NASAKOTE na ng mga pulis ang isang lalaki na sinasabing holdaper ng mga taxi driver sa isinagawang follow-up operation Sabado ng gabi, Marso 2.
Nakilala ang suspek na si Henrick Igot, 40, ng PNR cmpd., ng lungsod habang inaalam na kung sino ang kasama sa mga panghoholdap ng mga taxi driver.
Batay sa ulat, dakong alas-10 ng gabi nang madakip ang suspek sa kanilang bahay sa nasabing lugar matapos makatanggap ng impormasyon ang mga pulis na ang suspek ang mga nanghoholdap at tumatangay ng mga nabibiktimang taxi.
Positibo naman kinilala ni Protextato Labola, 35, ng Veterance Bagong Silangan, Quezon City ang suspek na siyang nangholdap sa kanya noong Marso 1, 2013.
Sinabi pa ng biktima na dakong alas-11 ng gabi nang maisakay niya ang suspek kasama ang isa pa sa Aurora Cubao at nagpahatid sa Caloocan City.
Katabi ng biktima si Igot habang nasa likod ang isa pang kasama at pagsapit sa Samson Road, Caloocan City ay nagdeklara ng holdap ang mga suspek.
Kinuha ng mga suspek ang kita ng biktima na aabot sa P4,400, ang isa cellphone bago pinababa ang huli at pinahururot papatakas ng mga suspek ang Toyota Corolla (TWG-720) taxi.
Nakita naman ang taxi na nakaparada sa D. Aquino st., dakong alas-11 kaninang umaga.