WALONG dalubhasang doktor mula sa Philippine General Hospital (PGH) ang tumulak sa PNP General Hospital sa Camp Crame upang suriin si Sen. Juan Ponce Enrile kaninang umaga, Hulyo 10.
Sinabi ni Dr. Jose Joven Cruz, spokesperson ng PGH, binubuo ng mga doktor na may iba’t ibang specialization tulad ng opthalmology, neurology, geriatric medicine, endocrinology at cardiology.
Sa pamumuno ni Dr. Lourdes Capito, deputy director ng PGH sa grupo, tututukan nila ang kalagayan ng kalusugan ng senador sa iba’t ibang aspeto upang makapagsumite sila ng rekomendasyon sa Hulyo 14, Lunes sa Sandiganbayan kung dapat bang isailalim pa ito sa hospital arrest.
Sabi pa ni Cruz, posibleng hindi matapos ngayong Huwebes ang isinasagawa nilang tests tulad na lang ng heart monitoring na 24-oras dapat ang itinatagal.
Sakaling hindi pa sila matapos, maaaring ilabas ng PNP General Hospital ang senador at dalhin sa PGH.
The post 8 PGH doctors, susuriin si JPE appeared first on Remate.