TIMBUWANG ang tatlo makaraang pagbabarilin sa loob ng isang bahay sa Commonwealth Ave., Brgy. Old Balara, Quezon City.

Nagkaroon ng mga tama ng bala sa ulo ang mga biktimang sina Robert Mago, isang alyas Anabelle, at isang alyas Roy.

Ayon sa mga residente, tatlong suspek na nakabonet ang pumasok sa nasabing bahay na sinasabing pugad ng video-karera.

Ilang sandali pa, nakarinig na lamang ang mga tao sa lugar ng sunod-sunod na putok ng baril at mabilis namang tumakas ang mga suspek.

Walong basyo ng bala ng baril ang narecover ng pulisya sa pinangyarihan ng krimen.

Samantala, dalawa naman ang nasugatan matapos mamaril ang tiyuhin ng isa sa mga namatay na si Mando Tahil.

Bigla na lamang nitong pinagbabaril ang isang mag-asawa na hinihinala nitong suspek sa pamamasalng sa kanyang pamangkin gamit ang isang shotgun.

Isinugod na sa ospital ng mag-asawa habang arestado naman ang suspek. JOHNNY ARASGA

BALAK ng Metro Manila Development Authority (MMDA) na doblehin ang multang ipinapataw sa lahat ng traffic violators.

Sinabi ni MMDA General Manager Tim Orbos, kailangan na nilang maghigpit dahil hindi na takot ang mga traffic violator dahil maliit na halaga lamang ang kanilang kailangang bayaran.

Aniya, panahon na para taasan ang multa na sinimulang ipatupad may 10 taon na ang nakararaan.

“Nung huling naitaas ‘yan ay more than 10 years ago so napakababa na nung violation rates to the point na hindi na siya nagse-serve as a deterrent, in fact several times may mga lumapit sa akin lalo na ‘yung mga negosyo at sinasabi na kung pwede na lang bayaran ng advance, ang sabi ko hindi naman po yata ‘yan ang rason at hindi kami andito para kumita ng pera pero para gamitin itong paniniket para hindi mag-violate ang mga tao,” ani Orbos.

Halimbawa nito ay ang multa sa illegal parking na nagkakahalaga ng P500 habang P300 naman sa mga sasakyang lalabag sa number coding scheme.

Ihahain ni Orbos ang panukala sa susunod na pagpupulong ng Metro Manila Council sa susunod na linggo.

“Panukala talaga ito ng inter-agency council on traffic at ng mga LGU dapat noong November pa ito, nagkasundo na except na hindi pa naipatutupad ito. Hihingin natin sa metro mayors na mauna na akong magtaas ng rates sa Metro Manila. Hopefully maaprubahan at maipatupad na natin,” dagdag ni Orbos.

May payo rin si Orbos sa mga public transport sector na sa ngayon pa lang ay umaangal na sa panukalang pagtaas ng violation rates.

“Huwag niyong pangunahan na magva-violate kayo, kasi ‘yun naman ang ang premise nito, papatawan lang kayo ng mataas na rates kung magva-violate sila. JOHNNY ARASGA

BUBUSISIIN ng National Bureau of Investigation (NBI) ang umano’y maanomalyang National Printing Office (NPO) deals sa tatlong pribadong kumpanya.

Sinabi kaninang Miyerkules ng umaga ni NBI Deputy Director for Intelligence Vicente de Guzman na sinimulan na nila ang imbestigasyon sa printing jobs para sa Social Security System (SSS) kasunod ng kahilingan ng Presidential Communications Operations Office (PCOO).

Ang NPO ay isang attached agency ng PCOO.

Iimbitahan aniya ng ahensya ang lahat ng taong sangkot sa nasabing transaksyon bago magsagawa ng rekomendasyon para sa criminal prosecution.

Ayon sa ulat, ang NPO ay may P74-million contract sa Western Visayas Printing Corp. (WVPC) pero mayroon pang ginawang transaksyon sa tatlong pang kumpanya na Best Forms Security Printer sa halagang P34-million, Tri-Print Work sa halagang P27-million, at Metro Color pata sa P15-million.

Sa kasagsagan ng iniulat na transaksyon, nagbitiw sa posisyon si NPO Bids and Awards Committee chairperson Sherwin Prose Castañeda kaasama ang sampu pang BAC officials.

Ang PCOO, sa pamamagitan ni Communications Undersecretary for Legal Affairs Enrique Tandan ay may nakitang supisyenteng basehan para magpatulong sa NBI para magsagawa ng imbestigasyon.

“The (PCOO) investigation uncovered several irregularities and violations of the Government Procurement Reform Act (Republic Act 9184) and the Anti-Graft and Corrupt Practices Act (RA 3019), among others,” pahayag ni Tandan.

Nanawagan din ang grupo sa Commission on Audit (COA) para imbestigahan ang umano’y talamak na printing orders. BOBBY TICZON

SINIBAK ng Supreme Court (SC) ang isang hukom na nagdismis sa kaso na isinampa laban sa mga miyembro ng fraternity na sangkot sa pagkamatay ng San Beda law student na si Marc Andre Marcos.

Sa isang desisyon na may petsang Enero 24, dinismis ng SC si Judge Perla Cabrera-Faller ng Cavite Regional Trial Court Branch 90 sanhi ng gross ignorance of the law at sa paglabag ng Code of Judicial Conduct.

Si Marcos, first-year law student, ay namatay mula sa extensive traumatic injuries sa kanyang upper at lower extremities na kanyang tinamo sa umano’y initiation rites ng Lex Leonum Fraternity sa isang farm sa Dasmariñas, Cavite, noong Hulyo 2012.

Matapos ang preliminary investigation, sinakdal ng Department of Justice (DOJ) ang 14 na frat members sa Cavite court, na kinalauna’y nagpalabas ng arrest warrant laban sa mga suspek noong Hunyo 3, 2013.

Gayunman, binawi ni Cabrera-Faller ang pagpapalabas ng arrest warrants laban sa mga suspek na sina Chino Daniel Amante, Richard Rosales at Mohamad Alim at idinahilan na nagkamali lamang siya.

Sa katunayan pa, iniutos ni Cabrera-Fuller ang pag-archive ng kaso na ikinagalit ng pamilya Marco lalo na ang lolo ng biktima na si retired Judge Martonino Marcos, na nagsampa ng kasong administratibo laban kay Cabrera-Faller sa dahilan na nalagyan o mabayaran ito para ibasura ang kaso.

Maliban sa dismissal, iniutos din ng SC na i-forfeit ang retirement benefits ni Cabrera-Faller, at pigilan itong muling makapasok sa government service. BOBBY TICZON

NAPATAY ng pulisya ang isa sa dalawang lalaking umambus sa isang babaeng pulis ng Manila Police District (MPD) sa ikinasang buy-bust operation sa Tondo nitong Martes ng gabi.

Dead-on-the-spot sanhi ng tama ng bala sa iba’t ibang bahagi ng katawan ang suspek na si Daniel Batac ng Tondo district.

Sa ulat, naganap ang insidente pasado alas-101:5 p.m. sa Mayhaligue St., Tondo.

Ayon sa MPD, nagsasagawa sila ng buy-bust operation sa lugar nang kumasa ang suspek at makipagbarilan sa kanila.

Ayon sa MPD, si Batac ay suspek sa pagpatay kay PO1 Jorsan Marie Alafriz nitong nakaraang Marso 19.

Lulan ang biktima sa isang gray na Mitsubishi at papasok na sa Barbosa community police nang ratratin ng dalawang lalaking lulan ng motorsiklo.

Ayon sa police record, dati nang nakulong ang suspek sa kasong pagnanakaw ng kotse. BOBBY TICZON

UTAS ang isang purok leader makaraang pagbabarilin ng isa sa riding-in-tandem sa Caloocan City kagabi.

Dead-on-the-spot sanhi ng mga tama ng bala ng hindi pa batid na kalibre ng baril sa ulo at katawan ang biktimang si Rodolfo Barreto, 67, purok leader sa Bagong Silang ng nasabing lungsod.

Sa ulat, dakong 9:00 kagabi, habang nakaupo ang biktima sa tapat ng barangay outpost sa kanilang lugar ay dumating ang mga suspek at bigla na lamang pinagbabaril ang biktima na agad nitong ikinamatay.

Inaalam na ng mga awtoridad ang motibo sa pamamaslang at kung sino ang responsable sa nasabing krimen. RENE MANAHAN

DALAWANG putol na binti ang ikinalat sa Bulacan kahapon, Martes.

Ang dalawang binti na kapwa sunog at naaganas na ay natagpuan sa madamong bahagi ng Brgy. Dakila sa Malolos.

Ayon kay Larry Martin, barangay tanod, nagtatanung-tanong na sila sa mga kabarangay kung may nakakitang kahina-hinalang mga tao na posibleng nagtapon ng mga binti.

Sinabi pa ni Martin na kamakailan lamang ay nagkaroon ng grassfire sa mismong lugar kung saan natagpuan ang mga putol na binti.

“Sa ngayon po ay wala naman kaming natatanggap pa na report na kung may naghahanap… Nagtatanong pa kami paano ang nangyari,” ani Martin.

Iniimbestigahan pa ng Malolos City Police Station ang kaso. BOBBY TICZON

PINAGBABARIL ng ‘di nakilalang suspek ang isang AWOL (absent without leave) na pulis habang may kausap sa cellphone sa harapan mismo ng kanilang tahanan sa Port Area, Maynila.

Namatay noon din ang biktimang si PO1 Jay Paguinto, 37, dating nakatalaga sa Quezon City Police District (QCPD), at taga-007 Blk. 9, Old Site, Baseco Cmpd., Port Area, bunsod ng mga tama ng bala sa iba’t ibang bahagi ng kanyang katawan.

Sa ulat ni SPO1 Joseph Kabigting ng Manila Police District (MPD)-homicide section, may kausap ang biktima sa cellphone pasado alas-5:00 kahapon sa harapan ng kanilang bahay na tila nakikipag-away.

Nagulat na lamang ang ilang tao sa lugar nang may marinig na mga putok ng baril at makitang duguang bumulagta ang biktima.

Agad namang ipinagbigay-alam ng mga nakakita ang pangyayari sa kanilang barangay na siya namang nag-report sa pulisya.

Wala namang makuhang iba pang impormasyon ang pulisya sa pagkamatay ng biktima dahil natatakot ang mga residente na baka sila naman ang balikan ng suspek.

Sa ngayon ay blangko pa ang pulisya sa motibo ng pamamaslang kay Paguinto gayundin ang pagkakilanlan ng suspek. JOCELYN TABANGCURA-DOMENDEN

TINAWAG ni Pangulong Rodrigo Roa Duterte na mga ‘buang’ ang mga taga-European Union (EU) dahil hindi alam ng mga ito ang kanilang sinasabi kaugnay sa patayang nangyayari sa bansa bunsod ng anti-drug war ng pamahalaan.

Sa naging talumpati ni Pangulong Duterte sa People’s Day Celebration sa Brgy. Batong Dalig Socorro, Oriental, Mindoro, sinabi nitong hindi niya gusto ang nais na mangyari ng EU na palayain agad si Sen. Leila de Lima dahil ito aniya ay political prisoner.

Ikinagalit din ng Pangulo ang tinuran ng EU na siya dapat ang makulong dahil sa mga patayang umaabot na sa 10,000.

Aniya, hindi niya kailanman inutusan ang PNP at AFP na pumatay ng walang kalaban-labang kriminal o drug pusher.

Subalit malinaw ang kanyang direktiba na tugisin ang mga sangkot sa iligal na droga para arestuhin ngunit kapag nanlaban at nalagay sa panganib ang buhay ng pulis ay saka nila barilin ang suspek para mapatay. KRIS JOSE

INATASAN ni Manila Mayor Joseph “Erap” Estrada ang Manila Department of Social Welfare (MDSW) na paigtingin pa ang pagsagip sa mga taong-lansangan, lalo na ng mga bata, upang maproteksyunan sila.

Diin ni Estrada, hindi niya tinuturing na “eyesores” ang mga taong-lansangan bagkus ay nais niyang mabigyan pa ang mga ito ng magandang buhay.

“Sa halip na namamalimos sila sa kalsada, at kung saan maaari pa silang maaksidente o maging biktima ng krimen, mas kailangan nila ng maayos na pangangalaga at proteksyon,” ani Erap.

Nitong Pebrero lang ay nilabas ni Erap ang Executive Order No. 10 na nag-aatas sa MDSW at iba pang departamento ng city hall na magsagawa ng malawakang rescue operation sa mga taong-lansangan upang makamit ng pamahalaang lungsod ang hangarin nitong “zero street dweller in the City of Manila.”

Binuo ng MDSW ang Task Force Reach- Out upang magsagawa ng rescue operation sa lungsod; ang pinakahuli ay isinagawa sa Binondo noong isang linggo, kung saan 121 taong-lansangan ang nakuha.

Sa 121 katao, 86 ang adults, 26 naman ang mga menor-de-edad, at walo ang senior citizens. Isang sanggol din ang na-‘rescue’, ayon sa hepe ng task force na si Laure Clemente, pinuno ng Reception and Action Center (RAC) ng MDSW.

Marami sa mga ito ang pinauwi na sa kani-kanilang pamilya, ayon kay Clemente.

“Many of the minors we rescued were solvent users while others, especially the adults, were those so-called vagrants, mga wala talagang bahay. We have to take them out of the streets because it’s dangerous for them,” paliwanag ni Clemente.

Tinurn-over na aniya ang mga natitira sa Manila Boystown Complex sa Marikina City na pinamamahalaanan ng lungsod kung saan ang mga bata ay pag-aaralin sa Fugoso Integrated School na nagbibigay ng Alternative Learning System (ALS).

Ang mga nasa hustong edad naman ay sasailalim sa iba’t ibang development activities tulad ng skills and livelihood trainings at basic business management courses.

Sa kanilang paglabas ay maaari rin silang i-refer sa Public Employment Service Office (PESO) upang magkaroon sila ng hanapbuhay.

“We want them to be productive citizens, kahit papaano may matutunan sila habang nasa Boystown sila,” ani Clemente. JOCELYN TABANGCURA-DOMENDEN

SINUSPINDE ng Supreme Court (SC) ang isang Sulu judge matapos mapatunayang guilty sa kasong sexual harassment na isinampa ng isang empleyada ng korte.

Sa isang desisyon na petsa Pebrero 21, sinuspinde ng mataas na hukom nang anim na buwan nang walang sahod ang suspek na si Judge Bensaudi Arabiani, Jr. ng Fourth Shari’a Circuit Court sa Maimbung, Sulu.

Binalaan din ng SC si Arabiani na kapag ito ay naulit pa ay mas mabigat na katapat na kaparusahan.

Si Arabiani ay inakusahan ng pagda-drawing ng ari ng babae at lalaki na kanyang ipinakita sa isang babaeng empleyado na kanyang pinagpapantasyahan.

Napatunayan ng korte na sinadya ni Arabiani ang kanyang ginawa para iparating ang kanyang sexual desires sa naturang court employee.

“It is an act that constitutes a physical behavior of a sexual nature; a gesture with lewd insinuation,” saad pa sa desisyon.

Dahil ito ang kauna-unahang sexual harassment case ni Arabiani, suspension lamang nang anim na buwan ang ipinataw laban sa kanya.

Ang desisyoin ay pirmado ni Associate Justice Estela Perlas Bernabe. BOBBY TICZON

BINANATAN ni election lawyer na si Atty. Romulo Macalintal ang pananahimik ng Commission on Elections (Comelec) hinggil sa balak ni Pangulong Rodrigo Duterte na ipagpaliban na lamang ang barangay elections.

Sinabi ni Atty. Macalintal na kanyang ipinagtataka ang hindi pagbibigay ng komentaryo ng poll body.

Ito’y upang maipaliwanag sa kasalukuyang administrasyon na ang balak ni Duterte na mag-appoint ng officer-in-charge (OIC) sa bawat barangay ay maituturing na “unconstitutional.”

Paliwanag ng election lawyer, ang mga opisyal ng barangay ay elective officials gaya ng mga alkalde at gobernador kaya kailangan ng halalan upang sila’y mapalitan. BOBBY TICZON

TODAS ang dalawang katao habang sugatan naman ang 14-anyos na dalagita na nadamay sa pamamaril ng hinihinalang mga miyembro ng vigilante group sa magkahiwalay na lugar sa Caloocan City kagabi, Marso 29.

Sa ulat, dakong 11:45 ng gabi, nasa lamay ng kanyang kapitbahay si Jefferson Macatunggal, 38, ng Brgy. 176, Bagong Silang nang dumating ang dalawang hindi kilalang suspek na kapwa nakasumbrero at maskara saka walang sabi-sabing pinutukan.

Ngunit sa halip nay tumama kay Macatunggal ay dumiretso ito sa 14-anyos na dalagita na mabilis na isinugod ng kanyang mga kaanak sa Tala Hospital upang magamot habang tumakbo naman si Macatunggal subalit hinabol pa rin ito ng mga suspek at nang makorner ay pinagbabaril sa ulo na dahilan ng kanyang agarang pagkamatay.

Matapos ito, mabilis na tumakas ang mga suspek sakay ng motorsiklo habang sa pahayag sa pulisya ng Purok Leader na si Jose Ibala, kilala umanong drug pusher ang biktima sa naturang barangay at isinailalim na rin ito sa “Oplan Tokhang”.

Samantala, dakong 9:20 naman ng gabi, naglalakad si Ricky Quimba, Jr., 28, ng Bayabas St., Brgy. 179 sa Crispolo St., Victoria Heights Subd., nang bigla na lamang huminto sa harap nito ang isang riding-in-tandem at sunod-sunod na pinutukan ang biktima bago mabilis na tumakas.

Naiwan naman ang walang buhay na katawan ng biktima habang patuloy ang masusing imbestigasyon ng pulisya upang matukoy ang pagkakilanlan ng mga suspek at motibo sa insidente. RENE MANAHAN

NAKAUWI na sa bansa ang 21-taong-gulang na mangingisda na nagpalutang-lutang sa karagatan sa loob ng 56 araw bago na-rescue ng Japanese fishing vessel sa Papua New Guinea.

Si Rolando Omongos ay nakaligtas sa pamamagitan ng pag-inom ng tubig-ulan at paminsan-minsang pagkain ng isdang dumidikit sa kanyang bangka.

Siya’y sinundo ng isang social welfare representative sa pagdating nito sa Ninoy Aquino International Airport (NAIA) terminal 1 noong Miyerkules ng gabi lulan ng Air Niugini flight PX10.

Nitong Enero, si Rolando at kanyang tiyuhing na si Reniel Omongis mula sa Davao ay umalis ng General Santos City kasama ang iba pa para mangisda, pero minalas na mapahiwalay sa mga kasamahan habang sakay ng isang maliit na bangka na walang gasolina, pagkain at tubig.

Hindi naman nakayanan ng kanyang tiyuhing si Reniel ang isang-buwang pagtitiis ng gutom at uhaw kaya namatay ito.

Habang si Rolando naman ay nawalan ng boses at halos hindi na nito maigalaw ang kanyang katawan.

Aniya, may mga araw na maraming dumaraang barko sa kanyang kinaroroonan pero hindi man lamang siya pinapansin.

“Hindi ako nawalan ng pag-asa. Lagi akong nagdarasal na mare-rescue din ako,” ani Rolando.

Natapos ang kanyang paghihirap nang may isang Japanese fishing vessel ang nakakita sa kanya at dinala siya sa mga awtoridad ng Papua New Guinea.

Ayon sa isang news report, namataan si Omongos ng isang fishing boat noong Marso 9, habang sinamang-palad naman ang kanyang tiyuhin na binawian ng buhay.

Batay sa PNG Post Courier, isang linggong katabi ni Rolando ang bangkay ng kanyang tiyuhin at napilitan niyang bitawan ito nang magsimula nang mangamoy.

Si Rolando ay pinayagang manatili ng social worker sa tanggapan ng Inter Agency Council Against Trafficking sa NAIA bago ito lumipad kahapon patungong General Santos City kung saan naghihintay ang kanyang ina. BENNY ANTIPORDA

LAOAG CITY – Patay ang isang lolo matapos uminom ng apat na bote ng energy drink kahapon (March 29) sa Brgy. 25, Laoag City.

Kinilala ang biktimang si Reynaldo Andres, 65, jeepney driver, ng nasabing bayan.

Sa paunang report ng Laoag City police, uminom ang biktima ng apat na energy drink bago pumunta ng San Nicolas, Laoag City at ipinarada nito ang kanyang pampasaherong dyip sa likod ng Robinson’s mall upang matulog.
Lao
Mula noon, hindi na gumising ang biktima at nadiskubre na lamang ang kanyang bangkay ng ilang mga driver.

Ayon kay Dr. Lionel Obien, San Nicolas health officer, posibleng inatake sa puso ang biktima dahil sa ininom niyang apat na boteng energy drink.

Ipinaliwanag ni Obien na ang pag-inom ng sobrang energy drink ay masama sa kalusugan at maaaring magresulta ng heart palpitation na nauuwi sa heart attack. ALLAN BERGONIA

KINASUHAN na ng pulisya ang lalaking nasa likod ng pagpapakalat ng photo scandal ng sikat na baskebolistang si Kiefer Ravena.

Sinabi ni Supt. Jay Guillermo, tagapagsalita ng PNP Anti-Crime Group, ang suspek na si Kristoffer Monico, 22, checking officer ng Metrobank at taga-36 Bartville Rd., Dela Paz, Pasig City ay sinampahan na ng kasong robbery/extortion at paglabag sa kasong cybercrime prevention act of 2012.

Pansamantalang nakadetine ngayon sa PNP-ACG headquarters si Monico para isailalim sa masusing imbestigasyon at dokumentasyon.

Matatandaang una rito, dumulog si Ravena na dating Most Valuable Player (MVP) ng UAAP sa PNP-ACG matapos takutin ni Monico na ipapakalat ang mga hubad niyang litrato kung hindi ito magbibigay ng P50,000.

Nabatid na nagpanggap na isang seksing babae si Monico at nakipag-chat kay Ravena sa social media.

Sa takot na maiskandalo, nakipagkasundo si Ravena na mag-abot ng P25,000 sa suspek para hindi gawin ang maitim na balak nito.

Ngunit kinalaunan, nalaman ni Ravena na kumalat din sa social media ang kanyang mga hubad na larawan.

Sa inilatag na entrapment operation, naaresto si Monico sa bahagi ng Eastwood central park sa Quezon City kahapon, Miyerkules.

Nakuha kay Monico ang dalawang pirasong P1,000 bills marked money, dalawang unit ng cellphone, isang mamahaling relo, iba’t ibang ID, credit cards at P6,734 cash. BOBBY TICZON

HINAMON ni House Speaker Pantaleon Alvarez ang kampo ni Davao del Norte Rep. Tonyboy Floirendo na humarap sa kanya at mag-usap sila.

Ito ang sinabi ni Alvarez sa gitna ng pahayag ni Floirendo na hindi umano siya kinakausap ni Alvarez kahit sila’y naging matalik na magkaibigan.

Ayon pa kay Alvarez, hindi si Floirendo ang naglabas ng mga ganitong pahayag kundi ang kanyang mga tagapagsalita.

Giit ng speaker, makabubuting sagutin na lamang ni Floirendo ang isyu at huwag igitna sa usaping ito ang pagkakaroon umano nito ng girlfriend na nagngangalang Jenny Vicencio.

Hindi rin takot si Alvarez na ma-disbar dahil sa pagkakaroon nito ng karelasyon sa pagsasabing “eh, ‘di maraming abogado ang madi-disbar” kasabay ng hamon pa nito sa mga nagbabanta na isampa ang reklamo. MELIZA MALUNTAG

NAGHAIN ng isang supplemental complaint affidavit sa Kamara si Magdalo Rep. Gary Alejano kaugnay sa nauna niyang inihaing impeachment complaint laban kay Pangulong Rodrigo Duterte.

Inilagay ni Alejano ang tatlong grounds sa impeachment Culpable violation of the constitution, betrayal of public trust at other high crimes dahil sa umano’y kabiguan ni Pangulong Duterte na igiit ng Pilipinas ang karapatan nito sa Benham Rise.

Ito’y sa gitna ng namataang pag-iikot diumano ng barko ng Tsina sa Benham Rise kahit may desisyon na ang United Nations Commission on the Limits of the Continental Shelf noong April 12, 2012 na ang nasabing isla ay pasok sa teritoryo ng Pilipinas.

Sinabi ni Alejano na muling nabigo si Pangulong Duterte na igiit din ang karapatan ng Pilipinas at iprotesta ang pagtatayo ng China sa environmental monitoring station sa Panatag Shoal o Scarborough Shoal.

Ang mga ito aniya’y sapat na basehan para ma-impeach si Pangulong Duterte kung saan ang orihinal na impeachment complaint ni Alejano ay naka-sentro sa nagaganap na extrajudicial killing sa bansa.

May tiwala si Alejano sa press conference na makatutulong sa kaniyang impeachment complaint na inihain ang iringan nina House Speaker Pantaleon Alvarez at Davao del Norte Rep. Tonyboy Floirendo.

Posible rin aniyang mapadali sa posisyon si Alvarez at mapalitan ito ni Deputy Speaker Gloria Macapagal-Arroyo bilang speaker of the House. MELIZA MALUNTAG

WALANG nakikitang dahilan ang pamahalaan para magdeklara ng unilateral ceasefire bago pa maganap ang peace talks sa pagitan ng gobyerno at National Democratic Front (NDF).

Ayon kay Presidential Adviser on the Peace Process at Department of Labor and Employment Sec. Silvestre Bello III, malabong magdeklara ng unilateral ceasefire si Pangulong Rodrigo Roa Duterte dahil mas interesado ang Chief Executive na matamo ang bilateral ceasefire agreement.

Kumbinsido naman si Sec. Bello na hindi magiging balakid sa peace talks ang pagtanggi ng pamahalaan na tapatan ang unilateral ceasefire ng NPA.

Umaasa naman si Bello na magiging produkto ng 4th round ng peace talks ang bilateral ceasefire dahil ito aniya ang unang agenda sa kanilang gagawing pag-uusap.

Bukod pa sa nagpalitan na aniya sila ng NDF ng draft hinggil sa terms and conditions and parameters of the agreement.

Pag-uusapan aniya ang mga maseselang bagay gaya ng kahulugan ng buffer zones at collection of revolutionary tax.

Sinabi pa niya na importante aniya sa bilateral ceasefire agreement ay ang mapipiling referee o tagapagitna.

Ang mga bansang nabanggit aniya ay ang Switzerland, Canada, Australia at marami pang iba.

Samantala, hindi naman inaalis ni Sec. Bello ang posibilidad na magpartisipa si Pangulong Duterte sa peace talks. KRIS JOSE

AYAW patulan ng Malakanyang ang hamon ni Sen. Antonio Trillanes IV na kasuhan siya ng libel kung nagsisinungaling siya nang sabihin niyang na may P2-bilyong bank deposit si Pangulong Rodrigo Roa Duterte.

Sinabi ni Presidential spokesperson Ernesto Abella na halatang-halata naman na may agenda ang senador na aniya’y hindi naman kailangang patulan.

“In other words, what I’m saying is that hindi naman natin kailangan patulan lahat ng mga ganyan eh ‘di ba? So nakikita natin, may kaga — itong mga kaganapan na ito ay mukhang ano, parang konektado sa isa’t-isa so hayaan na po natin silang mag-ingay. Ang sinasabi po natin, nakikita natin na mukhang meron din silang mga — anong tawag doon ay agenda,” ani Usec. Abella.

Sa kabilang dako, ibinuko ni Usec. Abella ang agenda ni Magdalo Party-list Rep. Gary Alejano sa pagbanat nito kay Pangulong Duterte lalo na ang paghahain ng impeachment complaint laban sa Punong Ehekutibo.

“Well, I would see first before I talk about that. You know, the other thing that all this noise is being created for example by the Magdalo representative, it seems to be, you know, it seems to be orchestrated in a sense of, apparently, he’s also wanting to run for senator in place of Trillanes. And I’m saying that this, you know, as part of the whole situation, I am saying that all this noise seems to be towards a particular situation,” anito.

Sa ulat, hinamon pa rin ni Trillanes ang Pangulong Duterte na lumagda ng waiver para magkaalaman kung sino ang nagsisinungaling sa kanilang dalawa.

Agad namang itinanggi ni Alejano na pamumulitika lang ang pagsampa niya ng impeachment complaint laban sa Chief Executive.

Sinabi ni Alejano na paglilihis lang sa tunay na isyu ang sinasabing political positioning para sa pagtakbo niya sa senatorial bet sa susunod na eleksyon.

Aniya, wala siyang planong tumakbo bilang senador at pumasok siya sa pulitika para ipagpatuloy ang adbokasiya ng Magdalo. KRIS JOSE