SUGATAN ang isang 24-anyos na babae nang tumalon ito mula sa isang taxi makaraang patakbuhin nang mabilis ng hindi nakilalang driver ang sasakyan nito kahapon ng madaling-araw sa Pasay City.
Ginagamot sa Pasay City General Hospital (PCGH) ang biktimang si Rhoda Velasco, ng Orbis Tondo, Pangasinan sanhi ng tinamong pinsala sa siko at tuhod nito.
Nagsasagawa naman ng beripikasyon ang pulisya sa Land Transportation Office (LTO) at Land Transportation Franchising and Regulatory Board (LTFRB) hinggil sa pagkakakilanlan ng tumakas na driver ng taxi na may tatak na “DOROJAN Taxi” at may plakang UVH-706.
Batay sa isinumiteng ulat kay C/Insp. Angelito De Juan, hepe ng Station Investigation Detective Management Branch ng Pasay City Police, ala-1:00 ng madaling-araw ng maganap ang insidente sa EDSA Rotonda ng naturang lungsod.
Nauna rito, kasama ng biktima ang kanyang kaibigan na nakilalang si Daisy Mesina patungong International Airport sa NAIA upang alamin ang pag-alis ng kanyang asawa papuntang Korea.
Sumakay ang dalawa sa nasabing taxi patungong Victoria Liner Bus Terminal sa EDSA, pagdating nila sa nasabing terminal ay laking gulat nila nang bigla silang singilin ng halagang P800 bukod pa ang P50 na tip.
Walang nagawa umano ang dalawa kundi magbayad ng nabatid na halaga sa hindi nakilalang driver dahil tinatakot umano sila nito.
Bumaba ng taxi si Mesina upang alamin ang body number at plate number ng taxi habang ang biktimang si Velasco ay naiwan pa sa loob ng naturang sasakyan kung saan nagbabalak pa lamang itong bumaba.
Akmang bababa pa lamang si Velasco ay biglang pinaharurot ng driver ang taxi kaya’t lumundag ito at nagpagulong-gulong sa kalsada na nagresulta sa pagkakasugat nito.
The post Bebot, sugatan sa pagtalon sa taxi appeared first on Remate.