ARESTADO ang isang security guard dahil sa walang habas na pagpapautok ng baril at panununtok sa umarestong pulis sa kanya sa Pandacan, Maynila, kagabi.
Nakakulong at nahaharap sa kasong indiscriminate firing, illegal possession of firearms at assault in person in authority ang suspek na si Edwin Buac, 40, ng Block 28, Lot 14-A Hipon Alley, Caloocan City.
Nauna dito, isang concerned citizen ang tumawag sa Police Community Precinct (PCP)-Beata hinggil sa pagwawala ng isang lalaki sa kahabaan ng Lorenzo de la Paz St., Pandacan, Maynila.
Nirespondehan ito nina PO1 Jonathan Bautista, PO3 Fred Martinez, PO3 Crispulo Frandoco at Sr. Insp. Brigido Salisi kung saan padating sa lugar ay naaktuhan ang suspek na nagpapaputok sa hawak niyang baril.
Gayunman, nang nakita ito ng suspek ay nagtatakbo ito dahilan para magkaroon ng habulan hanggang sa naaresto rin ang suspek.
Nadala pa ang suspek sa barangay hall at sa kabila ng nakaposas na ito ay nagawa pang suntukin si Bautista na tinamaan sa pisngi.
Nabatid na lango sa alak ang suspek at wala ring lisensiya ang hawak niya kalibre 38.
Nakakulong ngayon sa detention cell ng PCP-Beata ang suspek.
The post Lasing at nagwawalang sekyu, kalaboso appeared first on Remate.