MALUBHANG nasugatan ang dalawang lalaki matapos bugbugin at saksakin ng magpinsan nang magtalo matapos pagbintangan ng mga huli na inihian sila ng mga una habang nag-iinuman sa ginagawang eskwelahan sa Caloocan City, Huwebes ng gabi, Marso 20.
Ginagamot sa Jose Reyes Memorial Medical Center (JRMMC) sanhi ng pagkabali ng braso at mga saksak sa katawan si Vicente Vibora, 39, habang saksak naman sa dibdib ang inabot ni Mario Abrigo, 41, kapwa ng Montalban, Rizal.
Pinaghahanap naman ng mga pulis ang mga suspek na sina Marvie Pinca at Roland Pinca, kapwa stay-in sa Amparo High School ng lungsod.
Sa ulat, alas-7 ng gabi, nag-iinuman ang mga biktima sa ikalawang palapag ng nasabing eskwelahan habang sa unang palapag naman tumatagay ang mga suspek nang may tumulong tubig galing sa tubo at napatakan ang magpinsan.
Sa pag-aakalang ihi ng mga biktima ang pumatak, agad inakyat ng mga suspek ang mga biktima at kinompronta na nauwi sa pagtatalo hanggang sa kumuha ng pamalo si Roland habang naglabas naman ng icepick si Marvie at sinugod ang mga biktima.
Matapos ang insidente, tumakas ang mga suspek habang dinala ang mga biktima sa Tala Hospital bago inilipat sa JRMMC.
The post 2 kelot pinagsasaksak ng magpinsang senglot appeared first on Remate.