SUPORTADO pa rin ng mayorya ng mga Pilipino si Pangulong Rodrigo Duterte.

Binigyang-diin ni House Speaker Pantaleon Alvarez na naipakita ito ng dami ng tao na nagtungo sa Luneta kaalinsabay ng pagdiriwang ng ika-31 taong anibersaryo ng EDSA People Power Revolution.

“Clearly, ‘yung nangyari nung Sabado, makita natin na alin ‘yung majority, alin ‘yung minority. So nakikita natin, ‘yung suporta sa ating Pangulo, talagang anduduon pa rin. At malakas pa rin yung suporta dahil nga on the basis of the platform of government ay binigyan siya ng huge mandate by the people,” ani Alvarez.

Hindi aniya maiiwasang magkaroon ng comparison sa mga taong nagtungo sa EDSA at sa Luneta dahil ang mga nasa LUneta ay tagasuporta ng administrasyon ngunit pawang boluntaryo.

Hindi rin aniya sa Luneta lamang ang pagtitipon kundi maging sa Cebu City, Davao City, Butuan City, at Cagayan de Oro City.

“Pinapakita lang siguro nung mga supporters niya na talagang ito ay suportado ng sambayanan.”

Hindi man aniya umabot ng milyon ang tao sa Luneta ay sapat aniya para ipakita ang suporta sa pangulo kumpara sa mga nasa EDSA na ilang libo lamang.

“Kasi ‘yung mga grupong dumating doon, kilala ko ‘yun, kasama na namin sa kampanya ‘yun nung araw pa. Kaya wala naman sigurong naging epekto doon sa letter ng DILG doon sa mga LGUs,” sinabi pa ni Alvarez.

Hindi rin pinalagpas ni Alvarez si Jim Paredes na pumatol sa mga miembro ng Duterte Youth na nagtungo sa EDSA People Power anniversary.

“Iyon, bilang nakakatanda, eh, hindi dapat ginawa yun. Kasi we are a free country. Ngayon kung ‘yung mga youth na ‘yun gusto nilang pumunta roon, eh, hindi naman ipinagbabawal yun. So it’s their call na pumunta sila doon para to express also their sentiments. Sa akin wala namang masama doon,” bigay-diin pa ni Alvarez. MELIZA MALUNTAG

NALAPNOS ang katawan ng isang paslit nang silaban ng kanyang tatay ang kanilang bahay sa Aklan kaninang Martes ng madaling-araw.

Inoobserbahan ngayon sa Intensive Care Unit (ICU) ng Aklan Provincial Hospital sanhi ng paso sa braso, paa at iba pang bahagi ng katawan ang biktimang si Kent Luis Zausa, ng Brgy. Bulabud, Malinao.

Naaresto naman at nahaharap sa patong-patong na kaso kabilang ang R.A. 7610 o Special Protection of Children Against Abuse, Exploitation and Discrimination ang suspek na si Russel Zausa, 37.

Sa ulat, naganap ang insidente dakong 12:55 a.m. sa residente ng pamilya Zausa.

Sa pagsisiyasat ni PO3 Claire Catuiran ng Malinao Police Women’s and Children’s Desk, umuwing lasing na lasing ang suspek kaya kinompronta ng misis nito.

Bilang ganti naman nito, kumuha ang suspek ng gasolina at isinaboy sa kanilang bahay saka ito sinilaban.

Lingid sa kaalaman ng suspek, nasabuyan din pala ng gasolina ang kanyang anak kaya nang lamunin ng apoy ang kanilang bahay ay kasama itong nasilaban. BOBBY TICZON

INANUNSYO ni Philippine National Police (PNP) chief Director Ronald dela Rosa kaninang Martes ng umaga na isang bagong drug enforcement group ang bubuuin kapag bumalik na muli ang kampanya laban sa illegal drugs.

“We will be forming a new drug enforcement group manned by a new set of officers,” pahayag ni Dela Rosa sa mga reporters sa 23rd anniversary ng National Police College sa Cavite.

Ibabalik na aniya sa lalong madaling panahon ang anti-drug campaign pero hindi naman sinabi nito kung kailan ang eksaktong petsa at nais niyang sorpersahin ang kanilang kalaban.

“Pinaghahanda lang kami ni Pangulong Rodrigo Duterte. Just be ready, ready get set go. Ready. We will be informed if we will go back to the war on drugs. We will be informed in due time. Hintay-hintay lang tayo.”

Inalis ni Duterte nitong nakaraang buwan lamang ang anti-illegal drug campaign matapos masangkot ang ilan sa mga miyembro ng PNP Anti-Illegal Drugs Group sa pagdukot at pagpatay sa Korean businessman na si Jee Ick Joo.

Pinagbawalan din ni President Duterte ang National Bureau of Investigation (NBI) sa paglalatag ng anti-drugs operations.

Sa kasalukuyan, ang lead agency na humahawak ng anti-drug operations sa Pilipinas ay ang Drug Enforcement Agency. BOBBY TICZON

SA ikatlong pagkakataon ay muling nagbago ang direksyon ng Malaking Kapulungan ng Kongreso sa pagsusulong na maibalik ang death penalty.

Sa caucus ng super majority ngayong hapon ay napagkasunduan na limitahan muli sa isa sa halip na apat ang mga krimen na dapat patawan ng parusang kamatayan.

Inalis na sa mga krimen na dapat patawan ng parusang bitay ang rape, treason at plunder.

Ang naiwan lamang ay ang kasong may kaugnayan sa droga.
Sinabi ni Mindoro Occidental Rep. Reynaldo Umali, chairman ng House Committee on Justice na napagkasunduan ng mga kongresista na limitahan na lamang sa drug-related cases ang pagpapataw ng parusang kamatayan, ang manufacturing, sale at trading ng droga.

Ngunit ang posession ng droga ay mananatili lamang sa kategorya ng reclusion perpetua.

Inamin ni Umali na mas magiging madali ang pagpapasa ng death penalty bill kung ito ay magiging limitado lamang sa drug-related cases.

Samantala, ipagpapaliban din bukas (Martes) ang botohan para sa second reading at sa halip ito ay gagawin sa Miyerkules. MELIZA MALUNTAG

ARESTADO ang limang hinihinalang gun runners sa dalawang operasyon na isinagawa ng Quezon City Police District District Special Operation Unit (DSOU) kagabi Pebrero 27, 2017 (Linggo).

Kinilala ni Quezon City Police District (QCPD) Director, Police C/Supt. Guillermo Lorenzo Eleazar ang mga nadakip na suspek na sina Vien Michael Riva, 35, ng 49 Agno Extn., Brgy. Tatalon; Jonathan Diestro, 42, ng 31 Pampanga St., Boni Village, Brgy. Pasong Tamo; Noel Tumaliwan, 50, ng 24 Interville Freedom Lane, Tandang Sora; Romil Triñanes, 28, ng Sampaguita St., Brgy. Tandang Sora; at Cecille Nillo, 42 ng 11 Fort Santiago St., Brgy. Holy Spirit, QC.

Ayon kay Eleazar, nitong nakalipas na Pebrero 25, nakatanggap ng impormasyon ang DSOU na ang isang alyas Tol Vien na sa huli ay nakilala na si Michael Riva ay sangkot umano sa gunrunning activity at sa pagpapakalat ng illegal drugs.

Dakong 8:50 ng gabi nitong Pebrero 26, isang entrapment operation ang isinagawa laban kay alyas Tol. Isang pulis ang nagpanggap na bibili ng baril sa halagang P5,000.

SA huli sumang-ayon ang suspek na makipag deal sa McDonald’s food chain sa Mindanao Ave. cor. North Ave. sakay ng isang Mitsubishi Mirage G4 (ABG-5873). Agad na dinakip si Riva matapos tanggapin ang entrapment money mula sa operatiba.

Habang ang mga suspek na sina Diestro, Tumaliwan at Triñanes na nasa loob ng sasakyan ay nagtangkang tumakas subalit agad din naharang ng mga operatiba na nasa labas ng establisyemento.

Nakumpiska ng mga pulis ang cal. 38 na baril mula kay Diestro at isang cal. 45 pistola at transparent sachet ng shabu na nakuha sa passenger seat kung saan nakaupo sina Tumaliwan at Tinanes. SANTI CELARIO

MALIBAN sa pagtaas ng singil sa kuryente, may pagtaas din sa singil sa tubig ang Maynilad at Manila Water.

Ayon kay Metropolitan Waterworks and Sewerage System (MWSS) Chief Regulator Joey Yu, ang pagtaas sa singil sa tubig ay dahil sa foreign currency differential adjustment (FCDA).

Sinabi ni Yu na ang itataas na presyo sa singil sa kuryente ay pinagsamang FCDA para sa 1st at 2nd quarter ng taon.

Hindi kasi inaprubahan ng MWSS ang price adjustment para sana sa unang quarter na iminungkahi ng Manila Water na P0.70 kada cubic meter at sa Maynilad na P0.37 kada cubic meter.

Dahil dito, sa buwan ng Abril, pinagsamang halaga ng 1st quarter at 2nd quarter FCDA ang madaragdag sa singil.

Nakatakda namang ianunsyo ng MWSS ang kabuuang halaga ng itataas sa singil sa tubig sa mga susunod na araw. JOHNNY ARASGA

NASAKOTE ng mga tauhan ng Philippine National Police Anti-Cybercrime Group ang 15 Chinese nationals at isang Pilipino sa Pasig City dahil sa iligal na operasyon ng online gambling.

Sinalakay ng mga pulis ang opisina ng YD International, Inc. sa Ortigas, Pasig City dahil wala umanong permit ang operasyon nito mula sa Philippine Gaming Corporation (PAGCOR) o sa anomang accredited economic zone.

Pinalalabas umano ng kumpanya na ligal ang kanilang website, ngunit ididirekta rin ang user sa iba pang website.

Dahil dito, mahaharap ang mga suspek sa kasong paglabag sa Cybercrime Prevention Act of 2012.

Napag-alaman ring mga illegal workers ang mga Chinese nationals dahil walang working visas ang karamihan sa kanila, habang expired naman na ang passports ng iba.

Ayon sa pulisya, panay mga tourist visa ang gamit ng karamihan, at ang sistema, oras na matapos ang kanilang visa, aalis sila pero babalik rin pagkatapos ng ilang buwan para muling magtrabaho dito sa bansa.

Iginiit naman ng suspek na Pilipino na hindi niya alam na iligal ang nasabing sugalan dahil taga-asikaso lamang siya ng mga bayarin ng opisina. JOHNNY ARASGA

INANUNSYO ng Department of Health (DOH) na maaari nang magamit ang kauna-unahang “air ambulance” upang makapaghatid ng mga pasyente mula sa Mindoro, Marinduque, Romblon, Palawan (Mimaropa) papunta sa mga pagamutan sa Maynila at Quezon City.

Batay sa nilagdaang “memorandum of agreement” sa pagitan ng DOH-Regional Office IV-B at Philippine Adventist Medical Aviation Services (PAMAS), pagkakalooban ng PAMAS ang DOH-RO IV-B ng sasakyang himpapawid ang mga pasyenteng nangangailangang ng medical, maternal at surgical attention partikular sa rehiyon ng MIMAROPA.

Sa ilalim ng kasunduan na pinirmahan ni Regional Director Eduardo C. Janiaro sa panig ng DOH at Capt. Sean Knapp ng PAMAS, magkakaloob ng PAMAS ng sasakyang himpapawid na isang CESSNA 206 (six seater) at isang Robinson R44 Helicopter (four seater) at isang awtorisadong piloto na mag-o-operate sa naturang sasakyang himpapawid para sa pagdadala ng pasyente mula sa ospital ng Palawan at karating rehiyon o hanggang sa Manila at Quezon City.

Titiyakin din ng PAMAS na mayroong kasamang doctor o nurse habang nakasakay sa nasabing sasakyang himpapawid habang dinadala ito sa ospital, gayundin ang mga pangangailangan ng emergency life saving kit para sa pasyente.

Siniguro naman ng PAMAS na ang kanilang sasakyang panghimpapawid ay nasa “good operating condition” para matiyak ang kaligtasan ng kanilang pasyente habang nakasakay ito.

Ang DOH-RO IV-B naman ang babalikat sa gastusin sa gasolina, operating expenses, at aircraft maintenance ng naturang sasakyan na nagkakahalaga ng P1-milyon.

Ayonkay Janairo, malaking tulong ito sa mga pasyenteng nakatira sa mga bulubundukin lugar na nangangailangan ng medical attention kung saan kabilang ang probinsya ng Palawan na mayroong munisipyo at barangay na maituturing na Geographical Isolated and Disadvantaged Areas (GIDA) at walang access sa Rural Health Unit (RHU). MACS BORJA

KASAMA si Pangulong Rodrigo Roa ay ipinrisinta ni Presidential Adviser on the Peace Process Jesus Dureza sa media ang pitong-taong gulang na batang si Rexon Romoc, na dinukot ng Abu Sayyaf Group (ASG) at napalaya kagabi.

Si Rexon ay dinukot ng Abu Sayyaf kasama ang kanyang mga magulang na sina Elmer at Nora sa Payao, Zamboanga Sibugay noong Agosto 5, 2016.

Dinala ang mga ito sa Sulu, kung saan ginawang hostage sa loob ng pitong buwan.

Ang inang si Nora ang unang pinalaya ng ASG matapos magbayad ng ransom noong Agosto 22, at pagkatapos ay isinunod ang kanyang ama noong Nobyembre 13 matapos magbayad ng P1-milyon.

Sinasabing nagmula ang perang ibinayad sa ASG sa pinagbentahan ng maliit na sari-sari store at utang mula sa kaibigan at kamag-anak, pinanatili ng bandidong grupo ang bata bilang hostage.

“Nora had been agonizing over Rexon, her youngest of 2 children. Since last December, I would get txts and calls from her, most of the time crying, asking for help. President Duterte instructed me to work on his release without,” ayon naman kay Dureza.

Labis namang nagpasalamat ang inang si Nora kay Pangulong Duterte sa pagkakaligtas ng kanyang anak.

Nagpasalamat naman ang batang si Rexon kay Pangulong Duterte habang bibigyan naman ng laruang helicopter ni Dureza ang batang si Rexon. KRIS JOSE

LIMANG katao ang namatay sa naganap na sunog sa Brgy. Pinagsama sa Taguig City.

Ayon kay Taguig Fire Marshall Ian Guerrero, kinabibilangan ng mag-asawang sina Ramon at Virginia Benjamin at mga apo nilang magkakapatid na sina Franklin, 8, Francine, 12, at France John, 6, ang namatay matapos na hindi agad na makalabas sa nasusunog nilang bahay.

Nasa trabaho ang kanilang ama habang nasa labas naman ng bahay ang kanilang ina kaya hindi na nasagip ang mga biktima.

Mahigit tatlong oras bago tuluyang makontrol ang sunog na tumupok sa 10 kabahayan.

Inaalam pang mabuti ng mga awtoridad ang sanhi ng sunog na nagmula umano sa bahay na walang kuryente. JOHNNY ARASGA

NASA kustodiya ng mga awtoridad ang isang lalaki na pinaniniwalaang miyembro ng rebeldeng New People’s Army (NPA) matapos na makunan ng baril, bala at granada sa Capalonga, Camarines Norte.

Kinilala ang suspek na si Noel Alsom, 36-anyos.

Sa nakalap na impormasyon, nabatid na dinala ng mga tauhan ng Bravo Company, 9th Infantry Brigade, 9th Infantry Division ang suspek sa himpilan ng Capalonga PNP.

Nadakip umano ito matapos ang nangyaring engkwentro sa pagitan ng rebeldeng NPA at tropa ng pamahalaan sa Brgy. Aurora sa nasabing bayan nitong Sabado, Pebrero 25.

Nakorner umano ang suspek sa liblib na bahagi ng lugar at narekober sa kanya ang isang granada, isang cal. 38 revolver, apat na bala at isang basyo para sa parehong kalibre ng baril.

Nai-turnover na rin ng mga awtoridad ang nakuhang bala, baril at granada sa Camarines Norte Provincial Crime Laboratory Office at sa Explosives Ordnance Division (EOD) para sa kaukulang eksaminasyon. -30-

NAGPATUPAD ng bawas-presyo ng Liquefied Petroleum Gas (LPG) ang kumpanyang Petron ngayong unang araw ng Marso.

Epektibo ang rollback ng Petron sa kanilang Gasul at Fiesta Gas kaninang alas-12:01 ng madaling-araw.

Nasa P0.35 kada kilo o katumbas ng P3.85 kada 11-kilogram cylinder naman ang ibinawas sa presyo ng LPG.

Habang may rollback din na P0.20 per liter ang nasabing kumpanya sa kanilang autoLPG.

Ayon sa Petron, ang rollback ay bunsod ng pagbaba ng presyo ng LPG sa pandaigdigang pamilihan. JOHNNY ARASGA

SAN NICOLAS, ILOCOS NORTE – Patay ang isang retired police habang malubhang nasugatan ang kasamahan nitong ex-policeman nang pagbabarilin sila ng hindi pa nakikilalang suspek sa Brgy. Payas, San Nicolas, Ilocos Norte kagabi, Pebrero 28.

Dead-on-the-spot si retired policeman SPO2 Warlito Maruquin, ng Brgy. 13, Gen. Segundo St., Laoag City, habang under observation naman sa ospital ang kanyang kasamahang si dating police Abdun Laureta.

Nagtamo si Maruquin ng mga tama ng mga bala ng .45 pistol at M-16 rifle sa iba’t ibang bahagi ng katawan habang himala namang nakaligtas si Laureta.

Ang dalawang biktima ay close-in security ni Solsona, Ilocos Norte Mayor Alex Calucag.

Sa ulat, nakasakay ang mga biktima ng pulang Toyota Corolla na may plakang TRF-353 nang sila’y tambangan ng suspek.

Nakakuha naman ang mga imbestigador ng walong sachet ng shabu sa loob ng kotse ng mga biktima.

Sa ngayon, nagsasagawa ng follow-up investigation ang San Nicolas police kung may kinalaman sa iligal na droga ang pamamaril. ALLAN BERGONIA

MULING pinagtibay ni Pangulong Rodrigo Roa Duterte ang kanyang pangakong tutuldukan na ang hindi patas na practice ng labor contractualization.

Nakipagpulong si Pangulong Duterte sa mga manggagawa nitong nakaraang Lunes, Pebrero 27, sa Malakanyang kung saan ay tiniyak nitong tutuparin na niya ang pangako niyang ito.

Sinabi ni Presidential spokesperson Ernesto Abella na ang kauna-unahang pulong ni Pangulong Duterte sa grupo ng mga manggagawa na umabot nang tatlong oras ay “free-flowing, frank, and cordial.”

“After decades of consistent struggle against the epidemic of contractualization, workers may finally get their demand for its total prohibition as the President in his first audience with workers groups Monday evening left no doubt that he is not only targeting endo but indeed to end categorically end all forms of contractualization, including middleman agencies,” ayon kay Usec. Abella.

Sinabi pa niyang makailang ulit na pinalakpakan ng labor groups si Pangulong Duterte.

Sa pulong pa rin ay inilatag ni Pangulong Duterte ang kanyang political capital.

Hangad ni Pangulong Duterte na maging pamantayan sa isang trabaho ang direct hiring.

Nais din niyang isertipika bilang urgent ang House Bill No. 4444 o an act prohibiting all fixed-term contracts and criminalizes violations. KRIS JOSE

TODAS ang isang 21-anyos na lalaki habang sugatan naman ang kasama nitong babae matapos pagbabarilin ng mga hindi kilalang suspek habang naglalakad sa Quezon City kaninang madaling-araw, Marso 1, Miyerkules.

Kinilala ni Supt. Danilo Mendoza, hepe ng Quezon City Police District station 3-Talipapa, ang nasawing si Jomar Paloma, binata, walang trabaho, ng Olivas St., Brgy. Pasong Tamo, QC.

Sugatan naman ang kasama nitong si Judy Ann Escaluna, 19, dalaga, walang trabaho, ng Nawasa Line, Brgy. Holy Spirit, Brgy. Commonwealth, QC, na kasalukuyang ginagamot sa East Avenue Medical Center (EAMC).

Sa ulat, naganap ang insidente dakong 2:30 ng madaling-araw sa Luzon Ave. cor. Sampaguita St., Brgy. Pasong Tamo, QC.

Naglalakad ang biktimang si Paloma at Escaluna sa naturang lugar nang biglang sumulpot ang mga hindi kilalang suspek at sunod-sunod silang pinagbabaril.

Nagtamo ng maraming tama ng bala ng baril si Paloma na ikinamatay nito noon din habang isinugod naman ang sugatang si Escaluna sa naturang ospital.

Nagsasagawa na ng imbestigasyon ang mga operatiba ng QC police sa naturang insidente. SANTI CELARIO

PARA protektahan ang kanilang sarili laban sa mga kriminal, tuturuang humawak ng arnis ang may 300 kababaihang tanod sa ilalim ng Barangay Tanod Training Program ng Pamahalalang Lungsod ng Quezon sa Huwebes, Marso 2, para sa Women’s Month.

Nabatid na 10-araw tuturuan ng arnis ang mga instructor ng Arnis Philippines, Inc. upang magkaroon ng kaalaman at kasanayan ang mga babaeng tanod na pangalagaan ang kanilang sarili kontra sa masasamang loob.

Bukod dito, ang arnis na isang national martial at sport ng ating bansa gamit ang stick ay may malaking pakinabang para magkaroon ng higit na disiplina at magkaroon ng maayos na pangagatawan at masiglang kaisipan ng mga sasailalim sa programa.

Ang naturang programa ay sa ilalim ng pangangalaga ni QC Vice Mayor Joy Belmonte bilang pagbibigay-alaga sa mga kababaihan.

Kasama ni Vice Mayor Belmonte sa pagpapatupad ng pograma ang Rotary Club New Manila QC at Arnis Philippines, Inc.

Ngayong buwan ng kababaihan, buong buwan ng Marso ay may naikasang iba’t iba pang proyekto ang pamahalaang lungsod bilang bahagi ng pagkilala at pagpupunyagi sa natatanging papel ng kababaihan sa QC hinggil sa pagpapaunlad ng lungsod. SANTI CELARIO

LIBRE na ang kasal, binyag at libing sa lahat ng simbahang saklaw ng Ecclesiastical Province o Archdiocese of Manila, simula sa Nobyembre.

Ito, ayon kay Manila Auxiliary Bishop Broderick Pabillo, chairman ng Catholic Bishop’s Conference of the Philippines (CBCP)-Episcopal Commission on the Laity, ay makaraang alisin ang “arancel o fixed rate” ng mga sakramento ng simbahang katolika.

Layunin aniya nitong tuluyang mabura sa isip ng publiko na binabayaran ang mga sakramentong ibinibigay ng simbahan.

Aminado si Pabillo na sa tingin ng marami ay mapepresyuan ang mga serbisyo ng simbahang Katolika.

Sakop ng archdiocese ang mga diocese of Antipolo at buong Rizal; Cubao, Quezon City; Imus at buong Cavite; Kalookan; Malolos at buong Bulacan; Novaliches; Parañaque; Pasig at San Pablo, Laguna. JOHNNY ARASGA

PATAY na nang matagpuan ang isang Chinese national sa loob ng inuupahang condominium sa Brgy. Poblacion, Makati City.

Sa nakuhang passport, kiniala ang dayuhan na si Zongxing Lu, 23, binata.

Kinilala kagabi ang mga labi ng biktima sa inuupahang kwarto nito sa Room 2715 ng Gramercy Residences.

Kwento ng isang empleyado, naka-schedule sana siyang maglinis ng kwarto ni Lu pero nang katukin niya ito ay walang sumasagot dahilan para maghinala siya.

Nang buksan ang pinto, tumambad ang nakahubad na katawan ng biktima at nakabigti ang leeg.

Walang nakitang suicide note malapit sa biktima.

Batay sa report ng Makati City Police, walang nakitang injuries sa katawan ng biktima.

Nagpapatuloy pa rin ang imbestigasyon ng pulisya upang malaman kung may naganap na foul play sa pagkamatay ng nasabing Chinese national. JOHNNY ARASGA

ANDA, PANGASINAN – Dead-on-arrival ang isang estudyanteng babae habang malubhang nasugatan ang kapatid nitong lalaki matapos humampas ang sinasakyan nilang motosiklo sa isang Isuzu Elf sa nasabing lalawigan kahapon, Martes.

Kinilala ang namatay na si Jovilove Carolino, 23, habang nasa intensive care unit (ICU) ang kasamahan nitong si Jervin Carolino, 20, kapwa taga-Brgy. Awag ng nasabing bayan.

Sa imbestigasyon, naganap ang insidete alas-5:30 ng hapon sa Brgy. Mal-ong, Anda kung saan sakay ang mga biktima ng isang itim na Honda TMX (5285-ZK) na minamaneho ni Jervin.

Tinatahak ng Isuzu Elf (RDV-252) na minamaneho ni Ronald Donato, 35, ng Camasingalan, Sual, Pangasinan, ang daan nang biglang sumulpot ang motorsiklo ng mga biktima at humampas sa harapan nito.

Tumilapon ilang metro mula sa crime scene ang mga biktima at tumama ang ulo ni Jovilove sa isang concrete cement sanhi ng kanyang agaran nitong pagkamatay.

Parehong isinugod sa Bolinao Community Hospital ang dalawang biktima kung saan namatay si Jovilove.

Agad namang sumuko si Donato sa Anda police at nakatakda itong sampahan ng kasong serious physical injury at reckless imprudence resulting homicide. ALLAN BERGONIA

PATAY ang isang barangay chairwoman nang pagbabarilin ng isang gunman habang naglalakad pabalik sa barangay hall, matapos magkabit ng tarpaulin sa Tondo, Maynila kagabi.

Hindi na naisalba pa ng mga doktor sa Chinese General Hospital ang buhay ng biktimang si Nenita Acuña, 43, dalaga, chairwoman ng Brgy. 200, Zone 18, District 2, at taga-1026-A Hermosa St., sa Tondo, bunsod ng dalawang tama ng bala sa ulo.

Tinutugis na ng mga awtoridad ang isang Adrian Tayag, alyas ‘Pitong’, na taga-Tayag St., Tondo matapos iturong responsable sa pagpatay.

Sa imbestigasyon ni SPO2 Richard Escarlan ng Manila Police District (MPD)-homicide section, dakong 6:59 ng gabi nang maganap ang krimen sa isang eskinita, sa Dela Cruz St. kanto ng Hermosa St. sa Tondo.

Nabatid na katatapos lamang umanong magkabit ng mga tarpaulin ng biktima kasama ang barangay treasurer na si Jesskenlee Torres, 29, at isang barangay tanod nang isagawa ng suspek ang pagpatay.

Nakuhanan pa sa CCTV camera ang paglalakad ng biktima at mga kasamahan nito, habang kasunod ang suspek, na umiinom pa ng softdrinks, at naka-ball cap, tribal gear jacket, maong short pants at armado ng kalibre .45 baril.

Maya-maya ay nagulat na lamang ang mga kasamahan ng biktima nang makarinig ng dalawang magkasunod na putok ng baril at nang tingnan ay papatakas na ang suspek, habang duguan nang nakahandusay ang kapitana.

Isinugod naman ni Torres at Kagawad Noemi Acuňa sa pagamutan ang biktima pero nasawi rin dakong 7:50 ng gabi.

Kaagad namang nagsagawa ng follow-up operation ang mga awtoridad sa tahanan ni Tayag dakong 7:30 ng gabi ngunit bigo silang maaresto ito.

Sa halip, nadakip ng mga pulis ang mga suspek na sina Allan Tayag, 19, at Florentino Cadano, 32, kapwa Hermosa St., Tondo, nang makumpiskahan ng dalawang sachet ng shabu at isang kalibre .38 na paltik na kargado ng limang bala.

Inaalam pa ng mga awtoridad ang posibleng motibo ng krimen at kung posibleng may kinalaman ba ito sa trabaho ni Acuña bilang kapitana ng barangay. JOCELYN TABANGCURA-DOMENDEN