SISIMULAN na ang imbestigasyon sa posibleng kasong administratibo laban kay Sandiganbayan Justice Gregory Ong na idinadawit sa pork barrel queen na si Janet Napoles.
Ito ay matapos italaga ng Korte Suprema si retired associate justice Angelina Sandoval-Gutierrez bilang investigator sa kaso.
Si Gutierrez ay naatasan na magsumite ng rekomendasyon sa Kataas-taasang Hukuman kaugnay sa mga isyung kinasasangkutan ni Ong.
Walong taon nang nanungkulan sa Kataas-taasang Hukuman si Gutierrez nang italaga bilang mahistrado ni dating Pangulong Joseph Estrada noong taong 2000.
Partikular na pinaiimbestigahan ng hukuman ang ugnayan o koneksyon ni Ong sa itinuturong pork barrel scam queen na si Janet Lim-Napoles.
Iniutos ng SC ang imbestigasyon makaraang ilahad ni Benhur Luy, whistle blower sa pork barrel scam, sa Senate Blue Ribbon Committee Hearing na si Ong ay ang contact ni Napoles sa Sandiganbayan.
Matatandaan na naging kontrobersyal noong nakalipas na taon ang lumabas na larawan ni Napoles kasama si Ong at Senador Jinggoy Estrada.
Kontrobersyal ang larawan dahil si Napoles ay dating akusado sa kaso ng Kevlar Helmet na dinesisyunan ng Second Division ng Sandiganbayan noong October 28, 2010 kung saan si Ong ang umuupong chairman.
Ang Kevlar Helmet case ay maanomalyang transaksyong nagkakahalaga ng P3.8 million na pinasok ng Philippine Marines noong 1998.
Noong 2010, sinentensyahan ng Sandiganbayan ang mga military officer na lumagda sa kontrata, ang kapatid ni Napoles ay nahatulan din sa kasong falsification of public documents pero si Napoles na nagpa-encash ng tseke mula sa Marines ay naabsuwelto.
The post Imbestigasyon vs Justice Gregory Ong, sisimulan na appeared first on Remate.