UPDATE: Sumakabilang-buhay na kaninang madaling araw (Marso 3) ang vice mayoralty candidate na inambus nitong nakaraang Sabado ng hapon sa Mobo town, Masbate.
Ito ang kinumpirma ni Mobo MPS chief of police Inspector Jojelito Alforte na pasado alas-12:15 ng madaling araw nang biglang pumanaw si ABC President at Togbo Barangay Captain Isagani Lutango.
Si Lutango ay tumatakbong bise alkalde sa Mobo sa ilalim ng Nationalist People’s Coalition (NPC).
Ayon kay Alforte, tatlong tama ng bala mula sa hindi mabatid na uri ng short rifle ang tumama sa katawan ng biktima na nagresulta sa kumplikasyon hanggang sa tuluyan na itong bawian ng buhay.
Sa ngayon, nasa St. Florence funeral parlor ang labi ng biktima habang wala pang inilalabas na pahayag ang kanyang pamilya hinggil sa kung anong kasyon ang kanilang isusunod .
Maaalalang, pasado alas-5:00 nitong Sabado ng hapon ay binaril ng hindi pa nakilalang mga suspek ang biktima habang nasa isang sabungan sa Mobo Sports Complex. (Robert C Ticzon)