TATLO ang arestado sa isinagawang drug raid sa isang condominium sa Makati Avenue, Makati City.
Kinilala ang mga naaresto na sina Fortune Sarmiento, alias “Fort”, Edmund Macapinlac at Gio Ledesma na pawang mga Pilipino.
Ayon kay Atty. Jacquelyn de Guzman ng Philippine Drug Enforcement Agency (PDEA), nakuha sa mga naaresto ang “fly high” drug, isa sa bagong trend na droga.
“Kung maaalala niyo po noong December, nagsabi kami na may bagong trend ng drugs na kumakalat. Ito po yung ecstasy capsules na hinahaluan ng shabu at hinahaluan ng Chinese viagra.”
Hindi pa nabibilang kung gaano karami ang ecstasy.
Inaalam pa kung gawang Pinoy ang mga droga o pinuslit lamang sa bansa.
Bagama’t hindi pa kumbinsido ang ahensya kung konektado ang naarestong grupo sa drug cartel sa Mexico, sigurado naman silang kaugnay ito sa nahuling grupo noong Disyembre na pinagmulan ng droga sa mga clubs sa Makati, Taguig at Mandaluyong.
The post 3 arestado sa drug raid sa condo unit sa Makati appeared first on Remate.