BUMALIK na sa bansa ang binansagang “Queen of all media” na si Kris Aquino mula sa halos dalawang linggong bakasyon sa Europa dahil sa mga kontrobersyang kinaharap nito.
Dumating ito sa Ninoy Aquino International Airport kasama ang kanyang dalawang anak na sina Joshua at Bimby dakong alas-10:10 ng gabi lulan ng Emirates Air flight EK-334.
Tulad ng inaasahan, tadtad ng bantay ng mga kagawad ng Presidential Security Group ang actress-TV host para siguruhing walang miyembro ng media na makalalapit sa kanila.
At katulad din ng dati nang umalis ito noong nakaraang buwan, idinaan sina Kris at kanyang mga anak ng kanilang PSG escorts sa rampa.
Naging laman ng telebisyon at pahayagan sina Kris at dating asawang si James Yap nang mag-file ang kapatid ni PNoy ng Temporary Protection Order laban kay James.
Naghain naman ng hold departure order ang basketbolista para pigilan ang pangingibang-bansa ni Kris kasama ang mga anak pero ibinasura ito ng korte.