag-biktima diyan,” anito.

At kung bubuhayin naman niya ang away ng gobyerno laban sa illegal na droga ay agad niyang aatasan ang kapulisan na magsagawa ng pagro-ronda.

“Iyang daan, ‘yang publiko, ‘yang plaza, para lang ‘yan sa matutuwid na tao at gumagalang sa batas. Hindi ‘yan pwedeng pag-istambayan ng mga kriminal where you pry against the civilians there na tinatakot ninyo, hino-holdup ninyo,” anito.

Kaya iginiit ni Pangulong Duterte sa mga kaharap na Boy Scouts na isabuhay ang kanilang sinumpaan para sa bayan, lumayo sa iligal na droga at paghandaan ang pagiging susunod na mga lider ng bansa.

Nais din ng pangulo na sumailalim ang mga kabataan sa Citizens Military Training at Reserved Officers Training Corps (ROTC) para magsanay sa paghawak ng armas, magkaroon ng disiplina, maging makabayan at paghandaang ipagtanggol ang bansa, imbes na nagtatambay lang at magbisyo na sanhi ng maraming krimen. KRIS JOSE

BONTOC, MOUNTAIN PROVINCE – Patay ang isang opisyal ng Philippine National Police (PNP) matapos pagbabarilin ng mga hindi nakilalang suspek sa harap ng kanyang bahay sa Eyeb, Poblacion, Bontoc, Mountain Province nitong Linggo ng gabi, April 2.

Kinilala ang biktimang si C/Insp. Benjamin Falangon Challoy, 40, hepe ng Bontoc PNP at president ng Highway Patrol Group (HPG) Mountain Province.

Sa inisyal na imbestigasyon, nakarinig na lang ng mga putok ng baril ang kapitbahay ng biktima at nakita nilang tumakbo ang mga suspek palayo sa bahay ng biktima.

Bago ito, pauwi na ang biktima galing sa Bontoc police office at papasok sa kanilang bahay ng paulanan siya ng putok.

Agad na itinakbo sa pinakamalapit na ospital ang biktima ngunit hindi na rin umabot nang buhay sa dami ng tinamong tama ng bala sa katawan.

Nakarekober ng Bontoc-Scene of the Crime Operatives (SOCO) ng tatlong tingga ng .45 pistol na bumaon sa katawan ng biktima.

Sa ngayon, patuloy na nagsasagawa follow-up operation kung ano ang motibo sa krimen at patuloy ang manhunt operation laban sa mga suspek. ALLAN BERGONIA