HINIRANG bilang Best Player of the Conference (BPC) si Ranidel de Ocampo ng Home TelPad PBA Governors’ Cup ngayong Huwebes ng gabi, July 3, sa Smart Araneta Coliseum.
Sa kabila ng pagkabigo na makapasok sa finals nang talunin ng San Mig Super Coffee Mixers sa best-of-five series ng semifinals, nakamit ni De Ocampo ang nasabing award kahit pa nasa panglimang pwesto lamang siya sa stat race.
Nakalikom ng kabuuang 1,084 puntos si De Ocampo, na galing ang 541 sa media votes, 150 mula sa PBA, 35 sa mga manlalaro at 358 stat pts.
Naungusan ng Julugan, Tanza, Cavite native sina San Miguel Beermen bigman June Mar Fajardo tangan ang 989 pts., Air 21 center Asi Taulava, 638 pts., Ginebra rookie Greg Slaughter, 409 at Meralco forward Cliff Hodge na may 404 pts.
Ito ang kauna-unahang BPC award ni De Ocampo sa kanyang 10 taong PBA career.
“Sobrang saya kasi first Best Player of the Conference award ko ‘to,” ani De Ocampo. “Dati naman nagiging candidate din ako, pero ‘di nananalo. Kahit paano, ‘yung mga hirap, tiyaga, nagbunga.
“Na-appreciate ng tao at ng mga bumoto. Sa mga fans, maraming salamat sa inyo.”
Samantala, napasakamay naman ni Rain or Shine forward Arizona Reid ang kanyang ikalawang Bobby Parks Best Import award.
Nakalikom si AZ ng kabuuang 1,306 pts. na nagdala sa kanya sa tuktok. 563 dito ay mula sa kanyang stats, 518 sa media votes, 150 sa PBA at pinakamataas mula sa mga manlalaro na 75 pts.
Tinalo ni AZ sina reigning Best Import Marqus Blakely ng SMC na may 1,043 pts., Texter’s Paul Harris, 602 at si Alaska Aces’ Henry Walker na may 572 pts.
Matatandaang noong 2011 Governors’ Cup nasungkit ni AZ Reid ang kanyang unang Best Import award.
The post RDO, AZ Reid, bilang BPC at Best Import appeared first on Remate.