NAMATAY ang driver ng isang kotse matapos makabangga ang isang closed delivery van sa C5, Taguig malapit sa Market! Market! kaninang madaling-araw.
Kinumpirma ng tauhan ng Metro Manila Development Authority (MMDA) Rescue team na binawian ng buhay ang driver ng Nissan Sentra bagama’t naisugod pa sa Ospital ng Makati (OsMak).
Sa inisyal na imbestigasyon, ang insidente ay naganap alas-5:00 Biyernes ng madaling-araw.
Nabatid na nasa inner lane ng C5 southbound ang dalawang sasakyan nang bumuntot ang kotseng may plakang ZTX 925 sa van nang bumangga sa hindi pa mabatid na dahilan.
Wasak ang harapan ng kotse at hinihinalang nabagok ang ulo ng driver sa windshield.
Sugatan naman ang driver ng van na nagtamo ng malaking sugat sa kaliwang bahagi ng noo.
Patuloy pa rin ang imbestigasyon sa insidente.
The post Kelot pisak sa banggaan ng van at kotse appeared first on Remate.