AMINADO ang mga tauhan ng Taguig City police na blangko pa rin sila hinggil sa natagpuang pick-up van na tadtad ng tama ng bala kaninang madaling-araw sa Taguig City.
Kasalukuyang nagsasagawa pa ng malalimang imbestigasyon ang pulisya hinggil sa naganap na insidente kung saan inaalam pa nila kung kanino naka-rehistro ang Mitsubishi Strada (RLY-330) na natagpuang nakaparada sa labas ng Heritage Park sa Bayani Road, Barangay Pinagsama, Fort Bonifacio dakong alas-2 ng madaling-araw na flat ang mga gulong at tadtad ng tama ng bala.
Nabatid kay Taguig police chief S/Supt. Arthur Felix Asis, inaalam pa ng mga tauhan ng Scene of the Crime Operatives (SOCO) kung anong uri o kalibre ng baril ang ginamit nang tadtarin ng bala ang sasakyan na naging dahilan ng pagkabasag din ng mga salamin.
Wala namang nakitang bakas ng dugo sa loob at labas ng sasakyan bagama’t may mga basyo ng bala ng hindi pa batid na kalibre ng baril ang natagpuan ng pulisya.
Ayon sa pulisya, sa oras na matukoy na nila kung kanino naka-rehistro ang naturang sasakyan, magiging daan na ito upang unti-unting malinawan ang motibo sa pagpapaulan ng bala sa naturang pick-up van.
The post Pick-up van natagpuang tadtad ng tama ng bala appeared first on Remate.