KINASUHAN ni dating Manila Councilor Greco Belgica sa Supreme Court (SC) si Ombudsman Conchita Carpio-Morales ng disbarment complaint.

Ito’y may kaugnayan sa umano’y pag-absuwelto ni Morales sa pangalan ni dating Pangulong Noynoy Aquino dahil sa isyu ng pagpapatupad ng kontrobersiyal na P142-billion Disbursement Acceleration Program (DAP) na idineklara ng SC na unconstitutional.

Hinimok ni Belgica ang high tribunal na tanggalan ng lisensiya bilang abogado si Morales dahil sa paglabag nito sa Lawyer’s Oath at ang Canon of Professional Responsibility nang aprubahan nito ang resolusyon na nag-aabsuwelto sa dating pangulo sa mga kasong technical malversation, usurpation of legislative powers at graft.

Inakusahan din ng complainant si Morales ng paglabag sa Rule 6.01 ng Canon of Professional Responsibility nang nabigo itong ipatupad ang kanyang tungkulin para magkaroon ng hustisya sa mga hinawakang kaso.

Maliban sa disbarment case, pinaplantsa na rin ng grupo ni Belgica ang impeachment complaint laban kay Morales.

Iginiit ni Belgica na kwestyunable ang pag-abswelto ni Morales sa dating Pangulong Aquino na siyang nagtalaga sa kanya sa Ombudsman.

Si Morales ay magreretiro sa serbisyo sa July 25, 2018. BOBBY TICZON

HINIHINALANG ginahasa muna bago pinatay ang isang batang babae sa Polomolok, South Cotabato kagabi, Biyernes.

Ayon sa pulisya, may sugat sa tiyan at wala nang suot na underwear ang 5-anyos na bata nang matagpuan ang kanyang bangkay sa Brgy. Palkan.

Agad namang inaresto ng mga barangay tanod ang suspek na nakilalang si Benjamin Balasabas, Jr.

Dinampot ng mga taga-barangay si Balasabas dahil sa bahid ng dugo sa kanyang katawan na pinaghihinalaang dugo ng batang babae.

Itinatanggi naman ni Balasabas ang krimen at iginiit na ang dugong nakita sa kanyang katawan ay mula sa kalapati na kanyang kinatay para gawing ulam.

Sa Lunes nakatakdang sampahan ang suspek ng kasong rape at pagpatay. BOBBY TICZON

ASAHAN ang mas mainit pang panahon lalo’t kapag pumasok na sa bansa ang summer season.

Ito ang inahayag ni Aldzar Aurelio, weather forecaster ng Pagasa, kasunod ng panibagong record-high ng init kahapon.

Naitala ang 34.2°C sa Metro Manila at mayroon itong 38.5°C na heat index o init factor.

Sa ngayon ay hindi pa maideklara ang summer dahil may mahinang amihan pa rin na umiiral sa Northern Luzon.

Tinatayang papatak naman sa Abril at Mayo ang peak ng init na posibleng lumagpas pa sa kasalukuyang record ng Pagasa. BOBBY TICZON

PITONG drug suspects, kabilang ang anak ng isang dating barangay chairman, ang nakwelyuhan sa inilatag na anti-drugs operations sa Quezon City nitong Biyernes ng gabi.

Sinabi ni QCPD Police chief Guillermo Eleazar na ang suspect ay nakilalang si Bienvenido Aquino Jr., na nagsusuplay ng droga sa Bulacan, Pampanga at Lucena.

Nadampot din sa operasyon ang iba pang suspect na sina Randy Galapon, Mary Jane Legaspino, Dominick Macandog, Henderson Luna, Kyle Romero, Allan Jay Sison at isang “Eagleman.”

Sa ulat, naganap ang pagsalakay dakong 11:35 p.m. sa isang bahay sa Barangay Holy Spirit, Q.C.

Bago ito, nabulaga ang mga suspect nang isilbi ng mga tauhan ng QCPD ang arrest warrant na ipinalabas ng QC Regional Trial Court.

Nakumpiska sa operasyon ang 20 gramo ng shabu, drug paraphernalia, 1 grenade, 1 firearm at isang katana.

Dinala ang mga suspect sa QCPD’s headquarters sa Camp Karingal pata sa pagsasampa ng kaukulang kaso. (Bobby C Ticzon)

NAGBIGTI ang isang 33-anyos na construction foreman sa pamamagitan ng isang kumot sa loob ng kanyang inuupahang tahanan sa Malate, Manila kagabi.

Kinilala ang biktimang si Junie Tapinet, alyas ‘Jhong,’ 33, binata, construction foreman, ng 2381 Arellano Ave., Singalong, Malate.

Sa ulat ng Manila Police District (MPD)-homicide section, nabatid na dakong 8:10 ng gabi nang matagpuang nakabigti ang biktima sa loob ng kanyang bahay sa Arellano Ave.

Sa salaysay ng kanyang kapitbahay na si Simeon De Lima, nabatid na huli nilang nakitang buhay ang biktima dakong 11:00 ng umaga, nang makisuyo ito sa kanya na ibili siya ng isang tasa ng kape.

Kinagabihan ay pinuntahan naman umano ng isa pang kapitbahay na si Arsenio Jose, isang karpintero, ang biktima at tinangkang katukin ang pintuan nito ngunit walang sumasagot.

Sinubukan umano ni Jose na buksan ang pinto at natuklasang bukas ito.

Nagulat naman si Jose nang makitang patay na ang biktima at nakabigti gamit ang isang kumot.

Kaagad namang nagtungo si Jose sa barangay outpost upang i-report ang pangyayari.

Bukod sa dugong tumutulo sa hita ng biktima mula sa kanyang puwit, ay wala naman umanong nakita ang mga pulis na anomang sugat sa katawan ng biktima, na indikasyong posibleng sinadya ang pagkamatay nito.

Gayunman, aalamin pa rin ng pulisya kung posibleng may foul play sa insidente. JOCELYN TABANGCURA-DOMENDEN

TEPOK ang isang lalaki matapos tumalon mula sa ika-apat na palapag ng Sta. Lucia Mall sa Cainta, Rizal.

Ayon kay Eric Arevalo ng Cainta Rescue, alas-2:26 nang maitawag sa kanila ang insidente. Bigla na lamang aniyang tumalon ang biktima at nang lapitan nakita na wala itong buhay.

Hindi pa naman pinangalanan ang lalaki na nasa edad 30-40.

Isang 16-anyos na babae naman na nakilalang si Chantal de Villa ang nabagsakan ng lalaki. Dahil dito, nagtamo ang dalagita ng head trauma at injury sa kanang hita.

Hindi naman nagbigay ng iba pang detalye ang pamunuan ng mall hinggil sa naturang insidente. JOHNNY ARASGA

UMABOT na sa 54 ang bilang ng mga naitatalang napapatay sa Oplan Tokhang part 2 ng Philippine National Police (PNP).

Base sa datos ng PNP, walo ang napadagdag mula sa 46 na naitalang patay ng PNP sa loob ng 24 oras.

Pinakamarami sa mga napatay ay mula sa Region 3 na nakapagtala ng 24.

Pinakamababang bilang naman ang naitala sa Regions 1, 9 at 12 na mayroon lamang tig-iisang napatay sa operasyon.

Umaabot naman sa 160,229 ang kabuuang bilang ng mga bahay na kanilang natotokhang.

Samantala, umakyat sa halos 20,000 ang mga sumuko sa mga awtoridad habang 3,738 ang mga narresto na drug suspect sa isinagawang 2,345 na operasyon. JOHNNY ARASGA

SUMULAT na ang Catholic Bishop’s Conference of the Philippines (CBCP) sa Senado para makapagsagawa ng diyalogo hinggil sa usapin ng panukalang ibalik ang parusang kamatayan.

Nilalaman ng sulat na pirmado ni CBCP president Archbishop Socrates Villegas ang tatlong dahilan kung bakit dapat ibasura ang nasabing panukalang batas.

Tatlong katanungan ang kanilang inilatag tulad ng, 1) Ito ba ay mahalaga? 2.) Ito ba ay nakatutulong? 3.) Ito ba ay makatarungan?

Isinaad sa sulat na ang muling pagbubuhay ng capital punishment ay hindi tamang paraan para sa pagkamit ng hustisya.

Nakapaloob din sa sulat na mayroong 70 percent na judicial error sa death penalty cases ang naitala ng Korte Suprema.

Ang nasabing liham ay bahagi ng patuloy na pagsalungat ng CBCP sa planong ibalik ang parusang kamatayan sa bansa. BOBBY TICZON

NAUNSIYAMI ang dapat sana’y pangalawang pagpulong nina Pangulong Rodrigo Roa Duterte at Moro National Liberation Front (MNLF) founding chairman Nur Misuari.

Nauna nang itinakda ang meeting nina Pangulong Duterte at Misuari kamakalawa, Marso 24.

“I will talk to Nur Misuari tomorrow or tonight,” ayon kay Pangulong Duterte sa kanyang naging talumpati sa Kaamulan Festival celebration in Malaybalay, Bukidnon.

Hindi naman binanggit ni Pangulong Duterte kung ano ang magiging agenda ng kanyang pakikipagpulong kay Misuari.

Sa kabilang dako, nabanggit naman ni Pangulong Duterte ang ginagawang pagsasa-ayos ng Moro Islamic Liberation Front (MILF) sa kanilang panukala na federal structure of government.

“I’ll be frank with you, if we don’t give it to the Moro… we don’t give the federal, we won’t achieve… we will never have peace in this land,” ani Pangulong Duterte.

Hindi naman malinaw kung kasama si Misuari sa naging panukala ng MILF na federal structure of government.

Matatandaang nagkita at nagka-usap sina Pangulong Duterte at Misuari noong nakaraang Nobyembre ng nakaraang taon. KRIS JOSE

ITOGON, BENGUET – Patay ang isang construction worker habang malubhang nasugatan ang dalawa pa matapos bumangga at bumaliktad ang trak na kanilang sinasakyan sa Lower Manga, Tubing, Itogon, Benguet noong Huwebes, March 23.

Nakilala ang namatay na si Jun B. Cuengan, 46, ng nasabing bayan at mga sugatang sina Erwin Diase, Jr., 43, ng Trail Tuding, at Winsly Alonzo, 42, ng Proper Tuding, Itogon, parehong Benguet.

Sa report ng Itogon police, lulan ang mga biktima ng isang trak na may plakang UTI 157 na may kargang 12 steel bars at graba.

Dahil mabigat ang trak, dumausdos ito pababa sanhi upang bumangga ito at bumaliktad sa gilid ng kalsada.

Naipit si Cuengan sanhi ng kanyang pagkamatay bago dumating ng Baguio General Hospital (BGH).

Patuloy na nagsasagawa ang pulisya ng follow-up investigation hinggil sa aksidente. ALLAN BERGONIA

APAT ang napaulat na napatay habang nasa humigit-kumulang 15 pa ang naitalang nasugatan sa nangyaring pagsabog ng granada sa may Sitio Lambayong, Brgy. Busbus sa bayan ng Jolo sa Sulu.

Ayon kay Joint Task Force Sulu Commander Col. Cirilito Sobejana, nangyari ang nasabing pagsabog alas-7:10 kagabi malapit sa Karina Bakeshop and Grocery.

Hindi pa tinukoy ng opisyal ang mga pagkakakilanlan ng apat na napatay at ng mga nasugatan sa nasabing insidente.

Inihayag din ng opisyal na sa isinagawa nilang joint pursuit operation matapos ang malakas na pagsbaog, may naaresto na umano silang suspek na ngayo’y isinasailalim sa tactical interrogation sa himpilan ng Jolo municipal police station.

Tumanggi munang pangalanan ni Sobejana ang naarestong suspek habang patuloy pa ang kanilang operasyon laban sa mga kasamahan nito.

Hindi pa matukoy sa ngayon kung sino ang nasa likod ng madugong insidente at kung ano ang maaaring motibo ng mga salarin. JOHNNY ARASGA

ISINUSULONG ni Quezon City Rep. Alfred Vargas ang House Bill 5353 na layong madagdagan ng walo pang araw ang paternity leave para mabigyan ng mas mahabang panahon ang mga tatay na maalagaan ang kanyang asawa at bagong silang na anak.

Layon ng naturang house bill na amyendahan ang R.A. 8187 at mabigyan ng paternity leave ang lahat ng lalaking empleyado na kasal anoman ang kanilang trabaho na mapahaba mula sa 7 – 15 araw ito.

Ayon kay Vargas, ipinasa ng Kongreso ang Paternity Leave Act bilang pagkilala sa responsibilidad ng mga tatay sa pangangalaga sa kanyang asawa bago, habang nagbubuntis at sa pagpanganak ng kanilang anak ngunit aniya hindi ito sapat sa mga pangangailangan ng pamilyang Pilipino.

Dagdag pa ni Vargas, ang pag-amyenda sa Paternity Leave Act ay magsisigurong matatamasa ng mga bawat pamilyang Pilipino ang lahat ng benipisyo nito.

Aniya, ang maagang interaksyon ng tatay sa kanyang anak ay nagbibigay ng mga long-term benefits sa pagkatuto ng mga bata.

Kaugnay nito, ang naturang panukala ay nagbibigay ng opsyon sa mga empleyado na ma-extend ang kanilang paternity leave nang higit sa 15-araw nang walang bayad.

Kasama rin sa panukala ang probisiyon na hindi dapat ibawas sa taunang leave credits ng isang empleyado ang nasabing leave. JOHNNY ARASGA

TINIYAK ng Department of Social Welfare and Development (DSWD) na naghahanda sila sa posibilidad ng pagtama ng malakas na lindol o “The Big One” sa Metro Manila, ang sentro ng ekonomiya at politika ng Pilipinas.

Ito ang sinabi ni DSWD Sec. Judy Taguiwalo sa harap ng mga kumakalat na balita tungkol sa maaaring pagtama sa Kamaynilaan ng malakas na lindol tulad sa Surigao sa pagitan ng Pebrero at Marso ngayong taon.

Ayon kay Sec. Taguiwalo, ang bagong mantra nila ngayon sa gobyerno para sa “The Big One” ay: Plan, Prepare, Pray and Practice.

Kabilang sa kanilang paghahanda ay ang pre-positioning ng mga relief goods lalo na sa posibilidad na mapuruhan ng lindol ang kanilang mga warehouse.

Sinabi ni Taguiwalo na bagama’t wala pang teknolohiya na maagang makakapagsabi kung kelan magkakaroon ng lindol, aminado aniya ang Phivolcs na hinog na ang Metro Manila sa isang malakas na lindol.

Kaugnay nito, sinabi ng kalihim na “on top of the situation” ang National Disaster Risk Reduction and Management Council (NDRRMC) sa posibilidad ng “The Big One” at patuloy ang koordinasyon nila sa Metro Manila Commission. -30-

INIHAIN ni A-Teacher party-list Rep. Juliet Cortuna ang panukalang magbibigay ng 20% discount sa mga guro sa lahat ng mga produkto at serbisyo sa mga pangunahing establisiyemento, restaurants, sinehan, recreation centers, transport at kabilang ang medical at dental services.

Ang nasabing House Bill 4279 ay ang School Teachers Universal Discount and Courtesy Card Act na aniya’y dahil higit sa responsibilidad nito ang nagagawa ng mga guro.

Dahil din umano ito sa kanilang commitment sa kanilang mga estudyante at ang mga sakripisyo nila’y walang katumbas na halaga.

Dagdag pa niya, hindi pa natatapos sa school hours ang trabaho ng mga guro dahil kanila pang sinusuri ang papel ng kanilang mga estudyante. -30-

NAKIISA na naman ang mga Pilipino sa pagpatay ng mga ilaw sa loob ng isang araw kahapon, Sabado para sa taunang “Earth Hour”.

Isinagawa ang main event ng Earth Hour Philippines na ginanap sa SM by the Bay, Mall of Asia Complex sa Pasay City mula 8:30 pm – 9:30 pm kagabi.

Ayon kay World Wildlife Fund (WWF) Philippines President Joel Palma, na natutuwa sila na ngayong taon ay kabahagi nila ang mga kabataan.

Dagdag ni Palma, importante na maging kabahagi ang mga kabataan dahil aniya mahigit sa 50% ng Pilipinas ay kinokonsiderang kabataan.

Kaugnay nito, bago ang pagpatay ng mga ilaw ay nagkaroon muna ng Earth Hour Camp tampok ang interactive climate adaptation at mitigation booths kung saan kabilang dito ang native tree planting, renewable energy technologies at disaster go-bag preparation.

Hinikayat din ang publiko na makiisa sa iba’t ibang mga climate actions tulad ng sa paglipat sa renewable energy, pagtaguyod sa sustainable food at agriculture, pagkakarooon ng mga climate-friendly lna mga batas, pagsuporta sa mga conservation projects at pagbibigay kaalaman patungkol sa mga isyu na may kaugnayan sa klima. JOHNNY ARASGA

NAGPATAWAG ng emergency meeting si Senate President Aquilino Pimentel III para pag-usapan ang panukala ni Pangulong Rodrigo Duterte na pagpapaliban ng 2017 barangay elections.

Ayon kay Senate Majority Leader Vicente Sotto III, magaganap ang naturang meeting ngayong araw ng Linggo, March 26.

Dagdag pa ni Sotto, ang nasabing pulong ay para sa mga miyembro ng Senate majority bloc na sumama sa pagpunta ni Duterte sa Myanmar at Thailand.

Aniya, kinausap siya ni Duterte tungkol sa iba’t ibang bagay partikular sa mga kinalaman sa legislation at national interest issues tulad ng federalismo, problema sa iligal na droga at ang mga economic gains ng kanyang administrasyon.

Kaugnay naman sa barangay elections, sinabi sa kanya ng Pangulo na dapat pag-aralan ng Senado kung ano dapat gawin dito.

Ayon pa kay Sotto, merong pananaw ang pangulo pero hindi nito aniya ipinipilit sa kanila bagkus sinabi ito upang pag-aralan ang iba’t ibang ideya.

Bukod sa pagpapaliban ng barangay elections ay ipinihayag din ni Duterte ang ideyang pagtatalaga na lang ng mga barangay official kaugnay ng kampanya laban sa narco-politics. -30-

BANGKAY na nang matagpuan ang apat na katao kabilang ang isang babae matapos ratratin ng mga hindi nakikilalang armadong kalalakihan ang kanilang iniistambayang bahay sa Quezon City nitong Sabado ng gabi.

Pawang wala nang buhay sanhi ng mga tama ng bala sa iba’t ibang bahagi ng katawan ang mga biktimang sina Criselda Chua, Anthony Salazar, Leo Barba, at Celso Cervantes.

Blangko pa ang Quezon City Police District-Criminal Investigation and Detection Unit (QCPD-CIDU) investigators kung sino ang may kagagawan ng pagsalakay pero isa sa mga sinisilip na motibo ay may kaugnayan sa droga.

Sa ulat, naganap ang insidente dakong 11:40 p.m. sa loob mismo ng isang bahay sa #11 Golden Hills cor. Choclate Hills, Brgy. Payatas B, Q.C.

Ayon kay Nicanor Silanga, barangay tanod at isang concerned citizen, may narinig silang mga putok ng baril sa loob ng naturang bahay pero dahil ayaw madamay sa gulo ay hindi na sila lumabas pa ng bahay at makiusyoso.

Sa pagresponde naman ng pulisya, bukod sa mga natagpuang bangkay ay may natagpuang ding ilang drug paraphernalia, kabilang ang apat na aluminum foils at isang lighter sa loob ng naturang bahay.

Ayon sa mga residente, ang naturang bahay ay ginagawang drug den na ang may-ari ay isa sa mga napatay. BOBBY TICZON

TEPOK ang isang ginang matapos pagsasaksakin ng kanyang mister sa kanilang bahay sa bayan ng Barotac Nuevo sa Iloilo.

Sa inisyal na imbestigasyon ng mga pulis, umuwi ang mister ng biktimang si Legaya Valdez na si Carlos na noo’y lasing na lasing.

Nagalit umano si Legaya sa pag-uwi nang lasing ni Carlos kaya sinuntok niya ito at pinagmumura.

Dito umano nagdilim ang paningin ni Carlos na kumuha ng kutsilyo at anim na beses na inundayan ng saksak ang misis dahil sa galit.

Isinugod sa ospital si Legaya ngunit hindi na rin umabot nang buhay.

Sa ngayon ay hawak na ng pulisya si Carlos at sinampahan na rin siya ng kasong parricide. JOHNNY ARASGA

IGINIIT ni Justice Sec. Vitaliano Aguirre II na personal na opinyon lang ni Pangulong Rodrigo Duterte ang pahayag nitong hindi dapat maghain ng impeachment complaint laban sa mga opisyal ng pamahalaan na wala pang dalawang taon sa panunungkulan.

Ito ang naging reaksyon ng pangulo sa paninindigan ni House Speaker Pantaleon Alvarez na magsampa ng impeachment complaint laban kay Vice President Leni Robredo.

Sa kabila ito ng babala ng pangulo na wala naman itong mabuting maitutulong sa bansa, kung itutuloy nila ang proseso ng impeachment.

Gayunman, nilinaw ni Aguirre na ang impeachment ay nasa ilalim ng kapangyarihan ng Kongreso at hindi ng pangulo.

Aniya pa, maaring ma-impeach si Robredo sakaling mapatunayang mali ang mga pahayag nito laban sa kampanya ng pamahalaan kontra iligal na droga.

Nagdulot aniya ito ng pinsala sa imahe at ekonomiya ng bansa, kaya suportado niya ang nasabing impeachment.

Gagawing basehan sa impeachment ang video message na ginawa ni Rorbedo, kung saan binabatikos niya ang drug war ng pamahalaan. JOHNNY ARASGA