HINAHANTING na ng pulisya ang isang drug addict na pumatay sa kanyang inupahang sex worker sa Quezon City nitong nakaraang Sabado ng madaling-araw.
Kinilala ang suspek na si Musushi Tamano Lucman, huling kasama ng hindi nakikilalang biktima na inilarawang 20-22-anyos, naka-orange na t shirt at maong pants sa pag-check in sa Selanna Hotel, sa Cubao, QC. alas-12:15 ng madaling-araw.
Ayon sa kasama ni Lucman Mohhamad Ikles Mindalano, binayaran nila ang dalawang sex workers sa may Cubao at dinala sa nasabing hotel para pagparausan.
Pero ayon kay Mindalano, makalipas ang tatlong oras, bigla na lamang nagkaroon ng komosyon sa loob ng kuwarto na inupahan ni Lucman.
Ayon naman kay Bonifacio Jimenez, ang officer in charge ng hotel, narinig niya ang komosyon kaya pinuntahan niya ang kuwarto at nakitang pawisan at hindi mapalagay ang suspek.
Tinangka niya itong tanungin kung anong nangyari pero bigla itong tumakas at tumalon sa fire exit na nasa ikatlong palapag ng naturang hotel.
Sa kalituhan, suot pa aniya ni Lucman ang tsinelas ng mismong hotel sa kanyang pagtakas at naiwan ang kanyang rubber shoes.
Naiwan din ni Lucman ang kanyang bag na nang siyasatin ng pulisya ay nakitaan ng hinihinalang dahon ng pinatuyong marijuana.
Nang hanapin naman ni Jimenez ang kasama nitong babae, natagpuan ito sa banyo na may nakasakal na tuwalya sa leeg nito.
Teorya ng QCPD, maaaring humihirit pa ng isang round ng pagtatalik ang suspek na hindi naman pinagbigyan ng biktima.
The post Umayaw sa ‘isa pa,’ sex worker inutas appeared first on Remate.