SUGATAN sa engkwentro ang isang lider ng carjacking syndicate habang nakulweyuhan naman ang dalawang kasamahan nito sa isang police checkpoint sa Antipolo City nitong Miyerkules ng gabi, Hunyo 19.
Isinugod sa Amang Rodriguez Hospital sanhi ng tinamong tama ng bala sa iba’t ibang parte ng katawan ang suspek na si Ronan Rocha.
Nakaditine naman ngayon sa Criminal Investigation and Detection Group (CIDG) detention cell at sasampahan ng kaukulang kaso ang dalawang kasamahan ni Rocha na hindi nakuha ang mga pangalan.
Sa ulat, naganap ang insidente dakong 10:25 nitong Miyerkules ng gabi sa isang gas station sa Marcos highway sa Barangay Mayamot.
Bago ito, pinara ng CIDG operatives ang Mitsubishi Montero (UUI-219) ng mga suspek sa isang gasoline station sa may Marcos highway dahil sa kahina-hinalang mga kinikilos ng mga nakasakay sa nasabing SUV.
Imbes pumara, humarurot ang mga sasakyan ng mga suspek at pinaputukan pa ang humahabol na mga pulis.
Sa gitna ng palitan ng putok, tinamaan si Rocha habang taas ang kamay na lumabas sa kanilang sasakyan ang dalawang kasamahan nito.
Nakumpiska sa mga suspek ang nakaw na Mitsubishi Montero, isang cal. 38 revolver, at isang granada.
The post Carjacker sugatan, 2 tiklo sa engkwentro sa Antipolo appeared first on Remate.