PLANO ng pamahalaang lungsod ng Maynila na ipagbawal ang “riding-in-tandem” sa nabatid na lungsod dahil na rin sa dumaraming kaso ng pamamaslang sa buong Metro Manila na kinasasangkutan ng mga magkaangkas sa isang motorsiklo.
Ayon kay Manila Mayor Joseph Estrada, pag-aaralan nila kung magiging epektibo ang pagbabawal ng riding-in-tandem sa Maynila gayundin kung sasang-ayon ang mga motorista partikular na ang mga gumagamit ng motorsiklo sa araw-araw nilang pamumuhay.
Habang hindi pa ipinatutupad ang pagbabawal ng magkaangkas sa isang motorsiklo, mahigpit na inatasan ni Estrada ang lahat ng hepe ng mga istasyon ng pulisya sa Maynila na magsagawa ng “random checkpoints” sa kanilang nasasakupang lugar upang hindi makalusot ang masasamang elemento lalo na ang mga armadong riding-in-tandem.
Nagbabala rin si Estrada sa mga riding-in-tandem na gumagawa ng karahasan dahil tiniyak nito na nakatutok ang kapulisan laban sa kanila upang masugpo ang kanilang karumal-dumal na krimen.
Samantala, hindi pa man naipatutupad ang pagbabawal ng magkaangkas sa isang motorsiklo ay marami nang “riders” ang pumipiyok sa panukala ng alkalde.
Napag-alaman na ang ilang nagmo-motor ay kailangang mag-angkas lalo na ang mga naghahatid ng kanilang asawa, anak o sinomang mahal sa buhay dahil ang pagmo-motor ang isa sa pinakamabilis na transportasyon dahil sa kakayahan nitong makalusot sa mabigat na daloy ng trapiko.
The post Riding-in-tandem ibabawal sa Maynila appeared first on Remate.