ARESTADO ang dalawang menor-de-edad na itinuturing na “notoryus” na holdaper matapos nitong saksakin ang isang truck helper na kanilang hinoldap sa loob ng truck sa Tondo, Maynila.
Kinilala ni PCInsp. Rizalindo Morales, ng MPD-Don Bosco Police Community Precint
ang mga naarestong menor-de-edad na sina Ronnie, 17; at Mike, 15; pawang mga taga-Temporary Housing, Vitas, Tondo, Maynila.
Nabatid na naganap ang insidente noong Hunyo 24, alas-3 ng madaling-araw habang nakasakay umano ang biktimang si Ruben Maniago sa minamanehong truck nang huminto sila sa may Road 10, Capulong Street, Tondo, Maynila dahil sa traffic.
Sumulpot umano ang mga suspek at isa sa kanila ang puwersahang binuksan ang pinto ng truck at kaagad na sinaksak sa kaliwang tuhod ang biktima at saka sinikwat ang mga nakatagong tools ng sasakyan sa loob bago mabilis na tumalon palabas.
Kaagad naman nagtungo ang biktima sa Barangay Hall at sa Don Bosco PCP para ireklamo ang nangyari.
Sanhi nito, kaagad na nagpatrulya ang mga awtoridad hanggang sa mamataan sa Road 10 ang dalawang suspek na agad inaresto.
Sinampahan ng kasong robbery at serious physical injury si Ronnie sa Manila Prosecutor Office ,habang itinurn over naman sa Department of Social Welfare and Development -RAC sa Maynila si Mike.
The post 2 menor-de-edad dakip sa holdap appeared first on Remate.