KRITIKAL ang lagay ng isang binata nang saksakin ng kanyang kuya makaraang magtalo habang nag-iinuman dahil sa hindi pagbibigay ng share sa gastusin sa bahay, Biyernes ng gabi sa Malabon City.
Inoobserbahan sa Tondo Medical Center (TMC) si Rolando Gracilla, 35, pedicab driver ng #49 Camus Extension, Brgy. Ibaba ng nasabing lungsod sanhi ng dalawang saksak sa tiyan.
Mabilis namang tumakas ang suspek na si Rogelio Gracilla, 36, nakatatandang kapatid ng biktima.
Base sa imbestigasyon, alas-10:00 ng gabi nang maganap ang insidente sa loob ng bahay ng mga ito sa nasabing barangay.
Nag-iinuman ang mag-utol nang maungkat ng kuya ang hindi pagbibigay ng kapatid ng tulong sa gastusin sa bahay dahilan upang mainis ang biktima at sagot-sagutin ang kanyang kuya.
Sa galit naman ay kumuha ng patalim ang suspek at dalawang beses na tinarakan ang kapatid bago tumakas.
The post Away sa pera: Bunso tinarakan ng kuya appeared first on Remate.