HINDI ako rapist!
Ito ang umiiyak na pahayag ng aktor na si Vhong Navarro makaraang humarap sa panayam ng beteranong TV host na si Boy Abunda habang namamaga ang mukha at parehong may black eye sa magkabilang mata.
Habang nakahiga sa hospital bed, inamin ni Vhong na kaya siya pumayag na magpa-interview ay para hindi na maulit ang insidente, sa kapwa niya mga artista sa ibang tao lalo na sa ordinaryong mga tao.
Inamin din ni Vhong na mula sa P200 thousand na hinihingi sa kanyang pera ay umakyat ito sa kalahating milyon, hanggang sa maging P1 milyon bilang damage niya umano sa babae na kanyang pinangalanan na si Denise Millet Cornejo.
Sa salaysay ni Vhong, si Denise ay kaibigan niya na sa loob ng dalawang taon, pero nitong Enero 17, ngayong taon lamang sila muling nagkita matapos siyang anyayahan nito sa kanyang condo unit sa Taguig.
Alas-10:45 nang dumating aniya siya sa condo ni Denise na may bitbit na white wine.
Pagdating sa condo ay nagkuwentuhan sila at nag-inuman hanggang sa may mangyari pero nilinaw ni Vhong na walang sexual intercourse.
“Tito Boy, hindi naman ako kikilos kung hindi siya nagpapakita ng motibo, may nangyari nga pero walang sexual intercourse na nangyari,” ayon pa kay Vhong.
Matapos umano iyon ay umuwi na si Vhong pero bago pa man siya makauwi sa kanyang bahay ay nakatanggap siya ng text mula kay Denise na nagsasabing “Bad boy ka.”
“Hindi ko alam kung ano ang ibig niyang sabihin sa text na ‘yun, Tito Boy, bad ako dahil hindi ko itinuloy o ewan ko…kaya ang reply ko lang sa kanya ay babawi ako next time.”
Kinabukasan ay muling nakatanggap ng text message si Vhong mula kay Denise na nagsasabing pwede ba nilang pag-usapan ang nangyari na sinagot naman ng aktor na oo.
Nai-set ang pagkikita nila ng Enero 22, Miyerkules sa condo uli ng babae.
Alas-10:30 ng gabi nang dumating si Vhong sa condo ni Denise na laking gulat niya aniya dahil hindi na siya sinundo ng babae sa lobby at pinatutuloy na siya at sa elevator na lamang umano siya susunduin nito.
Pagdating sa pinto ng unit ng babae ay kinabahan umano si Vhong nang sabihin ni Denise na ginulat niya ito sa pagpunta dahil hindi pa umano ito nakapaglilinis.
Pagpasok ni Vhong sa unit ni Denise at pagkalagay ng bitbit niyang pagkain sa kusina ay nagulat siya dahil pagtalikod ni Denise ay may lalaking pumasok at agad siyang tinutukan ng baril.
Ang lalaki ay kinilala niyang si Cedrick Lee at may kasamang isa pang lalaki na kanyang kinilala lamang sa pangalang Mike.
Habang nakatutok umano ang baril sa kanya ay itinali ang kanyang mga kamay at paa, inilagay ang kanyang mukha sa sahig saka siya pinagsusuntok ni Lee.
May pumasok na rin na apat pang lalaki at dito na binusalan ang bibig ni Vhong at pinagtulungan uli siyang bugbugin.
Nang magsawa ay hinila aniya siya ng mga salarin sa kusina at hinubaran ng pantalon saka pinagsalita sa harap ng video nang “Ako si Vhong Navarro nangreyp ng kaibigan.”
Matapos nito ay dinala siya ng grupo sa police station kung saan nagpapa-blotter na si Denise.
Sa blotter ay sinabi umano ni Denise na nahuli silang nagtatalik ni Vhong sabay hingi sa kanya ng sorry.
Ayon sa pa sa Mike, pinagbabayad umano siya ng P200 thousand bilang danyos kay Denise, na binago naman ni Cedrick Lee at ginawang P500 thousand hanggang sa maging isang milyon.
Bago pinakawalan ay hiningi ni Cedrick Lee ang kanyang numero para sa kanilang transakyon.
Ang transakyon na sinasabi ng aktor ay ang pagbabayad niya ng P1 milyon na kanyang idedeposito sa ibibigay na bank account ng mga salarin.
Paglilinaw ng aktor na kung may video man na lalabas iyon ay tungkol lamang sa pagpapakita sa kanyang ari habang sinasabi ang “Ako si Vhong Navarro nangreyp ng kaibigan.”
Sa ngayon ay hiling lamang ni Vhong na magkaroon ng hustisya ang nangyari sa kanya, sabay hingi ng tawad sa kanyang non-showbiz girlfriend na nakasuporta sa kanya ngayon sa kabila ng kanyang nagawang kasalanan.
The post Hindi ako rapist – Vhong Navarro appeared first on Remate.