PATAY ang isang lalaki nang tambangan ng mga hindi pa nakikilalang armadong “riding-in-tandem” habang naglalakad ang biktima kaninang umaga sa Parañaque City.
Dead-on-the-spot ang biktima na nakilala sa pangalang Jun Usman, naninirahan sa Muslim area sa Barangay Sto. Niño, sanhi ng mga tama ng bala sa iba’t ibang bahagi ng kanyang katawan.
Sa ulat ni SPO1 Christopher Bilangel ng Homicide Section kay Parañaque police chief Senior Supt. Ariel Andrade, naganap ang insidente alas-10:57 ng umaga kanina sa kahabaan ng Ninoy Aquino Avenue sa Barangay San Dionisio.
Naglalakad ang biktima sa naturang lugar nang biglang lapitan ng isa sa dalawang lalaking magkaangkas sa motorsiklo at pinagbabaril na naging sanhi ng agaran niyang kamatayan.
Tumanggi naman ang kaanak ng nasawi na isailalim ang bangkay ng biktima sa awtopsiya bilang paggalang sa kanilang relihiyon.
Inaalam pa ng pulisya kung ano ang motibo ng mga suspek sa ginawang pamamaslang.
The post UPDATE: Kelot patay sa riding-in-tandem sa Parañaque appeared first on Remate.