PATAY ang isang palaboy nang magkalasog-lasog ang katawan makaraang tatlong beses masagasaan ng rumaragasang mga sasakyan kaninang madaling-araw sa Makati City.
Dead on the spot ang hindi pa nakikilalang biktima sanhi ng mga bali sa katawan at pinsala sa ulo matapos paulit-ulit na mahagip ng tatlong magkakaibang sasakyan.
Sa imbestigasyon, alas-4:50 ng madaling-araw nang maganap ang insidente sa kahabaan ng Sen. Gil Puyat Avenue, San Antonio Village.
Nauna rito, umupo sa gitna ng lansangan ang biktima kaya’t nahagip siya ng isang rumaragasang puting taxi.
Tumilapon ang biktima nang mabundol ng taxi kaya nasagasaan naman siya ng parating na Isuzu Crosswind hanggang muling masagasaan ng isa pang sasakyang Isuzu Alterra.
Tumakas patungo ng Pasay ang driver ng taxi at Isuzu Crosswind habang sumuko naman sa pulisya ang driver ng Alterra na kinilalang si Michael Jerome Cervantes, 26, ng 15 Narcisus St., Roxas District, Quezon City.
Dinala ng mga nagrespondeng Rescue Team ng Barangay Pio Del Pilar sa Filipinas Funeral ang biktima habang sinampahan naman ng kasong Reckless Imprudence Resulting in Homicide sa piskalya ng Makati si Cervantes at ang dalawa pang hindi nakilalang driver ng taxi at Isuzu Crosswind.