LAOAG CITY, ILOCOS NORTE – Dahil lamang sa pakikipag-away sa school, isang high school student ang nagbigti sa kanilang bahay sa Barangay Suyo, Laoag City, sa nasabing lalawigan kahapon, August 6.
Ang biktima na nakilalang si Sonny “Boy” Tuzon, 16, 4th year high school student ng Ilocos Norte National High School (INNHS) ng nasabing bayan.
Sa imbestigasyon ng Laoag City police, sinabi ng tatay ng biktima na si Lucilo Tuzon na bago magpakamatay ang biktima ay napagalitan umano siya dahil nakipagsuntukan ito sa eskwelahan.
Dahil dito, dinamdam ng biktima ang kanyang pagkagalit at nagkulong siya sa kuwarto.
At nang tawagin ang biktima para kumain, nagulat lamang ang kaanak niya nang makitang nakabitin ng nylon cord ang biktima at wala ng buhay.
Patuloy na nagsasagawa ng imbestigasyon ang pulisya hinggil sa insidente. Allan Bergonia