MANANATILI sa kustodiya ng Bureau of Immigration (BI) sa Taguig City ang Australian jihadist na si Robert Edward Cerantonio, alyas “Musa Cerantonio,” habang naghihintay ng kanyang deportation order.
Ito ang tiniyak ng BI kasabay ng pahayag ni BI spokesperson Atty. Elaine Tan na nakikipag-ugnayan na ang ahensya sa Australian embassy upang agad na mapabalik ng kanyang bansa si Cenrantonio matapos na maaresto sa Lapu-lapu City, Cebu dahil sa paglalantad nito ng global jihad sa internet.
Hawak naman ng pulisya sa Mandaue City ang kasintahan ni Cerantonio na si Joen Montaire, alyas “Mayra Ashawie,” 32, fashion designer ng Negros Occidental.
Si Cerantonio umano ay pumasok sa bansa upang magsagawa ng pagtuturo ng jihad sa internet partikular sa facebook.
Pinaniniwalaang konektado din si Cerantonio sa terror group na Al Qaeda. Tinukoy ng ilang terrorist experts na si Cerantonio ay isa sa mga maimpluwensiyang online preachers. Sinusuportahan ito ang jihad sa Iraq at Syria.
Ayon pa sa BI, ang pagpapa-deport kay Cerantonio ay matapos kanselahin ng Canberra ang kanyang pasaporte kung kaya’t itinuring na itong illegal alien sa bansa.
Si Cerantonio ay may 12,000 followers sa FB bago i-shut down ang kanyang FB noong Abril. Jocelyn Tabangcura-Domenden