TODAS ang isang estudyante at sugatan naman ang kasamang pulis makaraang maaksidente kaninang madaling-araw sa national highway ng Brgy. Cabaroan, Bantay, Ilocos Sur.
Nasawi habang nilalapatan ng lunas si June Ariel Pablico, 20, 4th year criminology student at nakilala naman ang sugatang pulis na si SPO1 Elmirante Tudlong, kasapi ng Ilocos Sur Police Provincial Office, tubong San Fernando, La Union.
Nabatid na binabaybay ng mga biktima ang national highway sakay ang Honda XRM 125 na minaneho ni Tudlong nang makarating sa kurbang bahagi ng daan at nasagasaan ang isang bato na naging dahilan para maaksidente ang mga biktima.
Dahil dito, nagtamo ng matinding sugat sa ulo ang estudyante dahilan ng kanyang pagkasawi.
Ayon sa inisyal na imbestigasyon, lasing si June nang maganap ang aksidente kung saan kaarawan niya kahapon habang kaarawan naman ngayon ng nasugatang pulis.