Panagbenga Festival, umarangkada na

Kaninang umaga, pormal na binuksan ang taunang festival na tampok ang mga naggagandahang bulaklak. Masugid na nag-abang ang mga turista sa kahabaan ng Session Road na isa sa mga dinaanan ng parada.Kabilang sa mga lumahok sa pagbubukas ng festival ang ilang opisyal ng Philippine Military Academy (PMA) na kaagad nasundan ng street performance ng ilang kabataan.

Hindi rin nagpahuli ang mga Baguio Ethnic Dance Troupe na lumahok sa parada bukod pa sa mga delegado mula sa Korea.

Suot ang makukulay na costume, nagpakitang-gilas din sa street dance ang mga mag-aaral mula Saint Louis University, Baguio City SPED Center, mga anime cosplayers kasama ang ilang miyembro ng lesbian, gay, bisexual at transgender (LGBT).

Sunflower naman ang tema ng isa sa mga grupong nagpasiklab habang nag-perform din ang isang grupong na mistulang paru-paro.

Tiniyak naman ng Baguio Flower Festival Foundation, Incorporated ang kalinisan at organisadong selebrasyon ng Panagbenga Festival ngayong taon.

Nasa 996 na pulis ang ikinalat sa lungsod at gagamit din ng drone plane ang Baguio Police na kanilang gagamitin para subaybayan ang mataong lugar.

Tutulong din sa crowd control ang 2,000 volunteers habang nakaantabay ang limang ambulansya sakaling may mangailangan ng atensyong medikal sa gitna ng parada.