MAY GO SIGNAL ng Malakanyang ang pag-angkat ng National Food Authority (NFA) ng hanggang 187,000 tonelada ng bigas bilang buffer stock.
Ito’y sa kabila ng sinabi ni Agriculture Sec. Proseso Alcala na sapat ang suplay ng bigas sa bansa ngayong taon.
Nauna rito, sinabi ni Pangulong Aquino na nakatakdang umangkat ang Pilipinas ng hanggang 100 metric tons ng high-grade rice.
Tinuran ni Presidential Spokesman Edwin Lacierda na sa 2014 pa rice-sufficient ang bansa at ang aangkatin ngayong quarter ay panigurado lang.
Aniya, totoong mag-e-export ng premium quality rice ngayong taon habang aangkat pa rin ng ordinary rice at inaasahang titigil na ang anumang importasyon sa 2014.
Kinakailangan aniyang si Alcala ang magpaliwanag dahil sa kanya nanggaling ang mga datos na ibinigay sa Pangulong Aquino.
Ayaw namang maniwala ng Malakanyang na ‘misinformed’ ang Pangulo at hintayin na lamang daw ang paliwanag ni Alcala.